1 O no siak so sakey ya angel, tan naalak so pirawat na pusok, pian siak komon so onla tan mansalita ed panamegley na trompita na Dios, ed sakey a voces a yegyegen to so mundo, tan ikelyaw so pambabawi ed balang sakey a totoo!

2 On, ibawag ko ed balang sakey a kamarerua, a siñga dia ed voces na karul, so pambabawi tan say plano na pananundon, a sikara so nepeg a mambabawi tan ondago ed Dios tayo, pian angapo la komon so dakel ya ermen ed amin a tapew na dalin.

3 Balet nengneng yo, sakey ak a too, tan mankasalanan ak ed say pirawat ko; lapu ed nepeg pasaragen ko so saray beñgatla ya ingetar na Katawan ed siak.

4 Ag la manepeg a panaburidoan ko so saray pilalek ko ed say malet a gangan na matunong a Dios, lapu ed kabat ko ya iter to ed saray totoo so unong ed saray pilalek da, balang la no nipaakar ed patey odino nipaakar ed bilay; on, kabat ko ya igetar to ed saray totoo, on, ipaakseb to ed sikara so saray gangan ya ag-nauman, unong ed saray linawa ra, balang la no saraya so nipaakar ed kilalaban odino nipaakar ed kadederal.

5 On, tan kabat ko a say maong tan mauges so sinmabi ed amin a totoo; siopaman ya ag to kabat so maong ed mauges so andi-tetel; balet siopaman a kabat to so maong tan mauges, dia ed sikato niiter so unong ed saray pilalek to, no say kaliktan to so maong odino mauges, bilay odino patey, gayaga odino tetel na consiensia.

6 Natan, dia ed nanenengneng ko kabat ko so saraya a beñgatla, akin pampilalekan ko ni so babaleg nen say pangawak na kimey a saya so akatawagan ko?

7 Akin pampilalekan ko ni a siak so sakey ya angel, pian makapansalita ak ya anga ed amin a sampot na mundo?

8 Tan nia, say Katawan iter to ed amin a bansa, ed dili a bansa ra tan salita ra, na mañgibañgat ed salita to, on, dia ed kakabatan, amin a nanengneng to a manepeg a nawalaan ira; dia ed ontan anengneng tayo a say Katawan so mambilin ed kakabatan, unong ed dinan so manepeg tan matua.

9 Amtak no anto so ingangan na Katawan ed siak, tan mangloria ak ed saya. Ag ko panglorian so inkasiak, balet mangloria ak ed saman so ingangan na Katawan ed siak; on, tan saya so gloriak, pian komon manmaliw ak ya ikakana ed saray lima na Dios a mañgawit na pigara a kamarerua ed pambabawi; tan saya so gayagak.

10 Tan nia, sano nanenengneng ko a dakel ed saray kaagian ko so tua a nambabawi, tan ondadago ra ed Katawan a Dios da, dia ed saya say kamareruak napno na gayaga; dia ed saya nanunotan ko no anto so saray ginawa na Katawan ed siak, on, angan dineñgel to so saray pikakasik; on, dia ed saya nanunotan ko so mapañgasi a taklay to ya iniunat to ed siak.

11 On, tan nanunotan ko met so inkadakep na saray amak; lapu ed petepeteg a kabat ko ya inlaban ira na Katawan ya impaway ed inkaaripen, tan lapu ed saya inletneg so simbaan to; on, say Katawan a Dios, say Dios nen Abraham, say Dios nen Isaac, tan say Dios nen Jacob, so añgilaban ed sikara ed inkaaripen.

12 On, lawas ko a nonunoten so inkadakep na saray amak; tan saman met lamlamang a Dios so añgilaban ed sikara ed lima na saray taga-Egipto, ed inkaaripen.

13 On, tan saman met lamlamang a Dios so añgiletneg na simbaan to ed limog da; on, tan saman met lamlamang a Dios so nantawag ed siak ed masanto a kimey, a mañgipulong na salita ed saya a totoo, tan añgiter ed siak na dakel a maong a nansumpalan, a dia ed saya say gayagak so nagnap.

14 Balet ag ak nangayaga ed maong a nansumpalan ko a bukor, balet say gayagak so lalo a nagnap lapu ed say maong a nansumpalan na saray kaagian ko, a linma ed dalin na Nephi.

15 Nia, sikara so nansagpot a mapalalo, tan akapañgiter ira na dakel a buñga; tan agay la a kabaleg so tumang da!

16 Natan, sano nanunotan ko so maong a nansumpalan na saraya a kaagian ko say kamareruak so naawit ed arawi, anga ed isian to ed laman ko, a siñga nen saman, tan ontan la so kabaleg na gayagak.

17 Tan natan komon say Dios iter to ed saraya, a kaagian ko, a sikara komon so onyurong ed panarian na Dios; on, tan ontan met ed buñga na saray sagpot da pian komon sikara so ag la ompaway, balet sikara komon so mandayew ed sikato ya anga ed anga. Tan komon say Dios iter to a saya so nagawa unong ed saray salitak, iñgen unong ed sinalitak. Amen.