“ເຈົ້າຮັກເຮົາຫລາຍກວ່າສິ່ງເຫລົ່ານີ້ບໍ?”
ມີສິ່ງໃດແດ່ທີ່ທ່ານສາມາດເຮັດໃນຊີວິດຂອງທ່ານ ເພື່ອສະແດງວ່າ ທ່ານຮັກພຣະຜູ້ເປັນເຈົ້າກ່ອນ?
ໃນເດືອນພະຈິກ ປີ 2019, ເພື່ອນຂອງຂ້າພະເຈົ້າກັບຂ້າພະເຈົ້າໄດ້ໄປຢ້ຽມຢາມແຜ່ນດິນສັກສິດ. ຂະນະຢູ່ທີ່ນັ້ນ, ພວກເຮົາໄດ້ທົບທວນ ແລະ ສຶກສາພຣະຄຳພີກ່ຽວກັບພຣະຊົນຊີບຂອງພຣະເຢຊູຄຣິດ. ເຊົ້າມື້ໜຶ່ງ ພວກເຮົາໄດ້ຢືນຢູ່ແຄມທະເລຄາລີເລເບື້ອງຕາເວັນອອກສຽງເໜືອ ໃນສະຖານທີ່ອາດເປັນບ່ອນທີ່ພຣະເຢຊູໄດ້ພົບກັບພວກສາວົກຂອງພຣະອົງ ຫລັງຈາກການຟື້ນຄືນພຣະຊົນຂອງພຣະອົງ.
ຫລັງຈາກການຟື້ນຄືນພຣະຊົນຂອງພຣະເຢຊູ, ດັ່ງທີ່ພວກເຮົາອ່ານໃນ ໂຢຮັນ ບົດທີ 21, ເປໂຕ ແລະ ພວກສາວົກຄົນອື່ນໆໄດ້ໄປຫາປາໝົດຄືນ ແຕ່ກໍບໍ່ໄດ້ຈັກໂຕ.1 ເຊົ້າຕໍ່ມາ, ພວກເພິ່ນໄດ້ເຫັນຊາຍຄົນໜຶ່ງຢືນຢູ່ແຄມຝັ່ງ ບອກພວກເພິ່ນໃຫ້ຖິ້ມມອງລົງເຮືອອີກຟາກໜຶ່ງ. ຕໍ່ຄວາມປະຫລາດໃຈຂອງພວກເພິ່ນ, ມອງໄດ້ເຕັມໄປດ້ວຍປາຢ່າງປະຕິຫານ.2
ທັນໃດນັ້ນ ພວກເພິ່ນກໍຮູ້ວ່າ ຊາຍຄົນນັ້ນແມ່ນພຣະຜູ້ເປັນເຈົ້າ, ແລະ ພວກເພິ່ນກໍໄດ້ຟ້າວເຂົ້າໄປທັກທາຍພຣະອົງ.
ຂະນະທີ່ພວກເພິ່ນກຳລັງດຶງມອງເຂົ້າຝັ່ງ, ເຕັມດ້ວຍປາ, ພຣະເຢຊູໄດ້ກ່າວວ່າ, “ຈົ່ງພາກັນມາກິນເຂົ້າສາ.”3 ໂຢຮັນໄດ້ລາຍງານວ່າ “ຫລັງຈາກກິນເຂົ້າແລ້ວ, ພຣະເຢຊູໄດ້ກ່າວແກ່ຊີໂມນເປໂຕ, ຊີໂມນ, ລູກຂອງໂຢນາເອີຍ, ເຈົ້າຮັກເຮົາຫລາຍກວ່າສິ່ງເຫລົ່ານີ້ບໍ?”4
ຂະນະທີ່ຂ້າພະເຈົ້າຢືນຢູ່ແຄມຝັ່ງບ່ອນດຽວກັນນັ້ນ, ຂ້າພະເຈົ້າຮູ້ວ່າ ຄຳຖາມຂອງພຣະຜູ້ຊ່ວຍໃຫ້ລອດ ເປັນໜຶ່ງໃນຄຳຖາມທີ່ສຳຄັນທີ່ສຸດ ທີ່ພຣະອົງອາດຖາມຂ້າພະເຈົ້າໃນມື້ໜຶ່ງ. ຂ້າພະເຈົ້າເກືອບໄດ້ຍິນສຸລະສຽງຂອງພຣະອົງຖາມວ່າ, “ຣະໂຊ, ເຈົ້າຮັກເຮົາຫລາຍກວ່າສິ່ງເຫລົ່ານີ້ບໍ?”
ທ່ານເຄີຍສົງໄສບໍວ່າ ພຣະເຢຊູໝາຍເຖິງສິ່ງໃດ ເມື່ອພຣະອົງຖາມເປໂຕວ່າ, “ເຈົ້າຮັກເຮົາຫລາຍກວ່າສິ່ງເຫລົ່ານີ້ບໍ?”
ເມື່ອກ່າວເຖິງຄຳຖາມນີ້ກັບຕົວເອງໃນວັນເວລາຂອງເຮົາ, ພຣະຜູ້ເປັນເຈົ້າອາດຖາມເຮົາກ່ຽວກັບວ່າ ເຮົາຫຍຸ້ງຫລາຍປານໃດ ແລະ ກັບອິດທິພົນໃນທາງບວກ ແລະ ທາງລົບ ທີ່ແຂ່ງຂັນເພື່ອຄວາມສົນໃຈ ແລະ ເວລາຂອງເຮົາ. ພຣະອົງອາດຖາມເຮົາແຕ່ລະຄົນ ຖ້າຫາກວ່າເຮົາຮັກພຣະອົງຫລາຍກວ່າສິ່ງຂອງໃນໂລກນີ້ຫລືບໍ່. ນີ້ອາດເປັນຄຳຖາມກ່ຽວກັບສິ່ງທີ່ມີຄ່າແທ້ໆໃນຊີວິດ, ຜູ້ທີ່ເຮົາຕິດຕາມ, ແລະ ວິທີທີ່ເຮົາເບິ່ງຄວາມສຳພັນຂອງເຮົາກັບສະມາຊິກໃນຄອບຄົວ ແລະ ເພື່ອນບ້ານ. ຫລື ບາງທີພຣະອົງຖາມວ່າ ແມ່ນຫຍັງທີ່ນຳຄວາມຊື່ນຊົນ ແລະ ຄວາມສຸກມາໃຫ້ເຮົາແທ້ໆ.
ສິ່ງຂອງຢູ່ໃນໂລກນີ້ນຳຄວາມຊື່ນຊົມ, ຄວາມສຸກ, ແລະ ຄວາມສະຫງົບ ຢ່າງທີ່ພຣະຜູ້ຊ່ວຍໃຫ້ລອດ ໄດ້ສະເໜີມອບໃຫ້ພວກສາວົກຂອງພຣະອົງ ແລະ ໃຫ້ເຮົາບໍ? ພຽງແຕ່ພຣະອົງເທົ່ານັ້ນທີ່ສາມາດນຳຄວາມຊື່ນຊົມ, ຄວາມສຸກ, ແລະ ຄວາມສະຫງົບທີ່ແທ້ຈິງມາໃຫ້ເຮົາ ຜ່ານທາງການຕິດຕາມພຣະອົງ ແລະ ເຮັດຕາມຄຳສອນຂອງພຣະອົງ.
ຂ້າພະເຈົ້າຈະຕອບວ່າແນວໃດ ກັບຄຳຖາມທີ່ວ່າ “ເຈົ້າຮັກເຮົາຫລາຍກວ່າສິ່ງເຫລົ່ານີ້ບໍ?”
ເມື່ອເຮົາຄົ້ນພົບຄວາມໝາຍທີ່ສົມບູນກວ່າກັບຄຳຖາມຂໍ້ນີ້, ເຮົາຈະສາມາດກາຍເປັນສະມາຊິກໃນຄອບຄົວ, ເປັນເພື່ອນບ້ານ, ເປັນພົນລະເມືອງ, ເປັນສະມາຊິກຂອງສາດສະໜາຈັກ, ແລະ ເປັນບຸດ ແລະ ທິດາຂອງພຣະເຈົ້າດີກວ່າເກົ່າ.
ເມື່ອເຖົ້າແກ່ສ່ຳຂ້າພະເຈົ້າ, ຂ້າພະເຈົ້າເຄີຍໄປຮ່ວມງານສົ່ງສະການຫລາຍເທື່ອແລ້ວ. ຂ້າພະເຈົ້າແນ່ໃຈວ່າ ພວກທ່ານຫລາຍຄົນເຄີຍສັງເກດເຫັນສິ່ງທີ່ຂ້າພະເຈົ້າໄດ້ສັງເກດເຫັນ. ເມື່ອສະເຫລີມສະຫລອງຊີວິດຂອງສະມາຊິກໃນຄອບຄົວ ຫລື ໝູ່ເພື່ອນຜູ້ທີ່ລ່ວງລັບໄປແລ້ວ, ໜ້ອຍເທື່ອທີ່ຜູ້ກ່າວປາໄສຈະກ່າວເຖິງເຮືອນຂອງຜູ້ຕາຍ ວ່ານ້ອຍໃຫຍ່ສ່ຳໃດ, ວ່າມີລົດຈັກຄັນ, ຫລື ມີເງິນໃນບັນຊີທະນາຄານຫລາຍປານໃດ. ຕາມປົກກະຕິແລ້ວ ເຂົາເຈົ້າຈະບໍ່ກ່າວເຖິງການລົງຂ່າວໃນສື່ສານມວນຊົນ. ໃນງານສົ່ງສະການສ່ວນໃຫຍ່ທີ່ຂ້າພະເຈົ້າໄດ້ໄປຮ່ວມ, ເຂົາເຈົ້າເນັ້ນເຖິງຄວາມສຳພັນຂອງຜູ້ຕາຍ, ການຮັບໃຊ້ຄົນອື່ນ, ບົດຮຽນ ແລະ ປະສົບການໃນຊີວິດ, ແລະ ຄວາມຮັກຂອງເຂົາເຈົ້າທີ່ມີຕໍ່ພຣະເຢຊູຄຣິດ.
ຢ່າເຂົ້າໃຈຜິດຂ້າພະເຈົ້າເດີ. ຂ້າພະເຈົ້າບໍ່ໄດ້ກ່າວວ່າ ການມີເຮືອນງາມ ຫລື ມີລົດທີ່ຫລູຫລາ ຫລື ການໃຊ້ສື່ສານມວນຊົນເປັນສິ່ງທີ່ບໍ່ດີ. ຂ້າພະເຈົ້າ ພຽງ ເວົ້າວ່າ ໃນທີ່ສຸດ, ສິ່ງເຫລົ່ານັ້ນມີຄວາມສຳຄັນເລັກນ້ອຍ ເມື່ອປຽບທຽບມັນໃສ່ກັບຄວາມຮັກທີ່ມີຕໍ່ພຣະຜູ້ຊ່ວຍໃຫ້ລອດ.
ເມື່ອເຮົາຮັກ ແລະ ຕິດຕາມພຣະອົງ, ເຮົາມີສັດທາໃນພຣະອົງ. ເຮົາກັບໃຈ. ເຮົາເຮັດຕາມຕົວຢ່າງຂອງພຣະອົງ ແລະ ຮັບບັບຕິສະມາ ແລະ ຮັບເອົາພຣະວິນຍານບໍລິສຸດ. ເຮົາອົດທົນຈົນເຖິງທີ່ສຸດ ແລະ ພະຍາຍາມຢູ່ໃນເສັ້ນທາງແຫ່ງພັນທະສັນຍາ. ເຮົາໃຫ້ອະໄພສະມາຊິກໃນຄອບຄົວ ແລະ ເພື່ອນບ້ານ ໂດຍການປະຖິ້ມຄວາມຄຽດແຄ້ນ ທີ່ເຮົາເຄີຍເກັບໄວ້. ເຮົາພະຍາຍາມຮັກສາພຣະບັນຍັດຂອງພຣະເຈົ້າດ້ວຍຄວາມພາກພຽນ. ເຮົາພະຍາຍາມເຊື່ອຟັງ. ເຮົາເຮັດ ແລະ ຮັກສາພັນທະສັນຍາ. ເຮົານັບຖືພໍ່ແມ່ຂອງເຮົາ. ເຮົາປ່ອຍວາງອິດທິພົນໃນທາງລົບຂອງໂລກ. ເຮົາກຽມຕົວເອງສຳລັບການສະເດັດມາຄັ້ງທີສອງຂອງພຣະອົງ.
ໃນເອກະສານ “ພຣະຄຣິດທີ່ຊົງພຣະຊົນ: ປະຈັກພະຍານຂອງອັກຄະສາວົກ,” ເຮົາອ່ານວ່າ: “[ພຣະເຢຊູ] ຈະສະເດັດກັບມາຍັງແຜ່ນດິນໂລກ. … ພຣະອົງຈະປົກຄອງເປັນຈອມກະສັດ ແລະ ຈອມເຈົ້ານາຍ, ແລະ ທຸກຫົວເຂົ່າຈະຄຸລົງ ແລະ ທຸກລີ້ນຈະກ່າວໃນການນະມັດສະການຢູ່ຕໍ່ພຣະພັກຂອງພຣະອົງ. ເຮົາແຕ່ລະຄົນຈະຢືນຮັບການພິພາກສາຈາກພຣະອົງຕາມວຽກງານຂອງເຮົາ ແລະ ຕາມຄວາມປາດຖະໜາຂອງໃຈເຮົາ.”5
ໃນຖານະອັກຄະສາວົກຄົນໜຶ່ງທີ່ໄດ້ເຊັນເອກະສານ “ພຣະຄຣິດທີ່ຊົງພຣະຊົນ”, ຂ້າພະເຈົ້າສາມາດກ່າວວ່າ ການທີ່ຮູ້ວ່າ ພຣະເຢຊູ “ເປັນຄວາມສະຫວ່າງ, ເປັນຊີວິດ, ແລະ ເປັນຄວາມຫວັງຂອງໂລກ”6 ໄດ້ເຮັດໃຫ້ຂ້າພະເຈົ້າມີຄວາມປາດຖະໜາຢ່າງຍິ່ງທີ່ຈະຮັກພຣະອົງຫລາຍຂຶ້ນໃນແຕ່ລະວັນ.
ຂ້າພະເຈົ້າເປັນພະຍານວ່າ ພຣະບິດາເທິງສະຫວັນ ແລະ ພຣະເຢຊູຄຣິດຊົງພຣະຊົນຢູ່. ຂ້າພະເຈົ້າເປັນພະຍານວ່າ ພວກພຣະອົງຮັກເຮົາ. ພຣະຄຳພີສິດສອນວ່າ “ເພາະວ່າ ພຣະເຈົ້າຮັກໂລກຫລາຍທີ່ສຸດ ຈົນໄດ້ປະທານພຣະບຸດອົງດຽວຂອງພຣະອົງ ເພື່ອທຸກຄົນທີ່ວາງໃຈເຊື່ອໃນພຣະບຸດນັ້ນຈະບໍ່ຈິບຫາຍ ແຕ່ມີຊີວິດອັນຕະຫລອດໄປເປັນນິດ.”7 ພຣະຄຳພີກໍສິດສອນອີກວ່າ ພຣະເຢຊູ “ຮັກໂລກຫລາຍ ຈົນວ່າພຣະອົງໄດ້ມອບຊີວິດຂອງພຣະອົງ, ເພື່ອວ່າຫລາຍຕໍ່ຫລາຍຄົນທີ່ເຊື່ອຈະກາຍເປັນບຸດ [ແລະ ທິດາ] ຂອງພຣະເຈົ້າ.”8
ພຣະບິດາເທິງສະຫວັນຮັກເຮົາຫລາຍຈົນວ່າພຣະອົງໄດ້ຈັດຕຽມແຜນແຫ່ງຄວາມລອດຂອງພຣະອົງ ໂດຍມີພຣະຜູ້ຊ່ວຍໃຫ້ລອດເປັນຈຸດສູນກາງ. ແລະ ພຣະເຢຊູກໍຮັກເຮົາຫລາຍຈົນວ່າ ຢູ່ໃນສະພາສະຫວັນ, ເມື່ອພຣະບິດາເທິງສະຫວັນຖາມວ່າ “ເຮົາຈະສົ່ງຜູ້ໃດໄປ?” ພຣະເຢຊູ, ຜູ້ເປັນພຣະບຸດຫົວປີຂອງລູກໆທາງວິນຍານທັງໝົດຂອງພຣະບິດາ, ໄດ້ຕອບວ່າ, “ຂ້າພຣະອົງຢູ່ນີ້ເດ, ຂໍຈົ່ງສົ່ງຂ້າພຣະອົງໄປເຖີດ.”9 ພຣະອົງໄດ້ກ່າວຕໍ່ພຣະບິດາວ່າ, “ພຣະບິດາເອີຍ, ຂໍໃຫ້ເປັນໄປຕາມພຣະປະສົງຂອງພຣະອົງເທີ້ນ, ແລະ ຂໍໃຫ້ລັດສະໝີພາບເປັນຂອງພຣະອົງຕະຫລອດການ.”10 ພຣະເຢຊູໄດ້ອາສາສະໝັກເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ ເພື່ອວ່າເຮົາຈະສາມາດກາຍເປັນເໝືອນດັ່ງພວກພຣະອົງ ແລະ ກັບຄືນໄປສູ່ທີ່ປະທັບຂອງພວກພຣະອົງ.
ພຣະຄຳພີທັງສອງຂໍ້ນີ້ສິດສອນວ່າ ກ່ອນຈະກັບຄືນໄປສູ່ທີ່ປະທັບຂອງພວກພຣະອົງໄດ້ນັ້ນ ເຮົາຕ້ອງ ເຊື່ອ. ເຮົາຕ້ອງເຊື່ອໃນພຣະເຢຊູ ແລະ ໃນແຜນແຫ່ງຄວາມສຸກຂອງພຣະເຈົ້າ. ທີ່ຈະ ເຊື່ອ ແມ່ນທີ່ຈະຮັກ ແລະ ຕິດຕາມພຣະຜູ້ຊ່ວຍໃຫ້ລອດ ແລະ ຮັກສາພຣະບັນຍັດ, ແມ່ນແຕ່ໃນທ່າມກາງການທົດລອງ ແລະ ການຜິດຖຽງກັນ.
ໂລກທຸກວັນນີ້ບໍ່ສະຫງົບ. ມັນມີທັງຄວາມຜິດຫວັງ, ຄວາມຂັດແຍ້ງ, ຄວາມທຸກໃຈ, ແລະ ສິ່ງລົບກວນຕ່າງໆນາໆ.
ປະທານດາລິນ ເອັຈ ໂອກສ໌, ໃນການກ່າວປາໄສ ໃນປີ 2017, ໃຫ້ຂໍ້ສັງເກດວ່າ: “ນີ້ເປັນຊ່ວງເວລາທີ່ທ້າທາຍ, ເຕັມໄປດ້ວຍຄວາມກັງວົນຫລາຍ: ສົງຄາມ ແລະ ຂ່າວລືເລື່ອງສົງຄາມ, ໂຣກລະບາດທີ່ອາດເກີດຂຶ້ນໄດ້, ຄວາມແຫ້ງແລ້ງ, ນ້ຳຖ້ວມ, ແລະ ພາວະໂລກຮ້ອນ.”11
ເຮົາບໍ່ສາມາດສູນເສຍຄວາມຮັກຂອງເຮົາຕໍ່ພຣະເຢຊູ ແລະ ສູນເສຍຄວາມຫວັງໃນພຣະອົງ, ເຖິງແມ່ນເຮົາກຳລັງປະເຊີນກັບການທ້າທາຍທີ່ເບິ່ງຄືວ່າມີຢູ່ຢ່າງຫລວງຫລາຍກໍຕາມ. ພຣະບິດາເທິງສະຫວັນ ແລະ ພຣະເຢຊູຈະບໍ່ມີວັນລືມໄລເຮົາ. ພວກພຣະອົງຮັກເຮົາ.
ເດືອນຕຸລາປີແລ້ວນີ້, ປະທານຣະໂຊ ເອັມ ແນວສັນ ໄດ້ສິດສອນເຮົາເຖິງຄວາມສຳຄັນຂອງການໃຫ້ພຣະບິດາເທິງສະຫວັນ ແລະ ພຣະເຢຊູຄຣິດມາກ່ອນ ໃນຊີວິດຂອງເຮົາ. ປະທານແນວສັນໄດ້ສິດສອນວ່າ ຄວາມໝາຍໜຶ່ງຂອງຄຳວ່າ ອິດສະຣາເອນ ແມ່ນ “ຂໍໃຫ້ພຣະເຈົ້າໄຊຊະນະ.”12
ເພິ່ນໄດ້ຖາມເຮົາແຕ່ລະຄົນ ໃນຄຳຖາມດັ່ງຕໍ່ໄປນີ້: “ທ່ານ ເຕັມໃຈທີ່ຈະໃຫ້ພຣະເຈົ້າໄຊຊະນະໃນຊີວິດຂອງທ່ານບໍ່? ທ່ານ ເຕັມໃຈທີ່ຈະໃຫ້ພຣະເຈົ້າເປັນອິດທິພົນທີ່ສຳຄັນທີ່ສຸດໃນຊີວິດຂອງທ່ານບໍ່? ທ່ານຈະອະນຸຍາດໃຫ້ພຣະຄຳຂອງພຣະອົງ, ພຣະບັນຍັດຂອງພຣະອົງ, ແລະ ພັນທະສັນຍາຂອງພຣະອົງມີອິດທິພົນໃນສິ່ງທີ່ທ່ານເຮັດແຕ່ລະວັນບໍ່? ທ່ານຈະອະນຸຍາດໃຫ້ສຸລະສຽງຂອງພຣະອົງມີຄວາມສຳຄັນກວ່າສິ່ງອື່ນໆບໍ່? ທ່ານ ເຕັມໃຈ ທີ່ຈະເຮັດສິ່ງໃດກໍຕາມທີ່ພຣະອົງປະສົງໃຫ້ທ່ານເຮັດ ມີຄວາມສຳຄັນກວ່າຄວາມທະເຍີທະຍານທຸກຢ່າງຂອງທ່ານບໍ່? ທ່ານ ເຕັມໃຈ ທີ່ຈະໃຫ້ຄວາມປະສົງຂອງທ່ານຖືກກືນລົງໄປໃນພຣະປະສົງຂອງພຣະອົງບໍ່?”13
ເຮົາຕ້ອງຈື່ຈຳສະເໝີວ່າ ຄວາມສຸກທີ່ແທ້ຈິງຂອງເຮົາແມ່ນຂຶ້ນຢູ່ກັບຄວາມສຳພັນຂອງເຮົາກັບພຣະເຈົ້າ, ກັບພຣະເຢຊູຄຣິດ, ແລະ ກັບກັນແລະກັນ.
ວິທີໜຶ່ງທີ່ຈະສະແດງຄວາມຮັກຂອງເຮົາ ແມ່ນໂດຍການຮ່ວມກັບຄອບຄົວ, ໝູ່ເພື່ອນ, ແລະ ເພື່ອນບ້ານຂອງເຮົາ ໃນການເຮັດບາງສິ່ງທີ່ເລັກໆນ້ອຍໆນຳກັນ ເພື່ອຮັບໃຊ້ກັນແລະກັນໃຫ້ດີຫລາຍຂຶ້ນ. ເຮັດໃນສິ່ງທີ່ເຮັດໃຫ້ໂລກນີ້ດີຂຶ້ນກວ່າເກົ່າ.
ມີສິ່ງໃດແດ່ທີ່ທ່ານສາມາດເຮັດໃນຊີວິດຂອງທ່ານ ເພື່ອສະແດງວ່າ ທ່ານຮັກພຣະຜູ້ເປັນເຈົ້າກ່ອນ?
ເມື່ອເຮົາເອົາໃຈໃສ່ຕໍ່ການມີຄວາມຮັກຕໍ່ເພື່ອນບ້ານຂອງເຮົາ ດັ່ງທີ່ພຣະອົງຮັກເຂົາເຈົ້າ, ແລ້ວເຮົາຈະເລີ່ມຮັກຜູ້ທີ່ຢູ່ອ້ອມຂ້າງເຮົາຢ່າງແທ້ຈິງ.14
ຂ້າພະເຈົ້າຂໍຖາມອີກຄັ້ງ, ທ່ານຈະຕອບແນວໃດກັບຄຳຖາມຂອງພຣະຜູ້ຊ່ວຍໃຫ້ລອດ ທີ່ວ່າ “ເຈົ້າຮັກເຮົາຫລາຍກວ່າສິ່ງເຫລົ່ານີ້ບໍ?”
ຂະນະທີ່ທ່ານໄຕ່ຕອງຄຳຖາມນີ້ດັ່ງທີ່ຂ້າພະເຈົ້າໄດ້ເຮັດ, ຂ້າພະເຈົ້າອະທິຖານວ່າ ທ່ານຈະຕອບຄືກັນກັບເປໂຕໄດ້ຕອບ ເມື່ອດົນນານມາແລ້ວວ່າ, “ໂດຍ, ພຣະອົງເຈົ້າເອີຍ; ພຣະອົງຮູ້ຈັກວ່າຂ້ານ້ອຍຮັກພຣະອົງ”15 ແລະ ແລ້ວໃຫ້ສະແດງອອກໂດຍການຮັກ ແລະ ການຮັບໃຊ້ທຸກຄົນທີ່ຢູ່ອ້ອມຂ້າງທ່ານ.
ຂ້າພະເຈົ້າເປັນພະຍານວ່າ ເຮົາໄດ້ຮັບພອນທີ່ມີພຣະກິດຕິຄຸນຂອງພຣະເຢຊູຄຣິດນຳພາເຮົາ ໃນວິທີທີ່ເຮົາດຳລົງຊີວິດ ແລະ ປະຕິບັດຕໍ່ຄົນອື່ນ. ໃນພຣະອົງ, ເຮົາຄົ້ນພົບວ່າ ທິດາ ແລະ ບຸດທຸກຄົນຂອງພຣະເຈົ້າມີຄ່າຕໍ່ພຣະອົງຫລາຍ.
ຂ້າພະເຈົ້າເປັນພະຍານວ່າ ພຣະເຢຊູເປັນພຣະຜູ້ຊ່ວຍໃຫ້ລອດທີ່ຊົງຮັກຂອງເຮົາ. ພຣະອົງເປັນພຣະບຸດອົງດຽວທີ່ຖືກຳເນີດຂອງພຣະເຈົ້າ. ແລະ ຂ້າພະເຈົ້າເປັນພະຍານເຖິງສິ່ງນີ້ດ້ວຍຄວາມຖ່ອມຕົວ ໃນພຣະນາມຂອງພຣະເຢຊູຄຣິດ, ອາແມນ.