“Mga Tinugyanan Niini nga Pagpangalagad,” kapitulo 19 sa Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018)
Kapitulo 19: “Mga Tinugyanan Niini nga Pagpangalagad”
Kapitulo 19
Mga Tinugyanan Niini nga Pagpangalagad
Samtang gibungkag ang Kampo sa Israel, usa ka grabe nga pagkatap sa kolera ang miataki sa mga sakop niini. Ang mga Santos nga himsog pa sa milabay nga pipila ka oras nangatumba, dili makalihok. Nagsige sila og suka ug misinati og grabeng kasakit sa tiyan. Napuno ang kampo sa mga paghilak sa masakiton, ug daghan nga mga lalaki ang luya kaayo aron makagwardya.
Si Nancy Holbrook ang usa sa unang nasakit. Wala madugay ang iyang bayaw nga si Eunice napareho niya, naluya sa grabe kaayo nga pamaul.1 Gigahin ni Wilford Woodruff ang hapit tibuok gabii ug ang sunod adlaw sa pag-atiman sa masakiton nga lalaki sa iyang grupo.2 Si Joseph ug ang mga elder sa kampo mihatag og mga panalangin sa masakiton, apan natakdan usab sila sa sakit wala madugay. Nasakit si Joseph paglabay sa pipila ka adlaw ug natanggong sa iyang tolda, dili sigurado kon mabuhi pa siya.3
Sa dihang ang mga tawo misugod sa pagkamatay, si Heber Kimball, Brigham Young, ug ang uban miputos og habol sa mga lawas ug gilubong kini daplin sa duol nga sapa.4
Natapos ra ang kolera paglabay sa pipila ka adlaw, nga naarang-arang na ang tanan sa sayong bahin sa Hulyo. Nianang higayuna, sobra sa saysenta ka mga Santos ang nasakit. Naulian si Joseph, ingon man si Nancy, Eunice, ug kadaghanan sa mga tawo sa kampo. Apan sobra sa usa ka dosena nga mga Santos ang namatay atol sa pagkuyanap sa sakit, lakip ni Sidney Gilbert ug Betsy Parrish, usa sa diyutay nga mga babaye sa kampo. Nagbangutan si Joseph alang sa mga biktima ug sa ilang mga pamilya. Ang katapusang tawo nga namatay mao si Jesse Smith, iyang ig-agaw.5
Hapit mamatay si Joseph, nga nagpahinumdom kon unsa ka dali nga makuha ang iyang kinabuhi gikan kaniya. Sa edad nga baynte otso anyos, mas nabalaka siya mahitungod sa pagkompleto sa iyang balaanong misyon.6 Kon mamatay siya karon, unsay mahitabo sa simbahan? Igo na ba ang kalig-on niini aron mopadayon human siya mamatay?
Nagsunod sa direksyon sa Ginoo, mihimo si Joseph og mga kausaban sa pagpangulo sa simbahan aron mabahin ang mga palas-anon sa pagdumala. Niining higayuna, si Sidney Rigdon ug Frederick Williams nagserbisyo uban kaniya diha sa kapangulohan sa simbahan. Gitakda usab niya ang Kirtland nga mahimong usa ka stake sa Zion, o opisyal nga tigumanan nga dapit alang sa mga Santos.7
Bag-ohay lang, human makadawat og panan-awon kon giunsa ni Pedro pag-organisar ang simbahan sa Ginoo sa karaang panahon, miorganisar si Joseph og high council nga dunay napulog duha ka mga high priest sa Kirtland aron sa pagtabang niya sa pagdumala sa stake ug paggiya niini kon wala siya.8
Wala madugay human nga nawala na ang kolera, dugang nga giorganisar ni Joseph ang simbahan. Nakigtagbo sa mga lider sa simbahan sa Distrito sa Clay pagka-Hulyo 1834, miorganisar siya og high council sa Missouri ug mitudlo ni David Whitmer nga modumala sa simbahan didto uban sa tabang sa duha ka mga magtatambag, si William Phelps ug si John Whitmer.9 Miadto dayon siya sa Kirtland, naghinam-hinam nga mahuman ang templo ug maangkon ang pagtuga og gahum nga makatabang sa mga Santos sa pagtubos sa Zion.
Nasayud si Joseph nga dagko nga mga problema ang nagpaabut sa unahan. Sa dihang mibiya siya sa Kirtland niana nga tingpamulak, ang bato nga mga bongbong sa templo mga upat ka pye ang gitas-on, ug ang pag-abut sa pipila ka hanas nga mga trabahante sa lungsod nakahatag kaniya og paglaum nga matuman sa mga Santos ang plano sa Ginoo alang sa Iyang balay. Apan ang mga nangawala diha ug libut sa Independence—ang buhatan sa pag-imprinta, ang tindahan, ug daghang ektarya nga mga yuta—nakadaut sa panalapi sa mga Santos. Si Joseph, Sidney, ug ubang mga lider sa simbahan grabe nga nakautang, mihulam og dagkong kantidad aron sa pagpalit og yuta alang sa templo sa Kirtland ug igasto sa Kampo sa Israel.
Tungod kay ang mga negosyo sa simbahan nahunong kadiyot o naglisud, ug walay masaligang sistema aron mangolekta og mga donasyon gikan sa mga Santos, ang simbahan dili makabayad alang sa templo. Kon si Joseph ug ang ubang mga lider malangay sa pagbayad, mahimong makuha sa ilang mga giutangan ang sagrado nga gambalay [building]. Ug kon mawala kanila ang templo, unsaon nila sa pagdawat sa pagtuga sa gahum ug pagtubos sa Zion?10
Didto sa Kirtland, si Sidney Rigdon mipaambit sa kabalaka ni Joseph mahitungod sa paghuman sa templo. “Atong buhaton ang tanang paningkamot aron mahuman kini nga gambalay [building] sa gitakda nga panahon,” iyang gisultihan ang mga Santos. “Diha niini nag-agad ang kaluwasan sa simbahan ug usab sa kalibutan.”11
Gi-monitor ni Sidney ang kalamboan sa templo samtang didto si Joseph sa Missouri. Nagkulang sa batan-ong mga lalaki aron motrabaho, si Artemus Millet, ang superintendent sa konstruksyon, migamit sa edaran nga mga lalaki ingon man usab sa mga babaye ug mga bata sa pagtrabaho sa gambalay [building]. Daghan sa mga babaye ang mibuhat sa mga trabaho nga kasagarang buhaton sa mga lalaki, mitabang sa mga mason ug mimaneho sa mga karwahe padulong ug gikan sa kubkubanan og bato aron sa paghakot og mga bato alang sa templo. Sa dihang miabut na si Joseph ug ang Kampo sa Israel balik sa Kirtland, ang mga bongbong misaka na og dugang nga pipila ka pye ibabaw sa pundasyon.
Ang pagbalik sa kampo nakapaspas sa pagtukod sa ting-init ug sa tinglarag niadtong 1834.12 Ang mga Santos mikubkob og mga bato, mihakot niini ngadto sa lote sa templo, ug mipataas sa mga bongbong sa templo matag adlaw. Mitrabaho si Joseph uban sa mga trabahante samtang nagsilsil og mga bloke sa bato gikan sa duol nga sapa. Ang uban mitrabaho sa sawmill sa simbahan nga nag-andam og mga kahoy alang sa mga sagbayan, mga kisame, ug mga salog. Ang uban mitabang sa pagpasaka og kahoy ug bato agi sa mga damba ngadto kon asa kini gikinahanglan.13
Si Emma ug ubang mga babaye, sa kasamtangan, mihimo og mga sinina alang sa mga trabahante ug mipakaon kanila. Si Vilate Kimball, asawa ni Heber, milambod og kwarentay singko kilos nga balahibo sa karnero aron mahimong hilo, gihablon kini aron mahimong panapton, ug mitahi og mga sinina alang sa mga trabahante, wala gani magtipig og bisan usa lang ka parisan nga stocking alang sa iyang kaugalingon.
Ang kadasig sa mga Santos sa pagkompleto sa templo miawhag ni Sidney, apan ang utang sa simbahan nagkadako matag adlaw, ug tungod kay mipirma siya sa iyang ngalan sa kadaghanan sa labing dagko nga mga loan, nasayud siya nga madaot ang iyang panalapi kon mapakyas ang simbahan sa pagbayad niini. Sa dihang nakita niya ang kakabus sa mga Santos ug ang mga sakripisyo nga ilang gihimo aron mahuman ang templo, nahadlok usab si Sidney nga wala silay igong kapanguhaan o determinasyon sa pagkompleto niini.
Napuno sa kabalaka, usahay mokatkat siya ibabaw sa mga bongbong sa templo ug mangamuyo sa Dios sa pagpadala sa mga Santos sa kwarta nga ilang gikinahanglan aron mahuman ang templo. Samtang nag-ampo siya, ang mga luha mitulo gikan sa iyang mga mata ngadto sa mga bato ubus sa iyang mga tiil.14
Walo ka gatus ka kilometro sa amihanang silangan sa Kirtland, ang baynte uno anyos nga si Caroline Tippets mainampingong mibutang og dakong kantidad sa kwarta diha sa mga sinina ug ubang butang nga iyang dad-on gikan sa New York ngadto sa Missouri. Siya ug ang iyang manghud nga si Harrison mobalhin ngadto sa kasadpan, naglaum nga manimuyo duol sa Distrito sa Jackson. Nakadungog sila mahitungod sa pagpanglutos sa mga Santos didto, apan gusto nilang mosunod sa sugo sa Ginoo nga magpundok ngadto sa Missouri ug mopalit og yuta sa Zion sa dili pa kini paliton sa mga kaaway sa simbahan.15
Ang sugo usa ka bahin sa pinadayag nga nadawat ni Joseph human siya mahibalo mahitungod sa pagpapahawa sa mga Santos gikan sa Zion. “Palita ang tanang yuta,” mabasa kini, “nga mahimong mapalit sa Distrito sa Jackson, ug sa palibut nga mga distrito.” Ang kwarta magagikan sa mga donasyon. “Ipapundok sa tanang simbahan ang tanan nilang kwarta,” misugo ang Ginoo, “ug himoa nga matudlo ang mga dungganan nga mga tawo, gani ang maalamon nga mga tawo, ug ipadala sila aron pagpalit niini nga mga yuta.”16
Sa dihang ang mga lider sa branch ni Caroline nahibalo mahitungod sa pinadayag, mihangyo sila sa gamayng grupo sa mga Santos sa pagpuasa ug pag-ampo alang sa tabang sa Ginoo sa pagpangolekta og kwarta aron mapalit og yuta sa Missouri. Ang ubang miyembro sa branch mihatag og dagkong donasyon sa kwarta ug kabtangan ngadto sa pundo. Ang uban mihatag og pipila ka dolyares.
Si Caroline dunay mga $250 nga iyang mabutang sa pundo. Mas dako kini nga kwarta kay sa nadonar ni bisan kinsa diha sa branch ug tingali labaw pa kay sa gilauman ni bisan kinsa nga iyang ihatag, apan nasayud siya nga makatabang kini sa mga Santos nga matubos ang gisaad nga yuta. Sa dihang iyang gidugang ang iyang donasyon ngadto sa pundo, ang sumada miabut og mga $850, usa ka dakong kantidad sa kwarta.
Pagkahuman sa miting, si Harrison ug ang iyang ig-agaw nga si John gipili nga mobiyahe ngadto sa Missouri aron sa pagpalit sa yuta. Midesider si Caroline nga mokuyog kanila ug bantayan ang iyang bahin sa donasyon. Human nga napahiluna ni John ang pipila ka buluhaton ug ang mga sakop sa pamilya miandam og grupo sa mga hayop ug karwahe alang kanila, ang tulo andam na sa pagbiya padulong sa Missouri.
Pagsaka sa karwahe, naghinam-hinam si Caroline nga magsugod og bag-ong kinabuhi sa Kasadpan. Tungod kay ang mga Tippets nagplano nga mohapit sa Kirtland, ang ilang mga lider sa branch mihatag kanila og sulat sa pagpaila ngadto sa propeta, nga nagpasabut kon asa gikan ang ilang kwarta ug unsay tuyo nila nga buhaton niini.17
Sa tibuok tinglarag sa 1834, si Joseph ug ubang mga lider sa simbahan nagkapalta-palta na sa ilang mga bayranan sa yuta sa templo, ug ang tubo sa mga utang padayon nga nagkadako. Ang ubang trabahante miboluntaryo sa ilang panahon sa pagtrabaho sa templo, nga medyo nakapagaan sa pinansyal nga problema sa simbahan. Kon ang mga pamilya adunay sobra nga kwarta o mga butang, ila kining itanyag usahay sa simbahan alang sa proyekto sa templo.18
Ang ubang tawo, diha sa sulod ug gawas sa simbahan, mipautang, mipahulam og kwarta aron mapadayon ang konstruksyon. Ang mga donasyon ug mga hulam, sa laing bahin, maoy gibayad sa mga materyal ug nagtugot sa mga tawo nga wala untay trabaho nga makatrabaho.19
Kini nga mga paningkamot padayon nga nakapataas sa mga bongbong sa templo, ug sa katapusang mga bulan sa tuig, igo na ang gitas-on niini aron makasugod ang mga panday sa pagbutang og mga busaug alang sa ibabaw nga andana. Apan ang kwarta dili kanunay nga mopaigo, ug ang mga lider sa simbahan nag-ampo kanunay alang sa dugang nga kwarta.20
Sa sayong bahin sa Disyembre, ang pamilyang Tippets miabut sa Kirtland, ug si Harrison ug John mihatag sa sulat sa ilang branch ngadto sa high council. Tungod kay hapit na ang tingtugnaw, nangutana sila sa konseho kon mopadayon ba sila ngadto sa Missouri o mogahin sa tingtugnaw diha sa Kirtland. Human sa pipila ka diskusyon, ang high council mirekomendar nga mopundo ang pamilya sa Ohio hangtud sa tingpamulak.
Desperado alang sa kwarta, mihangyo usab ang konseho sa batan-ong mga lalaki nga pahulamon og kwarta ang simbahan, misaad nga bayaran kini sa dili pa sila mobiya sa tingpamulak. Nagkauyon si Harrison ug John nga pahulamon ang simbahan og tipik sa $850 gikan sa ilang branch. Tungod kay dako nga porsyon niana nga kwarta gikan kang Caroline, ang konseho mipatambong kaniya sa miting ug mipasabut sa mga termino sa utang, nga andam niyang gidawat.
Pagkasunod adlaw, si Joseph ug Oliver nagmaya samtang nagpasalamat sila sa Ginoo alang sa pinansyal sa kahupayan nga dala sa pamilyang Tippets.21
Dugang nga mga hulam ug mga donasyon ang miabut sa simbahan niana nga tingtugnaw, apan nasayud si Joseph nga dili gihapon kini igo nga ikabayad sa nagkadako nga galastuhan sa templo. Hinoon, gipakita ni Caroline Tippets ug sa iyang pamilya nga daghang mga Santos sa lagyo nga mga branch sa simbahan ang gustong mobuhat sa ilang bahin diha sa buhat sa Ginoo. Sa pagsugod sa bag-ong tuig, nakaamgo si Joseph nga kinahanglan siyang mangita og paagi sa paglig-on niini nga mga branch ug sa pagpangayo sa ilang tabang sa paghuman sa templo aron ang mga Santos matugahan og gahum.
Ang solusyon miabut gikan sa usa ka pinadayag nga nadawat ni Joseph pipila ka tuig na ang milabay nga nagsugo ni Oliver Cowdery ug David Whitmer sa pagpangita og napulog duha ka mga apostoles aron sa pagsangyaw sa ebanghelyo ngadto sa kalibutan. Sama sa mga apostoles sa Bag-ong Tugon, kini nga mga tawo kinahanglang molihok isip espesyal nga mga saksi ni Kristo, mamunyag diha sa Iyang ngalan ug mopundok sa mga kinabig ngadto sa Zion ug sa mga branch niini.22
Isip usa ka korum, ang napulog duha ka mga apostoles kinahanglang molihok usab isip usa ka pabalhin-balhin nga high council ug mangalagad sa mga dapit nga wala malakip sa hurisdiksyon sa mga high council sa Ohio ug sa Missouri.23 Niini nga kapasidad, magiyahan nila ang misyonaryo nga buhat, madumala ang mga branch, ug makakuha og pundo alang sa Zion ug sa templo.
Usa ka Dominggo sa sayong bahin sa Pebrero, gidapit ni Joseph si Brigham ug Joseph Young sa iyang panimalay. “Gusto nako nga inyong ipahibalo sa tanang kaigsoonan nga nagpuyo sa mga branch, sulod sa resonable nga distansya gikan niini nga lugar, nga magpundok alang sa usa ka kinatibuk-ang komperensya sa sunod Sabado,” gisultihan niya ang mga brother. Niana nga komperensya, gipasabut niya, napulog duha ka mga tawo ang itudlo ngadto sa bag-ong korum.
“Ug ikaw,” miingon si Joseph ngadto ni Brigham, “usa kanila.”24
Pagkasunod semana, niadtong Pebrero 14, 1835, ang mga Santos sa Kirtland nagpundok alang sa komperensya. Ubos sa direksyon ni Joseph, si Oliver, David, ug ang ilang kaubang saksi sa Basahon ni Mormon, si Martin Harris, mipahibalo sa mga sakop sa Korum sa Napulog Duha ka mga Apostoles. Ang matag usa sa mga lalaki nga gitawag nakaserbisyo og misyon sa pagsangyaw, ug ang walo kanila nakamartsa sa Kampo sa Israel.25
Si Thomas Marsh ug David Patten, nga sobra na sa treynta anyos, mao ang kinamagulangan sa Napulog Duha. Si Thomas usa sa labing una nga mga kinabig, nga nakaangkon og pagpamatuod sa Basahon ni Mormon samtang giimprinta pa ang unang mga kopya. Si David nakaserbisyo og pipila ka misyon sa tulo ka tuig sukad sa iyang pagkakabig.26
Sama sa gisulti ni Joseph sa milabay nga semana, si Brigham gitawag usab ngadto sa korum. Ingon man ang iyang suod nga higala, si Heber Kimball. Silang duha parehong matinud-anon nga nakaserbisyo isip mga kapitan sa Kampo sa Israel. Karon biyaan na usab ni Brigham ang iyang pandayanan ug ni Heber ang iyang hulmahan og kulon aron sa pagbuhat sa sugo sa Ginoo.
Sama sa mga apostoles sa Bag-ong Tugon nga sila si Pedro ug Andres ug Santiago ug Juan, duha ka parisan nga mga lalaki ang gitawag ngadto sa Napulog Duha. Si Parley ug Orson Pratt mipakatap sa ebanghelyo ngadto sa silangan ug kasadpan ug karon mopahinungod na sa ilang kaugalingon sa pagserbisyo sa mga branch sa simbahan bisan asa. Si Luke ug Lyman Johnson misangyaw ngadto sa habagatan ug sa amihanan ug mogawas na usab, nga adunay apostolikanhong awtoridad karon.27
Parehas nga gipili sa Ginoo ang mga edukado ug wala makaeskwela. Si Orson Hyde ug William McLellin nakatudlo diha sa Tulunghaan sa mga Propeta ug gidala ang ilang hait nga salabutan diha sa korum. Bisan og baynte tres anyos pa lang, si John Boynton nagmalampuson pag-ayo isip usa ka misyonaryo ug mao lang sa mga apostoles nga nakatambong og unibersidad. Ang manghud sa propeta nga si William wala makabaton og samang pormal nga edukasyon, apan maayo kaayo siya nga mamumulong, walay kahadlok atubangan sa oposisyon, ug abtik nga manalipod sa mga nanginahanglan.28
Human matawag ang mga apostoles, gihatagan sila ni Oliver og espesyal nga sugo. “Ayaw gayud og hunong sa pagpaningkamot hangtud nga inyong makita ang Dios, nawong sa nawong,” miingon siya kanila. “Lig-ona ang inyong pagtuo; iwakli ang inyong mga pagduha-duha, inyong mga sala, ug tanan ninyong kawalay pagtuo; ug walay makapugong kaninyo sa pagduol sa Dios.”
Misaad siya kanila nga mosangyaw sila sa ebanghelyo sa lagyo nga mga nasud ug mopundok sa daghang mga anak sa Dios ngadto sa kasiguroan sa Zion.
“Kamo mga tinugyanan niini nga pagpangalagad,” mipamatuod siya. “Duna kitay buluhaton nga dili mabuhat sa ubang mga tawo. Kinahanglang ipahayag ninyo ang ebanghelyo diha sa kaligdong ug kalunsay niini, ug itugyan kamo namo sa Dios ug sa pulong sa Iyang grasya.”29
Duha ka semana human maorganisar ang Napulog Duha, miestablisar si Joseph og laing korum sa priesthood nga moapil sa mga apostoles sa pagsangyaw sa ebanghelyo, paglig-on sa mga branch, ug pagpangolekta og mga donasyon alang sa simbahan. Ang mga sakop niining bag-o nga korum, gitawag nga Korum sa Seventy, pulus mga beterano sa Kampo sa Israel. Mobiyahe sila sa lagyong dapit, nga magsunod sa ehemplo sa kapitoan nga mga disipulo sa Bag-ong Tugon nga mibiyahe nga nagtinagurha ngadto sa matag siyudad aron sa pagsangyaw sa pulong ni Jesus.30
Ang Ginoo mipili og pito ka lalaki nga mangulo sa korum, lakip ni Joseph Young ug Sylvester Smith, ang kapitan sa pundok kinsa nakig-away sa propeta panahon sa pagmartsa sa Kampo sa Israel. Uban sa tabang sa high council sa Kirtland, ang duha ka lalaki misulbad sa ilang panagbangi niana nga ting-init ug nagpasayloay sa usag usa.31
Wala madugay human sa ilang tawag, ang propeta namulong ngadto sa bag-ong mga korum. “Ang uban kaninyo nangasuko kanako tungod kay wala kamo makig-away sa Missouri,” miingon siya. “Apan sultihan ko kamo, dili gusto sa Dios nga makig-away kamo.” Hinoon, mipasabut si Joseph, ang Dios mitawag kanila ngadto sa Missouri aron sa pagsulay sa ilang kaandam sa pagsakripisyo ug pagpahinungod sa ilang kinabuhi ngadto sa Zion, ug sa pagpadako sa gahum sa ilang pagtuo.
“Dili Niya maorganisar ang Iyang gingharian nga dunay napulog duha ka mga kalalakin-an nga moabli sa pultahan sa ebanghelyo ngadto sa mga nasud sa yuta, ug kapitoan ka kalalakin-an ubos sa ilang direksyon nga magsunod sa ilang lakang,” mitudlo siya, “gawas kon kuhaon Niya sila gikan sa usa ka pundok sa kalalakin-an kinsa mihalad sa ilang kinabuhi ug mihimo og ingon ka dako nga sakripisyo sama sa gibuhat ni Abraham.”32