“Nagkahiusa diha sa Walay Katapusang Pakigsaad,” kapitulo 40 sa Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018)
Kapitulo 40: “Nagkahiusa diha sa Walay Katapusang Pakigsaad”
Kapitulo 40
Nagkahiusa diha sa Walay Katapusang Pakigsaad
Sa dihang nahibalik na si Joseph ngadto sa Nauvoo pagka Enero 10, 1843, ang mga higala ug kaparyentihan mihugop ngadto sa iyang balay sa pagpahalipay niya. Wala madugay, siya ug si Emma mipahigayon og usa ka salo-salo sa panihapon sa pagsaulog sa iyang kadaugan ug sa ilang ika disisais nga anibersaryo sa kasal. Si Wilson Law ug si Eliza Snow naghimo og mga awit alang sa okasyon, ug sila si Joseph ug Emma midalit sa pagkaon samtang ang mga bisita nagkinataw-anay ug mipaambit og mga istorya.1
Gikalipay ni Joseph ang makauban ang mga minahal. “Kon wala ako’y gidahum nga makita pag-usab ang akong inahan, mga igsoong lalaki, ug mga igsoong babaye ug mga higala,” siya sa wala madugay namalandong, “ang akong kasingkasing dali nga mobuto.”2 Nahupay siya nga masayud nga ang mga bunyag alang sa buhi ug patay, ang endowment, ug ang mahangturon nga kaminyoon nakahatag og mga paagi alang sa mga Santos nga makahimo og mga sagrado nga mga pakigsaad nga mi-seal nila ug makasalig nga ang ilang relasyon magpadayon lapas sa lubnganan.
Apan hangtud karon walay kababayen-an ug dyutay lang sa kalalakin-an ang nakadawat sa endowment, ug daghang mga Santos ang wala pa gihapon makahibalo sa pakigsaad sa mahangturon nga kaminyoon. Gihuptan ni Joseph ang saad nga siya mabuhi pa aron matapos ang iyang misyon, ug nangandoy siya nga makompleto ang templo aron iyang mapaila-ila ang mga Santos ngadto niining mga ordinansa. Padayon niyang gibati nga hapit na mahurot ang panahon.
Gipaspasan gihapon niya sa pagpadayon, nag-awhag sa mga Santos nga dunganan ang kapaspason. Mituo siya nga talagsaon nga mga panalangin ang maanaa niadtong nakadawat og sagradong mga ordinansa ug nakatuman sa mga balaod sa Dios. Karon, labaw gayud sa tanan, ang iyang tumong mao ang paglugway sa balaang kahibalo nga iyang nadawat ngadto sa mas daghang mga Santos, aron matabangan sila nga makahimo ug makatuman sa mga pakigsaad nga makabayaw ug makaluwas kanila.3
Ang Mississippi River mibagtok nianang tingtugnaw, nababagan ang kasagaran nga dagan sa mga balsa ug mga bangka sa sapa diha sa tibuok katubigan. Kasagaran mag-snow, ug ang bugnaw nga hangin mohuros sa patag nga yuta ug ibabaw sa pangpang. Pipila lang sa mga Santos ang dugay nga magpabilin sa gawas tungod kay kadaghanan nila nagsapatos lang, nipis ug mga jacket, ug gapason na ang mga bandana nga makapanalipud nila sa kabugnaw ug sa nagkalapok nga snow.4
Samtang nagsingabut ang pagtapos sa tingtugnaw, nagpabilin pa gihapon ang hilabihang katugnaw nga kahanginan samtang si Emily Partridge naglaba sa mga sinina ug nag-atiman sa mga bata diha sa panimalay sa mga Smith. Kapin na sa duha ka tuig, siya ug ang iyang magulang nga si Eliza nagpuyo ug nakigtambayayong uban sa mga Smith, dili layo gikan sa gipuy-an sa ilang inahan nga nagpuyo uban sa iyang bag-ong bana.5
Si Emily nahisakop sa Relief Society ug sagad makig-istorya sa kababayen-an sa iyang palibut. Panagsa makadungog siya ug mga hungihong bahin sa dinaghan nga kaminyoon. Kapin sa tranyenta ka mga Santos ang hilum nga mihangop sa maong buhat, lakip sa duha sa iyang igsoon sa gawas nga mga babaye ug sa iyang igsoon sa gawas nga mga lalaki. Si Emily wala makahibalo dayon bahin niini mismo.6
Hinoon, usa ka tuig sa wala pa, nahisgutan ni Joseph nga siya adunay butang nga isulti ngadto kaniya. Mitanyag siya nga isulat kini diha sa usa ka sulat, apan siya (si Emily) mihangyo nga dili niya kini buhaton, nabalaka nga basin maghisgut kini mahitungod sa dinaghan nga kaminyoon. Human niana, gibasulan niya ang iyang desisyon ug misulti sa iyang igsoong babaye mahitungod sa panag-istorya, gipaambit ang unsay gamay niyang nahibaloan mahitungod sa buhat. Si Eliza ingon ug gisaput na, mao nga si Emily wala na mosulti pa og dugang.7
Kay walay usa nga matug-anan, mibati si Emily nga sama sa nanglimbasug nga nag-inusara diha sa lawom nga tubig. Midangop siya sa Ginoo ug nag-ampo aron masayud kon unsay buhaton, ug human sa pipila ka mga bulan, nakadawat siya og balaanon nga kumpirmasyon nga siya kinahanglang maminaw sa unsay isulti ni Joseph ngadto niya—bisan kon may kalabutan pa kini sa dinaghan nga kaminyoon.8
Pagka-Marso 4, pipila ka adlaw human sa iyang ika-disinuwebe nga adlawng natawhan, mihangyo si Joseph nga makig-istorya kang Emily diha sa panimalay ni Heber Kimball. Migikan dayon siya sa dihang nahuman niya ang iyang trabaho, ang iyang hunahuna nangandam na sa pagdawat sa baruganan sa dinaghan nga kaminyoon. Sumala sa gilauman, si Joseph mitudlo niini ngadto kaniya ug mihangyo kon mahimo ba nga i-seal siya ngadto kaniya (ni Joseph). Miuyon siya, ug si Heber ang mihimo sa ordinansa.9
Paglabay sa upat ka adlaw, ang iyang igsoon nga si Eliza na-seal usab ngadto ni Joseph. Ang managsoong babaye magkaistoryahanay na sa usag usa ug mopaambit unsay ilang nasabtan ug mibati mahitungod sa mga pakigsaad nga ilang gihimo.10
Ang mga Santos mipadayon sa pagdepensa ni Joseph batok sa mga akusasyon nga gipanabi ni John Bennett. Daghan kaayo sa unsay nahisulat ni John mga tumo-tumo o dili gayud tinuod, apan husto ang iyang pangangkon nga si Joseph nagminyo sa daghang babaye. Wala makahibalo niini nga kamatuoran, si Hyrum Smith ug si William Law hugtanong mihimakak sa tanang pamahayag ni John ug inosente kaayong mihimaraut sa mga binuhatan sa mga Santos kinsa nagmasulundon sa buhat sa dinaghan nga kaminyoon.11
Wala mahimutang si Brigham Young niini. Hangtud nga ang mga sakop sa Unang Kapangulohan magpabilin nga wala masayud sa maong buhat, nagtuo siya, nga ang ilang panghimaraut sa poligamiya makapugong ni Joseph ug sa uban gikan sa pagtuman sa sugo sa Ginoo.
Misulay na si Joseph sa pagtudlo sa iyang igsoon ug ni William mahitungod sa dinaghan nga kaminyoon nga wala molampos. Sa makausa, atol sa usa ka miting sa konseho, wala kaayo niya tanduga ang isyu sa dihang misagbat si William. “Kon ang usa ka anghel sa langit mopadayag ngari nako nga ang usa ka tawo kinahanglan adunay sobra sa usa ka asawa,” miingon siya, “ako siyang patyon!”
Nakita ni Brigham nga ang mga lihok ni Hyrum ug William nakapaluya ni Joseph. Usa ka Dominggo, sa dihang natapos na ni Brigham ang iyang buluhaton sa gabii, miabut si Joseph nga wala damha diha sa iyang pultahan. “Gusto kong moadto ka sa akong balay ug magsangyaw,” miingon si Joseph.
Kasagaran malingaw si Brigham nga makigtigum uban sa mga Santos, apan nasayud siya nga si Hyrum magsangyaw usab nianang gabhiuna. “Dili lang ko moadto,” miingon siya.12
Si Brigham ug ang iyang asawa nga si Mary Ann nakahibalo na pinaagi sa pag-ampo ug pagdasig nga sila kinahanglan maghimo og dinaghan nga kaminyoon. Inubanan sa pagtugot ni Mary Ann, si Brigham na-seal ngadto sa babaye nga ginganlan og Lucy Ann Decker niadtong Hunyo 1842, usa ka tuig human unang natudlo ni Joseph ngadto kaniya ang baruganan. Si Lucy nabuwag gikan sa iyang unang bana ug adunay mga gagmayng bata nga kinahanglan pang amumahan.13
“Brother Brigham,” miinsister si Joseph, “kon dili ka mokuyog nako, dili ko mopauli sa balay karong gabii.”
Nagpanuko, miuyon si Brigham sa pagsangyaw, ug giubanan niya ang propeta sa pagpauli. Nakita nila si Hyrum nga nagbarug sa daplin sa abuhan, namulong ngadto sa tibuok panimalay. Naggunit siya sa Biblia, Basahon ni Mormon, ug sa Doktrina ug mga Pakigsaad ug namahayag nga kini mao ang balaod sa Dios nga nahatag ngadto kanila sa pagtukod sa Iyang gingharian.
“Ang tanang butang nga mosubra niini,” miingon si Hyrum, “iya sa tawo ug dili sa Dios.”
Naminaw si Brigham sa wali ni Hyrum, ang iyang gibati nagkakusog. Sa iyang tupad, si Joseph naglingkod nga gitabon ang mga palad sa iyang nawong. Sa dihang nahuman na si Hyrum, miyangu si Joseph ni Brigham ug miingon, “Barug na.”
Mibarug si Brigham ug mipunit sa mga kasulatan nga gibutang ni Hyrum. Iyang gipahimutang ang mga basahon sa iyang atubangan, matag usa, aron ang tanan diha sa lawak makakita. “Dili nako ibaylo sa abo sa dagami kining tulo ka mga basahon,” namahayag siya, “kon wala ang buhi nga pasidaan sa Dios.”14 Ang pagkulang og usa ka propeta sa ulahing mga adlaw, miingon siya, dili mas maayo ang mga Santos kay sa una dihang wala pa ang Dios mipadayag sa ebanghelyo pinaagi ni Joseph Smith.
Sa dihang nahuman na siya, si Brigham makasulti nga ang iyang wali nakatandog ni Hyrum. Mitindog, mapaubsanong nangayo og pasaylo si Hyrum sa mga Santos. Husto si Brigham, miingon siya. Sama ka bililhon sa mga kasulatan, kini dili puli alang sa usa ka buhi nga propeta.15
Niana nga tingpamulak, si Joseph kasagaran mobiya sa Nauvoo aron sa pagbisita sa mas gamay nga mga stake sa simbahan nga naa sa duol. Bisan asa siya moadto, giubanan siya sa iyang bag-ong klerk nga si William Clayton, usa ka maalam nga batan-ong lalake gikan sa England. Si William mitipon ngadto sa Nauvoo uban sa iyang asawa, si Ruth, niadtong 1840 ug gidawat sa propeta sukad niadto.16
Pagka-Abril 1, mibiyahe si William og tunga sa adlaw uban nilang Joseph ug Orson Hyde, kinsa bag-uhay lang nakabalik gikan sa Jerusalem, ngadto sa usa ka miting sa usa ka lungsod nga gitawag og Ramus.17 Pagkasunod buntag, naminaw si William samtang nagwali si Orson nga usa kadto ka pribilehiyo sa mga Santos nga ang Amahan ug ang Anak makapuyo diha sa ilang mga kasingkasing hangtud sa Ikaduhang Pag-anhi.18
Sa kaulahian, samtang gitagamtam nila ang pagkaon diha sa panimalay sa igsoong babaye ni Joseph nga si Sophronia, miingon si Joseph, “Elder Hyde, motanyag ko og pipila ka pagkoriher diha nimo.”
“Dawaton kini inubanan sa pasalamat,” ang tubag ni Orson.
“Ang pagsulti nga ang Amahan ug ang Anak nagpuyo diha sa kasingkasing sa tawo mao ang usa ka karaan nga hunahuna sa sekta ug kini sayop,” miingon si Joseph. “Kita makakita Niya nga Siya mismo. Atong makita nga Siya usa ka tawo nga sama kanato.”19
Aduna pay dugang isulti si Joseph kalabut niana sa dihang gipadayon ang komperensya nianang pagkagabii. “Ang Amahan adunay lawas nga unod ug mga bukog nga mahikap ingon sa tawo, ang Anak usab,” nagtudlo siya, “apan ang Espiritu Santo usa ka personahe sa Espiritu.”20
Samtang namulong si Joseph, nagsulat si William kutob sa mahimo bahin sa wali diha sa iyang diary. Nadani siya sa lawom nga mga kamatuoran nga gipaambit ni Joseph ug nagkinahanglan pa nga masayud pa og dugang.
Girekord ni William ang mga pagtulun-an ni Joseph nga ang kahibalo ug salabutan nga naangkon sa tawo diha sa kinabuhi ilang madala diha sa Pagkabanhaw. “Kon ang usa ka tawo makakab-ut og daghan pa nga kahibalo ug salabutan dinhi niini nga kinabuhi, pinaagi sa iyang kakugi ug pagkamasulundon, kay sa uban nga tawo,” mipasabot si Joseph, “siya adunay daghan nga kahigayunan didto sa kalibutan nga umaabut.”21
Human sa usa ka bulan, si Joseph ug si William namalik ngadto sa Ramus ug mipuyo sa panimalay nilang Benjamin ug Melissa Johnson. Gitudloan ni Joseph ang mga Johnson nga ang usa ka babaye ug lalake mahimong ma-seal alang sa kahangturan diha sa bag-o ug walay katapusang pakigsaad sa kaminyoon. Pinaagi lamang sa pagsulod ngadto niining pakigsaad, diin mao ang han-ay sa priesthood, siya mitudlo, sila makaangkon sa kahimayaan. Kon dili, ang ilang relasyon dili na magpadayon lapas sa lubnganan, gitapos ang ilang pag-uswag sa kahangturan ug pagsanay.
Ang paghulagway ni Joseph sa mahangturon nga kaminyoon nakapatingala ni William. “Matinguhaon ko nga mahiusa diha sa walay katapusan nga pakigsaad ngadto sa akong asawa,” misulat siya sa iyang diary, “ug nag-ampo nga mahimo na kini sa mas daling panahon.”22
Ang pagbalik ni Orson Hyde gikan sa Jerusalem nagpasabut nga si Peter ug si Mary Maughan kinahanglang ibalhin na ang ilang pamilya gawas sa panimalay sa mga Hyde didto sa Nauvoo. Tungod sa kawalay mapuy-an, nagkampo sila sa usa ka luna sa siyudad nga ilang naangkon gikan sa temple committee, sa pagkasabut nga si Peter magtrabaho sa templo aron makabayad sa yuta. Si Mary, mentras tanto, nakigbarter og binubod nga gapas nga iyang nadala gikan sa England alang sa pagkaon.
Si Peter sa wala madugay nagsugod og trabaho isip usa ka mangungulit og bato, magputol ug magporma og mga bloke nga limestone alang sa templo.23 Sa pagkakaron, ang mga bong-bong anaa sa dose ka pye ang gitas-on sa pipila ka mga dapit, ug usa ka temporaryo nga salog ang nataud aron makapahigayon ang mga Santos og mga miting diha sa templo.24
Ang building gipadak-an unta ug mas nindot pa kaysa templo nga nabisitahan nilang Peter ug Mary didto sa Kirtland. Aduna gihapon kini mga lawak tigumanan sa una ug ikaduhang andana. Apan ang gawas nga bahin sa templo sa Nauvoo maadornohan sa mga bato nga kinulitan og mga bituon, buwan, ug mga adlaw, nagsugyot sa mga gingharian sa himaya nga gihulagway diha sa panan-awon ni Joseph sa Pagkabanhaw ingon man sa paghulagway ni Juan nga Tigpadayag sa simbahan isip “usa ka babaye nga nagbistig adlaw, ang bulan diha sa ubos sa iyang mga tiil, ug sa iyang ulo dihay usa ka purongpurong nga mga bitoon nga napulog-duha ka buok.”25
Kada semana, ang mga trabahante migamit og pulbora aron sa pagkuha og bato gikan sa mga quarry sa amihanang bahin sa lungsod. Dayon ilang pikason ang bato ngadto sa mga gansang-gansang nga bloke ug migamit og mga baka sa pagguyod sa mga karomata sa paghakot niini ngadto sa buhatanan duol sa templo. Didto, ang mga kalalakin-an sama ni Peter motabas ug mopasinaw sa mga bloke sa hustong sukod samtang ang mga hanas nga mga mangungulit mokulit ug molalik sa mas daghan nga inadornohan nga mga bato. Kon maandam na ang bato, ang mga trabahante motaud niini ngadto sa taas nga crane ug mopahimutang niini sa saktong butanganan.26
Tungod sa permanenting trabaho ug sa ilang gipanag-iya nga yuta, si Peter ug Mary nananum og utanon, mitukod sa ilang kaugalingong balay, ug nagtinguha og mas komportable nga panahon sa umaabut.27
Duha ka bulan ang milabay human sa iyang pagka-seal ngadto ni Joseph, si Emily Partridge mitrabaho gihapon kada adlaw sa panimalay sa mga Smith, nanglaba ug namilot sa mga sinina ug nag-atiman sa mga bata. Si Julia Smith mag-dose anyos na niana nga tingpamulak ug nagtuon og mga leksyon sa painting.28 Ang mga batang lalaki usab nanagko na. Ang batang si Joseph dyes anyos, si Frederick sais, ug si Alexander mag-singko anyos. Ang mas magulang nga mga bata nag-eskwela uban sa manghud ni Emily nga si Lydia. Ang batang si Joseph makigdula usab sa iyang nuybe anyos nga manghud, si Edward Jr.29
Sa pagpili nga ma-seal ngadto ni Joseph, si Emily misalig sa iyang pagsaksi nga siya nagmasulondon sa sugo sa Ginoo. Siya ug ang iyang igsoon si Eliza mipadayon sa pagtago sa ilang mga kaminyoon. Sila ug ang uban kinsa nanaghimo og dinaghan nga kaminyoon wala gayud mopasabut niini isip poligamiya, nga ilang giisip nga kalibutanon nga termino, dili usa ka ordinansa sa priesthood.30 Sa dihang si Joseph o ang laing tawo mihimaraut sa “poligamiya” o “espirituhanong pagpangasawa” diha sa publiko, kadtong naghimo sa dinaghan nga kaminyoon nakasabut nga wala kini magpasabut ngadto sa ilang pakigsaad nga mga relasyon.31
Gawas sa Biblia, si Joseph walay mga sumbanan o ehemplo nga masundan, ug ang Ginoo wala niya mohatag kanunay og eksakto nga mga instruksyon kon unsaon sa pagsunod sa Iyang pulong. Kalabut sa uban nga mga sugo ug mga pagpadayag, si Joseph kinahanglan mopadayon sumala sa iyang labing maayo nga paghukom. Sa diha nga milabay ang daghang katuigan nga si Emily ug ang uban nagsulat og mga paghandom sa pagkamasulundon ni Joseph ngadto sa baruganan ug sa ilang kaugalingong mga kasinatian sa dinaghan nga kaminyoon sa Nauvoo. Ang ilang mga istorya kasagaran mubo ug putol-putol.32
Tungod kay walay usa nilang Joseph ug Emma ang nakasulat kon unsa ang ilang gibati mahitungod sa dinaghan nga kaminyoon, daghang mga pangutana nga nagpabilin nga wala matubag. Sa iyang mga sinulat, si Emily mirekord sa pipila sa ilang mga panglimbasug sa maong buhat. Dihay mga higayon nga si Emma hingpit nang misalikway niini samtang sa laing mga higayon nagduha-duha sa pagdawat niini isip usa ka sugo. Nataliwad-an tali sa mando sa Ginoo sa paghimo sa dinaghan nga kaminyoon ug sa pagsupak ni Emma, si Joseph usahay mopili nga magminyo nga dili makahibalo si Emma, nga nakamugna og makaguol nga mga sitwasyon alang sa tanang nalambigit.33
Sa sayong bahin sa Mayo, gikuha ni Emma sila si Emily ug Eliza ug gipasabut ngadto kanila ang baruganan sa dinaghan nga kaminyoon.34 Gisultihan niya si Joseph nga tugutan niya siya (si Joseph) nga ma-seal sa dugang duha ka mga asawa basta siya (si Emma) ang mopili kanila, ug siya mipili nilang Emily ug Eliza, klaro kaayo nga wala makahibalo nga si Joseph na-seal na ngadto nila.35
Imbis maghisgut sa iyang kanhi pagpa-seal, nagtuo si Emily nga ang pagpakahilum bahin sa maong butang maoy labing maayo niyang buhaton.36 Pipila ka adlaw ang milabay, siya ug si Eliza na-seal pag-usab ngadto ni Joseph, niining higayuna kuyog ni Emma isip usa ka saksi.37
Pagka Mayo 14, samtang nalayo si Joseph didto sa laing komperensya, si Hyrum nagsangyaw sa templo batok sa mga kalalakin-an nga dunay sobra sa usa ka asawa. Nagpasabut sa pagpanghimaraut ni Jacob sa dili awtorisadong dinaghan nga kaminyoon diha sa Basahon ni Mormon, si Hyrum mitawag sa buhat nga salawayon diha sa atubangan sa Dios.38
Human sa wali, misugod si Hyrum sa pagkwestyun sa iyang kaugalingong kasigurohan mahitungod sa unsay iyang gitudlo. Mga panag-istorya mahitungod sa dinaghan nga kaminyoon nalukop na sa Nauvoo, ug ang mga hungihong nga si Joseph adunay pipila ka mga asawa komon usab.39
Gusto man motuo ni Hyrum nga dili kini mao ang kahimtang, apan naghunahuna siya kon si Joseph aduna ba kahay butang nga wala gisulti kaniya. Adunay mga higayon, sa dihang si Joseph nagpaila nga naghimo sa maong buhat, tingali sa pagsulay ni Hyrum aron makita kon unsay iyang reaksyon. Ug nakamatngon si Hyrum nga dunay mga butang nga gisulti ni Joseph sa Napulog Duha nga wala niya gitudlo kaniya.
Usa ka adlaw wala madugay human sa wali, nakita ni Hyrum si Brigham duol sa iyang panimalay ug mihangyo kon mahimo ba silang mag-istorya. “Nasayud ko nga adunay butang o laing butang nga wala nako masabti nga gipadayag ngadto sa Napulog Duha,” miingon siya. “Tinuod ba kini?”
Nanglingkod ang mga lalaki diha sa nagtumpi nga brandilyas sa kural. “Wala koy nahibaloan sa bisan unsang butang nga imong nahibaloan,” maampingong mitubag si Brigham, “apan nakahibalo ko sa unsay akong nahibaloan.”
“Dugay na ko nga wala mosalig nga si Joseph nakadawat og usa ka pagpadayag nga ang usa ka lalaki kinahanglan makaangkon og sobra sa usa ka asawa,” miingon si Hyrum.
“Sultihan ko ikaw bahin niini,” miingon si Brigham, “kon manumpa ka pinaagi sa pagpataas sa kamot sa atubangan sa Dios nga ikaw dili na gayud mosulti batok ni Joseph ug sa iyang mga buhat ug sa mga doktrina nga iyang gisangyaw.”
Mitindog si Hyrum. “Buhaton nako kini sa tibuok kong kasingkasing,” miingon siya. “Gusto kong makahibalo sa kamatuoran.”
Samtang gitudlo ni Brigham kaniya ang mahitungod sa pagpadayag sa Ginoo ngadto ni Joseph bahin sa dinaghan nga kaminyoon, mihilak si Hyrum, nakumbinser nga si Joseph mibuhat ubos sa sugo.40
Sa ulahing bahin sa Mayo 1843, si Emma ug Joseph na-seal alang sa kahangturan diha sa usa ka lawak sa taas sa tindahan ni Joseph, sa katapusan gipahigayon sa unsay dugay na nilang gitinguha .41 Gidapit dayon ni Joseph si Brigham ug si Mary Ann Young, sila si Willard ug Jennetta Richards, Hyrum ug Mary Fielding Smith, ug ang biyuda nga igsoong babaye ni Mary, si Mercy Thompson, nga makigkita kaniya pagka sunod buntag aron madawat ang samang ordinansa.42
Sa wala pa ang panagtigum, nabalaka si Hyrum mahitungod sa iyang komplikado nga sitwasyon sa pamilya. Kon ang mga panalangin sa mahangturon nga kaminyoon mapanag-iya lang niadtong ma-seal pinaagi sa priesthood, unsa man ang mahitabo sa iyang unang asawa, si Jerusha, kinsa namatay unom na katuig na ang milabay?
“Mahimo nimo siyang ipa-seal diha kanimo sa samang baruganan ingon nga ikaw makabunyag alang sa mga patay,” miingon si Joseph.
“Unsay akong mabuhat para sa akong ikaduhang asawa?” Nangutana si Hyrum.
“Makahimo usab ka og pakigsaad diha kaniya alang sa kahangturan,” miingon si Joseph.
Miuyon si Mary sa pagserbisyo isip proxy ni Jerusha diha sa espesyal nga pag-seal. “Ug ako ma-seal diha nimo alang sa kahangturan mismo,” misulti siya ni Hyrum. “Gihigugma ko ikaw ug dili ko gusto nga mabulag gikan nimo.”43
Pagkabuntag sa Mayo 29, si Joseph ug ang uban nga nagkatigum sa taas sa iyang tindahan, ug ang matag magtiayon na-seal, gihiusa sila alang sa kahangturan. Isip mao lang ang biyuda sa lawak, si Mercy Thompson dili makalikay nga lahi ang bation kay sa uban. Apan ang kahibalo nga siya ma-seal gihapon ngadto sa iyang bana nga namatay na, si Robert, kinsa namatay sa hilanat nga malaria pipila ka tuig na ang milabay, nakapahimo niyang mibati nga ang Dios nagpakabana kaniya ug sa iyang sitwasyon.44
Sa dihang turno na ni Mercy sa pagdawat sa ordinansa, miingon si Joseph nga wala na siyay mahunahunaan nga mas maayo pa sa iyang bayaw nga si Hyrum nga maoy modala para ni Robert. Gi-seal siya ngadto ni Robert, dayun gi-seal si Hyrum ngadto ni Jerusha uban kang Mary nga nagsilbing proxy.45
Si Brigham mitapos sa ilang panagtigum sa usa ka himno ug pag-ampo ug ang managhigala migahin sa tibuok buntag sa panag-istoryahay mahitungod sa mga butang sa Dios. Usa ka maanindot nga panag-uyon ingon og nakapahilum sa tanang butang nga nakapabalaka sa mga Santos sulod sa miaging pipila ka mga tuig.46