1 Tan natan agawa dia ed komalabinsakey a bulan ed komalabinsiam a taon, ed komasamplo ya agew na bulan, saray ñgayew na Lamanite so anengneng da ya onsasabi a mamapaarap ed dalin na Ammonihah.

2 Tan nia, say ciudad so naapiger la, tan si Moroni so añgipasen na ñgayew ed ketegan na ciudad, tan pinilapilan da so kaliber-liber na dalin pian saya so mañgisalimbeng ed sikara ed saray pana tan bato na saray Lamanite; tan nia, sikara so akilaban ed panamegley na bato tan pana.

3 Nia, inkuan ko a say ciudad na Ammonihah so naapiger lamet. Ikuan ko ed sikayo, on, say kabiañgan to labat so naapiger; tan lapu ed dineral na saray Lamanite la ya aminsan lapu ed karelmeñgan na saray totoo, impasen da a saya lamet so maininomay a sakmalen da.

4 Balet nia, ontan la so irap na linawa ra; tan nia, saray Nephite so nankutkot na banawang ed kaliber-liber da, a mapalalo so kaatagey na pilapil to kanian saray Lamanite ag da nitupak so saray bato ra tan saray pana ed sikara pian saraya wala so kana to, ni say sikara so makasabi likud no dia ed pasen a lolooban.

5 Natan dia ed saya a panaon saray pañgulo a kapitan na saray Lamanite so nikelawan a maong, lapu ed dunong na saray Nephite ed impañgiparaan da na pasen a salimbeñgan da.

6 Natan saray pañgulo na saray Lamanite impasen da, lapu ed kinarakel na bilang da, on, impasen da a sikara so mankanawnawa ya onla ed sikara a siñga unong ed ginawa ra la; on, tan imparaan da met so inkasikara a dili ed saray salimbeng, tan salimbeng na pagew; tan imparaan da met so inkasikara a dili ed kawes a ginawa ed katat, on, makakapal a kawes a manakob ed inkalakseb da.

7 Tan lapu ed onia so paraan da impasen da a mainomay da a taloen tan ibalor so saray kaagian da ed pako na inkaaripen, odino sikara so mamatey tan mampatey unong ed kaliktan da.

8 Balet nia, dia ed mapalalo a kelaw da, sikara so akaparaan onkana ed sikara, ed sakey a kanengneñgan ya ag ni kapiganman akabkabatan ed limog na saray anak nen Lehi. Natan sikara so akaparaan ed saray Lamanite, a mibakal unong ed saray bilin nen Moroni.

9 Tan agawa a saray Lamanite, odino saray Amalickiahite, nikelawan ira a maong ed kanengneñgan na paraan na saray Nephite ed pibabakal.

10 Natan, no si ari Amalickiah so linma a pinmaway ed dalin na Nephi, ya añgipañgulo ed ñgayew to, lagi ingangan to ed saray Lamanite a dugpaen da so saray Nephite ed ciudad na Ammonihah; tan nia, ag to kawananen so dala na saray totoo to.

11 Balet nia, si Amalickiah ag linma a pinmaway ed inkasikato a dili a mibakal. Tan nia, saray pañgulo a kapitan to ag da nitepel a dugpaen so saray Nephite ed ciudad na Ammonihah, lapu ed si Moroni inuman to so panañgikurang na saray susumpalen ed limog na saray Nephite, a lapu ed saya saray Lamanite mairap so linawa ra ed saray pasen a sineneran da tan sikara so ag makaakar ed kawalaan da.

12 Dia ed ontan sikara so sinmener ed kalawakan, tan inawit da so campo ra, tan nankurang ira ya amaarap ed dalin na Noah, lapu ed ipapasen da a saya so ontumbok a maong a pasen a sabian da sumpa ed saray Nephite.

13 Lapu ed ag da amta a sinalimbeñgan nen Moroni so saya, odino inapiger to so saray salimbeñgan da, ed balang sakey a ciudad ed amin a dalin ed kaliber-liber; dia ed ontan, sikara so nankurang ya amaarap ed dalin na Noah ya awalaan na malet a gagala; on, saray pañgulo a kapitan da so linma ed arap da tan sikara so nansamba a deralen da so saray totoo ed saman a ciudad.

14 Balet nia, dia ed pankelaw da, say ciudad na Noah, a saya so sakey a makapoy a pasen, natan, dia ed panamegley nen Moroni, so nanmaliw a mabiskeg, on, ya angan napalabsanan to ni so biskeg na ciudad na Ammonihah.

15 Tan natan, nia, saya so kakabatan ed si Moroni; lapu ed impasen to a sikara so nataktakot ed ciudad na Ammonihah; tan lapu ed say ciudad na Noah so sankakapuyan a kabiañgan na dalin, dia ed ontan sikara so kinmurang a mibakal; tan dia ed onia saya so unong ed pilalek to.

16 Tan nia, tinuro nen Moroni si Lehi a pañgulo a kapitan na saray totoo ed saman a ciudad; tan sikato met lamlamang a Lehi ya akibakal ed saray Lamanite ed patar a wala ed bokig na ilog na Sidon.

17 Tan natan nia agawa, sanen nalmoan na saray Lamanite a si Lehi so mañguoley ed ciudad mairap lamet so linawa ra, lapu ed mapalalo so takot da ed si Lehi; manwari ya ontan saray pañgulo a kapitan da sinambaan da a dugpaen da so ciudad; dia ed ontan, inawit da so saray ñgayew da.

18 Natan nia, saray Lamanite ag ira makaloob ed saray panagsalimbeñgan da ed arum a dalan likud ed lolooban, lapu ed kinaatagey na pilapil ya imbunton da, tan say kinaaralem na banawang a kinutkot da ed kaliber-liber, no ag dia ed lolooban.

19 Tan dia ed onia saray Nephite sipaparaan ira a manderal ed amin a mansubok ya onkalab ya onloob ed salimbeñgan dia ed arum a dalan, dia ed pantupak da na bato tan pana ed sikara.

20 Dia ed onia sikara so akaparaan, on, sakey ya olop na saray sankabiskegan a lalaki ra, dia ed saray espada da, tan saray palsot da, pian sigbaten da so amin a mansubok ya onasinger ed pasen na salimbeñgan da ed panamegley na pasen a lolooban; tan dia ed onia sikara so akaparaan a mañgiagel ed inkasikara sumpa ed saray Lamanite.

21 Tan agawa a saray kapitan na Lamanite iniakar da so saray ñgayew da ed arap na pasen a lolooban, tan ginapoan da so milaban ed saray Nephite, pian makaakar ira ed pasen na salimbeñgan da; balet nia, sikara so sinunson da a pinapawil ya amimpiga, lapu ed onia sikara so pinapatey da ed agay la a karakel a panagpatey.

22 Natan sanen nalmoan da ya ag da nagamoran so pakapanyari ed saray Nephite ed panamegley na looban, ginapoan da a kutkoten so saray pilapil a dalin pian makagawa ra na dalan ya onla ed saray ñgayew da, pian nawalaan ira na nampara a pankanawnawa a milaban; balet nia, dia ed saraya ya impansubok da sikara so kinekena na bato tan pana ya intutupak da ed sikara; tan imbes a panoen da so banawang ed panamegley na pañgigeba ra na pilapil a dalin, sikara so napno na saray inaatey tan asugatan a laman.

23 Dia ed onia saray Nephite so awalaan na amin a pakapanyari ed saray kabusol da; tan dia ed onia so impansali na saray Lamanite a manderal ed saray Nephite anga ed amin a pañgulo a kapitan da so inatey; on, tan masulok a sanlibo ed saray Lamanite so inatey; balet, dia ed biek a dapag, angapo so angan sakey a kamarerua ed saray Nephite so inatey.

24 Wala so kulang a limamplo so asugatan, a sikara so akapalaway ed saray pana na saray Lamanite dia ed lolooban, balet sikara so asalimbeñgan na saray salimbeng da, tan saray salimbeng na pagew da, tan say salimbeng na ulo ra, kanian saray sugat da so dia ed bikking, a dakel ed saraya so mapalalo.

25 Tan agawa, sanen anengneng na saray Lamanite ya amin a pañgulo a kapitan da so inaatey sikara so binmatik ed kalawakan. Tan agawa a sikara so amawil ed dalin na Nephi, a mañgipakabat ed ari ra, ya Amalickiah, a saya so sakey a Nephite dia ed inkianak, so nipaakar ed baleg ya abalang ed sikara.

26 Tan agawa a mapalalo so pasnok to ed saray totoo to, lapu ed ag to agamoran so pilalek to ed saray Nephite; ya ag to ra nipako ed inkaaripen.

27 On, mapalalo so sanok to, tan inayew to so Dios, tan ontan met nen Moroni, a sinambaan to ya inomen to so dala to; tan saya lapu ed inonor nen Moroni so saray gangan na Dios ed impañgiparaan to ed kiagel na saray totoo to.

28 Tan agawa, dia ed biek a dapag, saray totoo nen Nephi so akisalamat ed Katawan a Dios da, lapu ed ag-mipara a pakapanyari to ed impañgilaban to ed sikara ed lima na saray kabusol da.

29 Tan dia ed onia so impansampot na komalabinsiam a taon ya oley na saray okom ed saray totoo nen Nephi.

30 On, tan awalaan ira na nampatuloy a kareenan ed limog da, tan mapalalo a baleg ya aliguas ed simbaan lapu ed panagimano da tan seet ya initer da ed saray salita na Dios, a saya so imbawag ed sikara nen Helaman, tan si Shiblon, tan si Corianton, tan si Ammon, tan saray kaagian to, on, tan ed amin a naordinan ed masanto a gangan na Dios, a sikara so abiniagan onkana ed pambabawi, tan sikara so nibaki a mampulong ed limog na saray totoo.