ຊື່ຂອງສາດສະໜາຈັກບໍ່ສາມາດຕໍ່ລອງໄດ້
ເມື່ອເຮົາເຕັມໃຈທີ່ຈະເຮັດຕາມຄຳແນະນຳຂອງພຣະຜູ້ເປັນເຈົ້າ ດັ່ງທີ່ຖືກເປີດເຜີຍຜ່ານທາງສາດສະດາທີ່ມີຊີວິດຢູ່ຂອງພຣະອົງ, ໂດຍສະເພາະ ຖ້າມັນຂັດກັບຄວາມຄິດເບື້ອງຕົ້ນຂອງເຮົາ, ທີ່ຮຽກຮ້ອງຄວາມຖ່ອມຕົວ ແລະ ການເສຍສະລະ, ແລ້ວພຣະຜູ້ເປັນເຈົ້າຈະອວຍພອນເຮົາດ້ວຍພະລັງທາງວິນຍານເພີ່ມເຕີມ.
ຢູ່ທີ່ງານຖະແຫລງຂ່າວ ໃນວັນທີ 16 ເດືອນສິງຫາ, 2018, ປະທານຣະໂຊ ເອັມ ແນວສັນ ໄດ້ກ່າວວ່າ: “ພຣະຜູ້ເປັນເຈົ້າໄດ້ເຮັດໃຫ້ຂ້າພະເຈົ້າຮູ້ເຖິງຄວາມສຳຄັນຂອງຊື່ທີ່ພຣະອົງໄດ້ຕັ້ງໄວ້ສຳລັບສາດສະໜາຈັກຂອງພຣະອົງ, ນັ້ນຄື ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.1 ເຮົາມີວຽກງານຢູ່ຕໍ່ໜ້າເຮົາ ທີ່ຈະເຮັດໃຫ້ຕົວເຮົາເອງສອດຄ່ອງກັບພຣະປະສົງຂອງພຣະອົງ.”2
ສອງວັນຕໍ່ມາ, ໃນວັນທີ 18 ເດືອນສິງຫາ, ຂ້າພະເຈົ້າຢູ່ກັບປະທານແນວສັນຢູ່ທີ່ເມືອງມອນທະຣີອໍ, ປະເທດການາດາ. ຫລັງຈາກກອງປະຊຸມຂອງສະມາຊິກຂອງພວກເຮົາ ຢູ່ທີ່ສູນກາງປະຊຸມ Palais de Congrés, ທີ່ໜ້າປະທັບໃຈ, ປະທານແນວສັນໄດ້ຕອບຄຳຖາມຈາກນັກຂ່າວ. ເພິ່ນໄດ້ຮັບຮູ້ວ່າມັນ “ກໍຈະເປັນການທ້າທາຍທີ່ຈະກັບມາ [ສະຖາປະນາຊື່ຂອງສາດສະໜາຈັກຄືນອີກ ແລະ] ແກ້ໄຂປະເພນີທີ່ມີກັນມາຫລາຍກວ່າຮ້ອຍປີ.” ແຕ່ເພິ່ນໄດ້ກ່າວຕື່ມວ່າ, “ຊື່ຂອງສາດສະໜາຈັກບໍ່ສາມາດຕໍ່ລອງໄດ້.”3
ເຈັດອາທິດຕໍ່ມາ, ປະທານແນວສັນໄດ້ກ່າວຢູ່ທີ່ກອງປະຊຸມໃຫຍ່ວ່າ: “ພຣະຜູ້ເປັນເຈົ້າໄດ້ເຮັດໃຫ້ຂ້າພະເຈົ້າ ຮູ້ເຖິງຄວາມສຳຄັນຂອງຊື່ທີ່ພຣະອົງໄດ້ຕັ້ງໄວ້ສຳລັບສາດສະໜາຈັກຂອງພຣະອົງ, ນັ້ນຄື ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. … ພຣະຜູ້ຊ່ວຍໃຫ້ລອດເອງ ໄດ້ກ່າວວ່າ, ‘ສາດສະໜາຈັກຂອງເຮົາຈະຕ້ອງຖືກເອີ້ນຕາມນັ້ນ.’” ແລ້ວປະທານແນວສັນໄດ້ກ່າວຊ້ຳວ່າ, “ຊື່ຂອງສາດສະໜາຈັກບໍ່ສາມາດຕໍ່ລອງໄດ້.”4
ຄຳຖາມທີ່ດີ
ແລ້ວກໍມີຄຳຖາມທີ່ດີວ່າ: ເປັນຫຍັງຈຶ່ງເປັນເວລານີ້, ເມື່ອເປັນເວລາຫລາຍທົດສະວັດ ເຮົາໄດ້ຍອມຮັບຊື່ຫລິ້ນ “ມໍມອນ”? “ກຸ່ມນັກຮ້ອງ Mormon Tabernacle,” ວິດີໂອໂຄສະນາ “I’m a Mormon [ເຮົາເປັນຄົນມໍມອນ],” ເພງປະຖົມໄວຊື່ “I Am a Mormon Boy [ເຮົາເປັນເດັກມໍມອນ]”?
ຄຳສອນຂອງພຣະຄຣິດບໍ່ປ່ຽນແປງ ແລະ ເປັນນິດ. ແຕ່ຂັ້ນຕອນສະເພາະ ແລະ ສຳຄັນຂອງວຽກງານຂອງພຣະຜູ້ຊ່ວຍໃຫ້ລອດກໍຖືກເປີດເຜີຍໃນເວລາທີ່ເໝາະສົມຂອງມັນ. ມື້ເຊົ້ານີ້ປະທານແນວສັນໄດ້ກ່າວວ່າ, “ການຟື້ນຟູແມ່ນຂະບວນການ, ບໍ່ແມ່ນເຫດການໃດໜຶ່ງ.”5 ແລະ ພຣະຜູ້ເປັນເຈົ້າໄດ້ກ່າວວ່າ, “ທຸກສິ່ງຕ້ອງເກີດຂຶ້ນໃນເວລາຂອງມັນ.”6 ບັດນີ້ມັນເປັນເວລາຂອງເຮົາ, ແລະ ເຮົາຕ້ອງສະຖາປະນາຊື່ທີ່ຖືກເປີດເຜີຍຂອງສາດສະໜາຈັກຄືນໃໝ່.
ເອກະລັກ ແລະ ຈຸດໝາຍປາຍທາງຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍຮຽກຮ້ອງໃຫ້ເຮົາຖືກເອີ້ນຕາມພຣະນາມຂອງພຣະອົງ. ເມື່ອບໍ່ດົນມານີ້ ຂ້າພະເຈົ້າໄດ້ຢູ່ທີ່ເມືອງເຄີດແລນ, ລັດໂອໄຮໂອ, ບ່ອນທີ່ສາດສະດາໂຈເຊັບ ສະມິດ ໄດ້ທຳນາຍແກ່ສະມາຊິກຂອງສາດສະໜາຈັກບໍ່ເທົ່າໃດຄົນວ່າ, “ສາດສະໜາຈັກນີ້ຈະອອກໄປຈົນເຕັມທະວີບອາເມຣິກາເໜືອ ແລະ ໃຕ້—ມັນຈະອອກໄປຈົນເຕັມແຜ່ນດິນໂລກ.”7 ພຣະຜູ້ເປັນເຈົ້າໄດ້ບັນຍາຍວຽກງານຂອງຍຸກສະໄໝນີ້ ວ່າເປັນ “ວຽກງານທີ່ແປກປະຫລາດ ແລະ ອັດສະຈັນ.”8 ພຣະອົງໄດ້ກ່າວເຖິງ “ພັນທະສັນຍາ [ທີ່ຈະ] ເກີດເປັນຈິງໃນວັນເວລາສຸດທ້າຍ,” ອະນຸຍາດໃຫ້ “ທຸກຕະກຸນຂອງ … ແຜ່ນດິນໂລກໄດ້ຮັບພອນ.”9
ຖ້ອຍຄຳຂອງກອງປະຊຸມນີ້ກໍຖືກແປເປັນ 55 ພາສາ. ໃນທີ່ສຸດ, ຖ້ອຍຄຳເຫລົ່ານີ້ກໍຈະຖືກຮັບຟັງ ແລະ ອ່ານໃນ 98 ພາສາຢູ່ໃນ 220 ກວ່າປະເທດ ແລະ ເຂດແດນ.
ເມື່ອພຣະຜູ້ຊ່ວຍໃຫ້ລອດສະເດັດຄືນມາໃນເດຊານຸພາບ ແລະ ລັດສະໝີພາບ, ສະມາຊິກທີ່ຊື່ສັດຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ຈະຢູ່ທ່າມກາງທຸກປະຊາຊາດ, ທຸກຜູ້ຄົນ, ທຸກເຊື້ອຊາດ, ແລະ ທຸກວັດທະນະທຳຂອງໂລກ.
ອິດທິພົນທີ່ເພີ່ມຂຶ້ນຂອງສາດສະໜາຈັກ
ອິດທິພົນຂອງສາດສະໜາຈັກທີ່ຟື້ນຟູຂອງພຣະເຢຊູຄຣິດ ຈະບໍ່ມີຢູ່ພຽງແຕ່ໃນຜູ້ຄົນທີ່ເປັນສະມາຊິກຂອງສາດສະໜາຈັກເທົ່ານັ້ນ. ເປັນເພາະການສະແດງໃຫ້ປະຈັກຈາກສະຫວັນໃນວັນເວລາຂອງເຮົາ, ເປັນເພາະພຣະຄຳພີທີ່ສັກສິດໄດ້ຖືກຟື້ນຟູສູ່ແຜ່ນດິນໂລກ, ແລະ ຂອງປະທານທີ່ມີພະລັງແຫ່ງພຣະວິນຍານບໍລິສຸດ, ເຮົາຈະເປັນແສງສະຫວ່າງຢູ່ເທິງເນີນພູ ຂະນະທີ່ຄວາມບໍ່ເຊື່ອໃນພຣະເຢຊູຄຣິດຈະເຮັດໃຫ້ໂລກມືດມົວ. ເຖິງແມ່ນວ່າຫລາຍຄົນຈະປ່ອຍໃຫ້ໂລກເຮັດໃຫ້ເຂົາເຈົ້າສົງໄສສັດທາຂອງເຂົາເຈົ້າທີ່ມີໃນພຣະຜູ້ໄຖ່, ເຮົາຈະ “ບໍ່ຖືກຍ້າຍອອກໄປຈາກບ່ອນ [ຂອງເຮົາ].”10 ຊາວຄຣິດທີ່ບໍ່ໄດ້ເປັນສະມາຊິກຂອງສາດສະໜາຈັກຂອງເຮົາຈະຕ້ອນຮັບບົດບາດຂອງເຮົາ ແລະ ພະຍານທີ່ແນ່ນອນຂອງເຮົາເຖິງພຣະຄຣິດ. ແມ່ນແຕ່ຊາວຄຣິດເຫລົ່ານັ້ນ ຜູ້ທີ່ເບິ່ງເຮົາດ້ວຍຄວາມສົງໄສ ກໍຈະຍອມຮັບເຮົາເປັນເພື່ອນ. ໃນວັນເວລາທີ່ຈະມາເຖິງນັ້ນ, ເຮົາຈະຖືກເອີ້ນຕາມພຣະນາມຂອງພຣະເຢຊູຄຣິດ.
ຂໍຂອບໃຈສຳລັບຄວາມພະຍາຍາມທີ່ສູງສົ່ງຂອງທ່ານ ທີ່ຈະສົ່ງເສີມຊື່ແທ້ຂອງສາດສະໜາຈັກ. ຢູ່ທີ່ກອງປະຊຸມໃຫຍ່ເມື່ອສາມປີກ່ອນ, ປະທານແນວສັນໄດ້ສັນຍາກັບເຮົາວ່າ “ຄວາມຕັ້ງໃຈທີ່ລະມັດລະວັງຂອງເຮົາ ທີ່ຈະເອີ້ນຊື່ທີ່ຖືກຕ້ອງຂອງສາດສະໜາຈັກຂອງພຣະຜູ້ຊ່ວຍໃຫ້ລອດ … [ຈະເຮັດໃຫ້ເຮົາ] ມີສັດທາຫລາຍຂຶ້ນ ແລະ ໄດ້ຮັບພະລັງທາງວິນຍານທີ່ຍິ່ງໃຫຍ່ກວ່າ.”11
ຄຳສັນຍານີ້ກໍບັນລຸຜົນສຳເລັດແລ້ວໂດຍສານຸສິດທີ່ອຸທິດຕົນຕະຫລອດທົ່ວໂລກ.12
ບຣາເດີ ລາວຣີ ອາໂຮລາ ຈາກສະຫະລັດພາກຕາເວັນອອກ ຍອມຮັບວ່າ ບາງເທື່ອລາວພົບເຫັນວ່າມັນອຶດອັດໃຈທີ່ຈະບອກຊື່ເຕັມຂອງສາດສະໜາຈັກ. ແຕ່ເພາະມັນເປັນຄຳແນະນຳຂອງສາດສະດາ, ລາວຈຶ່ງພະຍາຍາມຕໍ່ໄປ. ມີໂອກາດໜຶ່ງ, ລາວໄດ້ໄປຢາມເພື່ອນຢູ່ໂບດຂອງສາດສະໜາອື່ນ. ຕໍ່ໄປນີ້ແມ່ນຖ້ອຍຄຳຂອງລາວ:
“ຄົນທີ່ຮູ້ຈັກກັນໄດ້ຖາມວ່າ, “ເຈົ້າເປັນຄົນມໍມອນບໍ?”
“ຂ້າພະເຈົ້າໄດ້ຕອບວ່າ, ‘ແມ່ນແລ້ວ, ຂ້ອຍເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.’ ລາວໄດ້ເລີ່ມຖາມຄຳຖາມອີກຫລາຍຂໍ້, ແຕ່ລະຂໍ້ເລີ່ມດ້ວຍຖ້ອຍຄຳທີ່ວ່າ: ‘ສາດສະໜາຈັກມໍມອນເຊື່ອ … ?’ ແລະ ແຕ່ລະເທື່ອ, ຂ້າພະເຈົ້າກໍໄດ້ຕອບໄປດ້ວຍວະລີທີ່ວ່າ: ‘ໃນສາດສະໜາຈັກທີ່ຟື້ນຟູຂອງ [ພຣະເຢຊູ] ຄຣິດ, ເຮົາເຊື່ອ …’
“… ເມື່ອລາວເຫັນໄດ້ວ່າ ຂ້າພະເຈົ້າບໍ່ໄດ້ຍອມຮັບຊື່ ‘ມໍມອນ,’ ລາວກໍໄດ້ຖາມຕົງໆວ່າ, ‘ເຈົ້າບໍ່ໄດ້ເປັນມໍມອນບໍ?’
“ສະນັ້ນຂ້າພະເຈົ້າກໍໄດ້ຖາມລາວຖ້າຫາກລາວຮູ້ບໍວ່າມໍມອນເປັນໃຜ—ລາວບໍ່ຮູ້. ຂ້າພະເຈົ້າໄດ້ບອກລາວວ່າ ມໍມອນເປັນສາດສະດາ … [ແລະ ຂ້າພະເຈົ້າກໍ] ຮູ້ວ່າເປັນກຽດທີ່ມີສ່ວນກ່ຽວຂ້ອງກັບ [ເພິ່ນ].
“‘ແຕ່,’ ຂ້າພະເຈົ້າໄດ້ກ່າວຕໍ່ໄປວ່າ, ‘ມໍມອນບໍ່ໄດ້ຕາຍເພື່ອບາບຂອງຂ້ອຍ. ມໍມອນບໍ່ໄດ້ … ທົນທຸກທໍລະມານຢູ່ທີ່ສວນເຄັດເຊມາເນ ຫລື ຕາຍຢູ່ເທິງໄມ້ກາງແຂນ [ແທນຂ້ອຍ]. … ພຣະເຢຊູຄຣິດເປັນພຣະເຈົ້າ ແລະ ພຣະຜູ້ຊ່ວຍໃຫ້ລອດຂອງຂ້ອຍ. … ແລະ ໃນພຣະນາມຂອງພຣະອົງທີ່ຂ້ອຍຢາກເປັນທີ່ຮູ້ຈັກກັນ. …’
ຫລັງຈາກສອງສາມວິນາທີໃນຄວາມງຽບ, [ເພື່ອນຄົນນັ້ນໄດ້ເປັ່ງສຽງວ່າ], ‘ຖ້າແນວນັ້ນ, ເຈົ້າກໍເປັນຄົນຄຣິດສະຕຽນ ຊັ້ນນ່າ!’”13
ຈື່ຈຳຖ້ອຍຄຳຂອງປະທານແນວສັນໄດ້ບໍ? “ຂ້າພະເຈົ້າສັນຍາວ່າ ຖ້າຫາກເຮົາເຮັດໃຫ້ດີທີ່ສຸດ ໃນການເອີ້ນຊື່ທີ່ຖືກຕ້ອງຂອງສາດສະໜາຈັກຂອງພຣະຜູ້ເປັນເຈົ້າ, ແລ້ວພຣະອົງ ຜູ້ເປັນເຈົ້າຂອງສາດສະໜາຈັກ ຈະຖອກເທອຳນາດ ແລະ ພອນຂອງພຣະອົງລົງມາເທິງຫົວຂອງໄພ່ພົນຍຸກສຸດທ້າຍໃນວິທີທີ່ເຮົາບໍ່ເຄີຍເຫັນມາກ່ອນ.”14
ພຣະຜູ້ເປັນເຈົ້າຈະເປີດທາງສະເໝີ
ພຣະຜູ້ເປັນເຈົ້າຈະຮັກສາຄຳສັນຍາຂອງພຣະອົງສະເໝີ. ພຣະອົງຈະເປີດທາງໃຫ້ເຮົາສະເໝີ ຂະນະທີ່ເຮົາເຮັດວຽກງານຂອງພຣະອົງ.
ເປັນເວລາຫລາຍປີທີ່ພວກເຮົາຫວັງທີ່ຈະຊື້ ຊື່ໂດເມນເວັບໄຊ ChurchofJesusChrist.org ແລະ ChurchofJesusChrist.com. ໃນອິນເຕີເນັດ. ທັງສອງຢ່າງບໍ່ມີຂາຍ. ໃກ້ຕອນທີ່ປະທານແນວສັນຈະປະກາດ, ທັນໃດນັ້ນ ທັງສອງຢ່າງກໍມີຂາຍ. ມັນເປັນສິ່ງມະຫັດສະຈັນ.15
ພຣະຜູ້ເປັນເຈົ້າໄດ້ຂະຫຍາຍຄວາມພະຍາຍາມຂອງເຮົາ ໃນການແກ້ໄຂຊື່ທີ່ຕິດມາກັບສາດສະໜາຈັກເປັນເວລາດົນນານ.
ໃນການດຳເນີນໄປໜ້າດ້ວຍສັດທາ, ຊື່ຂອງກຸ່ມນັກຮ້ອງ ມໍມອນແທັບເບິແນັກໂກ ກໍປ່ຽນມາເປັນ ກຸ່ມນັກຮ້ອງແທັບເບິແນັກໂກທີ່ບໍລິເວນພຣະວິຫານ. ເວັບໄຊ LDS.org, ຊຶ່ງມີຜູ້ເຂົ້າຊົມຫລາຍກວ່າ 21 ລ້ານຄົນແຕ່ລະເດືອນ, ກໍໄດ້ປ່ຽນມາເປັນ ChurchofJesusChrist.org.16 ຊື່ຂອງ LDS Business College ກໍປ່ຽນມາເປັນ Ensign College. ເວັບໄຊ Mormon.org ໄດ້ຖືກສົ່ງຕໍ່ໄປທີ່ ChurchofJesusChrist.org. ຜະລິດຕະພັນຫລາຍກວ່າພັນຢ່າງທີ່ມີຊື່ “ມໍມອນ” ຫລື “LDS” ກໍປ່ຽນແລ້ວ. ໄພ່ພົນຍຸກສຸດທ້າຍທີ່ຊື່ສັດກໍໄດ້ປັບປ່ຽນເວັບໄຊ, ພອດແຄສ໌, ແລະ ບັນຊີ ທວີດເຕີ ຂອງເຂົາເຈົ້າ.
ພວກເຮົາໄດ້ນຳໃຊ້ສັນຍາລັກໃໝ່ທີ່ເຈາະຈົງຢູ່ທີ່ພຣະເຢຊູຄຣິດ.
ຢູ່ທາງກາງຂອງສັນຍາລັກ ມີຮູບທີ່ທ່ານທໍວາເຊັນ ໄດ້ແກະສະຫລັກຈາກຫີນອ່ອນເພື່ອເຮັດເປັນຮູບປັ້ນ ພຣະຄຣິດ. ມັນເປັນພາບຂອງພຣະຜູ້ເປັນເຈົ້າຜູ້ຟື້ນຊີບ, ທີ່ຊົງພຣະຊົນ ກຳລັງເອື້ອມອອກໄປໂອບກອດທຸກຄົນທີ່ຈະມາຫາພຣະອົງ.
“ຕາມສັນຍາລັກ, ພຣະເຢຊູຄຣິດຢືນຢູ່ກ້ອງປະຕູໂຂງ [ເຕືອນ] ເຮົາເຖິງພຣະຜູ້ຊ່ວຍໃຫ້ລອດທີ່ຟື້ນຄືນພຣະຊົນແລ້ວກຳລັງອອກມາຈາກອຸບມຸງ.”17
ສັນຍາລັກໃໝ່ຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ກໍໄດ້ຖືກດັດແປງຫລາຍກວ່າ 50 ພາສາ. ຊື່ໂດເມນໃໝ່ ກໍມີຕະຫລອດທົ່ວໂລກ.
ຄວາມກະຕັນຍູສຳລັບຄວາມຊ່ວຍເຫລືອຂອງຄົນອື່ນ
ພວກເຮົາຂໍຂອບໃຈຜູ້ຄົນທີ່ດີ ແລະ ມີພະຄຸນທັງຫລາຍ ຜູ້ທີ່ນັບຖືຄວາມປາດຖະໜາຂອງພວກເຮົາ ທີ່ຈະຖືກເອີ້ນຕາມຊື່ທີ່ຖືກຕ້ອງຂອງພວກເຮົາ. ເມື່ອບໍ່ດົນມານີ້ ຂ້າພະເຈົ້າໄດ້ອ່ານບົດຄວາມໜຶ່ງທີ່ອ້າງເຖິງຄຸນພໍ່ກາໂຕລິກ ຜູ້ໄດ້ກ່າວເຖິງ “ໄພ່ພົນຍຸກສຸດທ້າຍ.”18 ຕອນຂ້າພະເຈົ້າໄດ້ໄປຢ້ຽມຢາມຜູ້ນຳຂອງສາດສະໜາຈັກຊາວຄຣິດແຫ່ງໜຶ່ງເດືອນແລ້ວນີ້ ໃນສະຫະລັດພາກຕາເວັນອອກ, ເພິ່ນໄດ້ກ່າວເຖິງສາດສະໜາຈັກເປັນເທື່ອທຳອິດດ້ວຍຊື່ເຕັມ, ແລະ ຕໍ່ຈາກນັ້ນ ກໍໄດ້ເອີ້ນຫລາຍເທື່ອວ່າ “ສາດສະໜາຈັກຂອງພຣະເຢຊູຄຣິດ.”
ພວກເຮົາຮັບຮູ້ວ່າການຕື່ມອີກຫົກຄຳໃສ່ຊື່ຂອງພວກເຮົາຈະບໍ່ເປັນເລື່ອງງ່າຍສຳລັບໜ່ວຍສື່ສານ, ແຕ່ ດັ່ງທີ່ປະທານແນວສັນໄດ້ບອກລ່ວງໜ້າວ່າ “ໜ່ວຍສື່ສານທີ່ຮູ້ຈັກຮັບຜິດຊອບ ຈະເຂົ້າໃຈຕໍ່ຄຳຮຽກຮ້ອງນີ້.”19 ຂໍຂອບໃຈທີ່ໃຫ້ການພິຈາລະນາອັນດຽວກັນທີ່ໃຫ້ແກ່ອົງການວັດທະນະທຳ, ກິລາ, ການເມືອງ, ຫລື ຊຸມຊົນ ໂດຍການໃຊ້ຊື່ທີ່ພວກເຮົາເລືອກໃຊ້.
ຈະມີຜູ້ຄົນທີ່ຫວັງຈະລົບກວນ ຫລື ລົດຄວາມຈິງຈັງຂອງພາລະກິດຂອງເຮົາ, ທີ່ຈະເອີ້ນເຮົາຕາມຊື່ “ຊາວມໍມອນ” ຫລື “ໂບດມໍມອນ” ຕໍ່ໄປ. ດ້ວຍຄວາມສຸພາບ, ພວກເຮົາຂໍຮ້ອງໃຫ້ໜ່ວຍສື່ສານ ຈົ່ງໃຫ້ກຽດແກ່ຄວາມປາດຖະໜາຂອງພວກເຮົາທີ່ຈະຖືກເອີ້ນຕາມຊື່ທີ່ເປັນຊື່ຂອງພວກເຮົາມາເກືອບ 200 ປີແລ້ວ.
ຄວາມກ້າຫານຂອງໄພ່ພົນຍຸກສຸດທ້າຍ
ມີໄພ່ພົນເປັນຈຳນວນຫລາຍພັນຄົນ ຜູ້ທີ່ໄດ້ປະກາດຊື່ຂອງສາດສະໜາຈັກຢ່າງກ້າຫານ. ຂະນະທີ່ເຮົາເຮັດພາກສ່ວນຂອງເຮົາ, ຄົນອື່ນກໍຈະເຮັດຕາມ. ຂ້າພະເຈົ້າມັກເລື່ອງລາວນີ້ ຈາກປະເທດຕາຮີຕີ.
ນາງອິຣີອູຣາ ຊອງ ອາຍຸ 10 ປີ ຕັ້ງໃຈທີ່ຈະເຮັດຕາມຄຳແນະນຳຂອງປະທານແນວສັນ.
“ຢູ່ໃນຫ້ອງຮຽນຂອງນາງ ເຂົາເຈົ້າໄດ້ສົນທະນາວັນທ້າຍອາທິດຂອງພວກເຂົາ … ແລະ ນາງອິຣີອູຣາໄດ້ເວົ້າກ່ຽວກັບ … ສາດສະໜາຈັກ.
“ວາອິເຕ ພີຟາວ ຄູຂອງນາງ, ໄດ້ເວົ້າວ່າ, ‘ໂອ້, ເຈົ້າເປັນຄົນມໍມອນເນາະ?’
“ນາງອິຣີອູຣາໄດ້ປະກາດຢ່າງອາດຫານວ່າ, ‘ບໍ່, … ຂ້ານ້ອຍເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ!’
“ຄູຂອງນາງໄດ້ຕອບວ່າ, ‘ແມ່ນແລ້ວ, … ເຈົ້າເປັນຄົນມໍມອນ.’
“ນາງອິຣີອູຣາໄດ້ຢືນຢັນວ່າ, ‘ບໍ່ນາຍຄູ, ຂ້ານ້ອຍເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ!’
“ຄູພີຟາວກໍປະທັບໃຈກັບຄວາມເຊື່ອໝັ້ນຂອງນາງອິຣີອູຣາ ແລະ ໄດ້ຄິດວ່າເປັນຫຍັງນາງຈຶ່ງບໍ່ຫວັ່ນໄຫວໃນການນຳໃຊ້ຊື່ຍາວໆນັ້ນ ຂອງສາດສະໜາຈັກຂອງນາງ. [ລາວຈຶ່ງໄດ້ຕັດສິນໃຈຮຽນຮູ້ຕື່ມອີກກ່ຽວກັບສາດສະໜາຈັກ.]
“[ຕໍ່ມາ, ຖືກເອີ້ນວ່າ ຊິດສະເຕີ] ວາອິເຕ ພີຟາວ ທີ່ໄດ້ຮັບບັບຕິສະມາແລ້ວ [ລາວໄດ້ສະແດງຄວາມກະຕັນຍູ] ທີ່ນາງອິຣີອູຣາໄດ້ເຮັດຕາມຄຳແນະນຳຂອງປະທານແນວສັນ.”20
“ຊື່ຂອງສາດສະໜາຈັກບໍ່ສາມາດຕໍ່ລອງໄດ້.” ຂໍໃຫ້ເຮົາຈົ່ງດຳເນີນໄປໜ້າດ້ວຍສັດທາ. ເມື່ອເຮົາເຕັມໃຈທີ່ຈະເຮັດຕາມຄຳແນະນຳຂອງພຣະຜູ້ເປັນເຈົ້າ ດັ່ງທີ່ຖືກເປີດເຜີຍຜ່ານທາງສາດສະດາທີ່ມີຊີວິດຢູ່ຂອງພຣະອົງ, ໂດຍສະເພາະ ຖ້າມັນຂັດກັບຄວາມຄິດເບື້ອງຕົ້ນຂອງເຮົາ, ທີ່ຮຽກຮ້ອງຄວາມຖ່ອມຕົວ ແລະ ການເສຍສະລະ, ແລ້ວພຣະຜູ້ເປັນເຈົ້າຈະອວຍພອນເຮົາດ້ວຍພະລັງທາງວິນຍານເພີ່ມເຕີມ ແລະ ສົ່ງເຫລົ່າທູດຂອງພຣະອົງມາຊ່ວຍເຮົາ ແລະ ຢູ່ຄຽງຂ້າງເຮົາ.21 ເຮົາໄດ້ຮັບການຢືນຢັນຈາກພຣະຜູ້ເປັນເຈົ້າ ແລະ ຄວາມເຫັນຊອບຈາກພຣະອົງ.
ຂ້າພະເຈົ້າເປັນພະຍານເຖິງອຳນາດຈາກສະຫວັນ ທີ່ຢູ່ກັບສາດສະດາທີ່ຮັກແພງຂອງເຮົາ, ປະທານຣະໂຊ ເອັມ ແນວສັນ. ຄວາມປາດຖະໜາສູງສຸດຂອງເພິ່ນແມ່ນທີ່ຈະໃຫ້ພຣະຜູ້ເປັນເຈົ້າພໍພຣະໄທ ແລະ ອວຍພອນລູກໆຂອງພຣະບິດາເທິງສະຫວັນທຸກໆຄົນ. ຈາກປະສົບການສ່ວນຕົວ ແລະ ສັກສິດ, ຂ້າພະເຈົ້າເປັນພະຍານເຖິງຄວາມຮັກຂອງພຣະຜູ້ເປັນເຈົ້າທີ່ມີຕໍ່ເພິ່ນ. ເພິ່ນເປັນສາດສະດາຂອງພຣະເຈົ້າ.
ຂ້າພະເຈົ້າເປັນພະຍານວ່າ ພຣະເຢຊູຄືພຣະຄຣິດ, ພຣະບຸດຂອງພຣະເຈົ້າ. ໃນພຣະນາມຂອງພຣະເຢຊູຄຣິດ, ອາແມນ.