ຈົ່ງລະນຶກເຖິງໄພ່ພົນຂອງພຣະເຈົ້າທີ່ທຸກທໍລະມານ, ໂອ້ ພຣະເຈົ້າຂອງພວກຂ້າພຣະອົງ
ການຮັກສາພັນທະສັນຍາເປີດອຳນາດແຫ່ງການເສຍສະລະຊົດໃຊ້ຂອງພຣະເຢຊູຄຣິດ ເພື່ອໃຫ້ຄວາມເຂັ້ມແຂງ ແລະ ແມ່ນແຕ່ຄວາມຊື່ນຊົມແກ່ຜູ້ທີ່ທຸກທໍລະມານ.
ແຜນແຫ່ງຄວາມສຸກຂອງພຣະບິດາເທິງສະຫວັນແມ່ນລວມທັງປະສົບການມະຕະ ຊຶ່ງລູກໆຂອງພຣະອົງທຸກຄົນຈະຖືກທົດສອບ ແລະ ປະເຊີນກັບການທົດລອງ.1 ເມື່ອຫ້າປີກ່ອນ ຂ້າພະເຈົ້າໄດ້ຖືກກວດພົບວ່າເປັນໂຣກມະເລັງ. ຂ້າພະເຈົ້າເຄີຍຮູ້ສຶກ ແລະ ຍັງຮູ້ສຶກເຖິງຄວາມເຈັບປວດທາງຮ່າງກາຍຈາກການຜ່າຕັດ, ການປິ່ນປົວດ້ວຍລັງສີ, ແລະ ຜົນຂ້າງຄຽງຂອງຢາ. ຂ້າພະເຈົ້າໄດ້ປະເຊີນກັບການດີ້ນລົນທາງອາລົມໃນຊ່ວງຄ່ຳຄືນທີ່ນອນບໍ່ຫລັບ ທີ່ແສນທໍລະມານ. ສະຖິຕິທາງການແພດໄດ້ຊີ້ບອກວ່າ ຂ້າພະເຈົ້າອາດຈະຈາກຄວາມເປັນມະຕະນີ້ໄວກວ່າທີ່ຂ້າພະເຈົ້າໄດ້ຄາດໄວ້, ໂດຍຖິ້ມຄອບຄົວທີ່ເປັນທຸກສິ່ງສຳລັບຂ້າພະເຈົ້າໄວ້ທາງຫລັງ, ຊົ່ວໄລຍະໜຶ່ງ.
ບໍ່ວ່າທ່ານຈະຢູ່ໃສກໍຕາມ, ຄວາມທຸກທໍລະມານທາງຮ່າງກາຍ ຫລື ອາລົມຈາກການທົດລອງທີ່ຫລາກຫລາຍ ແລະ ຄວາມອ່ອນແອທາງມະຕະໄດ້ເຄີຍເປັນ, ກຳລັງເປັນຢູ່ຕອນນີ້, ຫລື ຈັກມື້ໜຶ່ງ ຈະເປັນສ່ວນໜຶ່ງໃນຊີວິດຂອງທ່ານ.
ຄວາມທຸກທໍລະມານທາງຮ່າງກາຍສາມາດເປັນຜົນມາຈາກການແກ່ຊະລາຕາມທຳມະຊາດ, ພະຍາດທີ່ບໍ່ຄາດຄິດ, ແລະ ອຸບັດຕິເຫດໂດຍບັງເອີນ; ຄວາມອຶດຫິວ ຫລື ຄວາມພະເນຈອນ; ຫລື ການຂົ່ມເຫັງ, ການກະທຳທີ່ຮຸນແຮງ, ແລະ ສົງຄາມ.
ຄວາມທຸກທໍລະມານທາງອາລົມອາດເກີດຂຶ້ນຈາກຄວາມວິຕົກກັງວົນ ຫລື ພາວະຊຶມເສົ້າ; ການທໍລະຍົດຂອງຄູ່ຄອງ, ພໍ່ແມ່, ຫລື ຜູ້ນຳທີ່ໄວ້ວາງໃຈ; ການວ່າງງານ ຫລື ການຖອຍຫລັງທາງການເງິນ; ການຕັດສິນທີ່ບໍ່ຍຸດຕິທຳຈາກຄົນອື່ນ; ການເລືອກຂອງໝູ່ເພື່ອນ, ລູກໆ, ຫລື ສະມາຊິກໃນຄອບຄົວອື່ນໆ; ການຂົ່ມເຫັງໃນທຸກຮູບແບບ; ຄວາມຝັນທີ່ບໍ່ສົມຫວັງຂອງຊີວິດແຕ່ງງານ ຫລື ລູກໆ; ຄວາມເຈັບປ່ວຍໜັກ ຫລື ການຕາຍກ່ອນຄວນ ຂອງຄົນທີ່ເຮົາຮັກ; ຫລື ອື່ນໆອີກຢ່າງຫລວງຫລາຍ.
ທ່ານຈະສາມາດອົດທົນຕໍ່ຄວາມທຸກທໍລະມານທີ່ບໍ່ຄືໃຜ ແລະ ບາງເທື່ອກໍເຮັດໃຫ້ອ່ອນກຳລັງລົງ ຊຶ່ງມາເຖິງເຮົາແຕ່ລະຄົນໄດ້ແນວໃດ?
ໂຊກດີທີ່ຄວາມຫວັງສາມາດຖືກພົບໄດ້ຢູ່ໃນພຣະກິດຕິຄຸນຂອງພຣະເຢຊູຄຣິດ, ແລະ ຄວາມຫວັງສາມາດເປັນສ່ວນໜຶ່ງໃນຊີວິດຂອງທ່ານໄດ້ເຊັ່ນກັນ. ມື້ນີ້, ຂ້າພະເຈົ້າຈະມາແບ່ງປັນຫລັກທຳແຫ່ງຄວາມຫວັງສີ່ຢ່າງ ຊຶ່ງເອົາມາຈາກພຣະຄຳພີ, ຄຳສອນຂອງສາດສະດາ, ການຢ້ຽມຢາມປະຕິບັດສາດສະໜາກິດຫລາຍໆຄັ້ງ, ແລະ ບັນຫາທາງດ້ານສຸຂະພາບທີ່ຂ້າພະເຈົ້າມີຢູ່ໃນເວລານີ້. ຫລັກທຳເຫລົ່ານີ້ບໍ່ແມ່ນພຽງແຕ່ສາມາດນຳໃຊ້ໄດ້ໃນວົງກວ້າງເທົ່ານັ້ນ ແຕ່ຍັງນຳໃຊ້ເປັນສ່ວນບຸກຄົນຢ່າງເລິກເຊິ່ງໄດ້ອີກດ້ວຍ.
ຢ່າງທຳອິດ, ຄວາມທຸກທໍລະມານບໍ່ໄດ້ໝາຍຄວາມວ່າພຣະເຈົ້າບໍ່ພໍພຣະໄທກັບຊີວິດຂອງທ່ານ. ເມື່ອສອງພັນປີກ່ອນ, ສານຸສິດຂອງພຣະເຢຊູໄດ້ເຫັນຄົນຕາບອດຄົນໜຶ່ງຢູ່ພຣະວິຫານ ແລະ ຖາມວ່າ, “ພຣະອາຈານເອີຍ, ບາບກຳຂອງຜູ້ໃດ ຈຶ່ງເປັນເຫດໃຫ້ຊາຍຄົນນີ້ເກີດມາຕາບອດ?”
ສານຸສິດຂອງພຣະອົງເບິ່ງຄືວ່າເຊື່ອຢ່າງຜິດໆ, ຄືດັ່ງຫລາຍໆຄົນໃນສະໄໝນີ້, ວ່າຄວາມຍາກລຳບາກ ແລະ ຄວາມທຸກທໍລະມານໃນຊີວິດເປັນຜົນຈາກການບາບ. ແຕ່ພຣະຜູ້ຊ່ວຍໃຫ້ລອດໄດ້ຕອບວ່າ, “ບໍ່ແມ່ນຍ້ອນການບາບຂອງລາວ ຫລື ບາບກຳຂອງພໍ່ແມ່ລາວ ລາວຕາບອດເພື່ອໃຫ້ພາລະກິດຂອງພຣະເຈົ້າສຳແດງໃນຕົວລາວ.”2
ວຽກງານຂອງພຣະເຈົ້າຄືການທີ່ຈະເຮັດໃຫ້ເກີດຄວາມເປັນອະມະຕະ ແລະ ຊີວິດນິລັນດອນ.3 ແຕ່ການທົດລອງ ແລະ ຄວາມທຸກທໍລະມານ—ໂດຍສະເພາະຄວາມທຸກທໍລະມານທີ່ເກີດຈາກການນຳໃຊ້ອຳເພີໃຈທີ່ເປັນບາບຂອງຄົນອື່ນ4—ໃນທ້າຍທີ່ສຸດ ຈະເຮັດໃຫ້ວຽກງານຂອງພຣະເຈົ້າກ້າວໜ້າໄປໄດ້ແນວໃດ?
ພຣະຜູ້ເປັນເຈົ້າໄດ້ບອກກັບຜູ້ຄົນແຫ່ງພັນທະສັນຍາຂອງພຣະອົງວ່າ, “ເຮົາທົດສອບພວກເຈົ້າໃຫ້ທົນທຸກໃນແປວໄຟ … ; ໃຫ້ບໍລິສຸດໃນເຕົາຫລອມຮ້ອນ.”5 ບໍ່ວ່າສາເຫດຂອງຄວາມທຸກທໍລະມານຂອງທ່ານຈະມາຈາກຫຍັງກໍຕາມ, ພຣະບິດາເທິງສະຫວັນທີ່ຊົງຮັກຂອງທ່ານ ສາມາດນຳມັນໃຫ້ຊຳລະຈິດວິນຍານຂອງທ່ານໃຫ້ບໍລິສຸດໄດ້.6 ຈິດວິນຍານທີ່ຖືກຊຳລະສາມາດແບກຮັບພາລະຂອງຄົນອື່ນດ້ວຍຄວາມເຂົ້າອົກເຂົ້າໃຈ ແລະ ເຫັນອົກເຫັນໃຈທີ່ແທ້ຈິງໄດ້.7 ຈິດວິນຍານທີ່ຖືກຊຳລະທີ່ “ໄດ້ຜ່ານການຂົ່ມເຫັງຢ່າງໜັກ” ໄດ້ກຽມພ້ອມທີ່ຈະມີຊີວິດຢູ່ຢ່າງຊົມຊື່ນຍິນດີໃນທີ່ປະທັບຂອງພຣະເຈົ້າຕະຫລອດໄປ, ແລະ “ພຣະເຈົ້າຈະຊົງເຊັດນ້ຳຕາທຸກຢົດຈາກຕາຂອງພວກເຂົາ.”8
ຢ່າງທີສອງ, ພຣະບິດາເທິງສະຫວັນຮູ້ກ່ຽວກັບຄວາມທຸກທໍລະມານຂອງທ່ານຢ່າງໃກ້ຊິດ. ໃນຂະນະທີ່ຢູ່ທ່າມກາງການທົດລອງ, ເຮົາສາມາດຄິດຢ່າງຜິດໆວ່າ ພຣະເຈົ້າຢູ່ໄກ ແລະ ບໍ່ສົນພຣະໄທກັບຄວາມເຈັບປວດຂອງເຮົາເລີຍ. ແມ່ນແຕ່ສາດສະດາໂຈເຊັບ ສະມິດ ກໍຍັງສະແດງຄວາມຮູ້ສຶກນີ້ໃນຈຸດທີ່ຕ່ຳທີ່ສຸດຂອງເພິ່ນ. ຕອນທີ່ຖືກຂັງຢູ່ໃນຄຸກລີເບີຕີ ໃນຂະນະທີ່ໄພ່ພົນຍຸກສຸດທ້າຍເປັນພັນໆຄົນກຳລັງຖືກຂັບໄລ່ໜີອອກຈາກບ້ານເຮືອນຂອງເຂົາເຈົ້າ, ໂຈເຊັບໄດ້ສະແຫວງຫາທີ່ຈະເຂົ້າໃຈຜ່ານທາງການອະທິຖານທີ່ວ່າ: “ໂອ້ ພຣະອົງເຈົ້າ, ພຣະອົງຊົງປະທັບຢູ່ບ່ອນໃດ? ແລະ ສາລາທີ່ປົກປິດບ່ອນລີ້ຂອງພຣະອົງຢູ່ບ່ອນໃດ?” ເພິ່ນໄດ້ຈົບດ້ວຍຄຳວິງວອນນີ້: “ຈົ່ງລະນຶກເຖິງໄພ່ພົນຂອງພຣະອົງທີ່ທຸກທໍລະມານ, ໂອ້ ພຣະເຈົ້າຂອງພວກຂ້າພຣະອົງ.”9
ຄຳຕອບຂອງພຣະຜູ້ເປັນເຈົ້າໄດ້ເຮັດໃຫ້ໂຈເຊັບ ແລະ ທຸກຄົນທີ່ທຸກທໍລະມານໝັ້ນໃຈຂຶ້ນອີກຄັ້ງວ່າ:
“ລູກເອີຍ, ສັນຕິສຸກຈົ່ງມີແກ່ຈິດວິນຍານຂອງເຈົ້າ; ຄວາມຍາກລຳບາກຂອງເຈົ້າ ແລະ ຄວາມທຸກທໍລະມານຂອງເຈົ້າຈະເປັນຢູ່ພຽງຊົ່ວຄາວ;
ແລະ ຈາກນັ້ນ, ຖ້າຫາກເຈົ້າອົດທົນມັນໄດ້ດີ, ພຣະເຈົ້າຈະຍົກເຈົ້າຂຶ້ນສູ່ເບື້ອງບົນ.”10
ໄພ່ພົນຫລາຍຄົນທີ່ທຸກທໍລະມານໄດ້ບອກຂ້າພະເຈົ້າວ່າ ເຂົາເຈົ້າຮູ້ສຶກເຖິງຄວາມຮັກຂອງພຣະເຈົ້າໃນລະຫວ່າງການທົດລອງຂອງເຂົາເຈົ້າໄດ້ຢ່າງໃດ. ຂ້າພະເຈົ້າຈື່ປະສົບການຂອງຂ້າພະເຈົ້າເອງໄດ້ຢ່າງຊັດເຈນ ໃນຈຸດໜຶ່ງຂອງການຕໍ່ສູ້ກັບໂຣກມະເລັງຂອງຂ້າພະເຈົ້າ ເມື່ອຕອນທີ່ໝໍຍັງບໍ່ໄດ້ບອກສາເຫດຂອງຄວາມເຈັບປວດທີ່ຮຸນແຮງບາງອັນເທື່ອ. ຂ້າພະເຈົ້ານັ່ງກັບພັນລະຍາຂອງຂ້າພະເຈົ້າ, ໂດຍມີເຈດຕະນາທີ່ຈະອວຍພອນເຂົ້າສວຍຂອງພວກເຮົາ. ກົງກັນຂ້າມ, ຂ້າພະເຈົ້າເຮັດໄດ້ພຽງແຕ່ຮ້ອງໄຫ້, “ພຣະບິດາເທິງສະຫວັນ, ຂໍຈົ່ງຊ່ວຍລູກແນ່ທ້ອນ. ລູກປ່ວຍຫລາຍ.” ປະມານ 20 ຫາ 30 ວິນາທີຕໍ່ມາ, ຂ້າພະເຈົ້າຖືກອ້ອມຮອບດ້ວຍຄວາມຮັກຂອງພຣະອົງ. ຂ້າພະເຈົ້າບໍ່ໄດ້ຮັບເຫດຜົນສຳລັບຄວາມເຈັບປ່ວຍຂອງຂ້າພະເຈົ້າ, ບໍ່ມີສັນຍານຂອງຜົນໄດ້ຮັບສຸດທ້າຍ, ແລະ ທັງບໍ່ໄດ້ຮັບການບັນເທົາຈາກຄວາມເຈັບປວດ. ຂ້າພະເຈົ້າພຽງແຕ່ຮູ້ສຶກເຖິງຄວາມຮັກອັນບໍລິສຸດຂອງພຣະອົງ, ແລະ ນັ້ນກໍພຽງພໍແລ້ວ.
ຂ້າພະເຈົ້າເປັນພະຍານວ່າ ພຣະບິດາເທິງສະຫວັນຂອງພວກເຮົາ, ຜູ້ຮູ້ແມ່ນແຕ່ການຕົກຂອງນົກຈອກພຽງແຕ່ໂຕດຽວ, ຮູ້ເຖິງຄວາມທຸກທໍລະມານຂອງທ່ານ.11
ຢ່າງທີສາມ, ພຣະເຢຊູຄຣິດໄດ້ປະທານອຳນາດຂອງພຣະອົງເພື່ອຊ່ວຍໃຫ້ທ່ານມີກຳລັງທີ່ຈະອົດທົນຕໍ່ຄວາມທຸກທໍລະມານຂອງທ່ານໄດ້ດີ. ອຳນາດນີ້ສາມາດເຮັດໃຫ້ເປັນໄປໄດ້ໂດຍຜ່ານທາງການຊົດໃຊ້ຂອງພຣະອົງ.12 ຂ້າພະເຈົ້າຢ້ານວ່າສະມາຊິກຂອງສາດສະໜາຈັກຫລາຍຄົນຈະຄິດວ່າ ຖ້າພວກເຂົາເຂັ້ມແຂງຂຶ້ນຈັກໜ້ອຍໜຶ່ງ, ພວກເຂົາຈະສາມາດຜ່ານຜ່າຄວາມທຸກທໍລະມານດ້ວຍຕົນເອງໄດ້. ນີ້ແມ່ນວິທີທີ່ຍາກໃນການໃຊ້ຊີວິດ. ຊ່ວງເວລາແຫ່ງຄວາມເຂັ້ມແຂງຊົ່ວຄາວຂອງທ່ານ ບໍ່ສາມາດປຽບທຽບກັບອຳນາດອັນບໍ່ມີຂອບເຂດຂອງພຣະຜູ້ຊ່ວຍໃຫ້ລອດ ທີ່ເສີມສ້າງຈິດວິນຍານຂອງທ່ານໄດ້.13
ພຣະຄຳພີມໍມອນໄດ້ສິດສອນວ່າ ພຣະເຢຊູຄຣິດຈະ “ຮັບເອົາ” ຄວາມເຈັບປວດ, ຄວາມປ່ວຍໄຂ້, ແລະ ຄວາມບົກພ່ອງຂອງເຮົາ ເພື່ອວ່າພຣະອົງຈະສາມາດຊ່ວຍເຫລືອເຮົາໄດ້.14 ທ່ານຈະສາມາດນຳໃຊ້ອຳນາດທີ່ພຣະເຢຊູຄຣິດປະທານໃຫ້ ເພື່ອຊ່ວຍເຫລືອທ່ານ ແລະ ເຮັດໃຫ້ທ່ານເຂັ້ມແຂງຂຶ້ນໃນຍາມທຸກທໍລະມານໄດ້ແນວໃດ? ສິ່ງສຳຄັນກໍຄືການຜູກມັດຕົນເອງກັບພຣະຜູ້ຊ່ວຍໃຫ້ລອດ ໂດຍການຮັກສາພັນທະສັນຍາທີ່ທ່ານໄດ້ເຮັດໄວ້ກັບພຣະອົງ. ເຮົາເຮັດພັນທະສັນຍາເຫລົ່ານີ້ ເມື່ອເຮົາຮັບພິທີການຖານະປະໂລຫິດ.15
ຜູ້ຄົນຂອງແອວມາໄດ້ເຂົ້າສູ່ພັນທະສັນຍາແຫ່ງການບັບຕິສະມາ. ຕໍ່ມາ ພວກເຂົາໄດ້ທຸກທໍລະມານໃນຄວາມເປັນທາດ ແລະ ໄດ້ຖືກຫ້າມບໍ່ໃຫ້ນະມັດສະການໃນບ່ອນເປີດເຜີຍ ຫລື ແມ່ນແຕ່ອະທິຖານອອກສຽງ. ແຕ່ພວກເຂົາຍັງຮັກສາພັນທະສັນຍາຂອງຕົນເອງດີທີ່ສຸດເທົ່າທີ່ພວກເຂົາສາມາດເຮັດໄດ້ ໂດຍການຮ້ອງອອກມາຢ່າງງຽບໆໃນໃຈຂອງພວກເຂົາ. ຜົນທີ່ໄດ້ຮັບກໍຄື, ອຳນາດແຫ່ງສະຫວັນໄດ້ມາ. “ພຣະຜູ້ເປັນເຈົ້າໄດ້ເພີ່ມພະລັງໃຫ້ພວກເຂົາ ເພື່ອພວກເຂົາຈະໄດ້ທົນຕໍ່ພາລະແບກຫາບຢ່າງງ່າຍດາຍ.”16
ໃນວັນເວລາຂອງເຮົາ, ພຣະຜູ້ຊ່ວຍໃຫ້ລອດໄດ້ເຊື້ອເຊີນວ່າ, “ຈົ່ງ ເບິ່ງທີ່ເຮົາໃນຄວາມນຶກຄິດທຸກຢ່າງ; ຢ່າສົງໄສ, ຢ່າສູ່ຢ້ານ.”17 ເມື່ອເຮົາຮັກສາພັນທະສັນຍາແຫ່ງສິນລະລຶກຂອງເຮົາ ວ່າຈະລະນຶກເຖິງພຣະອົງຕະຫລອດເວລາ, ພຣະອົງກໍສັນຍາວ່າ ພຣະວິນຍານຂອງພຣະອົງຈະຢູ່ກັບເຮົາຕະຫລອດເວລາ. ພຣະວິນຍານໄດ້ມອບກຳລັງໃຫ້ເຮົາເພື່ອອົດທົນຕໍ່ການທົດລອງ ແລະ ເຮັດໃນສິ່ງທີ່ເຮົາບໍ່ສາມາດເຮັດເອງໄດ້. ພຣະວິນຍານສາມາດປິ່ນປົວເຮົາ, ເຖິງແມ່ນວ່າປະທານເຈມສ໌ ອີ ຟາວ ໄດ້ສິດສອນວ່າ, “ການປິ່ນປົວບາງຢ່າງອາດເກີດຂຶ້ນໃນອີກໂລກໜຶ່ງ.”18
ເຮົາຍັງໄດ້ຮັບພອນໂດຍພັນທະສັນຍາ ແລະ ພິທີການໃນພຣະວິຫານ, ບ່ອນທີ່ “ອຳນາດຂອງຄວາມເປັນເໝືອນພຣະເຈົ້າຈະສະແດງໃຫ້ປະຈັກ.”19 ຂ້າພະເຈົ້າໄດ້ໄປຢ້ຽມຢາມຜູ້ຍິງຄົນໜຶ່ງທີ່ສູນເສຍລູກສາວໄວລຸ້ນໃນອຸບັດຕິເຫດຮ້າຍແຮງ, ແລ້ວຕໍ່ມາ ກໍສູນເສຍສາມີຂອງນາງດ້ວຍໂຣກມະເລັງ. ຂ້າພະເຈົ້າຖາມວ່າ ນາງສາມາດອົດທົນຕໍ່ການສູນເສຍ ແລະ ຄວາມທຸກທໍລະມານເຊັ່ນນີ້ໄດ້ແນວໃດ. ນາງຕອບວ່າ ຄວາມເຂັ້ມແຂງມາຈາກຄວາມໝັ້ນໃຈທາງວິນຍານກ່ຽວກັບຄອບຄົວນິລັນດອນ, ທີ່ໄດ້ຮັບໃນລະຫວ່າງການນະມັດສະການໃນພຣະວິຫານເປັນປະຈຳ. ດັ່ງທີ່ໄດ້ສັນຍາໄວ້, ພິທີການຕ່າງໆໃນບ້ານຂອງພຣະຜູ້ເປັນເຈົ້າ ໄດ້ມອບອຳນາດຂອງພຣະເຈົ້າເປັນອາວຸດໃຫ້ກັບນາງ.20
ຢ່າງທີສີ່, ເລືອກທີ່ຈະພົບຄວາມສຸກໃນແຕ່ລະມື້. ຜູ້ທີ່ທຸກທໍລະມານມັກຈະຮູ້ສຶກວ່າ ກາງຄືນນັ້ນຍາວນານເຫລືອເກີນ, ແລະ ແສງອາລຸນຈະບໍ່ມີວັນມາເຖິງ. ບໍ່ເປັນຫຍັງທີ່ຈະຮ້ອງໄຫ້.21 ແຕ່ຖ້າທ່ານພົບຕົວເອງໃນກາງຄືນແຫ່ງຄວາມທຸກທໍລະມານທີ່ມືດມົນ, ໂດຍການເລືອກສັດທາ ທ່ານຈະສາມາດຕື່ນຂຶ້ນມາກັບຕອນເຊົ້າທີ່ແຈ້ງສະຫວ່າງແຫ່ງປິຕິຍິນດີ.22
ຍົກຕົວຢ່າງ, ຂ້າພະເຈົ້າໄດ້ໄປຢ້ຽມຢາມແມ່ທີ່ຍັງໜຸ່ມຄົນໜຶ່ງທີ່ກຳລັງຮັບການປິ່ນປົວມະເລັງ, ຍິ້ມຢ່າງສະຫງ່າຜ່າເຜີຍໃນຕັ່ງຂອງນາງ ເຖິງແມ່ນຈະເຈັບປວດ ແລະ ບໍ່ມີຜົມກໍຕາມ. ຂ້າພະເຈົ້າໄດ້ພົບກັບສາມີພັນລະຍາຄູ່ໜຶ່ງ ໄວກາງຄົນທີ່ກຳລັງຮັບໃຊ້ຢ່າງມີຄວາມສຸກໃນຖານະຜູ້ນຳຊາວໜຸ່ມ ເຖິງແມ່ນວ່າເຂົາເຈົ້າບໍ່ສາມາດມີລູກໄດ້ກໍຕາມ. ຂ້າພະເຈົ້າໄດ້ນັ່ງຢູ່ກັບຜູ້ຍິງທີ່ດີຄົນໜຶ່ງ—ເປັນແມ່ຕູ້, ເປັນແມ່, ແລະ ເປັນພັນລະຍາທີ່ຍັງໜຸ່ມຢູ່—ຜູ້ທີ່ຈະເສຍຊີວິດພາຍໃນສອງສາມມື້ນັ້ນ, ແຕ່ທ່າມກາງນ້ຳຕາຂອງຄອບຄົວ ກໍຍັງມີສຽງຫົວ ແລະ ຄວາມຊົງຈຳທີ່ມີຄວາມມ່ວນຊື່ນ.
ໄພ່ພົນທີ່ທຸກທໍລະມານເຫລົ່ານີ້ ເປັນຕົວຢ່າງເຖິງສິ່ງທີ່ປະທານຣະໂຊ ເອັມ ແນວສັນ ໄດ້ສິດສອນທີ່ວ່າ:
“ຄວາມສຸກທີ່ເຮົາຮູ້ສຶກ ບໍ່ຂຶ້ນກັບສະຖານະການໃນຊີວິດຂອງເຮົາ ແຕ່ມັນຂຶ້ນກັບວ່າ ເຮົາເອົາໃຈໃສ່ຕໍ່ສິ່ງໃດ ໃນຊີວິດຂອງເຮົາ.
ເມື່ອເຮົາເຮັດໃຫ້ຊີວິດຂອງເຮົາເອົາໃຈໃສ່ຕໍ່ແຜນແຫ່ງຄວາມລອດຂອງພຣະເຈົ້າ … ແລະ ພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ, ເຮົາສາມາດຮູ້ສຶກເຖິງຄວາມສຸກໄດ້ ບໍ່ວ່າແມ່ນຫຍັງຈະເກີດຂຶ້ນ—ຫລື ບໍ່ເກີດຂຶ້ນກໍຕາມ—ໃນຊີວິດຂອງເຮົາ.”23
ຂ້າພະເຈົ້າເປັນພະຍານ24 ວ່າ ພຣະບິດາເທິງສະຫວັນຂອງເຮົາຈື່ຈຳໄພ່ພົນທີ່ກຳລັງທຸກທໍລະມານຂອງພຣະອົງ, ຮັກທ່ານ, ແລະ ຮູ້ກ່ຽວກັບທ່ານຢ່າງໃກ້ຊິດ. ພຣະຜູ້ຊ່ວຍໃຫ້ລອດຂອງເຮົາຮູ້ວ່າທ່ານຮູ້ສຶກຢ່າງໃດ. “ແນ່ນອນ ເພິ່ນຈະແບກຫາບເອົາຄວາມໂສກເສົ້າ, ແລະ ຄວາມເສົ້າສະຫລົດໃຈຂອງພວກເຮົາໄວ້.”25 ຂ້າພະເຈົ້າຮູ້—ໃນຖານະຜູ້ຮັບທຸກວັນ26—ວ່າການຮັກສາພັນທະສັນຍາ ເປີດອຳນາດແຫ່ງການເສຍສະລະຊົດໃຊ້ຂອງພຣະເຢຊູຄຣິດ ເພື່ອໃຫ້ຄວາມເຂັ້ມແຂງ ແລະ ແມ່ນແຕ່ຄວາມຊື່ນຊົມແກ່ຜູ້ທີ່ທຸກທໍລະມານ.
ສຳລັບທຸກຄົນທີ່ທຸກທໍລະມານ, ຂ້າພະເຈົ້າອະທິຖານວ່າ, “ຂໍໃຫ້ພຣະເຈົ້າຈົ່ງໂປດປະທານໃຫ້ພາລະຂອງພວກທ່ານເບົາບາງລົງ, ໂດຍທາງຄວາມສຸກຂອງພຣະບຸດຂອງພຣະອົງ.”27 ໃນພຣະນາມຂອງພຣະເຢຊູຄຣິດ, ອາແມນ.