“Igo na ang Gidugayon sa Pagsulay,” kapitulo 28 sa Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018)
Kapitulo 28: “Igo na ang Gidugayon sa Pagsulay”
Kapitulo 28
Igo na ang Gidugayon sa Pagsulay
Agosto 6, 1838, Adlaw sa Piniliay sa Missouri. Nianang buntaga, si John Butler miadto sa lungsod sa Gallatin, ang pwesto sa panggobyerno sa Distrito sa Daviess, aron sa pagbotar.1
Si John nahimong Santos sa Ulahing mga Adlaw sulod na sa pipila ka tuig. Siya ug ang iyang asawa, si Caroline, mibalhin ngadto sa usa ka gamayng pinuy-anan duol sa Adam-ondi-Ahman nianang ting-init. Usa siya ka kanhi kapitan sa lokal nga militia ug usa ka Danite.2
Natukod sa milabayng tuig, ang Gallatin labaw lang og gamay sa pundok sa mga balay ug saloon. Pag-abut ni John sa plaza sa lungsod, iyang naabtan nga napuno kini sa mga kalalakin-an gikan sa tibuok distrito. Gipahimutang ang usa ka presinto sa pagbotar diha sa usa ka gamayng balay diha daplin sa plaza.3 Samtang naglinya ang mga tawo sa pagbotar, ang mga nangampanya mitipon sa mga tawo sa gawas.4
Miapil si John sa usa ka gamayng grupo sa mga Santos nga nanagbarug nga nabuwag sa dakong grupo. Ang mga kinaiya sa Distrito sa Davies wala gayud mipabor sa mga Santos. Human maestablisar ni Joseph ang usa ka stake sa Adam-ondi-Ahman, milambo ang pinuy-anan ug sobra sa duha ka gatus ka mga balay ang natukod. Ang mga Santos karon makaimpluwensya sa distrito sa pagbotar, ug kana nakapasuko sa daghang mga nanimuyo. Aron malikayan ang problema, si John ug ang iyang mga higala nagplano nga magdungan sa pagbotar ug mamauli dayon.5
Sa pagduol ni John sa dapit nga botaranan, si William Peniston, usa ka kandidato alang sa representante sa estado, mikatkat ibabaw sa baril sa whiskey aron mamulong. Si William naningkamot nga maangkon ang mga boto sa mga Santos sayo niana nga tuig, apan sa dihang nahibaloan niya nga ang kadaghanan nila mipabor sa laing kandidato, giatake niya sila sa pagsaway.
“Ang mga lider sa Mormon mga pundok sa mga kawatan og kabayo, mga bakakon, ug mga mangingilad,” gisinggitan ni William kadtong mga kalalakin-an nga nagpundok sa duol. Si John wala mahimutang. Dili lisud alang kang William sa pag-awhag sa daghang tawo batok kaniya ug sa iyang mga higala. Kadaghanan sa mga lalaki nasuko na daan nila, ug daghan nang nag-inom og whiskey sukad gisugdan ang piniliay.
Si William mipasidaan sa mga botante nga ang mga Santos mangawat sa ilang mga kabtangan ug ilang palabwan ang mga boto.6 Wala sila nahisakop sa distrito, miingon siya, ug walay katungod sa pag-apil sa mga piniliay. “Nangulo ko sa manggugubot nga panon sa pagpalayas ninyo sa Distrito sa Clay,” nanghambog siya, miatubang ngadto ni John ug sa ubang mga Santos, “ug dili mopugong sa paggukod kaninyo karon”.7
Dugang pang mga whiskey ang gipanghatag sa mga katawhan. Nadungog ni John ang pipila ka mga tawo nga mibalikas sa mga Santos. Misugod siya sa pagpalayo. Kapin sa unom ka pye ang iyang gitas-on ug baskog ang pamayhon, apan miadto siya sa Gallatin aron mobotar, dili makig-away.8
Sa kalit lang, usa ka tawo diha sa pundok ang misulay sa pagsumbag sa usa sa mga Santos sa Ulahing mga Adlaw. Laing Santos milayat aron modepensa niya, apan ang pundok sa katawhan mitukmod og balik kaniya. Ang ikatulo nga Santos mikuha og piraso sa kahoy gikan sa nagtumpi nga kahoy ug gihampak diha sa ulo sa mihasmag. Ang tawo natumba duol sa tiilan ni John. Ang kalalakin-an sa isig ka habig mikuha ug mga bunal ug milanit sa mga punyal (knives) ug mga latigo.9
Nalabwan ang gidaghanon sa mga Santos upat batok sa usa, apan si John determinado sa pagpanalipod sa iyang isig ka Santos ug sa ilang mga lider. Nakasigpat og pundok sa mga pasomanos (rail) sa kural, mikuha siya og baga nga piraso sa oak ug midagan ngadto sa away. “O, kamong mga Danite,” misinggit siya, “ania ang usa ka trabaho alang kanato!”
Iyang gibunal-bunalan ang mga kalalakin-an nga miatake sa mga Santos, gibana-bana ang kada hapos nga igo lang malup-og ang iyang mga kontra, nga dili mamatay. Ang iyang mga higala misukol usab, naggamit og mga hinagiban nga gikan sa mga kahoy ug bato. Ilang gipatumba ang si bisan kinsa nga mohasmag kanila, gitapos ang pakig-away human sa duha ka minutos.10
Naghangos sa pagginhawa, mitan-aw si John sa tibuok town square. Ang mga samaran nga kalalakin-an naghigda nga wala na maglihok diha sa yuta. Ang uban nakaikyas. Si William Peniston miambak sa barel sa whiskey ug milayas ngadto sa usa ka duol nga bungtod.
Usa ka tawo gikan sa pundok sa katawhan miduol ni John ug miingon nga ang mga Santos makabotar na karon. “Ibutang ang inyong mga kahoy,” miingon siya. “Wala nay kapuslanan kini.”11
Gigunitan ni John og maayo ang pasomanos sa koral. Gusto siyang mobotar, apan nakahibalo siya nga matanggong siya kon mosulod siya sa gamay nga balay ug mosulay sa pagbotar nga walay hinagiban. Hinoon, mibalik siya ug misugod sa pagpalayo.
“Kinahanglan himoon ka namo nga binilanggo,” may laing tawo nga misinggit. Miingon siya nga ang pipila sa mga kalalakin-an nga nabunalan ni John tingali namatay.
“Ako usa ka tawo nga masulundon sa balaod,” miingon si John, “apan dili ko gusto nga pagahusayon sa usa ka manggugubot nga panon.” Misakay siya sa iyang kabayo ug mibiya sa lungsod.12
Pagkasunod adlaw, si John miadto sa Far West ug misulti ni Joseph mahitungod sa away. Ang mga report sa mga namatay sa Gallatin dali kaayong mikatap sa amihanang Missouri, ug ang mga manggugubot nga panon nangandam sa pag-atake sa mga Santos. Nahadlok nga si John ang mahimong puntariya sa pagpanimalos, gipangutana siya ni Joseph kon iya na bang gibalhin ang iyang pamilya gawas sa Distrito sa Daviess.
“Wala,” Miingon si John.
“Lakaw dayon ug ibalhin sila,” miingon si Joseph niya, “ug ayaw na pagkatulog og usa pa ka gabii didto.”
“Apan dili ko gustong magtinalawan,” tubag ni John.
“Lakaw ug buhata sama sa akong gisulti nimo,” miingon si Joseph.13
Mibiya dayon si John aron mopauli, ug sa wala madugay si Joseph mibiyahe kuyog ang usa ka grupo sa armadong mga boluntaryo sa pagpanalipod sa mga Santos didto sa Distrito sa Daviess. Sa ilang pag-abut sa Adam-ondi-Ahman, ilang nahibaloan nga walay usa sa isig ka habig sa panag-away sa Gallatin ang namatay. Nahuwasan, si Joseph ug ang iyang kaubanan miistar og usa ka gabii uban ni Lyman Wight.
Pagkasunod buntag, si Lyman ug ang armadong pundok sa mga Santos mipadulong sa panimalay ni Adam Black, ang lokal nga huwes sa kalinaw. Sumala pa sa mga hugon-hugon nga si Adam ang nagpundok sa mga manggugubot nga panon sa paggukod sa mga Santos. Gusto ni Lyman nga mopirma siya og usa ka pamahayag nga mogarantiya og patas nga pagtratar sa mga Santos sa Distrito sa Daviess, apan mibalibad si Adam.
Sa kaulahian nianang adlawa, si Joseph ug ang kapin sa usa ka gatos ka mga Santos namalik ngadto sa payag ni Adam. Si Sampson Avard, usa ka lider sa mga Danite sa Far West, midala sa iyang tulo ka mga tawo ngadto sa balay ug misulay sa pagpwersa sa huwes sa kalinaw sa pagpirma sa pamahayag. Si Adam mibalibad na usab, mibungat sa pagpakigkita kang Joseph. Nianang higayuna ang propeta miapil sa negosasyon ug nakighusay sa nahitabo sa malinawon nga paagi, miuyon nga tugutan ang huwes sa pagsulat ug mopirma sa iyang kaugalingon nga pamahayag.14
Apan ang kalinaw wala molungtad og dugay. Wala madugay human sa miting, si Adam mimando nga ipadakop si Joseph ug si Lyman tungod sa pagpalibut sa iyang payag sa armadong pwersa ug nakapahulga kaniya. Si Joseph nakalikay sa pagdakop pinaagi sa paghangyo nga mahusay didto sa iyang gipuy-an nga distrito sa Caldwell imbes nga sa Daviess, diin daghan kaayong mga lungsuranon ang nangasuko sa mga Santos.15
Ang mga tawo sa tibuok amihanang Missouri, sa laing bahin, mipatawag og mga miting aron hisgutan ang mga report nga naggikan sa Gallatin ug ang nagkadaghan nga mga Santos nga nanimuyo taliwala kanila. Ang ginagmayng mga manggugubot nga panon mibulit-bulit sa mga panimalay ug mga kamalig sa mga miyembro sa simbahan didto sa Distrito sa Daviess ug gipuntariya ang mga kasikbit nga pinuy-anan sa mga Santos.16
Aron mapakalma ang mga tensyon, si Joseph mibalik sa Daviess sa sayong bahin sa Septyembre aron tubagon ang mga pasangil batok niya. Atol sa pagdungog sa kaso, giangkon ni Adam nga si Joseph wala mipugos niya sa pagpirma sa pamahayag. Bisan pa niana, ang maghuhukom mimando sa propeta sa pagbalik sulod sa duha ka bulan alang sa husay.17
Ang mga Santos adunay pipila ka mga kaalyado didto sa gobyerno sa Missouri, ug sa wala madugay ang militia sa estado nagpundok na sa pagbuhi sa ilang mga grupo sa vigilante. Apan ang mga tawo sa sulod ug palibut sa Distrito sa Daviess nakahukom gihapon sa pagpalayas sa mga Santos gikan sa ilang mga utlanan.
“Ang mga tiglutos sa mga Santos,” si Joseph misulat sa usa ka higala, “dili makatulog diha sa Missouri.”18
Sa katapusan nga adlaw sa Agosto, si Phebe ug Wilford Woodruff nagbiyahe nga namaybay sa puting balas nga kabaybayonan dili layo gikan sa balay sa iyang mga ginikanan didto sa Maine. Hunas kadto. Ang mga balud nalukot gikan sa Altlantic Ocean ug mihampas sa lapyahan. Sa unahan, dili layo gikan sa kapunaw-punawan [horizon], hilum rang nangagi ang mga barko, ang ilang bug-at nga layag gihuyop sa hinuyuhoy sa hangin. Usa ka panon sa kalanggaman nagtuyok-tuyok sa paglupad diha sa kahanginan ug manugdon sa tubig.
Mipahunong sa iyang kabayo, si Phebe mikanaog ug namunit og mga kinhason nga nagkatag diha sa balas. Gusto niya kining dad-on isip handumanan sa dihang siya ug si Wilford mibalhin sa kasadpan ngadto sa Zion. Si Phebe nagpuyo duol sa dagat sulod sa hapit tibuok niyang kinabuhi, ug ang mga kinhason kabahin sa yuta diha sa panimalay.19
Sukad sa iyang pagkatawag ngadto sa Korum sa Napulog Duha, si Wilford matinguhaon na nga makaabut sa Missouri. Ang iyang bag-ohay lang nga pagbisita sa Fox Islands milungtad lang og igong gidugayon aron sa pag-aghat sa gamayng grupo sa mga Santos sa pag-uban kaniya ug ni Phebe ngadto sa Zion. Mibalik siya sa mainland nga nasagmuyo. Ang pipila sa mga miyembro sa branch miuyon nga mokuyog nila. Ang uban—lakip nilang Justus ug Betsy Eames, ang naunang nabunyagan sa mga isla—nagpaulahi.
“Makita ra man unya nila ang ilang kabuang kon ulahi na ang tanan,” miingon si Wilford.20
Apan si Phebe dili usab ingon niana ka matinguhaon sa pag-adto. Ganahan siyang makapuyo na usab kauban sa iyang mga ginikanan. Ang ilang panimalay komportable, hayahay, ug pamilyar. Kon mipabilin pa siya sa Maine, dili gayud unta siya mahilayo sa iyang pamilya ug mga higala.21 Ang Missouri, sa laing bahin, mil kinyentos ka milya ang gilay-on. Kon mobiya siya, lagmit dili na niya igkita pag-usab ang iyang pamilya. Andam na kaha siya sa paghimo niana nga sakripisyo?
Si Phebe mitug-an sa iyang mga pagbati ngadto ni Wilford. Gisabut niya ang kabalaka ni Phebe bahin sa pagbiya sa pamilya, apan wala niya gipanulti ang kahingawa ni Phebe ngadto sa panimalay. Nakahibalo siya, sama ni Phebe, nga ang Zion mao ang dapit sa kasiguroan ug proteksyon.
“Ako moadto sa yuta sa Zion o sa bisan asa nga ang Dios mopadala kanako,” misulat siya sa iyang journal, “kon gikinahanglan nga biyaan ko ang daghang mga amahan, mga inahan, mga kaigsoonan nga makababag tali sa Maine ug Missouri—ug mokaon lang og pinabukal nga helba diha sa dalan.”22
Hangtud sa Septyembre, si Phebe ug Wilford naghulat sa branch sa Fox Islands nga moabut sa mainland ug magsugod sa ilang pagbiyahe ngadto sa kasadpan. Apan samtang nanglabay ang mga adlaw ug walay mipatim-aw nga mga miyembro sa branch, si Wilford nawad-an sa pailub. Atrasado na kaayo nianang tuiga. Kon magkadugay ang kalangay sa ilang biyahe, mas dako ang kahigayunan nga makasugat sila og dautan nga panahon diha sa agianan.
Ang uban pa nga mga kahimtang nakapahimo ni Phebe nga mas nagduha-duha sa pagbiya. Ang Ilang anak nga babaye, si Sarah Emma, giubo og maayo, ug naghunahuna si Phebe kon maayo ba kaha nga dad-on siya sa ingon ka taas nga biyahe diha sa tugnaw nga panahon.23 Unya ang gipalabian nga report bahin sa karambola sa adlaw sa piniliay didto sa Daviess County napatik sa lokal nga pamantalaan. Ang balita nakapahadlok sa tanan.
“Dili maayo ang moadto didto,” gisultian si Phebe ug Wilford sa mga silingan. “Mamatay mo.”24
Pipila ka adlaw ang milabay, mga singkwenta ka mga Santos sa Fox Islands ang miabut, andam sa pagbiyahe ngadto sa Zion. Nakahibalo si Phebe nga panahon na kadto para mobiya, nga si Wilford kinahanglan nang moapil sa Napulog Duha didto sa Missouri. Apan gibati niya ang kusog nga pagbira sa panimalay ug sa pamilya. Ang dalan paingon sa Missouri mahimong lisud, ug ang panglawas ni Sarah Emma luyahon lang gihapon. Ug walay kasiguroan nga luwas sila gikan sa mga manggugubot nga panon sa higayon nga moabut sila sa bag-o nilang panimalay.
Bisan pa niana, mituo gihapon, si Phebe sa pagpundok. Nakabiya na siya sa panimalay aron mosunod sa Ginoo sa una, ug andam siya sa pagbuhat niini pag-usab. Sa dihang nanamilit siya sa iyang mga ginikanan, mibati siya og sama ni Ruth sa Daang Tugon, mibiya sa panimalay ug pamilya alang sa iyang hugot nga pagtuo.
Sa ingon ka lisud nga pagbiya, iyang gibutang ang iyang pagsalig sa Dios ug misakay sa karwahe.25
Sa katapusan sa Septyembre, ang baynte-uno anyos nga si Charles Hales miabut kuyog sa usa ka pundok sa mga Santos nga taga-Canada didto sa De Witt, Missouri. Usa sa liboan ang mitubag sa tawag sa pagpundok sa Zion, siya mibiya sa Toronto uban sa iyang mga ginikanan ug mga igsoon sayo nianang tuiga. Ang De Witt setenta ka milya sa amihanang silangan sa Far West ug mihatag sa mga nagsunod nga mga karwahe og dapit nga kapahulayan ug gihulipan ang mga kagamitan sa wala pa mipadayon ngadto sa Distrito sa Caldwell.26
Apan sa dihang miabut si Charles, ang lungsod naubos sa pagpang-atake. Mga upat ka gatus ka mga Santos ang namuyo sa De Witt, ug ang mga kasilinganan ug ang palibut sa mga pinuy-anan mipugos nila sa paggawas sa dapit, miinsister nga sila mobiya sa Oktubre 1 o kon dili kay palayason. Si George Hinkle, ang lider sa mga Santos sa De Witt, mibalibad sa pagbiya. Miingon siya nga ang mga Santos magpabilin ug makig-away alang sa ilang katungod sa pagpuyo didto.27
Dugang pa sa kalisud sa De Witt mao ang mga hungihong nga ang mga Danite nangandam na sa pakiggubat batok sa mga taga Missouri. Daghang mga lungsuranon ang misugod sa paglihok batok sa mga Santos ug karon nanagkampo na sa mga utlanan sa De Witt, andam sa pag-atake sa lungsod sa bisan unsang higayon. Ang mga Santos mipadala og hangyo ngadto sa gobernador sa Missouri nga si Lilburn Boggs alang sa panalipod.28
Kadaghanan sa mga Santos sa Canada mipadayon ngadto sa Far West, matinguhaon sa paglikay sa kagubot, apan si George mihangyo ni Charles nga magpabilin ug modepensa sa De Witt batok sa manggugubot nga panon. Isip usa ka mag-uuma ug musikero, mas naandan ni Charles ang magdaro o mag-trombone kay sa mamusil. Apan gikinahanglan ni George ang mga kalalakin-an nga motukod og mga kuta sa palibut sa De Witt ug mangandam alang sa pakig-away.29
Pagka Oktubre 2, ang adlaw pagkahuman sa tagal sa mga Santos nga mobiya sa mga pinuy-anan, ang manggugubot nga panon misugod sa pagpamusil kanila. Sa sinugdanan, wala mobalos og pamusil ang mga Santos. Apan human sa duha ka mga adlaw, si Charles ug ang mga duha ka dosenang mga Santos mipwesto subay sa ilang mga kuta ug mibalos sa pagpamusil, nakaangol og usa ka tawo.
Ang manggugubot nga panon misulong sa mga kuta, miabug ni Charles ug sa uban nga nanagan aron mopasalipod sa mga balayng troso diha sa duol.30 Gibabagan sa mga manggugubot nga panon ang mga karsada padulong sa De Witt, nga mipahunong sa pagsulod sa mga pagkaon ug ubang mga kagamitan sa mga Santos.
Duha ka gabii ang milabay, niadtong Oktubre 6, si Joseph ug Hyrum Smith mihilom og sulod ngadto sa lungsod kauban ni Lyman Wight ug usa ka gamayng armadong kalalakin-an. Ilang nasuta nga ang mga Santos hapit wala nay pagkaon ug uban pang mga panginahanglan. Gawas lang kon matapos na dayon ang gubat, ang kagutom ug pagkasakit mopaluya sa mga Santos sa dili pa mohimo og laing pagpamusil ang mga manggugubot nga panon.31
Si Lyman andam nang manalipod sa De Witt hangtud sa katapusan, apan human nakita ni Joseph kon unsa na ka lisud ang kahimtang, gusto niyang makigsabut og usa ka malinawon nga solusyon.32 Nakasiguro siya nga kon may bisan usa nga taga-Missouri ang mapatay sa gubat, ang manggugubot nga panon molugsong sa lungsod ug mopuo sa mga Santos.
Si Joseph mipadala og usa ka hangyo sa tabang gikan ni Gobernador Boggs, nagpasugo og usa ka mahigalaon nga taga Missouri sa pagdala sa hangyo. Ang mensahero mibalik human sa upat ka adlaw nagdala og mga balita nga ang gobernador dili manalipod sa mga Santos batok sa mga pag-atake. Miinsister si Boggs nga ang panagbangi tali ra nila ug sa mga manggugubot nga panon.
“Kinahanglan nilang pakigbisugan kini,” miingon siya.33
Ang mga kaaway nagpundok diha duol sa hapit kada distrito, ug ang mga Santos walay nadawat nga kasaligan nga tabang gikan sa militia sa estado, nasayud si Joseph nga gikinahanglan niyang tapuson ang gubat. Gikasilagan niya ang pagtahan ngadto sa mga manggugubot nga panon, apan ang mga Santos sa De Witt naluya na og maayo ug nalabwan na ang gidaghanon. Ang pagpadayon sa pagpanalipod sa mga pinuy-anan mahimong usa ka makuyaw nga kasaypanan. Maduha-duhaon, midesisyon siya nga panahon na sa pagbiya sa De Witt ug mosibug ngadto sa Far West.
Pagkabuntag sa Oktubre 11, gikarga sa mga Santos ang gamay nga kabtangan nga ilang madala sa karwahe ug mibiyahe tabok sa dakong patag nga kasagbutan.34 Gusto ni Charles nga mouban kanila, apan lain nga taga Canada nga Santos, kinsa wala pa maandam sa pagbiya, mihangyo niya nga magpabilin ug motabang kaniya. Misugot si Charles, nagdahum nga siya ug ang iyang higala dali rang makaapas sa uban nga mga Santos.
Apan human nga nakabiya na gayud sila sa lungsod, ang iyang higala mibalik sa agi sa dihang ang iyang kabayo nalup-og. Dili na gustong mopabilin sa bangis nga teritoryo, si Charles mibiyahe nga nag-inusara ug nagbaktas sa dili pamilyar nga dakong patag nga kasagbutan. Mipadulong siya sa amihanang-kasadpan, sa direksyon sa Distrito sa Caldwell, nga walay klaro nga ideya kon asa siya padulong.35
Pagka Oktubre 15, pipila ka adlaw human ang mga Santos sa De Witt nangabut sa Far West, gipatawag dayon ni Joseph ang matag kalalakin-an sa lungsod. Gatusan ka mga Santos ang misibug padulong sa Far West, miikyas sa mga kalihokan sa manggugubot nga panon sa tibuok amihanang Missouri. Kadaghanan nila karon nagpuyo sa mga karwahe o mga tolda nga nagkatag sa tibuok lungsod. Ang panahon mitugnaw na, ug ang mga Santos gipangbikugan ug nauyamot.36
Nakita ni Joseph nga ang sitwasyon nagkagrabe nga dili na mapugngan. Nakakuha siya og mga report nga ang ilang mga kaaway nanagpundok gikan sa tanang direksyon. Sa dihang ang manggugubot nga panon miatake kanila sa Jackson ug sa mga distrito sa Clay, ang mga Santos naningkamot sa pagdala niini sa kaaghop, misibug gikan sa mga panagbingkil ug misalig sa mga magbabalaod ug sa mga huwes sa pagpahiuli sa ilang mga katungod. Apan miabut ba kini ngadto kanila? Gikapoy na siya sa pagpang-abuso, ug gusto niyang mohimo og mas maisugon nga pagbarug batok sa ilang mga kaaway. Ang mga Santos nahutdan na sa mga kapilian.
“Igo na ang gidugayon sa atong pagsulay,” si Joseph misinggit ngadto sa mga tawo diha sa naglibut kaniya. “Kinsa man ang dakong buang nga magtawag og, ‘Ang balaod! Ang balaod!’ kon kini kanunayng gipahamtang batok kanato ug wala gayud mipabor kanato?”
Sulod sa katuigan nga gipangsakmit ang kayutaan, ug mga krimen nga walay silot batok sa mga Santos maoy hinungdan sa pagkunhod sa iyang pagsalig sa mga politiko ug mga magbabalaod, ug sa kadili andam sa gobernador nga motabang sa mga Santos nakapadugang lang niana nga talan-awon. “Kita ang modumala sa atong mga kalihokan ug sa atong kaugalingon,” miingon si Joseph. “Miapela na kita sa gobernador, ug wala siyay mahimo alang kanato. Ang mga militia sa distrito ato nang gisulayan, ug sila walay nahimo.”
Nagtuo siya nga ang estado mismo wala ray kalainan kay sa manggugubot nga panon. “Mitahan kita sa mga manggugubot nga panon sa De Witt,” miingon siya, “ug karon nag-andam na sila sa paghasmag sa Daviess.” Dili siya makatugot nga duna pay bisan unsang butang nga makuha gikan sa mga Santos.37
Ilang panalipdan ang ilang mga kaugalingon, namahayag ang propeta, o mamatay diha sa paningkamot.38