“Agniha Sila sa Pagpundok,” kapitulo 36 sa Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018)
Kapitulo 36: “Agniha Sila sa Pagpundok”
Kapitulo 36
Agniha Sila sa Pagpundok
Sa tingpamulak niadtong 1841, si Mary Ann Davis mitan-aw sa katapusang higayon sa nawong sa iyang bana sa wala isira ang tabon sa iyang lungon ug ang iyang mga higala midala sa iyang patayng lawas ngadto sa usa ka hilom nga lugar sa sementeryo sa nataran sa simbahan sa Tirley, England. Si John Davis batan-on pa ug lagsik, baynte singko anyos lang, sa dihang namatay siya. Samtang si Mary nagtan-aw sa mga lalaki nga miyayong sa iyang lungon palayo, kalit niyang gibati nga nag-inusara, nagtindog nga nasul-ob sa itom nga sinina sa pagbangutan sa usa ka dapit nga siya na lang ang bugtong Santos sa Ulahing mga Adlaw.
Namatay si John tungod sa iyang mga pagtuo. Siya ug si Mary nagkita sa usa ka miting sa mga Santos usa ka tuig sa sayo pa, dili pa dugay human si Wilford Woodruff mibunyag og gatusan sa United Brethren sa duol nga Herefordshire. Wala si John og si misimba uban sa United Brethren, apan ang gipahiuli nga ebanghelyo dali nga mikatap sa dapit, nakadani sa atensyon sa daghang mga tawo.1
Sila si Mary ug John miabli sa ilang panimalay ngadto sa mga misyonaryo naglaum nga makaestablisar og kongregasyon sa maong dapit. Ang British mission nagkadako ug nagkadako, ug human lang sa upat ka tuig, dihay labaw sa unom ka libo ka mga Santos sa England ug Scotland.2 Bisan sa London, diin ang mga tigsangyaw diha sa dalan gikan sa daghang mga simbahan maisugong nakigkompetensya alang mga tawo, ang mga misyonaryo nakaestablisar og branch sa halos mga kwarenta ka mga Santos, gigiyahan sa usa ka batan-on nga elder nga Amerikano nga ginganlan og Lorenzo Snow.3
Ang oposisyon nagpabilin gihapon ka kusog sa tibuok nasud. Baratuhon nga mga pamplet nagkatag sa kadalanan sa daghang mga siyudad, namahayag sa matag matang sa relihiyosong mga ideya.4 Ang uban mga giimprinta pag-usab nga anti-Mormon nga mga basahon gikan sa Estados Unidos ug mipasidaan sa mga magbabasa batok sa mga Santos sa Ulahing mga Adlaw.5
Naglaum nga makorihian ang bakak nga mga report, si Parley Pratt nagsugod sa pagsulat sa iyang kaugalingong mga pamplets ug nag-edit sa binulan nga pamantalaan, ang Latter-day Saints’ Millennial Star, nga nag-imprinta sa mga balita gikan sa mga Santos sa Nauvoo ug sa tibuok Britain. Si Brigham Young usab nagplano nga maghimo og himno ug ang Basahon ni Mormon nga maimprinta alang sa British nga mga Santos.6
Didto sa Tirley, sila si Mary ug John nag-atubang og pagsupak sa dihang ang mga misyonaryo nagsugod sa pagtudlo sa ilang panimalay. Ang bagis nga mga lalaki kasagaran mosamok-samok sa mga miting ug papahawaon ang mga misyonaryo. Migrabe ang sitwasyon hangtud usa ka adlaw niana, ang mga lalaki milamba ni John sa salog ug walay kalooy nga mipatid kaniya. Wala na siya maulii. Sa wala madugay natumba siya ug nagsugod og pagsuka og dugo. Ang mga misyonaryo misulay sa pagbisita sa magtiayon, apan ang masuk-anong mga silingan mibabag kanila. Naghigda na lang, si John nagkaluya hangtud nga namatay.
Human sa haya, si Mary nakahukom nga moapil sa panagpundok didto sa Nauvoo. Pipila ka mga apostoles, lakip ni Brigham Young ug Heber Kimball, bag-o lang mipahibalo nga sila mopauli nianang tingpamulak, uban nila ang daghang British nga mga Santos. Si Mary nagplano nga moadto sa Amihanang Amerika sa dili madugay uban sa gamay nga pundok sa mga Santos.
Tungod kay siya lamang ang bugtong sakop sa iyang pamilya sa simbahan, si Mary mibisita sa iyang mga ginikanan ug mga igsoon aron manamilit. Nagdahum siya nga ang iyang amahan moprotesta, apan yano kining nangutana kaniya kanus-a siya molarga ug unsa nga barko ang sakyan.
Sa adlaw nga si Mary mobiya padulong sa lungsod sa Bristol, gibati niya ang tumang kaguol. Milabay sa simbahan diin siya ug si John gikasal pipila ka buwan sa sayo pa, naghunahuna siya sa tanan nga nahitabo kaniya sukad.
Karon nga bayntekwatro anyos nga biyuda, nag-inusara siya nga moadto sa bag-ong yuta, determinado nga adunay samang kapalaran sa katawhan sa Dios.7
Balik sa Nauvoo, ang editor sa pamantalaan nga si Thomas Sharp milingkod tupad ni Joseph Smith sa entablado ug mitan-aw sa pundok sa pipila ka libo ka mga Santos. Abril 6, 1841 kadto, ang ika-onse nga anibersaryo sa simbahan ug ang unang adlaw sa kinatibuk-ang komperensya. Usa ka brass band nagpatukar taliwala sa panag-istoryahanay sa kongregasyon. Sa pipila ka gutlo, ang mga Santos magsaulog sa importante nga adlaw pinaagi sa pagpahimutang sa mga cornerstone sa usa ka bag-ong templo.
Si Thomas dili sakop sa ilang simbahan, apan ang mayor sa Nauvoo, si John Bennett, midapit kaniya sa paggahin sa adlaw uban sa mga Santos.8 Dili lisud ang pagtag-an ngano. Isip usa ka editor sa pamantalaan, si Thomas makahimo o makaguba og reputasyon sa pipila lang ka pulong, ug siya gidala ngadto sa Nauvoo isip potensyal nga kauban.
Sama sa mga Santos, si Thomas bag-o sa rehiyon. Wala pay bayntetres anyos, miadto siya sa kasadpan sa miaging tuig aron motrabaho sa pagkaabogado ug mipuyo sa siyudad sa Warsaw, mga usa ka adlaw nga biyahe sa habagatan sa Nauvoo. Pipila ka bulan human sa iyang pag-abut, nahimo siyang editor sa bugtong dili Mormon nga pamantalaan sa lalawigan ug nakaangkon og reputasyon sa iyang madanihon nga sinulat.9
Wala siyay pagpakabana sa mga pagtulun-an sa mga Santos ug wala kaayo madani sa ilang debosyon sa ilang pagtuo.10 Apan kinahanglang dawaton niya nga ang mga panghitabo karon talagsaon.
Ang adlaw gisugdan sa lanog kaayo nga gipabuto nga mga kanyon gisundan sa parada sa kasundalohan sa siyudad, nga gitawag og Nauvoo Legion, nga gilangkuban sa 650 ka mga lalaki. Sila si Joseph Smith ug John Bennett, nagsinina og maayong pagkautaw nga asul nga amerikana ug buwagaw nga dayan-dayan sa abaga sa mga opisyal sa militar, mimartsa sa Legion agi sa lungsod ug ngadto sa tip-tip sa bungtod sa bag-ong gikalot nga pundasyon sa templo. Tungod sa pagtahud, ang mga Santos mibutang ni Thomas duol sa ulohan sa prosesyon, dili layo gikan ni Joseph ug sa iyang mga sundalo nga bantay.11
Gisugdan ni Sidney Rigdon ang seremonya sa cornerstone pinaagi sa makadasig nga usa ka oras nga pakigpulong mahitungod sa bag-ong mga kalisdanan ug sa ilang mga paningkamot sa pagtukod og mga templo. Pagkahuman sa pakigpulong, mibarug si Joseph ug misugo sa mga trabahante sa pagpaubos sa dakong bato sa habagatang silangan nga bahin sa pundasyon.
“Kining unang cornerstone, sa pagrepresentar sa Unang Kapangulohan, karon napahimutang na agig pasidungog sa halangdong Dios,” mipahibalo siya, “aron ang mga Santos adunay dapit sa pagsimba sa Dios, ug ang Anak sa Tawo adunay dapit nga kapahulayan sa iyang ulo.”12
Human sa sagrado nga selebrasyon, si Joseph midapit ni Thomas ug sa ubang pinasidunggang mga dinapit ngadto sa iyang panimalay alang sa panihapon nga pabo. Gusto siya nga makahibalo sila nga welcome sila sa Nauvoo. Kon dili sila moapil sa iyang pagtuo, nanghinaut siya nga bisan dawaton lang nila ang iyang pagkamaabi-abihon.13
Nalipay si Joseph nga nakahibalo nga si Thomas miimprinta og maayo nga istorya sa seremonyas sa cornerstone sa iyang pamantalaan pagkasunod adlaw. Sa unang higayon sukad sa organisasyon sa simbahan, ingon og ang mga Santos nakaangkon og mga simpatiya sa ilang mga silingan, suporta sa gobyerno, ug mga higala sa importante nga mga dapit.14
Bisan og gidawat ni Joseph ang panahon sa panaghigalaay ug kalinaw sa Nauvoo, bisan pa niana, nasayud siya nga ang Ginoo nagpaabut kaniya nga mosunod sa Iyang tanang mga sugo, bisan kon ang pagbuhat sa ingon mosulay sa pagtuo sa mga Santos. Ug walay laing sugo nga mas dako nga pagsulay kay sa dinaghan nga kaminyoon.15
Nasabtan ni Joseph pinaagi sa pagpadayag nga ang kaminyoon ug pamilya mao ang sentro sa plano sa Dios. Ang Ginoo mipadala ni Elijah ang propeta ngadto sa templo sa Kirtland aron sa pagpahiuli sa mga yawe sa priesthood nga mobugkos sa mga henerasyon sama sa sumpay sa usa ka kadena. Ubos sa direksyon sa Ginoo, nagsugod si Joseph sa pagtudlo sa mga Santos nga ang mga bana ug mga asawa mahimong mabugkos alang karon ug sa kahangturan, mahimong mga manununod sa mga panalangin ni Abraham ug nagtuman sa mahangturong plano sa Dios alang sa Iyang mga anak.16
Si propeta Jacob sa Basahon ni Mormon mitudlo nga walay tawo “gawas sa usa ka asawa,” gawas kon ang Dios misugo niini.17 Sama sa gipakita sa istorya ni Abraham ug Sarah, usahay ang Dios mosugo sa matinud-anong mga sumusunod sa pag-apil sa dinaghan nga kaminyoon isip paagi sa pagpaabut niini nga mga panalangin ngadto sa daghang mga indibidwal ug mopasanay og katawhan sa pakigsaad ngadto sa Ginoo. Bisan sa mga pagsulay nga gikahatag niini, ang kaminyoon ni Abraham ngadto sa iyang laing asawa nga si Hagar nakahimo og dakong nasud. Ang dinaghan nga kaminyoon sa laing paagi mosulay sa mga Santos kinsa naghimo niini, apan ang Ginoo misaad sa paghimaya kanila tungod sa ilang pagkamasulundon ug sakripisyo.18
Ang mga tuig human sa pagbiya ni Joseph gikan sa Kirtland usa ka malisud nga panahon, ug wala niya itudlo sa mga Santos ang dinaghan nga kaminyoon kaniadto. Apan ang sitwasyon lahi sa Nauvoo, diin ang mga Santos sa katapusan nakakaplag og kaluwasan ug kalig-on.
Si Joseph adunay pagsalig usab sa Batakang Balaod sa Estados Unidos, nga nanalipod sa gawasnong pagsunod sa relihiyon. Sayo nianang tuiga, ang Nauvoo City Council mikumpirmar niini nga katungod sa dihang mipasar kini og ordinansa nga ang tanang relihiyoso nga mga grupo gitugutan nga gawasnong mosimba sa Nauvoo. Ang balaod gipaabot ngadto sa mga Kristiyano ug dili mga Kristiyano. Bisan og walay usa nga nagsunod sa Islam, ang ordinansa piho nga nanalipod sa mga Muslim, kinsa usahay adunay daghang mga asawa.19 Bisan og ang mga politiko mihigawad kaniya sa ulohan sa nasud, si Joseph mituo ug misalig sa natukod nga mga baruganan sa republika sa Amerika sa pagpanalipod sa iyang katungod sa pagsunod sumala sa kabubut-on sa Dios.20
Sa gihapon, nasayud siya nga ang paghimo sa dinaghan nga kaminyoon makapakugang sa mga tawo, ug siya nagpabilin nga nagduha-duha sa pagtudlo niini sa dayag. Samtang ang ubang relihiyoso ug mahandurawon nga mga komunidad sa kasagaran mosunod og laing matang sa kaminyoon, ang mga Santos nagsangyaw kanunay og tagsa ray asawa. Kadaghanan sa mga Santos—sama sa kadaghanan sa mga Amerikano—milambigit sa daghan og asawa sa mga katilingban nga ilang gikonsiderar nga dili kaayo sibilisado kay kanila.
Si Joseph mismo walay gibilin nga rekord sa iyang kaugalingong pagpasabut sa dinaghan nga kaminyoon o sa iyang pakigbisog sa pagsunod sa sugo. Si Emma usab walay gisulti mahitungod kon kanus-a siya nakahibalo sa praktis o unsay epekto niini sa iyang kaminyoon. Bisan pa niana, ang mga sinulat sa uban nga ilang mga suod, nakapaklaro nga kini usa ka tinubdan sa pag-antus nilang duha.
Apan gibati ni Joseph ang pagkadinalian sa pagtudlo niini ngadto sa mga Santos, bisan sa mga risgo ug sa iyang kaugalingong mga pagduha-duha. Kon iyang itudlo ang baruganan sa pribado ngadto sa matinud-anong mga lalaki ug babaye, makakuha siya og lig-ong suporta niini, pagpangandam sa panahon nga itudlo kini sa dayag. Sa pagdawat sa dinaghan nga kaminyoon, ang mga tawo kinahanglang mobuntog sa ilang mga pagduda, ikonsiderar pag-usab ang sosyal nga mga kustombre, ug magpakita og dakong pagtuo sa pagsunod sa Dios kon Siya mosugo og butang nga lahi kaayo sa ilang mga tradisyon.21
Sa tinglarag niadtong 1840, si Joseph nagsugod sa pagpakigsulti sa bayntesingko anyos nga si Louisa Beaman mahitungod sa praktis. Ang pamilya ni Louisa usa sa unang mituo sa Basahon ni Mormon ug midawat sa gipahiuli nga ebanghelyo. Human mamatay ang iyang mga ginikanan, mibalhin siya uban sa iyang magulang nga igsoong babaye nga si Mary ug sa bana sa iyang igsoon, si Bates Noble, usa ka beterano sa Kampo sa Israel.22
Diha si Bates atol sa paghisgot ni Joseph ni Louisa mahitungod sa dinaghan nga kaminyoon.23 “Sa pagpadayag niini nganha nimo, akong gisalig ang akong kinabuhi sa imong mga kamot,” gisultihan ni Joseph si Bates. “Sa takna sa dautan ayaw ako luibi ngadto sa akong mga kaaway.”24
Sa wala madugay, si Joseph mitanyag og kaminyoon ngadto ni Louisa. Wala siyay gibilin nga rekord kon unsay iyang reaksyon sa tanyag, o kanus-a o ngano nga iyang gidawat kini. Apan sa gabii niadtong Abril 5, 1841, ang adlaw sa wala pa ang kinatibuk-ang komperensya, nag-abut si Joseph ug Louisa ug si Bates alang sa seremonya. Gitugutan ni Joseph, gibugkos ni Bates silang duha, misubli sa mga pulong sa ordinansa samtang si Joseph namulong ngadto kaniya.25
Nianang pagkating-init, ang mga Santos nalipay nga si John Bennett gitudlo ngadto sa usa ka importante nga katungdanan sa sistema sa korte sa distrito. Apan ang uban sa distrito nasuko, nahadlok sa nagtubo nga politikanhong gahum sa mga Santos. Ilang nakita ang pagkatudlo ni John nga usa ka pagsulay sa karibal nga mga politiko nga makuha ang boto sa mga Santos.26
Si Thomas Sharp, kinsa sakop sa karibal nga pundok, dayag nga mikwestyon sa kwalipikasyon ni John alang sa katungdanan, sa iyang reputasyon, ug sa sinseridad sa iyang bag-ong bunyag. Sa usa ka editoryal sa pamantalaan, iyang giawhag ang mga lumulupyo sa pagsupak sa pagkatudlo.27
Gipalabihan usab ni Thomas ang mga report sa walay pagkatagbaw sa gatusan sa British nga mga Santos nga nagpundok sa dapit. “Giingon nga daghan ang determinado nga mobiya,” mi-report siya, “ug nga ang mga sulat gipadala ngadto sa England, nagpasidaan sa ilang mga higala, kinsa nagplano nga molalin, sa subo nga kahimtang sa Siyudad sa Simbahan.” Ang hinungdan niining diskontento, miingon siya, mao ang kakulang sa pagtuo sa misyon sa propeta.28
Gibati og tumang kasuko nga nagbasa sa editoryal, gidiktar ni Joseph ang usa ka sulat ug gipadala kini ngadto ni Thomas, nagkanselar sa iyang subscription:
Sir—Dili na nako ipadayon ang akong subscription—ang mga sulod niini gihimo aron sa pagdaot kanako, ug sa akong pagbayad sa subscription sa hugaw nga pamantalaan—kana nga papel sa mga bakak—kana mao ang dakong tinubdan sa kadautan—makauulaw ngadto ni bisan kinsa nga moral nga tawo.
Kanimo, uban sa tumang pagtamay,
Joseph Smith
P.S. Palihug imantala ang gisulat sa ibabaw sa imong dili angayan nga tahuron nga pamantalaan.29
Nasuko sa sulat, giimprinta kini ni Thomas sa sunod nga isyu uban sa mahait nga komentaryo mahitungod sa mapanagnaong tawag ni Joseph. Ang pipila ka tawo miakusar ni Thomas nga migamit sa iyang pamantalaan aron pag-ulog-ulog sa mga Santos.30 Gusto siya karon nga ang iyang mga magbabasa masayud nga iyang nakita nga ang mga Santos nagtubo nga politikanhong hulga sa mga katungod sa ubang mga lumulupyo sa distrito.
Isip ebidensya, si Thomas miprinta pag-usab sa pamahayag ni Joseph nga bag-o lang gimantala nga nagtawag sa mga Santos bisan asa sa pagpundok ug pagtukod sa Nauvoo. “Kon ang iyang kabubut-on mao ang ilang balaod,” mipasidaan si Thomas sa iyang mga magbabasa, “unsay mahitabo—sa pagkatinuod, unsay dangatan—sa inyong gimahal nga mga katungod ug labing bililhon nga mga pribilehiyo?”31
Samtang nagkakritikal si Thomas, nabalaka si Joseph nga iyang maagni ang uban sa distrito batok sa mga Santos.32 Uban ang mga cornerstone sa templo nga napahimutang ug ang mga imigrante nga gikan sa Britain nga nagsingabot puno nga nanakay sa barko, daghan kaayo ang namiligro. Kinahanglang dili mawala sa mga Santos ang Nauvoo sama sa Independence ug Far West nga nawala gikan kanila.
Ang mga barko nga nanglarga dagko ug gagmay naghuot sa nagkapuliki nga dunggoanan sa Pantalan sa Bristol sa habagatang kasadpang England.33 Misakay sa barko nga modala niya ngadto sa Amihanang Amerika, nakita ni Mary Ann Davis ang iyang higdaanan nga limpyo ug walay mga pulgas. Siya ug ang ubang mga pasahero gitugutan lang og usa ka kaban tupad sa ilang higdaanan samtang ang uban nilang mga butang gibutang sa tipiganan sa barko.
Nagpabilin si Mary sa Bristol og usa ka semana samtang ang barko giandam. Aron mas pribado, siya ug ang ubang mga pasahero mibitay og mga kurtina taliwala sa ilang mga higdaanan, nagbahin-bahin sa dakong kwarto ngadto sa gagmay nga mga kwarto-kwarto. Nanuroy usab sila sa gagmay nga mga dalan, nanan-aw sa mga talan-awon ug sa kaalimyon sa siyudad.
Nagdahum si Mary nga ang iyang mga ginikanan moabut bisan unsang adlawa aron mopalarga niya. Nganong gusto man ang iyang amahan nga makahibalo sa ngalan sa iyang barko ug asa dapit mogikan?
Apan ang iyang mga ginikanan wala moabut. Hinoon, mga abogado—nga gisuhulan sa iyang amahan sa pagpugos niya nga dili mobiya—nagsugod sa pagbisita sa barko kada adlaw, nangita sa usa ka biyuda nga dunay itom nga mga mata ug itom nga sinina. Nahigawad, apan determinado nga moadto sa Zion, gihipos ni Mary ang iyang mga sinina sa pagbangutan ug nagsugod sa pagsinina sama sa ubang mga batan-ong babaye nga sakay sa barko.
Ang barko sa wala madugay milarga padulong sa Canada. Sa dihang midunggo kini paglabay sa duha ka bulan, si Mary ug ang iyang grupo mibiyahe padulong sa habagatan sakay sa steamship, tren, ug canal boat hangtud miabut sila sa dunggoanan duol sa Kirtland. Madasigon nga ikauban ang mga Santos, si Mary ug ang iyang mga higala miadto sa lungsod, diin ilang nakita si William Phelps nga naggiya sa usa ka gamay nga branch sa simbahan.34
Ang Kirtland makita nga mao gihapon kini kaniadto. Sa mga Dominggo, si William nagmiting sa templo, sa kasagaran siya ra ang maglingkod sa pulpito. Gikan sa iyang gilingkuran sa kongregasyon, si Mary naghunahuna nga ang templo morag og wala nay tagad.
Paglabay sa pipila ka semana, laing grupo sa British nga mga Santos ang miabut sa Kirtland. Usa ka miyembro sa grupo, si Peter Maughan, nagplano nga mopadayon, mosakay og steamship tabok sa Dakong mga Suba padulong sa Chicago ug dayon mobiyahe padulong sa Nauvoo. Gusto nga mahuman na ang ilang biyahe, si Mary ug ang ubang pipila ka mga Santos miapil kaniya ug sa iyang unom ka gagmayng mga anak.35
Sa pagpadulong sa Nauvoo, si Mary ug si Peter nagkasuod. Si Peter usa ka biyudo kinsa nagtrabaho sa mina sa tingga sa amihanang kasadpang England. Ang iyang asawa, nga si Ruth, namatay sa pagpanganak sa wala pa ang pamilya magplano nga molalin. Si Peter mikonsiderar nga magpabilin sa England, apan si Brigham Young mikombinser niya nga moadto sa Nauvoo.36
Sa dihang si Mary miabut sa Nauvoo, iyang gisiksik ang siyudad nangita og mga higala gikan sa England. Naglakaw-lakaw sa kadalanan, nakakita siya og tawo nga nagsangyaw ibabaw sa usa ka baril ug mihunong aron maminaw. Ang tigsangyaw usa ka malipayon nga tawo, ug ang iyang pagkayano ug pagkamatinuoron nakapadani sa gamay nga pundok. Matag karon ug unya mosandig ug mobutang sa iyang mga kamot sa mga abaga sa usa ka taas nga tawo sa iyang atubangan, ingon og nagsandig siya sa usa ka lingkuranan.
Diha-diha si Mary nakaila nga siya mao si Joseph Smith. Human sa lima ka bulan nga pagbiyahe, siya sa katapusan nagbarug taliwala sa mga Santos sa presensya sa propeta sa Dios.37
Sa kasamtangan, sa pikas bahin sa kalibutan, si Orson Hyde natandog samtang siya nagtan-aw sa unang higayon sa Jerusalem. Ang karaang siyudad anaa sa ibabaw sa bungtod sa mga walog ug gilibutan sa baga nga mga paril. Samtang nagpadulong siya sa kasadpan nga ganghaan sa siyudad, gikapoy sa iyang mga biyahe, si Orson mipasiplat sa mga paril ug sa mga tore nga nagbarug sa likod niini.38
Nagdahum si Orson nga mosulod sa Jerusalem uban ni John Page, apan si John mipauli sa wala pa moabut sa Estados Unidos. Mipadayon nga nag-inusara, si Orson mibiyahe agi sa England ug sa tibuok Europe, miagi sa pipila sa dagkong mga siyudad sa kontinente. Dayon mipaingon siya sa habagatang silangan ngadto sa Constantinople ug misakay og steamship ngadto sa kabayabayunan sa Jaffa, diin siya nakigsabut nga mobiyahe ngadto sa Jerusalem uban sa grupo sa mga English nga mga lalaki ug sa ilang armado nga mga sulugoon.
Sa mosunod nga pipila ka adlaw, si Orson misuroy sa abugon, libaungon nga mga dalan sa Jerusalem ug nahimamat ang relihiyoso ug sibil nga mga lider sa siyudad. Mga napulo ka libo ka mga tawo, kadaghanan Arabic ang sinultihan, nagpuyo sa Jerusalem. Dili maayo ang kondisyon sa siyudad, dunay mga bahin nga nangabungkag human sa daghang mga tuig sa panagbangi ug walay pagtagad.
Bisan pa, sa pagbisita ni Orson sa mga dapit nga iyang nabasa sa Biblia, nakadayeg siya sa siyudad ug sa sagrado nga kasaysayan niini. Sa dihang iyang nakita ang mga tawo nga naghimo sa inadlaw-adlaw nga mga buluhaton nga gihulagway sa mga sambingay sa Manluluwas, iyang gihanduraw ang iyang kaugalingon nga mibalik ngadto sa panahon ni Jesus. Sa Getsemani, miputol siya og sanga gikan sa kahoy nga oliba ug namalandong sa Pag-ula.39
Niadtong Oktubre 24, 1841, si Orson mimata sa wala pa ang kaadlawon ug milakaw paingon sa bakilid duol sa gilaktan ni Jesus sa gabii sa wala pa ang Iyang paglansang. Mikatkat sa Bukid sa Olibo, si Orson milingi sa walog sa Jerusalem ug nakita ang talagsaong Dome of the Rock, nga nagtuybo duol sa dapit diin nagbarug ang templo sa panahon sa Manluluwas.40
Nakahibalo nga ang Ginoo misaad nga ang pipila sa kaliwatan ni Abraham magpundok ngadto sa Jerusalem sa dili pa ang Ikaduhang Pag-anhi, ang apostol milingkod ug misulat og pag-ampo, mihangyo sa Dios sa paggiya sa nagkatibulaag nga mga salin ngadto sa ilang gisaad nga yuta.41
“Dasiga sila nga magpundok niini nga yuta sumala sa imong pulong,” nag-ampo si Orson. “Paanhia sila sama sa mga panganud ug sama sa mga salampati sa ilang mga bintana.”
Sa dihang nahuman na siya sa iyang pag-ampo, si Orson mipatong-patong og mga bato sa dapit ug milakaw pag-usab tabok sa walog aron mopatong-patong og dugang mga bato sa Bukid sa Zion isip usa ka yanong monumento sa pagkakompleto sa iyang misyon. Dayon gisugdan niya ang taas nga biyahe pauli.42