Noffru Qlubna lil Alla
Minn Neill F. Marriott
It-Tieni Kunsillier fil-Presidenza Ġenerali tal-Tfajliet
Meta aħna niftħu qlubna għall-Ispirtu, aħna nitgħallmu x’ inhuma l-għemejjel ta’ Alla u nagħrfu x’ inhi r-rieda Tiegħu.
Il-Presbiteru Dallin H. Oaks, fil-konferenza ġenerali ta’ April, tkellem dwar il-bżonn ”li nirriformaw il-ħajja personali tagħna.”1 Jien nipproponi li din ir-riforma personali tibda permezz ta’ bidla fil-qalb—hi x’inhi l-esperjenza tagħkom fil-ħajja jew minn fejn ġejjin.
Jiena ġejja mill-Qalba tan-Nofsinhar tal-Istati Uniti, u fiż-żogħżija tiegħi l-kliem tal-innijiet antiki Protestanti għallmuni x’ inhi verament il-qalb ta’ dixxiplu veru—waħda li fiha tkun seħħet bidla verament. Ikkunsidraw dan il-kliem, tant għażiż għalija:
F’ idejk, Mulej!
F’ idejk!
Inti ċ-Ċeramista;
U jiena t-tafal.
Agħġinni u fassalni
Kif tixtieq int,
Filwaqt li fis-skiet nistenna,
Li r-rieda tiegħek insir naf.2
Kif nistgħu aħna, nies moderni, impenjattivi u kompettitivi nibqgħu nistennew siekta biex insiru nafu r-rieda Tiegħu? Kif nistgħu naraw li l-għemejjel tal-Mulej isiru l-għemejjel tagħna? Jiena nemmen li għandna nibdew l-ewwel billi nitgħallmu dwaru u nitolbu biex niksbu l-għarfien. Hekk kif il-fiduċja tagħna fih tikber, aħna niftħu qlubna għalih, infittxu li nagħmlu r-rieda Tiegħu, u nistennew li niksbu tweġiba għal talbna li tgħinna nifhmu.
Il-bidla fil-qalb tiegħi bdiet meta, bħala daqsxejn ta’ tifla ta’ 12-il sena, jiena bdejt infittex lil Alla. Ħlief li ngħid it-Talba tal-Missierna,3 ma kontx naf eżatt kif għandi nitlob. Niftakarni ninżel għarkupptejja, nittama li nħoss fija l-imħabba Tiegħu, u nistaqsih, ”Fejn inti, Missier tas-Smewwiet? Naf li tinsab x’ imkien hemm, iżda fejn?” U bqajt nistaqsi din il-mistoqsija tul iż-żogħżija tiegħi kollha. Kelli ftit idea dwar ir-realtà ta’ Ġesù Kristu, iżda Missieri tas-Smewwiet, fl-għerf Tiegħu, ried li nagħmel 10 snin infittex u nistenna.
Fl-1970, meta l-missjunarji għallmuni dwar il-pjan tas-salvazzjoni tal-Missier u dwar l-Att tal-Fidwa tas-Salvatur, ma bqajtx nistenna aktar. Jiena ħaddant dawn il-veritajiet u tgħammidt.
Fuq il-bażi ta’ dan l-għarfien tal-ħniena u l-qawwa tal-Mulej, żewġi, uliedi u jiena għażilna dan il-kliem bħala l-motto tagħna: ”Eventwalment kollox se jkun sew.” Madankollu, kif nistgħu ntennu dan il-kliem lil xulxin meta ħajjitna tkun maħkuma minn inkwiet kbir u ma nkunux nistgħu nsibu risposta għall-mistoqsijiet tagħna?
Meta t-tifla ħelwa u denja tagħna, Georgia, ta’ 21 sena, iddaħħlet l-isptar f’ qagħda kritika wara aċċident bil-mutur, il-familja tagħna għedna, ”Eventwalment kollox se jkun sew.” Hekk kif jien ħallejt il-missjoni tagħna fil-Brażil u qbadt ajruplan għal Indianapolis, ġewwa Indjana, fl-Istati Uniti tal-Amerka, biex inkun ħdejha, jiena bqajt nemmen fil-motto tal-familja tagħna. Madankollu, l-għażiża tifla tagħna għaddiet lejn id-dinja tal-ispirti ftit sigħat biss qabel ma nżilna bl-ajruplan. Bin-niket u x-xokk kbir li ħakem il-familja tagħna, kif stajna aħna nħarsu lejn xulxin u xorta waħda ngħidu, ”Eventwalment kollox se jkun sew”?
Wara l-mewt mortali ta’ Georgia, l-uġigħ li ħassejna kien mill-aktar intens, sofrejna ħafna u anke llum għadhom jiġu mumenti meta nħossu niket kbir, iżda aħna niksbu l-faraġ fl-għarfien li fil-verità ħadd ma jmut. Minkejja d-diqa ta’ qalb li ħassejna meta l-ġisem fiżiku ta’ Georgia ma baqax aktar jiffunzjona, aħna kellna l-fidi li hija kompliet tgħix bħala spirtu,u aħna nemmnu li se ngħixu magħha għal dejjem jekk aħna nibqgħu leali lejn il-patti tagħna tat-tempju. Il-fidi tagħna fil-Feddej tagħna u fil-Qawmien Tiegħu mill-Imwiet, il-fidi tagħna fil-qawwa tas-saċerdozju Tiegħu u l-fidi tagħna fis-siġill etern wasslu biex aħna nistgħu niddikjaraw il-motto tagħna b’ konvinzjoni.
Il-President Gordon B. Hinckley qal: ”Jekk tagħmlu l-almu tagħkom, eventwalment kollox ikun sew. Afdaw f’ Alla. … Il-Mulej mhux se jabbandunana.”4
Il-motto tal-familja tagħna ma jgħidx, ”Eventwalment kollox se jkun sew issa.” Jitkellem dwar it-tama tagħna fir-riżultat aħħari u etern tagħna—mhux neċessarjament ir-riżultati preżenti tagħna. L-iskrittura tgħid, ”Fittxu b’ diliġenza, itolbu dejjem u emmnu, u fl-aħħar mill-aħħar kollox se jseħħ għall-aħjar tagħkom.”5 Dan ma jfissirx li kollox hu sew, iżda għal min hu umli u fidil, kull ħaġa—kemm pożittiva kif ukoll negattiva—se tkun għall-aħjar tagħna, u fil-ħin li jrid il-Mulej. Nistennew lilu, xi kultant bħal Ġob fis-sofferenza tiegħu, għax nafu li Alla ”jidrob u jdewwi, hu jolqot, u idejh ifejqu.”6 Qalb umli taċċetta l-isfidi li tħabbat wiċċha magħhom u taċċetta li tibqa’ tistenna sal-ħin li fih tikseb il-fejqan.
Meta aħna niftħu qlubna għall-Ispirtu, aħna nitgħallmu x’ inhuma l-għemejjel ta’ Alla u nagħrfu x’ inhi r-rieda Tiegħu. Matul is-sagrament, li jiena nsejjaħlu l-qalb tas-Sabbath, jiena sibt li wara li nitlob għall-maħfra ta’ dnubieti, insibha naturali li nistaqsi lill-Missier tas-Smewwiet, ”Missier, hemm xi ħaġa oħra li tridni nagħmel?” Meta aħna nkunu siekta u nistennew li nwettqu r-rieda Tiegħu, nafu naħsbu f’ xi ħaġa oħra li jeħtieġ li nibdlu—xi ħaġa li qed tillimita l-kapaċità tagħna li nirċievu l-gwida spiritwali jew saħansitra l-fejqan u l-għajnuna.
Per eżempju, jista’ jkun li jiena qed insibha bit-tqila li naħfer lil xi ħadd. Meta jiena nistaqsi jekk hemmx aktar x’ nista’ nagħmel, dak is-”sigriet” ifeġġ b’ ċerta ċarezza f’ moħħi. Fl-essenza, l-Ispirtu s-Santu ikun qed jgħidli b’ leħen sieket, ”Inti b’ onestà staqsejtni jekk hemmx iżjed x’ tagħmel, u jien qed nurik. Ir-riżentiment tiegħek iżommok milli tavvanza u jdgħajjef l-abbiltà tiegħek li tesperjenza relazzjonijiet b’ saħħithom. Tista’ teħles minn din it-tagħbija li qed iġġorr.” Verament tista’ tkun ħaġa diffiċli—nafu anke niġġustifikaw għalfejn ma nistgħux naħfru—iżda biex ikollna ferħ dejjiem jeħtieġ li noffru qlubna għar-rieda tal-Mulej.
Maż-żmien u fil-ħin opportun, aħna nirċievu l-qawwa u d-direzzjoni grazzjuża Tiegħu—li forsi jistgħu jwassluna biex immorru t-tempju aktar ta’ spiss jew nistudjaw b’ aktar profondità dwar l-Att tal-Fidwa tas-Salvatur jew immorru nieħdu parir mingħand xi ħabib, mill-isqof, minn xi kunsillier professjonali jew saħansitra minn xi tabib. Il-fejqan f’ qalbna jibda meta aħna nissottomettu ruħna lil Alla u nqimuh.
Il-qima vera tibda meta mmorru quddiem il-Missier u l-Iben b’ qalb safja. X’inhi l-kundizzjoni ta’ qalbna llum? Paradossalment, sabiex ikollna qalb imfejqa u fidila, l-ewwel għandna nħalluha tiżvoga quddiem il-Mulej. ”Bħala sagrifiċċju intom għandkom toffruli qalb maqsuma u spirtu sogħbien,”7 iddikjara l-Mulej. Ir-riżultat li jkollna jekk aħna nissagrifikaw qalbna, jew ir-rieda tagħna, lill-Mulej hu li aħna nirċievu l-gwida spiritwali li tant neħtieġu.
B’ għarfien akbar tal-grazzja u l-ħniena tal-Mulej, aħna nsibu li l-qalb umli tagħna tibda tinqasam u tiżvoga bil-gratitudni. Imbagħad induru lejh, fejn inkunu lesti li nħallu lill-Uniku Iben Waħdieni ta’ Alla jġorr it-tagħbija magħna. Meta b’ qalb maqsuma aħna nippermettu li Huwa jgħinna nġorru t-tagħbija tagħna, aħna nirċievu tama ġdida u gwida ċara permezz tal-Ispirtu s-Santu.
Jiena sibtha diffiċli li nneħħi minn ġo fija x-xewqa mortali li l-affarijiet iseħħu kif nixtieqjiena, u eventwalment intbaħt li l-għarfien tiegħu huwa ferm limitat u inferjuri mqabbel ma’ Ġesù Kristu. “It-triqtiegħu twassal għall-ferħ f’ din il-ħajja u għall-ħajja eterna fil-ħajja li jmiss.”8 Nistgħu aħna nħobbu lil Ġesù Kristu u t-triq Tiegħu aktar milli nħobbu lilna nfusna u l-aġenda personali tagħna?
Xi wħud jafu jaħsbu li f’ ħajjithom kienu wisq id-drabi fejn kienu falliment u fejn ħassewhom dgħajfin quddiem id-dnub u x-xewqat ta’ qalbhom għall-ħwejjeġ tad-dinja. Madankollu, bħala Iżrael tal-patt, aħna mhux sempliċiment nippruvaw ninbidlu weħdina. Jekk aħna nitolbu lil Alla bil-ħerqa, Huwa jaċċettana kif aħna—u jagħmel minna ferm aktar milli aħna qatt nistgħu nimmaġinaw. It-teologu magħruf Robert L. Millet kiteb dwar ”xewqa qawwija li nitjiebu,” ibbilanċjata mal-”assigurazzjoni spiritwali li permezz ta’ Ġesù Kristu aħna lkoll se nirnexxu.”9 B’ dan l-għarfien, aħna nistgħu b’ onestà ngħidu lil Missierna tas-Smewwiet:
Jien nafda kull m’għandi f’ idejk,
Għax naf kemm tħobbni int,
Minn qalbi jien nagħmel dak li inti trid:
Inkun dak li tridni nkun.10
Meta aħna noffru l-qalb maqsuma tagħna lil Ġesù Kristu, Huwa jaċċetta l-offerta tagħna. Huwa joħodna lura. Sofrejna kemm sofrejna telfiet u ġrieħi u ġejna kemm ġejna mwarrbin, il-grazzja u l-fejqan Tiegħu huma fuq kollox u fuq kulħadd. Fi sħubija mas-Salvatur, aħna nistgħu ngħidu b’ kunfidenza, ”Eventwalment kollox se jkun sew.” F’ isem Ġesù Kristu, amen.