1 Tan natan, siak, Alma lapu ed ingangan ak na Dios ya itagar ko si Amulek tan onla kami, tan mampulong kami lamet ed saya a totoo, odino ed saray totoo a wala ed ciudad na Ammonihah, agawa a legan ya igagapok so mampulong ed sikara, ginapoan da ak a kolkulen a kuan da:

2 Siopa ka? Ipasen mo kasi a manisia kami ed pamaneknek na sakey a too, angano ipulong to ed sikami a saya a mundo so natunaw?

3 Natan ag da natatalusan so saray salita ya imbaga ra; lapu ed ag da kabat a saya a mundo so natunaw.

4 Tan inkuan da met: Ag kami manisia ed saray salitam no mamprofesiya na saya a baleg a ciudad so naderal ed loob na sakey ya agew.

5 Natan ag da kabat a say Dios nagawaan to so onia a makapakelaw a kimey, lapu ed inmawet so puso ra tan matalker a teñger da a totoo.

6 Tan inkuan da: Siopa so Dios, ya añgibaki na aliwan dakel nen say sakey a too ya añgiteran to na pakaoley ed limog na saya a totoo, a mañgibawag ed sikara na katuaan na saray makana tan makapakelaw a beñgatla?

7 Tan sikara so inmalagey pian siak so limaan da; balet nia, ag da ginawa. Tan siak so tinmalindeg ya andi-takot ya añgibawag ed sikara, on, siak so andi-takot a nampaneknek ed sikara, a nankuan:

8 Nia, O sikayo a marelmeng tan matuñgañga a kailalakan; panon so impakaliñgwan yo ed saray sisia a tawir na kaamaan yo; on, panon kagano so impanlingwan yo ed saray gangan na Dios.

9 Ag yo kasi nanunotan a si ama tayo, si Lehi, so naawit a pinmaway ed Jerusalem dia ed panamegley na lima na Dios? Ag yo kasi nanunotan a sikara ya amin so inwanwan to ed kalawakan?

10 Tan alingwanan yo kasi la a tampol no amimpiga-piga a panaon so impañgilaban to ed saray ama tayo ed lima na saray kabusol da, tan sikara so iniagel to ed kadederal, angan dia ed lima na saray dili a kaagian da?

11 On, tan no ag lapu ed ag mipara a pakapanyari to, tan panañgasi to, tan andukey a panagtepel to ed sikatayo, sikatayo so andi-saew ya ataksing la ed tapew na saya a dalin ya abayag la sakbay na saya a panaon, tan ag la piga sikatayo la so wala ed kipapasen na andi-angaan a segsegang tan abagey.

12 Nia, natan ikuan ko ed sikayo a sikato so añgigangan ed sikayo a mambabawi; tan likud no sikayo so mambabawi, ag yo nayarian a tawiren so panarian na Dios. Balet nia, aliwa ni a saya ya amin—ingangan to kayo a mambabawi, odino sikayo so sigpot to a deralen ed tapew na dalin; on, dalawen to kayo ed pasnok to, tan dia ed sebeg na sanok to ag to iarawi.

13 Nia, ag yo kasi nanunotan so saray salita ya imbalikas to ed si Lehi, ya inkuan to: Unong no onoren yo so saray gangan ko, sikayo so onaliguas ed saya a dalin? Tan lamet saya so asalita: Unong no ag yo sumpalen so saray gangan ko sikayo so nataksing ed arap na Katawan.

14 Natan pirawat ko a nunoten yo komon, ya unong a saray Lamanite ag da sinumpal so saray gangan na Dios, sikara so ataksing ed arapan na Katawan. Natan anengneng tayo a say salita na Katawan so apamintuan nipaakar ed saya a beñgatla, tan saray Lamanite so ataksing ed arapan to, nanlapu ed impankasalanan da ed saya a dalin.

15 Angaman ontan ikuan ko ed sikayo, a saya so magmaong ni a nayari ya itepel da ed agew na kaokom nen say sikayo, no magnayon kayo ed saray kasalanan yo, on, tan magmaong ni a nayari ya itepel da dia ed saya a bilay nen say sikayo, likud no sikayo so mambabawi.

16 Lapu ed dakerakel a sipan so niiter met ed saray Lamanite; lapu ed sisia a tawir na kaamaan da so akaseñgeg na ipansiansia ra ed ag-pikakabat; dia ed ontan say Katawan so mapañgasi ed sikara tan parukeyen to so pambilay da ed dalin.

17 Tan dia ed arum a panaon sikara so naawit a manisia ed salita to, tan naamtaan da so saray liñgo na saray sisia a tawir na kaamaan da; tan dakel ed sikara so nilaban, lapu ed say Katawan so mapañgasi ed amin ya ontawag ed ñgaran to.

18 Balet nia, ikuan ko ed sikayo a no magnayon kayo ed saray karelmeñgan yo saray agew yo so ag la ondukey ed saya a dalin, tan saray Lamanite so nibaki ed sikayo; tan no ag kayo mambabawi sikara so onsabi ed sakey a panaon ya ag yo amta, tan sikayo so dalawen na sigpot a kadederal; tan saya so nagawa unong ed sebeg na sanok na Katawan.

19 Lapu ed ag to nitepel a mambilay kayo ed saray karelmeñgan yo, pian naderal so saray totoo to. Ikuan ko ed sikayo, Andi; lablabayen to ni ya itepel a saray Lamanite a deralen da so amin a totoo to a sikara so tatawagen a totoo nen Nephi, no sikara so napelag ed saray kasalanan tan kasosumpa, kayari a wala ed sikara so baleg a liwawa tan dakel a pikakabat ya initer na Katawan a Dios ed sikara;

20 On, kayari a sikara so sakey a totoo ya añgiteran na baleg a palabo na Katawan; on, kayari a niiter ed sikara so mabunlok ya aro nen say dinan a bansa, sankakanayon, salita, odino totoo; kayari a niiter ed sikara so pikakabat nipaakar ed amin a beñgatla, unong ed saray pilalek da, tan pananisia ra, tan saray pikakasi ra, nipaakar ed saray agawa la, tan saray peles ni a nagagawa, tan ed saray onsabi;

21 Kayari a sikara so dinalaw na Espiritu na Dios; ya akapitungtong la ra ed saray angeles, tan sikara so akitungtoñgan na voces na Katawan; tan wala ed sikara so espiritu na profesiya, tan say espiritu na puyan, tan ontan met ed dakerakel a palabo, say palabo na pakapansalita ed arum a salita, tan say palabo na panagpulong, tan say palabo na Espiritu Santo, tan say palabo na panañgipatalus;

22 On, tan kayari a sikara so inlaban na Dios ed impaway da ed dalin na Jerusalem, ed panamegley na lima na Katawan; a sikara so nilaban ed eras, tan dia ed sakit, tan amin a nengneng na sakit; tan sikara so apabiskeg ed bakal, pian sikara so ag naderal; lapu ed sikara so nipaway ed inkaaripen ya amimpiga-piga la, tan sikara so naasikaso tan niagel ya anga ni ed natan; tan sikara so inmaliguas anga ed sikara so minmayaman ed amin a nengneng na beñgatla—

23 Tan natan nia ikuan ko ed sikayo, a no saya a totoo, ya akaawat na dakerakel a palabo a nanlapu ed lima na Katawan, no sikara so mankasalanan sumpa ed liwawa tan pikakabat a wala ed sikara, ikuan ko ed sikayo no onia so kipapasen, no sikara so napelag ed kasalanan, magmaong ni a nayari a nitepel so saray Lamanite nen say sikara.

24 Tan nia, saray sipan na Katawan so niiter met ed saray Lamanite, balet saraya so angapo ed sikayo no sikayo so mankasalanan; ag kasi say Katawan insipan to so saya tan malet ya impaakseb to so gangan, no sikayo so ontuñgañga sumpa ed sikato sigpot a sikayo so naderal ed tapew na saya a dalin?

25 Tan natan lapu ed saya a señgegan, pian ag kayo naderal, say Katawan imbaki to so angel to ya ondalaw ed dakel a totoo to, ya inkuan to ed sikara a nakaukolan ya onla ira tan ibawag da a siseseet ed saya a totoo, a mankuan; Mambabawi kayo, lapu ed say panarian na tawen so asinger la;

26 Tan ag la dakel ya agew manlapu ed natan say Anak na Dios so onsabi ed gloria to; tan say gloria to so gloria na Bugbugtong ya Anak na Ama, napno na gracia, pampapara, tan katuaan, napno na anos, panañgasi, tan andukey a panañgitepel, masiglat ya ondeñgel ed nañgis na saray totoo to tan mañgebat ed saray pikakasi ra.

27 Tan nengneng yo, sikato so onsabi dia a manundon ed saray nabiniagan onkana ed pambabawi, dia ed pamanamegley na pananisia ed ñgaran to.

28 Dia ed ontan, iparaan yo so dalan na Katawan, lapu ed say panaon asinger la a say amin a totoo anien da so tumang na saray kimey da, unong ed no anto so kipapasen da nen saman—no sikara so matunong anien da so kilalaban na saray kamarerua ra, unong ed pakapanyari tan panañgilaban nen Jesu Cristo, tan no sikara so mauges anien da so kadederal na saray kamarerua ra, unong ed pakapanyari tan panagdakep na demonyo.

29 Natan nia, saya so voces na angel, a manakis ed saray totoo.

30 Tan natan, inararok a kaagian, lapu ed sikayo so kaagian ko, tan nepeg yo so aroen, tan kaukolan a mañgawit kayo na kimey ya ontukoy ed pambabawi, tan anengneng ko a saray puso yo so naspot la ya inmawet sumpa ed salita na Dios, tan lapu ed anengneng ko a sikayo so abalang tan nigapol a totoo.

31 Natan agawa a sanen siak, Alma, nibalikas ko la so saraya a salita, nia, saray totoo sinmanok ira ed siak lapu ed imbagak ed sikara ya anawet so puso ra tan totoo a matatalker so saray teñger da.

32 Tan ontan met lapu ed imbagak a sikara so abalang tan nigapol a totoo ampetang so ulo ra ed siak, tan nampirawatan da ak a limaan, pian siak so ikulong da ed pañgawan.

33 Balet agawa a say Katawan ag inmabuloy a siak so alaen da ed saman a panaon tan siak so ikulong da ed pañgawan.

34 Tan agawa a si Amulek so linma tan tinmalindeg, tan ginapoan to so mampulong ed sikara met. Tan natan saray salita nen Amulek ag la nisulat ya amin, angaman ontan say kabiañgan na saray sinalita to so nisulat ed saya a libro.