Niskopru d-Divintà ta’ Ġo Fina
Minn Rosemary M. Wixom
President Ġenerali tal-Primarja
Aħna niġu f’ din id-dinja biex nieħdu ħsieb u niskopru ż-żerriegħa ta’ natura divina li għandna ġewwa fina.
Ħuti, aħna nħobbukom! Jiena nixhed li l-ħajja hija rigal. Alla għandu pjan għal kull waħda minna, u l-għan individwali tagħna beda ferm qabel ma’ aħna ġejna hawn fid-dinja.
Dan l-aħħar bdejt nagħraf li l-miraklu tat-twelid ta’ tarbija f’ din il-ħajja mortali huwa parti mill-pjan ta’ Alla. Kollha kemm aħna żviluppajna fiżikament ġewwa l-ġuf t’ ommna filwaqt li għaddejna xhur sħaħ niddependu fuq il-ġisem tagħha biex isostni l-ġisem tagħna. Eventwalment, madankollu, il-proċess tat-twelid—ħaġa mill-aktar drammatika kemm għall-omm kif ukoll għat-tarbija—wasal biex isseparana minnha.
Hekk kif tarbija titwieled f’ din id-dinja, it-tibdil fit-temperatura u d-dawl u l-pressjoni f’ daqqa li tintreħa minn ġos-sider twassal lit-tarbija biex tieħu l-ewwel nifs tagħha weħidha. Dak il-pulmun ċkejken f’ daqqa waħda jimtela bl-arja għall-ewwel darba, l-organi jibdew jaħdmu u t-tarbija tibda tieħu n-nifs. Hekk kif jinqata’ l-kurdun, it-tarbija tissepara ruħha għal dejjem minn ommha, u b’ hekk tibda l-ħajja tat-tarbija fid-dinja.
Ġob qal, ”L-ispirtu ta’ Alla għamilni, u n-nifs tas-Setgħan jagħtini l-ħajja.”1
Aħna niġu hawn fid-dinja ”fuq sħab ta’ glorja.”2 “Il-Familja: Proklamazzjoni lid-Dinja” tgħallimna li kollha kemm aħna aħna ”iben jew bint spirtu ta’ ġenituri tas-smewwiet” u ”kollha għandna natura divina u destin divin.”3 Missierna tas-Smewwiet b’ mod ġeneruż jaqsam parti mid-divinità Tiegħu magħna. Din in-natura divina tasal għandna bħala rigal mingħandu b’ imħabba li ġenitur biss jista’ jħoss.
Aħna niġu f’ din id-dinja biex nieħdu ħsieb u niskopru ż-żerriegħa ta’ natura divina li għandna ġewwa fina.
Aħna Nafu Għalfejn
Elaine Cannon, li kienet president ġenerali tat-Tfajliet, qalet, ”Hemm jumejn li huma mill-aktar importanti fil-ħajja tal-mara: Il-jum li fih titwieled u l-jum li ssir taf għalfejn.”4
Aħna nafu għalfejn. Aħna ġejna hawn fid-dinja biex ngħinu nibnu s-saltna Tiegħu u nħejju għat-Tieni Miġja ta’ Ibnu, Ġesù Kristu. Ma’ kull nifs li nieħdu, aħna nagħmlu li nistgħu biex nimxu warajh. In-natura divina li hemm ġo kull waħda minna tissaffa u tikber permezz tal-isforz li aħna nagħmlu biex nersqu aktar viċin Missierna u Ibnu.
In-natura divina tagħna m’għandha x’ taqsam xejn ma’ kemm aħna nirnexxu personalment, mal-istatus li aħna niksbu, man-numru ta’ maratoni li aħna niġru jew mal-popolarità tagħna u kemm nemmnu fina nfusna. In-natura divina tagħna ġejja minn Alla. Twaqqfet fejn konna neżistu qabel it-twelid tagħna u se tkompli tul l-eternità.
Aħna Lkoll Maħbubin
Aħna nidentifikaw ruħna man-natura divina tagħna hekk kif aħna nħossu u noffru l-imħabba ta’ Missierna tas-Smewwiet. Aħna għandna l-għażla ħielsa biex permezz tagħha nieħdu ħsiebha, inħalluha tiffjorixxi u ngħinuha tikber. Pietru qal li aħna ġejna mogħtija ”l-wegħdiet prezzjużi” li aħna nistgħu ”nissieħbu fin-natura ta’ Alla.”5 Hekk kif aħna nifhmu min verament aħna—ulied Alla—aħna nibdew inħossu dawk il-wegħdiet prezzjużi.
Jekk aħna nħarsu ’l barra mit-tieqa, u mhux biss lejn il-mera, aħna jkollna ċans li nibdew inħarsu lejna nfusna bħala wliedu. Tkun ħaġa mill-aktar naturali li aħna nduru lejh fit-talb, u nkunu ħerqanin li naqraw kliemu u nagħmlu r-rieda Tiegħu. Aħna nkunu kapaċi naraw il-valur tagħna mill-mod kif iħares lejna Hu u mhux kif jarawna dawk ta’ madwarna jew dawk li jkunu fuq il-Facebook.
Jekk qatt ikollkom xi dubju mid-divinità li hemm ġewwa fikom, inżlu għarkupptejkom u itolbu lill-Missier fis-Smewwiet, ”Verament jiena bintek, u inti veru tħobbni?” Il-Presbiteru Elder M. Russell Ballard qal, “Wieħed mill-aktar messaġġi ħelwin li jwasslilkom l-Ispirtu hu dwar il-mod kif il-Mulej iħossu dwarkom.”6
Aħna Tiegħu. Pawlu qal, ”Dan l-Ispirtu jixhed flimkien mal-ispirtu tagħna li aħna wlied Alla.”7 Ħafna drabi l-ewwel għanja tal-Primarja li aħna nitgħallmu tkun ”Jien Iben Alla.”8 Issa wasal iż-żmien li naqbdu dik il-frażi għażiża ”Jien iben Alla” u magħha nżidu l-kliem ”Mela, x’ għandi nagħmel?” Nafu anke nistaqsu mistoqsijiet bħal dawn: ”X’ nista’ nagħmel biex ngħix ħajti bħala bint Alla?” ”Kif nista’ niżviluppa n-natura divina li hemm ġewwa fija?”
Il-Dieter F. Uchtdorf qal, ”Alla bagħatkom hawn sabiex iħejjikom għal futur akbar milli qatt tistgħu timmaġinaw.”9 Dan il-futur, jum wara jum, jibda jieħu l-ħajja meta intom ma tibqgħux sempliċiment teżistu; jibda jieħu l-ħajja meta intom tibdew tgħixu ħajjitkom biex twettqu l-għan li għalih inħlaqtu. B’ dan il-mod intom tistiednu l-Mulej f’ ħajjitkom, u tibdew twettqu r-rieda Tiegħu.
Aħna Nitgħallmu Minħabba n-Natura Divina Tagħna
In-natura divina timlina bix-xewqa li nsiru nafu aħna stess din il-verità eterna.
Waħda tfajla żagħżugħa jisimha Amy m’ilux għallmitni din il-lezzjoni meta hija kitbet: ”Dan iż-żmien mhux faċli tkun żagħżugħa. Il-mogħdija aktar ma tmur aktar qed tidjieq. Satana verament qed jagħmel dak kollu li jista’. Sar kollox jew tajjeb jew ħażin; m’hemmx triq tan-nofs.”
Hija kompliet: ”Xi kultant diffiċli ssib ħbieb tajbin. Anke meta taħseb li għandek ċerti ħbieb tal-qalb li qatt mhu se jħalluk waħdek, għal xi raġuni anke dawn jinbidlu. Huwa għalhekk li jiena grata li għandi l-familja, lil Missieri tas-Smewwiet, lil Ġesù Kristu u l-Ispirtu s-Santu li jistgħu jkunu s-sieħba tiegħi kull meta l-ħbieb tiegħi ma nsibhomx.”
Amy kompliet tgħid: ”Darba waħda matul il-lejl ħassejtni verament inkwetata. Għedt lil oħti li ma kontx naf x’ se naqbad nagħmel.”
Aktar tard matul dak il-lejl oħtha bagħtitilha messaġġ bil-mowbajl u kkwotat lill-Presbiteru Jeffrey R. Holland meta huwa qal: ”Taqtgħux qalbkom. … Ara taqtgħu qalbkom. Ibqgħu mexjin. Ibqgħu ppruvaw. Quddiemkom se ssibu l-għajnuna u l-hena. … Fl-aħħar kollox se jkun sew. Afdaw f’ Alla u emmnu fil-ħwejjeġ tajbin li se jkollkom f’ ħajjitkom.”10
Amy spjegat: ”Niftakarni naqra dan il-kliem u nitlob li jekk Alla verament kien jinsab hemm għalija jiena b’ xi mod se jirnexxili nħoss l-imħabba li Hu għandu għalija.”
Hija qalet: ”Hekk kif jiena tlabt u emmint li Hu kien jinsab hemm, jiena ħassejt ġewwa fija l-aktar sentiment meraviljuż u ħelu li mlieni bil-ferħ. M’għandix kliem biex niddeskrivih. Jiena kont naf li Huwa kien jinsab hemm u li kien iħobbni.”
Peress li intom uliedu, huwa jaf intom x’ tistgħu ssiru. Huwa jaf bil-biżgħat tagħkom u bil-ħolm tagħkom. Huwa jgħożż il-potenzjal tagħkom. Huwa jistennikom biex tmorru quddiemu fit-talb. Peress li intom uliedu, intom mhux biss għandkom bżonnu, iżda anke Hu għandu bżonnkom. Dawk li bħalissa jinsabu bilqiegħda ħdejkom f’ din il-laqgħa għandhom bżonnkom. Id-dinja għandha bżonnkom, u n-natura divina tagħkom tippermettilkom li tkunu d-dixxipli leali Tiegħu fost uliedu kollha. La darba nibdew naraw id-divinità ġewwa fina, aħna nkunu nistgħu narawha wkoll f’ ħaddieħor.
Aħna Nservu Minħabba n-Natura Divina Tagħna
In-natura divina timlina bix-xewqa li naqdu lil ħaddieħor.
M’ilux wisq, Sharon Eubank, id-direttriċi tas-Servizzi Umanitarji u l-Karitajiet tal-QAJ, tkellmet dwar esperjenza li rrakkonta l-Presbiteru Glenn L. Pace. F’ nofs is-snin tmenin, fl-Etiopja kien hemm nixfa enormi u ġuħ mill-aktar kbir. Bħala għajnuna lin-nies tal-post, ġew maħluqa għadd ta’ stazzjonijiet bl-ilma u l-ikel għal dawk li setgħu jaslu sa ħdejhom. Wieħed raġel xwejjaħ li kien qed imut bil-ġuħ kien jinsab għaddej jimxi triq twila sakemm jasal sal-istazzjon tal-ikel. Huwa kien għaddej minn ġo villaġġ meta sema’ tarbija tibki. Huwa beda jfittex sakemm sab lit-tarbija bilqiegħda mal-art ħdejn l-omm mejta tagħha. U ħa t-tarbija f’ idejh u kompla miexi l-25 mil li kien fadal sal-istazzjon tal-ikel. Meta huwa wasal, l-ewwel kliem li tenna ma kienx ”Jiena għandi l-ġuħ” jew ”Għinuni.” Kliemu kien ”X’ jista’ jsir għal din it-tarbija?”11
In-natura divina ta’ ġo fina tħeġġeġ ix-xewqa tagħna li nilħqu lil ħaddieħor u tnebbaħna biex nagħmlu xi ħaġa. Missierna tas-Smewwiet u Ġesù Kristu jistgħu jgħinuna nsibu l-qawwa li nagħmlu dan. Jista’ jkun li l-Mulej ikun qed jistaqsina, ”X’ nistgħu nagħmlu għal din il-bint, għal dan ħuna, għal dan il-missier jew dan il-ħabib?”
Huwa permezz tas-suġġerimenti tal-Ispirtu li n-natura divina ta’ dak li jkun qed jiddubita, wara li jieħu nifs fil-fond, issib biżżejjed paċi li huwa jerġa’ jikseb lura l-fidi.
Meta l-profeta jitkellem, kliemu jinfluwenza n-natura divina tagħna u jagħtina l-qawwa li nimxu wara kliemu.
Li kull ġimgħa aħna nieħdu sehem fis-sagrament jagħti l-ħajja lid-divinità li hemm ġewwa fina, u permezz ta’ dan aħna niftakru fis-Salvatur tagħna, Ġesù Kristu.
Jiena nwiegħed li hekk kif intom tiskopru l-kobor tan-natura divina li hemm ġo fikom, intom tibdew tħaddmu b’ aktar qawwa id-don prezzjuż tagħkom. Ħalluh jiggwidakom sabiex issiru wliedu, li timxu fil-mogħdija li twassal għal għandu—fejn aħna niġu ”rrestawrati lura għand dak Alla li tagħna l-ħajja.”12 F’isem Ġesù Kristu, amen.