1 Tan lamet, kaagian ko, pilalek ko a saglawien so saray kanunotan yo ed panaon sano say Katawan a Dios iter to so saraya a gangan ed saray anak to; tan pirawat ko a nunoten yo a say Katawan a Dios inordinan to so saray sacerdote, unong ed masanto a gangan to, a saya so intumbok ed gangan na Anak to, pian ibañgat so saraya a beñgatla ed saray totoo.

2 Tan saraman a sacerdote so naordinan unong ed gangan na Anak to, ed kanengneñgan pian saray totoo nakabatan da no anto a kanengneñgan so pantalaran da ed Anak to nipaakar ed karundon.

3 Tan saya so kanengneñgan no panon a ira naordinan—lapu ed sikara so atawag tan niparaan a nanlapu ed inletneg na mundo unong ed sipor a pikakabat na Dios, lapu ed mapalalo a pananisia ra tan maong a kimey da; a dia ed unaan sikara so naabuloyan a mampili na maong odino mauges; dia ed ontan lapu ed pinili ra so maong, tan nankurang ira ed baleg tan malet a pananisia, sikara so atawag ed sakey a masanto a kimey, on, dia ed saman so masanto a kimey a niparaan a kaiba, tan unong ed, sakey a panañgiparaan a panundon onkana ed onia.

4 Tan dia ed onia sikara so atawag ed saya a masanto a kimey lapu ed pananisia ra, legan a saray arum ipulisay da so Espiritu na Dios lapu ed kaawetan na saray puso ra tan inkabulag na kanunotan da, a, no ag lapu ed saya awalaan ira na baleg a pankanawnawa a siñga saray kaagian da.

5 Odino dia ed arum a salita, dia ed inmuna sikara so nampapara ed kipapasen ed saray kaagian da; dia ed onia saya a masanto a kimey so niparaan a nanlapu la ed inletneg na mundo ed saraman so ag da paaweten so saray puso ra, lapu ed sikara so asakop tan dia ed panamegley na bagat na Bugbugtong ya Anak a pamaandi na kasalanan, a sikato so niparaan—

6 Tan dia ed onia sikara so atawag ed saya a masanto a kimey, tan naordinan ed saya ya atagey ya inkasacerdote unong ed masanto a gangan na Dios, a mambañgat na saray gangan to ed saray anak na totoo, pian sikara met so onloob ed painawaan to—

7 Saya ya atagey ya inkasacerdote so nitumbok ed gangan na Anak to, a saya a gangan so nanlapu la ed inletneg na mundo; odino dia ed arum a salita, angapo so gapo to ed saray agew odino angaan to ed saray taon, lapu ed niparaan la nanlapu ed andi-angaan ya anga ed amin ya andi-angaan, unong ed sipor la a pikakabat to ed amin a beñgatla—

8 Natan sikara so naordinan unong ed saya a kanengneñgan—tan sikara so atawag ed masanto a kimey, tan naordinan katekep na sakey a masanto a tutuntonen, tan inawat da so atagey ya inkasacerdote na masanto a gangan, a saya a kimey, tan tutuntonen, tan atagey ya inkasacerdote, angapo so gapo to odino sampot—

9 Dia ed onia sikara so nanmaliw ya atagey a sacerdote ed ando la ya ando, unong ed gangan na Anak, say Bugbugtong ya Anak na Ama, a sikato so angapo so gapo to ed saray agew odino sampot na saray taon, a sikato so napno na gracia, pampapara, tan katuaan. Tan saya so onia. Amen.

10 Natan, unong ed inkuan ko nipaakar ed say masanto a gangan, odino saya ya atagey ya inkasacerdote, wala so dakel a naordinan tan sikara so nanmaliw ya atagey a sacerdote na Dios; tan saya lapu ed mapalalo a pananisia tan panagbabawi ra, tan say inkamatunong da ed arap na Dios, lapu ed pinili ra so mambabawi tan mankimey ed inkamatunong nen say nabalang;

11 Dia ed ontan sikara so atawag unong ed saya a masanto a gangan, tan sikara so pinasanto, tan saray kawes da so alinisan a pinmuti ed panamegley na dala na Cordero.

12 Natan sikara, kayari a sikara so pinasanto na Espiritu Santo, a saray kawes da agawa ya amputi, lapu ed agawa ra a dalisay tan angapo so mansa ed arap na Dios, ag da nayarian so onseleng ed kasalanan likud ed pambusol; tan wala so dakel, mapalalo a dakel, a sikara so agawa a dalisay tan linmoob ed painawaan na Katawan a Dios da.

13 Tan natan, kaagian ko, pilalek ko a mampaabeba kayo ed arap na Dios, tan mañgiter kayo na buñga ya ontukoy ed pambabawi, pian sikayo met so makaloob ed saman a painawaan.

14 On, mampaabeba kayo ed inkasikayo a dili angan siñga unong ed saray totoo ed agew nen Melquisedec, a sikato met so atagey a sacerdote unong na saman met lamlamang a gangan a sinalitak, a sikato met so añgala ed inkasikato a dili na say atagey ya inkasacerdote ed ando la ya ando.

15 Tan sikato met lamlamang a Melquisedec so nambayaran nen Abraham na kakaplo; on, angan si ama tayo ya Abraham so nambayar na kakaplo ed amin a kayarian to.

16 Natan saraya a tutuntonen so niiter ed onia a kanengneñgan, pian dia ed saya saray totoo so mantalaran ed Anak na Dios, tan saya so kanengneñgan na gangan to, odino saya so gangan to, tan saya pian mantalaran ira ed sikato onkana ed pamaandi na saray kasalanan da, pian sikara so makaloob ed painawaan na Katawan.

17 Natan saya a Melquisedec nen saman so sakey ya ari ed dalin na Salem; tan saray totoo to so inmawet ed biskeg na karelmeñgan tan karumsisan; on, sikara ya amin so sinmian; sikara so napno na amin a kanengneñgan na inkauges;

18 Balet si Melquisedec lapu ed inagamil to so mabiskeg a pananisia, tan inawat to so kimey na atagey ya inkasacerdote unong ed masanto a gangan na Dios, so nampulong na pambabawi ed saray totoo to. Tan nia, sikara so nambabawi; tan si Melquisedec inletneg to so kareenan ed dalin da ed saray agew to; dia ed ontan sikato so atawag a prinsipe na kareenan, lapu ed sikato so ari ed Salem; tan sikato so nanoley ed silong nen ama to.

19 Natan, dakerakel ni so akauna nen say sikato, tan dakerakel met ira nen kayari to, balet angapo ed sikara so mas mapagalang; dia ed ontan, sikato so mabetbet da a nabibitla.

20 Natan ag ko la nakaukolan ya uliten so saya a pamaakaran; masarag la so saray asalitak. Nengneng yo, saray masanto a kasulatan wala ed arap yo; no saraya so ipulisay yo saraya so panlapuan na dili a kaderal yo.

21 Tan natan agawa a sanen kayari nen Alma ya imbaga so saraya a salita ed sikara, iniunat to so saray taklay to ed sikara tan iniakis to ed baleg a voces, a nankuan: Natan la so panaon a pambabawi, lapu ed say agew na kilalaban so manasinger la;

22 On, tan say voces na Katawan, dia ed panamegley na sañgi na saray angeles, so añgibawag na saya ed amin a bansa; on, imbawag da la, pian nawalaan ira na makapalikliket a balita na baleg a gayaga; on, tan itanol to so saraya a makapalikliket a balita ed limog na amin a totoo to, on, anga ed saraman so ataytayak ed arum a pasen ed tapew na dalin; dia ed ontan sikara so ondago ed sikatayo.

23 Tan saraya so nipakabat ed sikatayo ed malinlinew a panagsalita, pian natalusan tayo, pian ag itayo naliñgo; tan saya lapu ed sikatayo so akarakar ed sankaili a dalin; dia ed ontan, sikatayo so apalaboan a maong, lapu ed wala ed sikatayo so saraya a makapalikliket a balita a nibawag ed sikatayo ed amin a pasen na kaubasan tayo.

24 Tan nia, saray angeles ibabawag da so saya ed karaklan ed saya a panaon dia ed dalin tayo; tan saya so onkana ed gagala ya iparaan so saray puso na saray anak na totoo a mañgawat ed salita to ed panaon ya onsabi ed gloria to.

25 Tan natan manalagar itayo labat ya ondeñgel ed saray magayaga a balita ya ibawag ed sikatayo na sañgi na saray angeles, nipaakar ed isabi to; tan say panaon onsabi la, ag tayo kabat labat no kapigan. Wala ed Dios komon dia la ed agew ko; balet dia la ed magano odino dia ed saray agew a kaunoran, a dia ed saya siak so mangayaga.

26 Tan saya so nipakabat ed saray manepeg tan masanto a totoo, dia ed panamegley na sañgi na saray angeles, ed panaon ya isabi to, pian saray salita na kaamaan tayo so nasumpal, unong ed saman so sinalita ra nipaakar ed sikato, a saya unong ed espiritu na profesiya a wala ed sikara.

27 Tan natan, kaagian ko, pirawat ko manlapu ed sankaaraleman a kabiañgan na pusok, on, tekep na pannununot ko ya angan ansakit a liknaen, a deñgelen yo so saray salitak, tan ibantak yo so saray kasalanan yo, tan ag yo la ipapaleen so agew na pambabawi yo;

28 Balet sikayo so mampaabeba ed inkasikayo a dili ed arap na Katawan, tan ontawag kayo ed masanto a ñgaran to, tan mambantay tan mampikasi kayo ya andi-tonda, pian ag kayo natukso ed alablabas nen say nasakbat yo, tan dia ed onia sikayo so itabin na Masanto ya Espiritu, a manmaliw kayo a mapaabeba, maolimek, matoluk, maanos, napno na aro tan amin ya andukey a panagtepel;

29 A nawalaan kayo na pananisia ed Katawan; a nawalaan kayo na ilalo ya awaten yo so andi-angaan a bilay; a nawalaan kayo na aro na Dios a magnayon lawas ed saray puso yo, pian sikayo so nitanduro ed kaunoran ya agew tan makaloob kayo ed painawaan to.

30 Tan say Katawan iabuloy to ed sikayo so pambabawi, pian ag yo naawit so idapo na sanok to ed sikayo, pian sikayo so ag nabalor na gulonggulong na infierno, pian ag kayo mantepel na komadua a patey.

31 Tan si Alma nansalita ni dakel a salita ed saray totoo, a saraya so ag nisulat ed saya a libro.