ສັດທາທີ່ຈະກະທຳ ແລະ ກາຍເປັນ

ໂດຍ ແອວເດີ ຊີໂຣ ສະມາຍ

ແຫ່ງສາວົກເຈັດສິບ

ຜ່ານທາງການອະທິຖານ, ການສຶກສາພຣະຄຳພີ, ແລະ ການກະທຳ, ເຮົາຈະສາມາດເປີດພອນຕ່າງໆແຫ່ງສະຫວັນ ແລະ ກາຍເປັນຜູ້ຕິດຕາມທີ່ດີກວ່າເກົ່າຂອງພຣະຜູ້ຊ່ວຍໃຫ້ລອດ ພຣະເຢຊູຄຣິດ.

ບໍ່ດົນຫລັງຈາກທີ່ຂ້າພະເຈົ້າໄດ້ຖືກເອີ້ນໃຫ້ຮັບໃຊ້ ເປັນເຈົ້າໜ້າທີ່ຊັ້ນຜູ້ໃຫຍ່ສາວົກເຈັດສິບ, ຂ້າພະເຈົ້າໄດ້ມີໂອກາດເວົ້າລົມກັບປະທານຣະໂຊ ເອັມ ແນວສັນ ປະມານສອງສາມນາທີ. ມັນເປັນການພົບປະໂດຍບໍ່ໄດ້ຕັ້ງໃຈໃນໂຮງອາຫານ, ແລະ ເພິ່ນໃຈດີຫລາຍທີ່ໄດ້ເຊີນໃຫ້ແອວເດີ ແອັສ ມາກ ພາມເມີ ແລະ ຂ້າພະເຈົ້ານັ່ງ ແລະ ກິນເຂົ້າສວຍນຳເພິ່ນ.

“ພວກເຮົາຈະສົນທະນາກ່ຽວກັບຫຍັງໃນຊ່ວງເວລາກິນເຂົ້າສວຍກັບສາດສະດາ?” ເປັນຄວາມຄິດຢ່າງໜຶ່ງທີ່ໄດ້ເຂົ້າມາໃນຈິດໃຈຂອງຂ້າພະເຈົ້າ. ດັ່ງນັ້ນຂ້າພະເຈົ້າຈຶ່ງໄດ້ຕັດສິນໃຈຖາມປະທານແນວສັນວ່າ ເພິ່ນມີຄຳແນະນຳ ຫລື ການຊີ້ນຳແນວໃດບໍສຳລັບຂ້າພະເຈົ້າທີ່ຫາກໍໄດ້ຮັບການເອີ້ນ. ຄຳຕອບຂອງເພິ່ນແມ່ນລຽບງ່າຍ ແລະ ກົງໄປກົງມາ; ເພິ່ນໄດ້ແນມເບິ່ງຂ້າພະເຈົ້າ ແລະ ເວົ້າວ່າ, “ແອວເດີ ສະມາຍ, ເຈົ້າໄດ້ຮັບການເອີ້ນໃນສິ່ງທີ່ເຈົ້າສາມາດກາຍເປັນໄດ້.” ຂ້າພະເຈົ້າຍ່າງອອກຈາກປະສົບການນັ້ນໄຕ່ຕອງກ່ຽວກັບສິ່ງທີ່ພຣະຜູ້ເປັນເຈົ້າປະສົງໃຫ້ຂ້າພະເຈົ້າກາຍເປັນ. ຂະນະທີ່ຂ້າພະເຈົ້າໄດ້ຄິດກ່ຽວກັບເລື່ອງນີ້, ຂ້າພະເຈົ້າຮັບຮູ້ໄດ້ວ່າ ພຣະອົງປະສົງໃຫ້ຂ້າພະເຈົ້າກາຍເປັນສາມີ, ເປັນພໍ່, ແລະ ເປັນລູກ ແລະ ເປັນຜູ້ຮັບໃຊ້ທີ່ດີກວ່າເກົ່າ. ຈາກນັ້ນຂ້າພະເຈົ້າຮັບຮູ້ໄດ້ວ່າທຸກສິ່ງນີ້ສາມາດບັນລຸໄດ້ຂະນະທີ່ຂ້າພະເຈົ້າພະຍາຍາມກາຍເປັນສານຸສິດທີ່ດີກວ່າເກົ່າຂອງພຣະຜູ້ຊ່ວຍໃຫ້ລອດ ພຣະເຢຊູຄຣິດ.

ກອງປະຊຸມໃຫຍ່ເທື່ອແລ້ວນີ້, ປະທານແນວສັນໄດ້ກ່າວວ່າ: “ກ່ອນຈະເຮັດຫຍັງໄດ້ດີ ຕ້ອງໃຊ້ຄວາມພະຍາຍາມ. ການກາຍເປັນສານຸສິດທີ່ແທ້ຈິງຂອງພຣະເຢຊູຄຣິດບໍ່ໄດ້ຖືກຍົກເວັ້ນ.”¹ ປະທານແນວສັນໄດ້ເຊື້ອເຊີນໃຫ້ເຮົາພະຍາຍາມຢ່າງໜັກເພື່ອກາຍເປັນສານຸສິດທີ່ດີກວ່າເກົ່າຂອງພຣະເຢຊູຄຣິດ. ເພິ່ນໄດ້ບອກກັບເຮົາວ່າ ເພື່ອທີ່ຈະກາຍເປັນເໝືອນດັ່ງພຣະຜູ້ຊ່ວຍໃຫ້ລອດຫລາຍຂຶ້ນ, ເຮົາຕ້ອງເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາ ໂດຍການທູນຂໍ, ກະທຳ, ແລະ ສຶກສາ, ໃນຈຳນວນຫລາຍໆສິ່ງ.

1. ທູນຂໍ

ເພິ່ນໄດ້ກ່າວວ່າ, “ຈົ່ງທູນຂໍຄວາມຊ່ວຍເຫລືອຈາກພຣະບິດາເທິງສະຫວັນຂອງທ່ານ, ໃນພຣະນາມຂອງພຣະເຢຊູຄຣິດ.”² ການທູນຂໍຜ່ານທາງການອະທິຖານເປັນສິ່ງສຳຄັນຢ່າງໜຶ່ງເພື່ອໃຫ້ຮູ້ເຖິງການເປັນສານຸສິດທີ່ດີກວ່າເກົ່າຂອງພຣະເຢຊູຄຣິດ.

ເມື່ອໃກ້ຈະເຖິງບັ້ນທ້າຍຂອງການປະຕິບັດສາດສະໜາກິດຂອງພຣະອົງໃນບັນດາຊາວນີໄຟໃນທະວີບອາເມຣິກາ, ພຣະເຢຊູຄຣິດໄດ້ສະເດັດກັບຄືນສູ່ສະຫວັນ. ຕໍ່ມາ, ສານຸສິດຂອງພຣະອົງໄດ້ເຕົ້າໂຮມກັນ, “ເພື່ອອະທິຖານ ແລະ ຖືສິນອົດເຂົ້າຢ່າງເອົາຈິງເອົາຈັງ. ແລະ ພຣະອົງໄດ້ສະເດັດມາປະກົດຕົວຕໍ່ພວກເພິ່ນອີກຄັ້ງ, ເພາະພວກເພິ່ນໄດ້ອະທິຖານຫາພຣະບິດາໃນພຣະນາມຂອງພຣະອົງ.”³ ເປັນຫຍັງພຣະເຢຊູຈຶ່ງປະກົດຕົວຕໍ່ສານຸສິດຂອງພຣະອົງອີກຄັ້ງ? ຍ້ອນວ່າພວກເພິ່ນໄດ້ອະທິຖານ; ພວກເພິ່ນໄດ້ທູນຂໍ.

ແລ້ວ ພຣະອົງໄດ້ກ່າວຕໍ່ໄປວ່າ:

“ບັດນີ້ເຮົາໄປເຝົ້າພຣະບິດາ. ແລະ ຕາມຈິງແລ້ວເຮົາກ່າວກັບເຈົ້າ, ສິ່ງໃດກໍຕາມທີ່ເຈົ້າຈະຂໍຈາກພຣະບິດາໃນນາມຂອງເຮົາ ເຈົ້າຈະໄດ້ຮັບ.

“ສະນັ້ນ, ຈົ່ງໝັ່ນຂໍ, ແລ້ວເຈົ້າຈະໄດ້ຮັບ; ຈົ່ງໝັ່ນເຄາະ, ແລ້ວຈະມີຄົນໄຂປະຕູໃຫ້; ເພາະວ່າທຸກຄົນທີ່ໝັ່ນຂໍ ກໍໄດ້ຮັບ; ແລະ ທຸກຄົນທີ່ໝັ່ນເຄາະ ກໍມີຄົນໄຂປະຕູໃຫ້.”⁴

ເຮົາຕ້ອງທູນຂໍດ້ວຍສັດທາເພື່ອໃຫ້ຮູ້ເຖິງພຣະປະສົງຂອງພຣະຜູ້ເປັນເຈົ້າ ແລະ ຍອມຮັບວ່າພຣະຜູ້ເປັນເຈົ້າຮູ້ວ່າສິ່ງໃດເປັນສິ່ງທີ່ດີກວ່າສຳລັບເຮົາ.

2. ກະທຳ

ການກະທຳກໍເປັນສິ່ງໜຶ່ງທີ່ສຳຄັນຕໍ່ການກາຍເປັນສານຸສິດທີ່ດີກວ່າເກົ່າຂອງພຣະເຢຊູຄຣິດ. ຂະນະທີ່ເຮົາກະທຳຢູ່ນັ້ນ, ພຣະອົງຈະນຳພາ ແລະ ຊີ້ນຳເຮົາຕະຫລອດເສັ້ນທາງ. ຂ້າພະເຈົ້າແນ່ໃຈວ່າ ນີໄຟໄດ້ຂໍຄຳແນະນຳຈາກພຣະຜູ້ເປັນເຈົ້າເພື່ອໃຫ້ຮູ້ຈັກວິທີທີ່ຈະໄປເອົາແຜ່ນຈາລຶກທອງເຫລືອງຈາກລາບານໄດ້ແນວໃດ, ເຖິງຢ່າງນັ້ນກໍຕາມ ເພິ່ນ ແລະ ພວກອ້າຍຂອງເພິ່ນໄດ້ພະຍາຍາມສອງຄັ້ງໂດຍປາດສະຈາກຄວາມສຳເລັດ. ແຕ່ພວກເພິ່ນກໍຍັງກະທຳຕໍ່ໄປ, ແລະ ພຣະຜູ້ເປັນເຈົ້າໄດ້ຊີ້ນຳພວກເພິ່ນຕະຫລອດເສັ້ນທາງຂອງພວກເພິ່ນ. ສຸດທ້າຍ, ນີໄຟໄດ້ປະສົບຄວາມສຳເລັດໃນຄັ້ງທີສາມ. ເພິ່ນຈື່ໄດ້ວ່າ, “ພຣະວິນຍານໄດ້ນຳຂ້າພະເຈົ້າໄປ, ໂດຍບໍ່ຮູ້ລ່ວງໜ້າເຖິງສິ່ງທີ່ຂ້າພະເຈົ້າຄວນຈະເຮັດ.”⁵

ນີ້ແມ່ນວິທີພຣະຜູ້ເປັນເຈົ້າທຳງານຂະນະທີ່ເຮົາໃຊ້ຄວາມພະຍາຍາມ ແລະ ລົງມືກະທຳ, ແມ່ນແຕ່ໃນເວລາທີ່ເຮົາບໍ່ເຂົ້າໃຈຢ່າງແຈ່ມແຈ້ງເຖິງສິ່ງທີ່ເຮົາຕ້ອງເຮັດກໍຕາມ. ພຣະຜູ້ເປັນເຈົ້າໄດ້ບອກນີໄຟ ເຖິງສິ່ງ ທີ່ຕ້ອງເຮັດ: ໄປ ແລະ ນຳເອົາແຜ່ນຈາລຶກມາ. ແຕ່ວ່າພຣະອົງບໍ່ໄດ້ບອກນີໄຟເຖິງ ວິທີ ທີ່ຈະເຮັດ. ພຣະອົງໄດ້ປ່ອຍນີໄຟໃຫ້ຄິດ ແລະ ສະແຫວງຫາຄວາມຊ່ວຍເຫລືອຈາກພຣະຜູ້ເປັນເຈົ້າ—ແລະ ນີ້ແມ່ນວິທີທີ່ພຣະຜູ້ເປັນເຈົ້າຊົງທຳງານເປັນປະຈຳໃນຊີວິດຂອງເຮົາ. ເມື່ອເຮົາກະທຳໃນສັດທາ, ພຣະຜູ້ເປັນເຈົ້າກໍຈະນຳພາ ແລະ ຊີ້ນຳເຮົາ.

3. ສຶກສາ

ໃນ 3 ນີໄຟ, ບັນດາສານຸສິດໄດ້ກ່າວຕໍ່ພຣະຜູ້ຊ່ວຍໃຫ້ລອດວ່າ ມີການໂຕ້ຖຽງກັນໃນບັນດາຜູ້ຄົນກ່ຽວກັບຊື່ຂອງສາດສະໜາຈັກ. ໃນການກ່າວຕອບ, ພຣະຜູ້ຊ່ວຍໃຫ້ລອດໄດ້ສິດສອນຫລັກທຳໜຶ່ງທີ່ສຳຄັນ ເມື່ອພຣະອົງໄດ້ຖາມວ່າ, “ພວກເຂົາບໍ່ໄດ້ອ່ານພຣະຄຳພີບໍ?”⁶ ການສຶກສາກໍເປັນສິ່ງໜຶ່ງທີ່ສຳຄັນຕໍ່ການກາຍເປັນສານຸສິດທີ່ດີກວ່າເກົ່າຂອງພຣະເຢຊູຄຣິດ. ການອະທິຖານ ແລະ ການສຶກສາພຣະຄຳພີ ຈະຄຽງຄູ່ກັນໄປ. ທັງສອງທຳງານຮ່ວມກັນເພື່ອຜົນປະໂຫຍດຂອງເຮົາ. ນີ້ແມ່ນຂັ້ນຕອນທີ່ພຣະຜູ້ເປັນເຈົ້າໄດ້ຈັດຕັ້ງຂຶ້ນມາ. “ຈົ່ງຊື່ນຊົມດ້ວຍພຣະຄຳຂອງພຣະຄຣິດ; ເພາະຈົ່ງເບິ່ງ, ພຣະຄຳຂອງພຣະຄຣິດຈະບອກພວກທ່ານທຸກຢ່າງທີ່ພວກທ່ານຄວນເຮັດ.”⁷

ພຣະຜູ້ຊ່ວຍໃຫ້ລອດກໍໄດ້ສິດສອນເຊັ່ນດຽວກັນວ່າ ເຮົາບໍ່ຄວນພຽງແຕ່ສຶກສາພຣະຄຳພີເທົ່ານັ້ນ ແຕ່ວ່າກໍຕ້ອງສິດສອນມັນເຊັ່ນກັນ, ດັ່ງທີ່ພຣະອົງໄດ້ສະແດງແກ່ຊາວນີໄຟ: “ແລະ ບັດນີ້ເຫດການໄດ້ບັງເກີດຂຶ້ນຄື ເມື່ອພຣະເຢຊູໄດ້ຊີ້ແຈງພຣະຄຳພີທັງໝົດແລ້ວ ຊຶ່ງພວກເພິ່ນໄດ້ຂຽນໄວ້, ພຣະອົງໄດ້ບັນຊາໃຫ້ພວກເພິ່ນສິດສອນເລື່ອງທີ່ພຣະອົງໄດ້ຊີ້ແຈງມານັ້ນແກ່ພວກເຂົາ.”⁸

ນີ້ຄືເຫດຜົນໜຶ່ງ ວ່າເປັນຫຍັງມັນຈຶ່ງສຳຄັນຫລາຍສຳລັບນີໄຟທີ່ຕ້ອງກັບຄືນໄປ ແລະ ນຳເອົາແຜ່ນຈາລຶກທອງເຫລືອງມາ: ຄອບຄົວຂອງເພິ່ນຕ້ອງການພຣະຄຳພີ ທີ່ບໍ່ພຽງແຕ່ຊ່ວຍພວກເພິ່ນໃນການເດີນທາງໄປຫາແຜ່ນດິນແຫ່ງຄຳສັນຍາເທົ່ານັ້ນ ແຕ່ເພື່ອຊ່ວຍໃຫ້ພວກເພິ່ນສິດສອນລູກຫລານຂອງພວກເພິ່ນນຳອີກ. ເຮົາກໍຕ້ອງສະແຫວງຫາການຊີ້ນຳຈາກພຣະຄຳພີເຊັ່ນດຽວກັນ ສຳລັບການເດີນທາງຂອງເຮົາ, ແລະ ເຮົາຕ້ອງສິດສອນມັນໃນບ້ານ ແລະ ການເອີ້ນໃນສາດສະໜາຈັກຂອງເຮົາ.

4. ກະທຳເພື່ອກາຍເປັນ

ຫລາຍໆຄັ້ງ ຄຳຕອບຕໍ່ການອະທິຖານຈະບໍ່ມາເຖິງໃນທັນທີທັນໃດ. ແຕ່ວ່າເຮົາຈຳຕ້ອງມີສັດທາເພື່ອດຳເນີນຕໍ່ໄປ, ກະທຳໃນຄວາມຊອບທຳ, ແລະ ຢືນຢັດຄືກັນກັບນີໄຟຕອນເພິ່ນພະຍາຍາມໄປເອົາແຜ່ນຈາລຶກທອງເຫລືອງ. ພຣະຜູ້ເປັນເຈົ້າຈະສະແດງໃຫ້ເຮົາເຫັນທີລະເລັກທີລະໜ້ອຍ; ຂະນະທີ່ເຮົາສຶກສາພຣະຄຳພີ, ພຣະຜູ້ເປັນເຈົ້າຈະໃຫ້ຄຳຕອບແກ່ເຮົາ ຫລື ເພີ່ມຄວາມເຂັ້ມແຂງທີ່ຈຳເປັນເພື່ອໃຫ້ເຮົາຂ້າມຜ່ານໄປໃຫ້ໄດ້ອີກວັນໜຶ່ງ, ອາທິດໜຶ່ງ, ແລະ ລອງໃໝ່ອີກຄັ້ງໜຶ່ງ. ແອວເດີ ຣິເຈີດ ຈີ ສະກາດ ໄດ້ກ່າວວ່າ: “ຈົ່ງຂອບຄຸນພຣະເຈົ້າທີ່ບາງເທື່ອພຣະອົງປ່ອຍໃຫ້ທ່ານຕໍ່ສູ້ດີ້ນລົນຊົ່ວໄລຍະໜຶ່ງ ກ່ອນພຣະອົງຈະຕອບທ່ານ. ສິ່ງນັ້ນຈະເຮັດໃຫ້ສັດທາຂອງທ່ານເພີ່ມຂຶ້ນ ແລະ ນິໄສໃຈຄໍຂອງທ່ານຈະເຕີບໂຕຂຶ້ນ.”⁹

ຜ່ານທາງການອະທິຖານ ແລະ ສຶກສາພຣະຄຳພີ, ພຣະຜູ້ເປັນເຈົ້າໄດ້ໃຫ້ຄວາມເຂັ້ມແຂງແກ່ຂ້າພະເຈົ້າສະເໝີ ເພື່ອກະທຳ ແລະ ອົດທົນໄປອີກວັນໜຶ່ງ, ອີກອາທິດໜຶ່ງ, ແລະ ລອງໃໝ່ອີກຄັ້ງ. ຫລາຍໆຄັ້ງ ຄຳຕອບບໍ່ໄດ້ມາເຖິງໃນທັນທີທັນໃດ. ຂ້າພະເຈົ້າຍັງມີຄຳຖາມທີ່ຍັງບໍ່ທັນໄດ້ຮັບຄຳຕອບເທື່ອ, ແຕ່ວ່າຂ້າພະເຈົ້າຍັງທູນຂໍ ແລະ ສຶກສາຕໍ່ໄປ, ແລະ ຂ້າພະເຈົ້າມີຄວາມສຸກທີ່ພຣະຜູ້ເປັນເຈົ້າຍັງສືບຕໍ່ໃຫ້ຄວາມເຂັ້ມແຂງແກ່ຂ້າພະເຈົ້າໃຫ້ກະທຳໃນຂະນະທີ່ຂ້າພະເຈົ້າລໍຖ້າຄຳຕອບນັ້ນຢູ່.

ແອວເດີ ສະກາດ ໄດ້ກ່າວອີກວ່າ, “ເມື່ອທ່ານເດີນໄປຈົນສຸດຂອບເຂດຂອງຄວາມເຂົ້າໃຈຂອງທ່ານ ເຂົ້າໃນຄວາມສະຫລົວແຫ່ງຄວາມບໍ່ແນ່ນອນ, ໂດຍການໃຊ້ສັດທາ, ທ່ານຈະຖືກນຳພາໄປພົບທາງອອກທີ່ທ່ານຈະບໍ່ພົບໂດຍວິທີອື່ນ.”¹⁰

ການກາຍເປັນຜູ້ຕິດຕາມທີ່ດີກວ່າເກົ່າຂອງພຣະຜູ້ຊ່ວຍໃຫ້ລອດ ພຣະເຢຊູຄຣິດ ຄືການເດີນທາງຕະຫລອດຊີວິດ, ແລະ ເຮົາທຸກຄົນຢູ່ໃນສະຖານະທີ່ແຕກຕ່າງກັນ, ເຄື່ອນຍ້າຍໃນບາດກ້າວທີ່ແຕກຕ່າງກັນ. ເຮົາຕ້ອງຈື່ຈຳໄວ້ວ່າ ນີ້ບໍ່ແມ່ນການແຂ່ງຂັນ, ແລະ ເຮົາຢູ່ທີ່ນີ້ເພື່ອຮັກ ແລະ ຊ່ວຍເຫລືອຊຶ່ງກັນແລະກັນ. ເຮົາຕ້ອງກະທຳຕໍ່ໄປເພື່ອຍອມໃຫ້ພຣະຜູ້ຊ່ວຍໃຫ້ລອດທຳງານກັບເຮົາໃນຊີວິດຂອງເຮົາ.

ດັ່ງທີ່ໄດ້ກ່າວກັບຊິດນີ ຣິກດອນ, ພຣະຜູ້ເປັນເຈົ້າໄດ້ກ່າວດັ່ງນີ້: “ເຮົາໄດ້ຫລຽວເບິ່ງເຈົ້າ ແລະ ວຽກງານຂອງເຈົ້າ. ເຮົາໄດ້ຍິນຄຳອະທິຖານຂອງເຈົ້າ, ແລະ ໄດ້ຕຽມເຈົ້າສຳລັບວຽກງານທີ່ສຳຄັນກວ່າ.”¹¹ ຂ້າພະເຈົ້າເປັນພະຍານວ່າ ພຣະຜູ້ເປັນເຈົ້າໄດ້ຍິນ ແລະ ຕອບຄຳອະທິຖານຂອງເຮົາ; ພຣະອົງຮູ້ຈັກເຮົາ; ພຣະອົງມີວຽກງານທີ່ສຳຄັນສຳລັບເຮົາແຕ່ລະຄົນ. ຜ່ານທາງການອະທິຖານ, ການສຶກສາພຣະຄຳພີ, ແລະ ການກະທຳ, ເຮົາຈະສາມາດເປີດພອນຕ່າງໆແຫ່ງສະຫວັນ ແລະ ກາຍເປັນຜູ້ຕິດຕາມທີ່ດີກວ່າເກົ່າຂອງພຣະຜູ້ຊ່ວຍໃຫ້ລອດ ພຣະເຢຊູຄຣິດ.

ປະທານດາລິນ ເອັຈ ໂອກສ໌ ໄດ້ສິດສອນວ່າ: “ການພິພາກສາຄັ້ງສຸດທ້າຍ ບໍ່ແມ່ນພຽງແຕ່ເພື່ອເປັນການປະເມີນຄວາມດີງາມ ແລະ ການກະທຳທີ່ຊົ່ວຮ້າຍ—ສິ່ງທີ່ເຮົາໄດ້ ເຮັດ ຜ່ານມາເທົ່ານັ້ນ. ມັນເປັນການຮັບຮູ້ເຖິງຜົນສະທ້ອນສຸດທ້າຍຂອງການກະທຳ ແລະ ຄວາມຄິດ—ສິ່ງທີ່ເຮົາໄດ້ ກາຍເປັນ.”¹²

ຂ້າພະເຈົ້າກະຕັນຍູສຳລັບສາດສະດາ, ຜູ້ພະຍາກອນ, ແລະ ຜູ້ເປີດເຜີຍທັງຫລາຍ; ພວກເພິ່ນເປັນຄົນຍາມຢູ່ເທິງປ້ອມຍາມ. ພວກເພິ່ນເຫັນສິ່ງທີ່ເຮົາບໍ່ເຫັນ. ຂ້າພະເຈົ້າເປັນພະຍານວ່າຜ່ານທາງຄຳເວົ້າຂອງພວກເພິ່ນ, ເຮົາສາມາດກາຍເປັນຜູ້ຕິດຕາມທີ່ດີກວ່າເກົ່າຂອງພຣະຜູ້ຊ່ວຍໃຫ້ລອດ ພຣະເຢຊູຄຣິດ ແລະ ບັນລຸສັກກະຍະພາບຂອງເຮົາ. ຂ້າພະເຈົ້າເປັນພະຍານວ່າ ພຣະຄຣິດຊົງພຣະຊົນຢູ່ ແລະ ຮູ້ຈັກເຮົາແຕ່ລະຄົນ. ນີ້ແມ່ນສາດສະໜາຈັກຂອງພຣະອົງ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.