1 Natan agawa a kayari impansampot nen Korihor, lapu ed naawat nen Alma so balita a saray Zoramite pipikeweten da so dalan na Katawan, tan si Zoram, a sikato so pañgulo ra, so mañgitutonton ed puso na saray totoo ya ontewek ed saray talintao, say puso to lamet so ginmapo ya onsinagem lapu ed karelmeñgan na saray totoo.

2 Tan saya so señgegan na baleg ya ermen nen Alma nen akabatan to so karelmeñgan ed limog na saray totoo to; dia ed onia say puso to so mapalalo ya apaermen lapu ed insian na saray Zoramite ed saray Nephite.

3 Natan saray Zoramite so nantitipon ed sakey a dalin a saya so tinawag da na Antionum, a saya so wala ed bokig na Zarahemla, a ñgalñgali miketeg ya asinger ed gilig na dayat, ed abalaten na dalin na Jershon, a saya met so miketeg ed kalawakan ed abalaten, a saya a kalawakan so napno na saray Lamanite.

4 Natan saray Nephite baleg so takot da ag la piga saray Zoramite onloob ira ed sakey a talusan ed saray Lamanite, tan saya so panseñgegan na dakel a nabalang ed kabiañgan na saray Nephite.

5 Tan natan, unong a say panagpulong na salita wala so baleg a tanguyor to a mañgitunton ed saray totoo a mangawa na kaptekan—on, awalaan na mabiskeg a pakapanyari ed saray kanunotan na saray totoo nen say espada, odino angan dinan a beñgatla, ya agawa ed sikara—dia ed ontan anunotan nen Alma a nakaukolan a suboken da so pakayari na salita na Dios.

6 Dia ed ontan intarok to si Ammon, tan si Aaron, tan si Omner; tan si Himni intilak to ed simbaan ed Zarahemla; balet saray abitla ya unaan a talora so intarok to a kaiba to, tan ontan met ed si Amulek tan si Zeezrom, a sikara so wala ed Melek; tan intarok to met so duara ed saray anak to a lalaki.

7 Natan say sankapañguloanan ed saray anak to a lalaki so ag to intarok, tan say ñgaran to Helaman; balet say ñgaran na saray intarok to si Shiblon, tan si Corianton; tan saraya so ñgaran na linma ya akiolop ed sikato ed limog na saray Zoramite, a mañgipulong ed sikara na salita.

8 Natan saray Zoramite so sinmian a nanlapu ed saray Nephite; dia ed ontan wala la ed sikara so salita na Dios a nipulong ed sikara.

9 Balet sikara so naplag ed saray baleg a liñgo, lapu ed ag da susumpalen so saray gangan na Dios, tan saray tutuntonen to, unong ed gangan nen Moises.

10 Ni say sikara so manusumpal ed saray gagawaen ed simbaan, a mampatuloy ira ed panagpikasi tan onkerew na abagey ed Dios ya inagew-agew, pian ag ira napelag ed tukso.

11 On, dia ed magano a salita, pinikewet da so saray dalan na Katawan ed dakerakel a pamaakaran; dia ed ontan, lapu ed saya a señgegan, si Alma tan saray kaagian to so linma ed saman a dalin pian ipulong da so salita ed sikara.

12 Natan, sanen sikara so akasabi ed saman a dalin, nia, dia ed baleg a pankelaw da arumog da a saray Zoramite so nampaalagey na sinagogas, tan nantitipon ira ed inkasikara ed sakey ya agew ed loob na sakey simba, a saya ya agew so tatawagen da ya agew na Katawan; tan sikara so mampipikasi ed kanengneñgan na sakey a panañgigalang ya ag ni kapiganman anengneng nen Alma tan saray kaagian to;

13 Tan wala so sakey a pasen ya impaalagey da ed pegley na sinagoga ra, a saya so pasen a talindegan, ya atagey nen say katagey na ulo; tan dia ed tapew to nia sakey a too labat so nayarian to.

14 Dia ed ontan, siopaman a mampilalek a mañgigalang sikato so onla ya ontalindeg ed tapew to nia, tan iunat to so saray lima to a paarap ed tawen, tan ikelyaw to ed maksil a voces, a mankuan:

15 Masanto, masanto a Dios; manisia kami a sika so Dios, tan manisia kami a sika so masanto, tan sika so sakey ya espiritu nen saman, tan sika so espiritu natan, tan sika so espiritu ed ando la ya ando.

16 Masanto a Dios, manisia kami ya insian mo kami ed saray kaagian mi; tan ag kami manisia ed sisia a tawir na saray kaagian mi, a saya so iniawat ed sikara na saray inuogaw a kagagawa na kaamaan da; balet manisia kami a pinili mo kami a manmaliw a masanto ya anak mo; tan ontan met impakabat mo ed sikami ya angapo so Cristo.

17 Balet sika met lamlamang nen karoman, natan, tan dia ed andi-angaan; tan sikami so pinilim pian sikami so nilaban, balet amin a wala ed kaliber-liber mi sikara so apili ya ibantak dia ed sanok mo ed dalem na infierno; a lapu ed saya ya inkasanto, O Dios, misalamat kami ed sika; tan misalamat kami met ed sika lapu ed pinili mo kami, pian sikami ag nitunton a niarawi ed saray makulang-kulang a sisia a tawir na saray kaagian mi, a saya so mamabalor ed sikara ed pananisia ed si Cristo, a saya so mañgitutonton na saray puso ra ya onarawi ed sika, a Dios mi.

18 Tan lamet misalamat kami ed sika, O Dios, lapu ed sikami so sakey ya apili tan masanto a totoo. Amen.

19 Natan agawa kayari a si Alma tan saray kaagian to tan saray anak to a lalaki nadñgel da so saraya a pikakasi, sikara so nankelaw ya ag nasoksukat.

20 Tan nengneng yo, balang sakey a too so linma tan mampikasi na saman lamlamang a pikakasi.

21 Natan saya a pasen so tinawag da na Rameumptom, a saya, no ipatalus, so masanto a panagtalindegan.

22 Natan, manlapu ed saya a talindegan sikara so mañgiapay, balang sakey a too, na saman lamlamang a pikakasi ed Dios da, a misalamat ira ed Dios lapu ed sikara so pinili to, tan ag to ra intunton a niarawi ed saray sisia a tawir na saray kaagian da, tan saray puso ra so ag atakew a manisia ed saray beñgatla ya onsabi, a saya angapo so pikakabat da.

23 Natan, kayari na amin a totoo so akapañgiapay na pisasalamat ed onia a kanengneñgan, sikara so pinmawil ed saray kaaboñgan da, ya ag da la bibitlaen lamet so Dios da anga ed ontumbok a pantitipon da lamet ed masanto a talindegan, pian iyapay da lamet so pisasalamat unong ed ugali ra.

24 Natan sanen si Alma anengneng to saya say puso to so apaermen; lapu ed anengneng to a sikara so marelmeng tan managpikewet a totoo; on, anengneng to a saray puso ra so akateen ed balitok, tan pilak, tan amin a nengneng na mararakep ya ikakana.

25 On, tan anengneng to met a saray puso ra so nipaatagey ed baleg a panagpasirayew, dia ed kinon da.

26 Tan intagey to so voces to ed tawen, tan nankelyaw, a nankuan: O, kaonoñgan kabayag, O Katawan, so panirap na saray igagangan mo a manayam dia ed leksab na inkalaman, a manimaton na onia a sankaugesan a karelmeñgan ed limog na saray anak na totoo?

27 Nengneng mo, O Dios ko, sikara so onnanañgis ed sika, tan balet saray puso ra so tinmaluna so kinon da. Nengneng mo, O Dios, sikara so mannañgis ed sika ed saray sañgi ra, balet sikara so sinmibok a nipaatagey, angan dia ed pambaleg-balegan, na saray beñgatla ya andi-kana ed mundo.

28 Nengneng mo, O Dios ko, so saray ankabli a kawes da, tan saray singsing da, tan saray pulseras da, tan saray alahas da a balitok, tan saray beñgatla ya ankabli ya arkos ed sikara; tan nengneng mo, saray puso ra so niteen ed saraya, tan siansia ni a sikara so mankelyaw ed sika tan kuan da—Misalamat kami ed sika, O Dios, lapu ed sikami so sakey ya apili a totoo ed sika, balet saray arum so nabalang.

29 On, tan ibabaga ra ya impakabat mo ed sikara ya angapo so Cristo.

30 O Katawan a Dios, kaonoñgan kabayag so pañgitepel ed say onia a karelmeñgan tan ag-inkamatuor a wala ed limog na saya a totoo? O Katawan, iter mo ed siak so biskeg, pian nitepel ko so saray kakapoyan ko. Lapu ed siak so makapoy, tan say onia a karelmeñgan ed limog na saraya a totoo so mañgiiter na irap ed kamareruak.

31 O Katawan, say pusok so mapalalo a maermen; ligliwam pa so kamareruak ed Cristo. O Katawan, iter mo pa ed siak pian nawalaan ak na biskeg, pian siak so makatepel a siaanos ed saraya ya irap ya onsabi ed siak, lapu ed karelmeñgan na saray totoo.

32 O Katawan, ligliwam pa so kamareruak, tan iter mo ed siak so maong a pansumpalan, tan ontan met ed saray kaibak a komikimey a kaolop ko—on, si Ammon, tan si Aaron, tan si Omner, tan ontan met nen Amulek tan si Zeezrom, tan saraman met so duara ya anak ko a lalaki—on, angan amin da sikara so ligliwam, O Katawan. On, ligliwam pa so saray kamarerua ra ed si Cristo.

33 Iter mo pa ed sikara pian nawalaan ira na biskeg, pian nitepel da so saray irap ya onsabi ed sikara lapu ed karelmeñgan na saya a totoo.

34 O Katawan, iter mo pa ed sikami pian nawalaan kami na maong a pansumpalan ed pañgawit mi ed sikara lamet ed sika dia ed Cristo.

35 Nia, O Katawan, saray kamarerua ra so pinabli, tan dakel ed sikara so kaagian mi; dia ed ontan, iter mo ed sikami, O Katawan, so pakapanyari tan kakabatan pian naawit mi so saraya, saray kaagian mi, lamet ed sika.

36 Natan agawa sanen imbalikas nen Alma so saraya a salita, intapew to so saray lima to ed amin a kaolop to. Tan nia, dia ed impañgitapew to na lima to ed sikara, sikara so napno na Masanto ya Espiritu.

37 Tan kayari to nia sikara so nansisian ed balang sinansakey, ya angapo so kanunotan da ed inkasikara no anto so kanen da odino anto so inomen da, odino anto so isulong da.

38 Tan say Katawan so nantalima ed sikara pian sikara so ag naerasan, ni say sikara so napaet; on, tan initer to met ed sikara so biskeg, pian nitepel da so antokaman a kanengneñgan na irap, likud no saraya so naakmon na gayaga ed si Cristo. Natan saya so unong ed pikakasi nen Alma; tan saya lapu ed sikato so nampikasi dia ed pananisia.