Saray Salita nen Mormon

1 Tan natan siak, Mormon, lapu ed asinger la so pañgiawat ko ed saray kasulatan ya abayag ko la a gagawaen ed lima nen anak ko a Moroni, nia anengneng ko lawari ya amin so inkaderal na saray totook, saray Nephite.

2 Tan dakel a lasus taon la so linmabas kayari insabi nen Cristo nen iawat ko so saraya a kasulatan ed saray lima na laki ya anak ko; tan ipapasen ko a natasian to so nagnap a kaderal na saray totook. Balet iabuloy komon na Dios a nisundo to so saraya ya amin, pian nisulat to so nipaakar ed sikara, tan angan nipaakar ed si Cristo, ag la piga dia ed arapen ya agew saya so pinabañgan da.

3 Tan natan, mansalita ak na daiset nipaakar ed insulat ko; tan kayari na impangawak na pamatikey ed saray lugan na piligo nen Nephi, ya anga ed oley na saya ya ari Benjamin, a sikato so sinalita nen Amaleki, sinukaitan ko so saray kasulatan a nipalima ed siak, tan arumog ko so saraya a piligo, a niluganan na melag a kasulatan na saray profeta, manlapu ed si Jacob ya anga ed impanoley na saya ya ari Benjamin, tan ontan met ed dakel ed saray salita nen Nephi.

4 Tan saray beñgatla a lugan na saraya a piligo apaliket da ak, lapu ed saray profesiya ed isabi nen Cristo; tan unong ed kakabatan na kaamaan ko dakel ed saraya so asumpal, on, tan kabat ko met no kaonoñgan so karakel na saray beñgatla ya improfesiya nipaakar ed sikami anga ed saya ya agew so asumpal, tan no kaonoñgan karakel so onsabi ed labas ni na saya ya agew so peteg saraya so onsabi a nagawa—

5 Dia ed ontan, pinilik so saraya a beñgatla, pian isumpal ko so saray kasulatan ed saraya, a say nakdaan ni ed saray kasulatan ko saraya so alaen ko manlapu ed saray piligo nen Nephi; tan ag ko nayarian ya isulat so kakalasus a kabiañgan na saray beñgatla nipaakar ed saray totook.

6 Balet nia, alaen ko so saraya a piligo, a saraya so pakalmoan na saray profesiya tan puyan, tan ilugan ko ed nakekeraan ni a kasulatan ko, lapu ed saraya so apili-pili ed siak; tan amtak a saraya so apili ya onkana ed saray kaagian ko.

7 Tan saya so gawaen ko ya onkana ed maong a gagala; lapu ed onia so nipasabi ed siak, unong ed saray kimey na Espiritu na Katawan a wala ed siak. Tan natan, ag ko amta so amin a beñgatla; balet say Katawan amta to so amin a beñgatla ya onsabi; dia ed ontan, sikato so mankimey ed siak pian nagawa so unong ed linawa to.

8 Tan say pikakasik ed Dios so nipaakar ed saray kaagian ko, pian sikara so ompawil lamet ed pikakabat ed Dios, on, say pananundon nen Cristo; pian sikara lamet so manmaliw a makapalikliket a totoo.

9 Tan natan siak, Mormon, mampatuloy ak la ed panumpal ko ed saray kasulatan ko, a saraya so inaon ko ed saray piligo nen Nephi; tan gawaen ko unong ed pikakabat tan pakatalus ya initer ed siak na Dios.

10 Dia ed ontan, agawa a kayari ya iniawat nen Amaleki so saraya a piligo ed kinen ari Benjamin, inala to so saraya tan intipon to ed sananey a piligo, a lugan to nia so saray kasulatan ya iniawat na saray arari, manlapu ed sakey a kapolian ya anga ed sananey ya anga ed saray agew nen ari Benjamin.

11 Tan saraya so nipalima manlapu ed si ari Benjamin, anga ed saray saguinunor a kapolian ya anga ed inkaplag da ed saray limak. Tan siak, Mormon, nampikasi ak ed Dios a saraya so ag naderal manlapu ed saya a panaon anga ed arapen. Tan amtak a saraya so napagnayon; lapu ed wala so saray makana a beñgatla a nisulat, a dia ed saraya saray totook tan saray kaagian da so naokom ed makabaliksan tan sampot ya agew, unong ed salita na Dios a saya so nisulat.

12 Tan natan, nipaakar ed saya ya ari Benjamin—sikato so awalaan na daiset a baliñgaan ed limog na saray dili a totoo to.

13 Tan agawa met a saray ñgayew na saray Lamanite so pinmaway a linma ed dalin na Nephi, pian onlaban sumpa ed saray totoo to. Balet nengneng yo, si ari Benjamin tinipon to so saray ñgayew to, tan sikato so tinmalindeg sumpa ed sikara; tan nilabanan to ra ed biskeg na dili a taklay to, ed saman so espada nen Laban.

14 Tan dia ed biskeg na Katawan sikara so akibaliñgaan ed saray kabusol da, anga ed impakapatey da ed dakel a nilibo ed saray Lamanite. Tan agawa a sikara so akilaban ed saray Lamanite anga ed asunson da ra ed paway na amin a dalin na tawir da.

15 Tan agawa a kayari inkiwala na saray aliwa a peteg a Cristo, tan saray sañgi ra so akopit, tan sikara so adusa unong ed saray kasalanan da;

16 Tan dia ed kayari inletaw na saray aliwa a peteg a profeta, tan aliwa a peteg a managpulong tan managbañgat ed limog na saray totoo, tan amin da so adusa unong ed saray kasalanan da; tan kayari ya awalaan na dakel a baliñgaan tan dakel a sinmisian ya akitipon ed saray Lamanite, nia, agawa a si ari Benjamin, katekep na tulong na saray masanto a profeta a wala ed limog na saray totoo to—

17 Tan nia, si ari Benjamin so sakey a masanto a too, tan sikato so nanoley ed saray totoo ed inkamatunong; tan dakel so saray masanto a totoo to ed saman a dalin, tan sikara so nambalikas na salita na Dios ed pakapanyari tan pakaoley; tan sikara so añgikana na kakdeman lapu ed talker na teñger na saray totoo—

18 Dia ed ontan, lapu ed saray tulong da, si ari Benjamin, dia ed panamegley na impankimey to ed amin ya angaan na nayarian na laman to tan naspot a pakayari na kamarerua to, tan ontan met ed saray profeta, dia ed aminsan ni niletneg to so kareenan ed saman a dalin.