“Pasiuna,” Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018)
“Pasiuna,” Mga Santos, Volume 1
Pasiuna
Ang mga tinuod nga istorya nga maayong pagkasaysay makapadasig, makapasidaan, makalingaw, ug makatudlo. Si Brigham Young nakasabut sa gahum sa usa ka maayong istorya sa dihang siya mitambag sa mga historian sa Simbahan sa pagbuhat og labaw pa kay sa yano nga pagrekord sa yano nga mga kamatuoran sa nangagi. “Isulat sa sinugilon nga estilo,” mitambag siya nila, ug “isulat lamang ang ikanapulong bahin niini.”1
Ang mosunod mao ang usa ka sugilanon sa kasaysayan nga gihimo aron sa paghatag sa mga magbabasa og sukaranang pagsabut sa kasaysayan sa Simbahan. Matag kahimtang, tawo, ug linya sa dayalogo gikuha diha sa makasaysayanong mga tinubdan, nga gikutlo sa katapusan sa basahon. Kadtong gusto nga mobasa niining mga tinubdan, mas makasabut sa mga may kalabutan nga hisgutanan, ug makadiskubri og mas daghang istorya makakaplag og mga link ngadto sa dugang pang mga tinubdan sa online sa history.lds.org.
Kini nga libro mao ang una sa upat ka volume sa kasaysayan sa Simbahan ni Jesukristo sa mga Santos sa Ulahing mga adlaw. Ang mga volume manag-uban nga nagsaysay sa istorya sa Pagpahiuli sa ebanghelyo ni Jesukristo gikan sa unang mga adlaw sa Simbahan hangtud karon. Nahisulat kini sa estilo nga makapaikag nga ma-akses ra sa mga Santos sa tibuok kalibutan.
Ang Simbahan mimantala og duha ka daghang volume sa mga kasaysayan sa nangagi. Ang una mao ang dokumentaryo sa kasaysayan nga gisugdan ni Joseph Smith niadtong mga 1830 ug gimantala sa pagsugod sa 1842. Ang ikaduha gisulat sa kaabag nga historian sa Simbahan nga si B. H Roberts ug gimantala niadtong 1930.2 Ang naabtan sa gipahiuli nga ebanghelyo sa tibuok kalibutan sukad niadto, ug ang sugo sa Ginoo nga magpadayon sa pagtipig sa kasaysayan alang sa “kaayohan sa simbahan, ug alang sa nagtubo nga kaliwatan,”3 timailhan nga panahon na sa pag-update ug paglakip sa dugang pang mga Santos diha sa istorya.
Gani mas daghan pa sa kanhing mga kasaysayan, ang Mga Santos nagpresentar sa mga kinabuhi ug mga istorya sa ordinaryong kalalakin-an ug kababayen-an sa Simbahan. Nakahatag usab kini og bag-ong detalye ug panabut ngadto sa mas inila nga mga tawo ug mga panghitabo gikan sa kasaysayan sa Simbahan. Ang matag kapitulo makatabang sa magbabasa nga makasabut ug makadayeg sa mga Santos kinsa nakapahimo sa Simbahan kon unsa kini karon. Gitambayayongan sa paghunahuna, ang ilang mga istorya nakamugna og kabuhong sa kasaysayan sa Pagpahiuli.
Ang Mga Santos dili kasulatan, apan sama sa mga kasulatan, ang matag volume naglangkob og balaan nga kamatuoran ug mga istorya sa dili perpekto nga mga tawo nga naningkamot nga mamahimong mga Santos pinaagi sa Pag-ula ni Jesukristo.4 Ang ilang mga istorya—sama sa mga istorya sa tanang mga Santos, sa nangagi ug sa pagkakaron—nagpahinumdom sa mga magbabasa kon unsa ka maloloy-on ang Ginoo ngadto sa Iyang katawhan samtang sila nagkapundok sa tibuok kalibutan aron ipadayon ang buhat sa Dios.