Nissaħħu permezz tal-Att tal-Fidwa ta’ Ġesù Kristu
Mill-Presbiteru Dallin H. Oaks
Tal-Kworum tat-Tnax-il Appostlu
Minħabba l-Att tal-Fidwa Tiegħu, is-Salvatur għandu l-qawwa li jassistina—jgħinna—f’ kull uġigħ u sofferenza mortali.
F’ din il-ħajja mortali aħna ċerti minn żewġ ħwejjeġ, il-mewt u t-toqol tad-dnub. L-Att tal-Fidwa ta’ Ġesù Kristu teqred l-effett ta’ dawn iż-żewġ ħwejjeġ ċerti fil-ħajja mortali. Iżda minbarra l-mewt u d-dnub, fil-ħajja mortali aħna għandna nħabbtu wiċċna ma’ diversi sfidi oħra. Minħabba dan l-istess Att tal-Fidwa, is-Salvatur tagħna jista’ jipprovdilna l-qawwa li neħtieġu biex negħlbu dawn l-isfidi mortali. Dan huwa s-suġġett tiegħi llum.
I.
Bosta rakkonti fl-iskrittura dwar l-Att tal-Fidwa jitkellmu dwar is-Salvatur ikisser l-irbit tal-mewt u s-sofferenza għal dnubietna. Fid-diskors tiegħu kif deskritt fil-Ktieb ta’ Mormon, Alma għallem dawn il-ħwejjeġ fundamentali. Iżda huwa pprovdielna wkoll l-aktar assigurazzjoni ċara li hemm fl-iskrittura li s-Salvatur esperjenza wkoll l-uġigħ u l-mard u s-sofferenza tal-poplu Tiegħu.
Alma ddeskriva din il-parti tal-Att tal-Fidwa tas-Salvatur: ”U hu għandu jmur, isofri kull tip ta’ uġigħ, tbatija u tiġrib; u dan sabiex iseħħ dak li hemm miktub li jgħid li hu se jieħu fuqu l-uġigħ u l-mard tal-poplu tiegħu” (Alma 7:11; ara wkoll 2 Nephi 9:21).
Aħsbu ftit dwar dan! Fl-Att tal-Fidwa tas-Salvatur, Huwa sofra ”kull tip ta’ uġigħ, tbatija u tiġrib.” Kif spjega l-President Boyd K. Packer: ”Huwa ma kellu għalfejn iħallas l-ebda dejn. Huwa ma għamel xejn ħażin. Madankollu, Huwa esperjenza kollox—akkumulazzjoni sħiħa ta’ kull ħtija, il-mard u n-niket, l-uġigħ u l-umiljazzjoni, kull tip ta’ tbatija mentali, emozzjonali u fiżika.”1
Għalfejn Huwa sofra dawn l-isfidi mortali kollha, ”ta’ kull tip”? Alma spjega, ”U huwa jieħu fuqu s-sofferenza tal-poplu Tiegħu, sabiex jimtela bil-ħniena, skont il-ġisem, ħalli huwa jkun jaf, skont il-ġisem, kif jista’ jgħin lin-nies tiegħu skont is-sofferenza tagħhom” (Alma 7:12).
Per eżempju, l-Appostlu Pawlu ddikjara li peress li s-Salvatur ”hu stess bata u kien imġarrab, jaf jgħin lil dawk li huma fit-tiġrib.” (Lhud 2:18). Bl-istess mod, il-President James E. Faust għallem, ”Peress li s-Salvatur sofra kollox u kull ħaġa li aħna qatt nistgħu nħossu jew nesperjenzaw, Huwa jista’ jgħin lid-dgħajfin jiksbu l-qawwa.”2
Is-Salvatur tagħna esperjenza u sofra l-milja tal-isfidi mortali kollha ”skont il-ġisem” ħalli Huwa jkun jaf ”skont il-ġisem” kif ”jgħin lin-nies tiegħu skont is-sofferenza tagħhom.” Għalhekk Huwa jaf it-taqbid tagħna, l-uġigħ il-qalb li jkollna, it-tiġrib tagħna u s-sofferenza tagħna, għaliex minn jeddu Huwa esperjenza dan kollu bħala parti essenzjali mill-Att tal-Fidwa Tiegħu. U minħabba f’ hekk, l-Att tal-Fidwa Tiegħu jagħtih il-qawwa biex jgħinna—li jagħtina l-qawwa nikkumbattu dak kollu li jkollna quddiemna.
II.
Filwaqt li t-tagħlim ta’ Alma fis-seba’ kapitlu huwa l-aktar skrittura ċara fost l-iskrittura kollha dwar din il-qawwa essenzjali tal-Att tal-Fidwa, dan it-tagħlim jinsab mgħallem ukoll tul l-iskrittura mqaddsa kollha.
Fil-bidu tal-ministeru Tiegħu, Ġesù spjega li Huwa kien ntbagħat ”idewwi l-qalb miksura” (Luqa 4:18). Il-Bibbja spiss tkellimna dwar li Huwa fejjaq lin-nies ”mill-mard tagħhom” (Luqa 5:15; 7:21). Il-Ktieb ta’ Mormon jitkellem li Huwa fejjaq lil dawk ”li kienu qed isofru kull tip ta’ tbatija” (3 Nephi 17:9). L-Evanġelju ta’ Mattew jispjega li Ġesù fejjaq lin-nies ”biex hekk seħħ dak li kien ingħad permezz tal-profeta Isaija, meta qal: ‘Hu rafa’ fuqu d-dgħufija tagħna, u tgħabba bil-mard tagħna” (Mattew 8:17).
Isaija għallem li l-Messija kien se jitgħabba bil-”mard” u n-”niket” tagħna (Isaija 53:4). Isaija għallem ukoll li Huwa se jsaħħaħna: ”La tibżax, għax miegħek jien! La titħassibx, għax Alla tiegħek jien: Jiena nwettqek, jiena ngħinek” (Isaija 41:10).
B’hekk, aħna nkantaw:
Tibżax, jiena miegħek; dik qalbek la taqtax,
Għax jien Alla tiegħek, jien ngħinek tinkwetax.
Insaħħek, u ngħinek biex wieqaf sod tkun, …
B’ idi l-omnipotenti inżommok jien fiż-żgur.3
Waqt li beda jitkellem dwar xi wħud mill-isfidi mortali tiegħu, l-Appostlu Pawlu kiteb, ”għal kollox niflaħ bis-saħħa ta’ Kristu li jqawwini” (Filippin 4:13).
U b’ hekk nistgħu naraw li minħabba l-Att tal-Fidwa Tiegħu, is-Salvatur għandu l-qawwa li jgħinna f’ kull uġigħ u sofferenza mortali. Xi kultant il-qawwa Tiegħu tfejjaq xi mard li jista’ jkollna, iżda l-iskrittura u l-esperjenzi tagħna jgħallmuna li xi kultant Huwa jgħinna billi jagħtina l-qawwa jew il-paċenzja li nikkumbattu s-sofferenza tagħna.4
III.
X’ inhu dan l-uġigħ u l-mard u din is-sofferenza li s-Salvatur esperjenza u sofra?
Aħna lkoll nesperjenzaw uġigħ u sofferenza u mard f’ xi mument jew ieħor. Minbarra dak li nesperjenzaw minħabba dnubietna, il-ħajja mortali hi mimlija taqbid u uġigħ il-qalb kontinwu u sofferenza kontinwa.
Aħna u l-maħbubin tagħna nsofru minħabba l-mard. Xi darba jew oħra lkoll kemm aħna nesperjenzaw ukoll ċertu uġigħ minħabba ġrieħi trawmatiċi jew minħabba xi diffikultajiet fiżiċi jew mentali. Ilkoll kemm aħna soffrejna u esperjenzajna dulur f’ ħajjitna minħabba l-mewt ta’ xi ħadd għażiż għalina. Ilkoll kemm aħna nesperjenzaw il-falliment fir-responsabbiltajiet personali tagħna, fir-relazzjonijiet tagħna fil-familja jew fix-xogħol tagħna.
Meta l-persuna li lilha miżżewġin jew inkella wliedna ma jaċċettawx dak li aħna nafu li hu veru u joħorġu mit-triq tas-sewwa, aħna nesperjenzaw ċertu uġigħ partikolari minħabba l-istress, l-istess bħall-missier l-iben il-ħali fil-parabbola memorabbli ta’ Ġesù (ara Luqa 15:11–32).
Kif iddikjara s-Salmista, ”Kbar huma l-ħsarat tar-raġel sewwa, iżda minnhom kollha jeħilsu l-Mulej” (Salm 34:19).
B’ hekk, dan l-innu tagħna jitkellem dwar din l-assigurazzjoni vera: ”M’hawn l-ebda niket fid-dinja li s-sema ma tistax tfejjaq.”5 Dak li jfejjaqna huwa s-Salvatur tagħna u l-Att tal-Fidwa Tiegħu.
Għaż-żgħażagħ huwa partikolarment diffiċli s-sentiment li huma jafu jistgħu jiġu mwarrbin, meta sħabhom ikunu jidhru li qed jieħdu gost flimkien f’ relazzjonijiet u attivitajiet sbieħ u deliberatament iħalluhom barra. Ċerti preġudizzji razzjali u etniċi jistgħu jwasslu wkoll biex ċerti żgħażagħ u adulti jitwarrbu. Il-ħajja mimlija sfidi oħra, bħall-qgħad jew ċerti sfidi oħra fil-pjanijiet tagħna.
Jiena għadni qed nitkellem dwar is-sofferenza mortali li mhijiex riżultat ta’ dnubietna. Xi wħud jitwieldu b’ xi diżabiltà fiżika jew mentali li twassal għas-sofferenza personali, kemm għalihom kif ukoll għal dawk li jħobbuhom u jieħdu ħsiebhom. Għal ħafna, minħabba l-mard tad-dipressjoni jesperjenzaw bosta uġigħ u jispiċċaw inkapaċi f’ ħafna ħwejjeġ b’ mod permanenti. Sofferenza oħra li twassal għal ħafna uġigħ hija ċ-ċirkustanza li persuna tibqa’ ma tiżżewwiġx. Dawk li qed issofru minħabba din iċ-ċirkustanza għandkom tiftakru li s-Salvatur esperjenza dan it-tip ta’ uġigħ ukoll u li, permezz tal-Att tal-Fidwa Tiegħu, Huwa joffrilkom il-qawwa li tiffaċċjawha.
Ftit huma d-diżabiltajiet li jagħmlu ħsara akbar lill-ħajja temporali u spiritwali tagħna mill-vizzji. Uħud minn dawn, bħall-vizzji tal-pornografija jew tad-drogi, ħafna drabi huma kawża ta’ mġieba ħażina. Anke meta nkunu ndimna mill-imġieba tagħna, il-vizzju jaf jibqa’ hemm. Dan il-vizzju li jġibna f’ ċertu sens inkapaċi jista’ jittaffa permezz tal-qawwa deċiżiva li jagħtina s-Salvatur. L-istess l-isfida severa li jesperjenzaw dawk li jintbagħtu l-ħabs minħabba xi att kriminali. Ittra riċenti tixhed dwar il-qawwa li jista’ jikseb anke xi ħadd li jinsab f’ din iċ-ċirkustanza: ”Jiena naf li s-Salvatur tagħna jinsab jimxi f’ dawn is-swali, u ħafna drabi jiena ħassejt l-imħabba ta’ Kristu bejn dawn il-ħitan tal-ħabs.”6
Kemm togħġobni t-testimonjanza tal-poetessa u ħabiba Emma Lou Thayne. Permezz ta’ kliem li issa nkantawh bħala innu, hija kitbet:
Fejn nista’ nsib il-sliem?
Fejn hu l-faraġ tiegħi
Meta f’ sorsi oħra ma nsibx il-ferħ?
Meta b’ qalb imġarrba, rabja jew ħażen,
Nintelaq waħdi,
Nevalwa ruħi?
Fejn, meta l-uġigħ jikber,
Fejn, meta nibqa’ nkarkar,
Fejn, meta rrid inkun naf, fejn nista’ mmur?
Fejn hi l-id siekta biex tikkalma d-diqa f’ qalbi?
Min, min jista’ jifhem?
Hu, l-uniku Wieħed.7
IV.
Min jista’ jiġi mgħejun u msaħħaħ permezz tal-Att tal-Fidwa ta’ Ġesù Kristu? Alma għallem li s-Salvatur se jieħu fuqu ”l-uġigħ u l-mard tal-poplu tiegħu” u “jgħin lill-poplu tiegħu” (Alma 7:11,12; enfażi miżjuda). Min hu l-”poplu tiegħu” f’ din il-wegħda? Tgħid in-nies mortali kollha—dawk kollha li jgawdu r-realtà tal-qawmien mill-imwiet permezz tal-Att tal-Fidwa? Jew huma biss dawk il-ftit qaddejja magħżula li jikkwalifikaw ruħhom permezz tal-ordinanzi u l-patti?
Il-kelma poplu għandha diversi tifsiriet fl-iskrittura. It-tifsira l-aktar xierqa għat-tagħlim li s-Salvatur se jgħin lill-”poplu tiegħu” hija t-tifsira li Ammonin uża meta huwa għallem li ”Alla konxju ta’ kull poplu, ġej mil-liema pajjiż ġej” (Alma 26:37). Dan huwa wkoll dak li riedu jfissru l-anġli meta huma ħabbru t-twelid ta’ Kristu tarbija: ”Inħabbrukom ferħ kbir, ferħ li se jkun għall-poplu kollu” (Luqa 2:10).
Minħabba l-esperjenza Tiegħu tal-Att tal-Fidwa fil-mortalità, is-Salvatur hu kapaċi jfarraġ, ifejjaq u jsaħħaħ lill-bnedmin kollha ma’ kullimkien, iżda jiena nemmen li Huwa jista’ jagħmel dan biss għal dawk li jfittxuh jew jitolbu għall-għajnuna Tiegħu. L-Appostlu Ġakbu għallem ”Iċċekknu quddiem il-Mulej, u hu jerfagħkom.” (Ġakbu 4:10). Aħna nikkwalifikaw għal dik il-barka meta nemmnu fih u nitolbu għall-għajnuna Tiegħu.
Hawn miljuni ta’ nies li jgħixu bil-biża’ ta’ Alla li jitolbu lil Alla sabiex jerfagħhom minn qalb is-sofferenza tagħhom. Is-Salvatur tagħna żvela li Huwa ”niżel ’l isfel minn kollox” (D&C 88:6). Kif għallem il-Presbiteru Neal A. Maxwell, ”Meta ’niżel ’l isfel minn kollox,’ Huwa fehem, b’ mod perfett u personali, il-milja sħiħa tas-sofferenza umana.”8 Nistgħu ngħidu wkoll li għaliex niżel ’l isfel minn kollox, Huwa jinsab fil-pożizzjoni ideali li jerfagħna u jagħtina l-qawwa li nibqgħu sodi qalb is-sofferenza tagħna. Jeħtieġ biss li aħna nitolbuh.
Bosta drabi fir-rivelazzjoni moderna, il-Mulej iddikjara, ”Għalhekk, jekk titolbuni intom tirċievu; jekk tħabbtu jinfetħilkom” (per eżempju, D&C 6:5; 11:5; ara wkoll Mattew 7:7). Verament, minħabba l-imħabba universali Tagħhom, Missierna tas-Smewwiet u Ibnu l-Għażiż, Ġesù Kristu, jisimgħu u jwieġbu t-talb ta’ dawk kollha li jersqu lejhom bil-fidi. Kif kiteb l-Appostlu Pawlu, ”It-tama tagħna hi f’Alla l-ħaj, li hu s-Salvatur tal-bnedmin kollha, l-aktar ta’ dawk li jemmnu” (1 Timotju 4:10).
Jiena naf li dan kollu hu minnu. Li jagħmel għalina l-Att tal-Fidwa tas-Salvatur tagħna hu ferm aktar milli jiżgurana dwar l-immortalità tagħna permezz tar-reżurezzjoni universali u jipprovdilna l-opportunità li nitnaddfu mid-dnub permezz tal-indiema u l-magħmudija. L-Att tal-Fidwa Tiegħu jipprovdilna wkoll l-opportunità li nduru lejn Dak li esperjenza s-sofferenza kollha li aħna nesperjenzaw fil-ħajja mortali tagħna u jagħtina l-qawwa li nġorru tagħbija tal-mortalità. Huwa jaf bid-diqa ta’ qalb tagħna, u jinsab hemm biex jgħinna. Bħas-Samaritan it-Tajjeb, meta huwa jarana midruba mal-ġenb tat-triq, Huwa jinfaxxa l-ġrieħi tagħna u jieħu ħsiebna (ara Luqa 10:34). Il-fejqan u l-qawwa li ssaħħaħna ta’ Ġesù Kristu u l-Att tal-Fidwa Tiegħu hija disponibbli għalina lkoll li nitolbuh. Jiena nixhed dwar dan kif nixhed ukoll dwar is-Salvatur tagħna, li jagħmel dan kollu possibbli.
Għad jasal jum meta s-sofferenza kollha li nesperjenzaw fil-ħajja mortali tagħna tgħaddi u ma jkunx hemm aktar uġigħ (ara Rivelazzjoni 21:4). Nitlob li aħna lkoll nifhmu t-tama u l-qawwa tal-Att tal-Fidwa tas-Salvatur tagħna: l-assigurazzjoni tal-immortalità, l-opportunità għall-ħajja eterna, u l-qawwa li ssostnina li nistgħu nirċievu jekk aħna nitolbuh, f’ isem Ġesù Kristu, amen.