“Kita Mosulay Kanila,” kapitulo 37 sa Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018)
Kapitulo 37: “Kita Mosulay Kanila”
Kapitulo 37
Kita Mosulay Kanila
Niadtong Enero 5, 1842, nag-abli og tindahan si Joseph sa Nauvoo ug malipayong mitimbaya sa iyang daghang mga kustomer. “Ganahan ko nga moserbisyo sa mga Santos ug mahimong sulugoon sa tanan,” gisultihan niya ang usa ka higala sa sulat, “manghinaut nga ako mahimaya sa tukma nga panahon sa Ginoo.”1
Ang doktrina sa kahimayaan gihunahuna pag-ayo ug gikabalak-an ni Joseph.2 Niadtong Pebrero, nagsugod siya sa paghunahuna sa linukot nga mga papel sa Ehiptohanon nga iyang napalit sa Kirtland ug ang wala mahuman nga hubad sa mga sinulat ni Abraham.3 Ang bag-ong kasulatan nagtudlo nga ang Dios mipadala sa Iyang mga anak nganhi sa yuta aron sulayan ang ilang pagkamatinud-anon ug pagkaandam sa pagsunod sa Iyang mga sugo.
“Ug kita mosulay kanila dinhi, ang Manluluwas mipahayag sa wala pa malalang ang yuta, “aron pagsuta kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila.” Kadtong nagmasulundon sa Iyang mga sugo mahimaya ngadto sa mas dakong himaya. Kadtong mipili nga dili mosunod sa Dios mawad-an niining mahangturong mga panalangin.4
Gusto ni Joseph nga motabang sa mga Santos nga makat-on niini nga mga kamatuoran aron sila molambo ngadto sa kahimayaan ug mosulod sa presensya sa Dios. Didto sa Kirtland, ang pagtuga sa gahum nakapalig-on sa daghang mga lalaki alang sa mga hagit sa natad sa misyon. Apan ang Dios misaad sa pagtugyan og mas dako nga espirituhanong pagtuga diha sa templo sa Nauvoo. Pinaagi sa pagpadayag sa dugang nga mga ordinansa ug kahibalo ngadto sa matinud-anong mga lalaki ug mga babaye sa simbahan, ang Ginoo mohimo kanila nga mga hari ug mga rayna, mga pari ug mga paring babaye, sama sa gipanagna ni Juan ang Tigpadayag diha sa Bag-ong Tugon.5
Giawhag ni Joseph ang Napulog Duha ug ang ubang gisaligan nga mga higala nga magmasulundon sa Ginoo samtang giandam sila sa pagdawat niini nga pagtuga sa balaan nga gahum. Mitudlo usab siya sa baruganan sa dinaghan nga kaminyoon ngadto sa pipila ka mga Santos ug mipamatuod sa balaan nga gigikanan niini. Sa miaging ting-init, wala makaabut og usa ka semana human ang mga apostoles makabalik gikan sa England miabut sa Nauvoo, iyang gitudllo ang baruganan ngadto sa pipila kanila ug misugo kanila sa pagsunod niini isip usa ka sugo sa Ginoo.6 Samtang ang dinaghan nga kaminyoon wala kinahanglana alang sa kahimayaan o ang mas dako nga gahum sa pagtuga, ang pagkamasulundon ngadto sa Ginoo ug ang pagkaandam sa pagpahinungod sa kinabuhi ngadto Kaniya maoy gikinahanglan.
Sama ni Joseph, ang mga apostoles misupak sa sinugdanan sa bag-ong baruganan. Gibati ni Brigham ang tumang kaguol sa desisyon sa pagminyo og laing asawa nga siya nagtinguha na lang nga mamatay og sayo. Sila si Heber Kimball, John Taylor, ug Wilford Woodruff gustong molangay sa pagsunod kutob sa mahimo.7
Sa pagsunod sa sugo sa Ginoo, si Joseph nabugkos usab ngadto sa ubang mga babaye sukad sa iyang kaminyoon ngadto ni Louisa Beaman. Kon magtudlo og usa ka babaye mahitungod sa dinaghan nga kaminyoon, si Joseph motudlo kaniya sa pagpangita sa iyang kaugalingong espirituhanong kumpirmasyon nga ang pagkabugkos ngadto kaniya matarung. Dili ang tanang babaye midawat sa iyang imbitasyon, apan daghan ang midawat.8
Sa Nauvoo, ang pipila ka mga Santos miapil sa dinaghan nga kaminyoon alang karon ug sa kahangturan, nga nagpasabut nga ang ilang pagkabugkos molungtad niining kinabuhia ug sa sunod. Sama sa kaminyoon nga usa ray asawa, kini nga mga kaminyoon maglakip sa sekswal nga mga relasyon ug pagpanganak. Ang ubang dinaghang kaminyoon alang lang sa kahangturan, ug ang mga partisipante nakasabut nga ang ilang pagkabugkos moepekto sa sunod nga kinabuhi.9
Sa pipila ka mga kaso, ang usa ka babaye nga naminyo sa sibil ngadto sa usa ka masupakon nga Santos, o ngadto sa usa ka lalaki nga dili miyembro sa simbahan, o gani ngadto sa usa ka miyembro sa simbahan nga maayo ra, mahimong mabugkos ngadto sa kahangturan sa laing lalaki. Human sa seremonya sa pagbugkos, ang babaye magpadayon sa pagpuyo uban sa iyang bana karon samtang magpaabut sa mga panalangin sa mahangturong kaminyoon ug kahimayaan sa kinabuhi nga moabut.10
Sa sayong bahin niadtong 1842, si Joseph mitanyag nga magpabugkos ngadto ni Mary Lightner, kansang bana, nga si Adam, dili miyembro sa simbahan. Atol sa ilang panaghisgot, si Joseph misulti ni Mary nga ang Ginoo misugo kanila nga magpabugkos alang sa sunod nga kinabuhi.11
“Kon ang Dios misulti nimo niana,” nangutana si Mary, “nganong wala man Siya mosulti nako?”
“Pag-ampo nga matinuoron,” tubag ni Joseph, “kay ang anghel misulti nako nga ikaw makabaton og saksi.”12
Ang imbitasyon ni Joseph nakapabalaka ni Mary. Sa pagtudlo kaniya mahitungod sa dinaghan nga kaminyoon, gihulagway ni Joseph ang walay katapusan nga mga panalangin sa mahangturong pakigsaad sa kaminyoon.13 Sa dihang si Mary naminyo ni Adam, nagsinaaray sila sa usag usa alang niini nga kinabuhi lamang. Karon nakasabut siya nga dili diay makahimo og mahangturong mga pakigsaad uban kaniya gawas kon mouyon una siya nga magpabunyag pinaagi sa tukma nga awtoridad.14
Nakigsulti si Mary ni Adam mahitungod sa bunyag, nanghangyo kaniya nga moapil sa simbahan. Misulti si Adam kaniya nga mitahud siya ni Joseph apan wala motuo sa gipahiuli nga ebanghelyo ug dili magpabunyag.15
Naghandom sa mga panalangin sa mahangturong kaminyoon, apan nakahibalo nga dili niya kini madawat uban ni Adam, naghunahuna si Mary unsay buhaton. Ang mga pagduha-duha misulod sa iyang hunahuna. Sa katapusan, nag-ampo siya nga ang Ginoo mopadala og anghel aron sa pagkumpirmar kaniya nga ang imbitasyon ni Joseph sakto.16
Usa ka gabii, samtang siya didto sa iyang iyaan, si Mary nakakita og kahayag sa iyang kwarto. Naglingkod sa iyang higdaanan, natingala siya nga nakakita og anghel, nagsinina og puti, nagtindog tupad kaniya. Ang nawong sa anghel hayag ug matahum, nga ang mga mata midulot kaniya sama sa kilat.
Nahadlok, gitabunan niya ang iyang ulo, ug mibiya ang anghel.
Pagkasunod Dominggo, nangutana si Joseph ni Mary kon nakadawat ba siya og tubag.
“Wala pa akoy saksi, apan nakakita ko og butang nga sukad wala pa nako makita,” matud ni Mary. “Nakakita ko og anghel ug hilabihan nakong hadloka. Wala ko mosulti.”
“Ang anghel kadto sa buhi nga Dios,” miingon si Joseph. “Kon ikaw matinud-anon makakita ka og mas dagkong mga butang kay sa niana.”17
Nagpadayon sa pag-ampo si Mary. Nakakita siya og anghel, nga nakapalig-on sa iyang pagtuo sa mga pulong ni Joseph. Ug siya nakadawat og laing espirituhanon nga mga saksi sa paglabay sa mga adlaw nga dili niya ikalimud o ibaliwala. Si Adam iya gihapon nga bana niini nga kinabuhi, apan gusto siya nga makasiguro nga siya makadawat sa tanang mga panalangin nga anaa kaniya sa umaabut nga kinabuhi.18
Sa wala madugay gidawat niya ang imbitasyon ni Joseph, ug si Brigham Young mibugkos nilang duha alang sa sunod nga kinabuhi.19
Ubos sa direksyon ni Joseph, si John Taylor ug Wilford Woodruff nagsugod sa pagmantala sa hubad sa propeta sa basahon ni Abraham niadtong Marso 1842 diha sa mga isyu sa Times and Seasons. Samtang ang mga Santos mibasa sa rekord, nadasig sila nga nakadiskobre og bag-ong mga kamatuoran mahitungod sa paglalang sa kalibutan, sa katuyoan sa kinabuhi, ug sa mahangturong kapalaran sa mga anak sa Dios. Nahibaloan nila nga si Abraham naghupot sa Urim ug Thummim ug nakigsulti sa Ginoo sa atubangay. Nabasahan nila nga ang yuta ug ang tanan diha niini naorganisar gikan sa mga materyal nga anaa na aron sa pagpahinabo sa kahimayaan sa espiritu nga mga anak sa Amahan.20
Taliwala sa kadasig sa pagmantala sa basahon ni Abraham ug sa makapalambo sa kalag nga doktrina nga gitudlo niini, ang mga Santos nagpadayon sa paghimo og mga sakripisyo sa pagtukod sa ilang bag-ong siyudad ug pagtukod sa templo.
Niining higayuna, ang Nauvoo adunay sobra sa usa ka libo nga mga log cabin, uban sa daghang mga balay nga tabla ug solido nga brick nga mga balay nga nahuman na o gitrabaho pa.21 Aron mas maayo ang pag-organisar sa siyudad, gibahin kini ni Joseph ngadto sa upat ka mga yunit nga gitawag og mga ward ug mitudlo og mga bishop nga modumala kanila. Ang matag ward gipaabut nga motabang sa pagtukod sa templo pinaagi sa pagpadala og mga mamumuo aron motrabaho sa balay sa Ginoo matag ikanapulo nga adlaw.22
Si Margaret Cook, usa ka wala maminyo nga babaye kinsa misuporta sa iyang kaugalingon isip mananahi sa Nauvoo, nagtan-aw samtang nagpadayon ang trabaho sa templo. Nagtrabaho siya ni Sarah Kimball, usa sa labing unang kinabig sa simbahan, kinsa naminyo og usa ka malampuson nga negosyante nga dili Santos sa Ulahing mga Adlaw.
Samtang si Margaret nagtrabaho, siya ug si Sarah usahay mag-istorya mahitungod sa mga paningkamot sa pagtukod sa templo. Ang mga bong-bong pipila pa lamang ka pye ang gitas-on, apan ang mga trabahante nakahimo na og temporaryo nga luna sa silong sa templo ug mibutang og dako nga bunyaganan alang sa mga bunyag alang sa mga patay. Ang bunyaganan usa ka oblong nga pool nga maayong pagkahimo gamit ang mga tabla gikan sa pine nga gipatong sa likod sa dose ka gikulit nga mga baka ug gibutangan og nindot nga mga moulding. Sa pagkahuman og pahinungod sa bunyaganan, ang mga Santos nagsugod pag-usab sa pagpahigayon og mga bunyag alang sa mga patay.23
Gusto kaayo nga motampo ngadto sa templo, si Margaret nakamatikod nga daghan sa mga trabahante kulang og mga sapatos, mga karsones, ug mga sinina. Misugyot siya ngadto ni Sarah nga magtinabangay sila aron makahatag og bag-ong mga sinina alang sa mga trabahante. Miingon si Sarah nga mosuplay siya sa mga materyal alang sa mga sinina kon si Margaret ang motahi. Mahimo usab silang mangayo og tabang sa ubang mga babaye sa Nauvoo ug mag-organisar og kapunongan nga modumala sa trabaho.24
Sa wala madugay, si Sarah midapit og halos usa ka dosena ka mga babaye sa iyang balay aron hisgutan ang bag-ong kapunongan. Ilang gihangyo si Eliza Snow, kinsa nailhan sa abilidad sa pagsulat, sa paghimo og konstitusyon. Gihimo dayon ni Eliza ang dokumento ug mipakita niini ngadto sa propeta sa dihang nahuman na siya.
Miingon si Joseph nga mao kadto ang labing maayong konstitusyon. “Apan dili kini mao ang inyong gusto,” miingon siya. “Sultihi ang mga sister nga ang ilang mga halad gidawat sa Ginoo, ug Siya adunay butang nga mas maayo alang kanila.” Gihangyo niya ang kapunongan nga makigkita niya sa pipila ka adlaw sa iyang tindahan.
“Akong i-organisar ang mga babaye ubos sa priesthood subay sa sumbanan sa priesthood,” miingon si Joseph.25 “Ania na nako karon ang yawe diin ako makahimo.”26
Pagkasunod Huwebes, Marso 17, 1842, si Emma Smith misaka sa hagdanan ngadto sa dakong kwarto sa ibabaw sa tindahan ni Joseph. Disenuebe ka babaye, lakip nila ni Margaret Cook, Sarah Kimball, ug Eliza Snow, mianha aron sa pag-organisar sa bag-ong kapunongan. Si Joseph diha usab uban ni Willard Richards, kinsa nagsugod sa pagtrabaho isip tigsulat ni Joseh human makapauli gikan sa England, ug si John Taylor.27
Ang labing bata nga babaye nga mitambong mao ang kinse anyos nga si Sophia Marks. Ang labing tigulang, si Sarah Cleveland, singkwentaykwatro anyos. Ang kadaghanan sa mga babaye halos susama sa edad ni Emma. Gawas kang Leonora Taylor, kinsa natawo sa England, ang tanang mga babaye gikan sa silangang Estados Unidos ug mianha sa kasadpan uban sa mga Santos. Pipila kanila, sama nila ni Sarah Kimball ug Sarah Cleveland, arang-arang og kahimtang, samtang ang uban aduna ray sobra og gamay sa ilang gisul-ob nga mga sinina.
Ang mga babaye nakaila kaayo sa usag usa. Sila si Philinda Merrick ug Desdemona Fullmer naluwas gikan sa masaker sa Hawn’s Mill. Sila si Athalia Robinson ug Nancy Rigdon managsoon. Sila si Emma Smith ug Bathsheba Smith manag-agaw pinaagi sa kaminyoon, sama nila ni Eliza Snow ug Sophia Packard. Sila si Sarah Cleveland ug Ann Whitney mitabang ni Emma sa malisud nga mga panahon sa iyang kinabuhi, miatiman kaniya ug sa iyang pamilya sa ilang panimalay sa dihang wala na silay laing kapaingnan. Si Elvira Cowles nagpuyo sa balay ni Emma ug mitabang sa pag-atiman sa iyang mga anak.28
Nakagusto si Emma sa ideya sa pagsugod og kapunongan alang sa mga babaye sa Nauvoo. Karong bag-o, si Joseph ug ang ubang mga lalaki sa lungsod misulod ngadto sa usa ka siglo na nga kapunongan nga fraternity nga gitawag og Freemasonry, human sa dugay na kaayo nga mga Mason sama ni Hyrum Smith ug John Bennett mitabang sa pag-organisar og kapunongan sa mga Mason sa siyudad. Apan ang mga babaye sa Nauvoo adunay laing matang sa kapunongan.29
Human ang tanan makakanta sa “Ang Espiritu sa Dios” [“The Spirit of God”] ug si John Taylor mihalad og pag-ampo, mibarug si Joseph ug mipasabut nga ang bag-ong kapunongan mao ang moawhag sa mga babaye sa pagpangita ug pagtabang sa timawa, maghalad og matarung nga pagkorihir niadtong nasayop, ug molig-on sa komunidad. Dayon iyang giimbitar ang mga babaye sa pagpili og presidente, kinsa mopili og duha ka mga magtatambag, sama sa mga korum sa priesthood. Sa unang higayon, ang mga babaye adunay opisyal nga awtoridad ug mga responsibilidad sa simbahan.30
Ang higala ni Emma nga si Ann Whitney mi-nominate niya nga mahimong presidente, ug ang tanang mga babaye sa kwarto miuyon. Dayon si Emma mitudlo nila ni Sarah Cleveland ug Ann nga iyang mga magtatambag.
Gibasa ni Joseph ang pagpadayag nga iyang nadawat alang ni Emma niadtong 1830 ug mipahibalo nga siya na-orden o na-set-apart nianang higayuna sa pagpasabut sa mga kasulatan ug sa pagtudlo sa mga babaye sa simbahan. Ang Ginoo mitawag kaniya nga usa ka “pinili nga babaye,” gipasabut ni Joseph, tungod kay napili siya nga modumala.
Si John Taylor dayon mi-orden ni Sarah ug Ann isip magtatambag ni Emma ug mikumpirma ni Emma sa iyang bag-ong calling, mipanalangin kaniya sa kalig-on nga iyang gikinahanglan. Human makahatag og dugang nga mga instruksyon, gihatag ni Joseph ang miting ngadto kaniya, ug si John misugyot nga ilang hukman unsay ngalan sa kapunongan.
Ang mga magtatambag ni Emma mirekomendar nga tawgon nila kini og Nauvoo Female Relief Society, apan si John misugyot nga ang Nauvoo Female Benevolent Society, susama sa mga ngalan sa ubang mga kapunongan sa mga babaye sa tibuok nasud.31
Miingon si Emma nga mas gusto niya ang “relief” kay sa “benevolent,” apan si Eliza Snow misugyot nga ang “relief” nagpasabut og dili ordinaryo nga tubag sa usa ka dako nga kalamidad. Dili ba ang ilang kapunongan mas motutok sa mga problema sa kada adlaw nga kinabuhi?
“Mohimo kita og butang nga dili ordinaryo,” miinsister si Emma. “Kon ang usa ka barko makaagi og kusog nga sulog sa mabaw nga bahin nga dunay daghang mga Mormon nga sakay, isipon nato kana nga usa ka panawagan alang sa kahupayan. Paabuton nato ang talagsaong mga okasyon ug dinaliang mga tawag.”
Gipamalandungan ang iyang mga pulong. “Ako uyon sa imong punto,” miingon si John. “Ang imong mga argumento lig-on kaayo dili ko makalalis niini.”
Makamao sa balaknong mga pulong, si Eliza mirekomendar og gamay nga kausaban sa ngalan. Imbis Nauvoo Female Relief Society, misugyot siya nga “ang Female Relief Society of Nauvoo.” Ang mga babaye miuyon.
“Ang matag sakop kinahanglang determinado nga mohimo og kaayohan,” misulti kanila si Emma. Labaw sa tanan, ang gugma nga putli kinahanglan nga modasig sa ilang kapunongan. Sama sa gitudlo ni Pablo sa Bag-ong Tugon, ang maayong mga buhat dili makahatag nila og kaayohan kon ang gugma nga putli wala diha sa ilang mga kasingkasing.32
Kanunay makigkita si Joseph sa Relief Society nianang tingpamulak. Ang organisasyon kusog nga mitubo, nadugangan kini sa dugay na nga mga Santos ug bag-ong nabunyagan nga mga milalin sa gidaghanon niini. Sa iyang ikatulo nga miting, ang mga babaye walay igong lugar sa tindahan ni Joseph alang sa tanan nga gustong motambong. Gusto ni Joseph nga ang Relief Society moandam sa ilang mga miyembro sa pagtuga sa gahum nga ilang dawaton sa templo. Gitudloan niya ang mga babaye nga sila kinahanglan gayud nga mahimong usa ka pinili nga kapunongan, linain gikan sa dautan ug maglihok sumala sa sumbanan sa karaang priesthood.33
Sa kasamtangan, si Joseph nabalaka sa mga report nga pipila ka mga lalaki sa Nauvoo adunay sekswal nga relasyon nga gawas sa kaminyoon ug nangangkon nga ang mao nga kinaiya gitugutan ra basta gihimo lang sa tago. Ang pagkatintal, nga nakadaot sa mga pagtulun-an sa Ginoo bahin sa kaputli, gipakatap sa mga tawo nga wala magpakabana sa mga sugo. Kon kining mga tawhana magpadayon nga dili mahunong, mahimon silang seryoso nga babag alang sa mga Santos.
Niadtong Marso 31, si Joseph mihangyo ni Emma nga mobasa og sulat ngadto sa Relief Society, magtambag nila nga ang mga kadagkoan sa simbahan dili gayud mouyon sa maong mga binuhatan. “Gusto nato nga mahunong sila,” pahayag sa sulat, “kay buot namo nga motuman sa mga sugo sa Dios sa tanang mga butang.”34
Labaw sa tanan, si Joseph gusto nga ang mga santos mahimong takus sa mga panalangin sa kahimayaan. “Kon kamo gusto nga moadto asa ang Dios, kinahanglan nga kamo mahimong sama sa Dios o maghupot sa mga baruganan nga gihuptan sa Dios,” gisultihan niya ang mga Santos nianang tingpamulak. “Kon magpalayo kita gikan sa Dios, maadto kita sa yawa ug mawala ang kahibalo, ug kon walay kahibalo dili kita maluwas.”35
Misalig siya sa kapangulohan sa Relief Society sa pagpangulo sa mga babaye sa simbahan ug sa pagtabang nila sa pag-amuma sa maong kahibalo ug pagkamatarung sa ilang kaugalingon.
“Kini nga kapunongan mao ang pagdawat og instruksyon pinaagi sa kapunongan nga gi-establisar sa Dios—pinaagi sa pamaagi niadtong gitudlo sa paggiya,” mipahayag siya. “Karon akong ihatag ang yawe kanimo sa ngalan sa Dios, ug kini nga kapunongan magmaya ug ang kahibalo ug kaalam modagayday gikan niining higayuna.”36
Niadtong Mayo 4, 1842, sila si Brigham Young, Heber Kimball, ug Willard Richards nakakita nga nausab ang kwarto ni Joseph sa ibabaw. Sa bongbong diha ang bag-ong gipintal nga mural. Gagmay nga mga kahoy ug mga tanom sa duol nagsugyot og tanaman. Laing parte sa kwarto gilain nga dunay gibutang nga kurtina.37
Gidapit ni Joseph ang tulo ka apostoles nga moanha sa tindahan nianang buntaga alang sa espesyal nga miting. Iyang gidapit ang iyang igsoon nga si Hyrum ug si William Law, mga sakop sa Unang Kapangulohan ug duha sa iyang suod nga mga magtatambag. Usab sa nanambong mao ang mga bishop nga sila si Newel Whitney ug George Miller, ang presidente sa stake sa Nauvoo, nga si William Marks, ug ang lider sa simbahan nga si James Adams.38
Sa nahibiling oras sa kahapunon, ang propeta mipaila og ordinansa ngadto sa mga lalaki. Kabahin niini naglakip sa mga paghugas ug mga pagdihog, susama sa mga ordinansa nga gihatag didto sa templo sa Kirtland ug sa karaang tabernakulo sa Hebreohanon. Ang mga lalaki gihatagan og sagrado nga undergarment nga motabon sa ilang mga lawas ug magpahinumdom nila sa ilang mga pakigsaad.39
Ang bag-ong ordinansa nga gipadayag sa Dios ngadto ni Joseph nagtudlo og mahimayaong mga kamatuoran. Nagpasabut kini sa mga istorya sa kasulatan bahin sa Paglalang ug sa Tanaman sa Eden, lakip sa bag-ong istorya nga makita sa hubad ni Abraham, sa paggiya sa mga tawo sa hinay-hinay sa plano sa kaluwasan. Sama ni Abraham ug sa ubang karaang mga propeta, nakadawat sila og kahibalo nga makapahimo nila nga makapabalik ngadto sa presensya sa Dios.40 Sa panahon sa ordinansa, ang mga tawo mihimo og mga pakigsaad nga magpuyo nga matarung, putli nga kinabuhi ug mopahinungod sa kaugalingon sa pagserbisyo sa Ginoo.41
Gitawag ni Joseph ang ordinansa ang pagtuga ug misalig sa mga tawo nga dili ipadayag ang espesyal nga kahibalo nga ilang nakat-unan nianang adlawa. Sama sa pagtuga sa gahum didto sa Kirtland, ang ordinansa sagrado ug alang lang sa espirituhanon. Apan mas labaw pa sa pagbu-bu sa espirituhanong mga gasa ug balaang gahum sa mga elder sa simbahan. Sa dihang nahuman na ang templo, ang mga lalaki ug mga babaye makadawat na sa ordinansa, makalig-on sa ilang relasyon sa pakigsaad ngadto sa Dios, ug makakita og mas dakong gahum ug panalipod sa pagpahinungod sa ilang mga kinabuhi ngadto sa gingharian sa Dios.42
Sa dihang ang seremonya nahuman, si Joseph mihatag og pipila ka mga instruksyon ngadto ni Brigham. “Wala kini masakto sa pagkahan-ay,” gisultihan niya ang apostol, “apan nahimo nato ang tanang kutob sa atong mahimo ubos sa mga sirkumstansya diin kita mahimutang, ug ako gusto nga sugdan ninyo sa pagpahimutang ug pag-organisar ug paghimo og mga sistema niining tanang mga seremonya.”43
Sa ilang pagbiya sa tindahan nianang adlawa, ang mga lalaki nakadayeg sa mga kamatuoran nga ilang nakat-unan gikan sa pagtuga. Ang pipila ka mga aspeto sa ordinansa mipahinumdom ni Heber Kimball sa mga seremonya sa Mason. Sa mga miting sa Freemasonry, ang mga lalaki naghimo og istorya nga nagsimbolo mahitungod sa arkitekto sa templo ni Solomon. Ang mga Mason nakat-on og mga sinyas ug mga pulong nga ilang gipanumpaan nga himoong sekreto, ang tanan niini nagsimbolo nga sila nagtukod og solido nga pundasyon ug nagdugang og kahayag ug kahibalo niini sa hinay-hinay.44
Apan ang pagtuga usa ka ordinansa sa priesthood nga alang sa mga lalaki ug mga babaye, ug kini nagtudlo og sagrado nga mga kamatuoran nga wala sa Masonry, nga gusto ni Heber nga makat-unan sa uban.
“Nakadawat kita og pipila ka bililhon nga mga butang pinaagi sa propeta bahin sa priesthood nga makapalipay sa inyong kalag,” misulat si Heber ngadto ni Parley ug ni Mary Ann Pratt didto sa England. “Dili ko makahatag niini nganha kaninyo sa papel, kay kini dili angay isulat, busa kamo kinahanglan nga moanhi ug makakuha niini sa inyong kaugalingon.”45