1 Natan saya so wala ed gangan nen Mosiah a balang sakey a too a manañgokom ed gangan, odino saray apili a manmaliw ya okom, so mañgawat na upa unong ed panaon ya impankimey da a mañgokom ed saray naawit ed sikara a tutolan.

2 Natan no say sakey a too akautang ed sananey, tan ag mambayar ed saman so akautañgan to, sikato so nidalem ed okom; tan say okom ikana to so pakaoley to, tan mañgibaki na saray taga-pañgulo pian saman a too so awiten da ed sikato; tan okomen to so saman a too unong ed gangan tan dia ed saray pakapatnagan ya iparungtal da sumpa ed sikato, tan dia ed onia say too pasuoten da a mambayar ed saman so utang to, odino sikato so bakbaken da, odino sikato so ibantak da manlapu ed limog na saray totoo a siñga sakey a matakew tan sakey a too a managala na kayarian na sananey.

3 Tan say okom mañgawat na upa to unong ed panaon a nikana to—sakey a senine a balitok ed sanagew, odino sakey a senum a pilak, a saya so kasimbang na sakey a senine a balitok; tan saya so unong ed gangan a niiter.

4 Natan saraya so ñgaran na saray nanduroma a nengneng na balitok da, tan saray pilak da, unong ed nigetar a bili to. Tan saraya a ñgaran so initer na saray Nephite, lapu ed ag da intumbok unong ed kagagawa na saray Judio a wala ed Jerusalem, ni say sukat ag da intumbok ed kagagawa na saray Judio; balet inuman da so saray panagbilang tan panagsukat da, unong ed kanunotan tan kurang na kipapasen na saray totoo, ed balang sakey a kailalakan, anga ed oley na saray okom, a saraya so inletneg nen ari Mosiah.

5 Natan say panagbilang da onia—say sakey senine a balitok, sakey seon a balitok, sakey shum a balitok, tan sakey limnah a balitok.

6 Sakey senum a pilak, sakey amnor a pilak, sakey ezrom a pilak tan sakey onti a pilak.

7 Say sakey senum a pilak so kasimbang na sakey senine a balitok, tan angan dia ed sukat na bokakew, tan ontan met ed sukat na balang sakey ya uri na dawa.

8 Natan say bili na sakey seon a balitok so mamiddua ed bili na sakey senine.

9 Tan say sakey shum a balitok so mamiddua ed bili na sakey seon.

10 Tan say sakey limnah a balitok so kasimbang na bili na saraya ya amin.

11 Tan say sakey amnor a pilak so kapara na duara a senum.

12 Tan say sakey ezrom a pilak so kapara na apatira a senum.

13 Tan say sakey onti so kabaleg na bili na saraya ya amin.

14 Natan saraya so bili na saray memelag a panagbilang da—

15 Say sakey shiblon so kapaldua na sakey a senum; dia ed ontan, say sakey shiblon so kasimbang na kapaldua a sukat na bokakew.

16 Tan say sakey shiblum so kapaldua na sakey a shiblon.

17 Tan say sakey leah so kapaldua na sakey a shiblum.

18 Natan saraya so bilang da, unong ed panagbilang da.

19 Natan say sakey antion a balitok so kapara na talora a shiblon.

20 Natan, say alenleneg a getma ra so say pakagamor da na gungona, lapu ed pakaawat da na upa ya ontukoy ed kimey da, dia ed ontan, sinugsogan da so saray totoo a mangawa na gulo, tan amin a nengneng na panseñgegan na gulo tan karelmeñgan, pian nawalaan ira na dakel a kimey, pian makaawat ira na dakel a kuarta unong ed saray dalem a niduñget ed sikara; dia ed ontan ginewgew da so saray totoo ya onsumpa ed si Alma tan si Amulek.

21 Tan saya a Zeezrom ginapoan to a tepetan si Amulek, a nankuan: Ebatan mo ak pa ed pigara ya itepet ko? Natan si Zeezrom so sakey a too a marunong ed saray ikakana na demonyo, pian deralen to so beñgatla a maong; dia ed ontan, inkuan to ed si Amulek: Ebatan mo kasi so saray tepet ya iter ko ed sika?

22 Tan si Amulek inkuan to ed sikato: On, dapot no saraya so unong ed Espiritu na Katawan, a wala ed siak; lapu ed ag ak mambalikas na beñgatla ya onsumpa ed Espiritu na Katawan. Tan si Zeezrom inkuan to ed sikato: Nia, wala dia so anemira ya antis a pilak, tan saraya ya amin iter ko ed sika no iburim a wala so sakey a Sankaatageyan a Mambibilay.

23 Natan si Amulek inkuan to: O sika ya anak na infierno, akin kasi siak so tuksoen mo? Ag mo kasi kabat a say sakey a matunong ag ontoluk ed ontan a tukso?

24 Manisia ka kasi ya angapo so Dios? Ibagak ed sika, Andi, kabat mo a wala so Dios, balet lalo ya inarom so makaseleng nen say sikato.

25 Tan natan sika so nantila ed arap na Dios ed siak. Imbagam ed siak—Nia so anemira ya antis, a saraya baleg so bili to, iter ko ed sika—balet dia ed dalem na pusom labay mo a saraya a kayarianen a manlapu ed siak; tan say pilalek mo labat iburik so tua tan mabilay a Dios, pian wala so señgegan na panderal mo ed siak. Tan natan nia, lapu ed saya a baleg a kaugsan awaten mo so gungonam.

26 Tan si Zeezrom inkuan to ed sikato: Imbagam a wala so sakey a tua tan mabilay a Dios?

27 Tan si Amulek inkuan to: On, wala so sakey a tua tan mabilay a Dios.

28 Natan si Zeezrom inkuan to: Wala kasi so dakel nen say sakey a Dios?

29 Tan sikato so inmebat: Andi.

30 Natan si Zeezrom inkuan to lamet: Panon so pakapikabat mo ed saraya a beñgatla?

31 Tan inkuan to: Sakey ya angel so añgipaamta ed siak.

32 Tan si Zeezrom inkuan to lamet: Siopa so saman so onsabi? Sikato kasi so Anak na Dios?

33 Tan inkuan to ed sikato, On.

34 Tan si Zeezrom inkuan to lamet: Sikato kasi so mañgilaban ed saray totoo to a wala ed saray kasalanan da? Tan si Amulek so inmebat tan inkuan to ed sikato: Ibagak ed sika ya ag to gawaen, lapu ed ag nayari ya iburi to so salita to.

35 Natan si Zeezrom inkuan to ed saray totoo: Manseet kayo a tandaan so saraya a beñgatla; tan inkuan to a wala so saksakey a Dios; balet inkuan to a say Anak na Dios so onsabi, balet ag to ilaban so saray totoo to—a siñga sikato so awalaan na pakaoley a mangangan ed Dios.

36 Natan si Amulek inkuan to lamet ed sikato: Nia sika so nantila, lapu ed inkuan mo a nansalita ak a siñga awalaan ak na pakaoley a mangangan ed Dios lapu ed inkuan ko ya ag to ilaban so saray totoo to a wala ed saray kasalanan da.

37 Tan ibagak ed sika lamet ya ag to ra nayarian ya ilaban so saray wala ed kasalanan da; tan ag ko nayarian ya iburi so salita to, tan inkuan to ya angapo so marumsis a beñgatla so makatawir ed panarian na tawen; dia ed ontan, panon ka a nilaban, likud no tawiren mo so panarian na tawen? Dia ed ontan, ag kayo nilaban no wala kayo ed saray kasalanan yo.

38 Natan si Zeezrom inkuan to lamet ed sikato: Say Anak na Dios sikato kasi so peteg ya Andi-angaan ya Ama?

39 Tan si Amulek inkuan to ed sikato: On, sikato so peteg ya Andi-angaan ya Ama na tawen tan say dalin, tan amin a beñgatla a lugan to; sikato so gapo tan sampot, say unaan tan sampot;

40 Tan sikato so onsabi dia ed mundo a manundon ed saray totoo to; tan alaen to ed sikato a dili so saray kasalanan na amin a manisia ed ñgaran to; tan saraya so nawalaan na andi-angaan a bilay, tan say kilalaban so ag onsabi ed arum ni.

41 Dia ed ontan saray marelmeng mansiansia a siñga angapo so karundon ya agawa, likud lambeñgat ed inkaukbar na balor na patey; tan nia, say agew onsabi ya amin so ombañgon manlapu ed patey tan ontalindeg ed arap na Dios, pian sikara so naokom unong ed saray kimey da.

42 Natan, wala so patey a tatawagen a patey na laman; tan say patey nen Cristo ukbaren to so saraya a balor na patey na laman, pian amin so onoli ed saya a patey na laman.

43 Say espiritu tan say laman so mankasakey lamet ed nagnap ya indeñgan; mandapag a saray lawas tan nantotoupan so ompawil ed gendat a nengneng to, angan siñga say kanengneñgan tayo natan ed saya a panaon; tan sikatayo so niakar ya ontalindeg ed arap na Dios, a sikakabat tayo a siñga pikakabat tayo natan, tan onsabi ed sikatayo so marlang a pakanodnunot ed amin a kasalanan tayo.

44 Natan, saya a kipawil so onsabi ed amin, mandapag a matakken tan malangwer, mandapag ya adakep tan bulos, mandapag a laki tan bii, mandapag a makasalanan tan matunong; tan angan sakey a buek na ulo so nabalang; balet ag nabalang so sakey a beñgatla no nipawil ed nagnap ya indeñgan to, a siñga natan, odino dia ed inkalaman, tan sikara so niakar tan salaysayen da ed arap na lantaran nen Cristo ya Anak, tan say Dios Ama, tan say Masanto ya Espiritu, say saksakey ya Andi-Angaan a Dios, pian sikara so naokom unong ed saray kimey da, no bilang sikara so maong odino sikara so mauges.

45 Natan, nia, asalitak la ed sikayo so nipaakar ed patey na saya a laman, tan ontan met say nipaakar ed kioli ed bilay na say ompatey a laman. Ikuan ko ed sikayo a saya a laman ya ompatey so ombañgon ed ag-ompatey a laman, a manlapu ed patey, iñgen manlapu ed unaan a patey ya ombilay, pian ag la ra ompatey kapiganman; saray espiritu ra so mitipon ed saray laman da, a kapiganman ag la mansian; dia ed ontan say tibukel so manmaliw a maespiritu tan ag la ompatey, pian ag da la nasubok so kabulok na laman.

46 Natan, sanen asumpal la nen Amulek so saraya a salita saray totoo ginapoan da lamet so onkelaw, tan ontan met si Zeezrom ginmapo ya ongiwgiw. Tan dia ed onia nansampot so saray salita nen Amulek, odino saya ya amin so insulat ko.