1 Tan agawa a si Alma tan si Amulek so nigangan ya ompaway ed saman a ciudad; tan sikara so sinmipot, tan sikara so pinmaway anga ed akasabi ra ed dalin na Sidom; tan nia, diman da nalmo so amin a totoo a pinmaway ed dalin na Ammonihah, a sikara so sinunson tan tinupak da, lapu ed anisia ra ed saray salita nen Alma.

2 Tan insalaysay da ed sikara so amin ya agawa ed saray kaasawaan ra tan saray anak da, tan ontan met say nipaakar ed inkasikara, tan say pakapanyari na inkilaban da.

3 Tan ontan met si Zeezrom so naninagem diman ed Sidom, ya atagey so petang to, makaseñgeg ed mapalalo ya inkakewkew na nunot to ed karelmeñgan to, lapu ed impasen to a si Alma tan si Amulek so naandi la ra; tan impasen to a sikara so pinatey da lapu ed karelmeñgan to. Tan saya a baleg a kasalanan, tan saray dakel ni a kasalanan to, so akagutgot ed kanunotan to anga ed saya so mapalalo ya ansakit, lapu ed angapo la so ilalo to a nilaban; dia ed ontan sikato so ginmapo ya onkapoy ed katagey na petang to.

4 Natan, sanen nadñgelan to a si Alma tan si Amulek so wala ed dalin na Sidom, say puso to so ginmapo a nawalaan na biskeg na linawa; tan añgipawit a tampol na bilin ed sikara, a pilalek to a sikara so onla ed sikato.

5 Tan agawa a sikara so linma a tampol, ya inonor da so bilin ya impawit to ed sikara; tan linma ra ed abong a kawalaan nen Zeezrom; tan arumog da ed dukolan to, a maniinagem, a makapkapoy lapu ed katagey na petang to; tan say kanunotan to wala ed mapalalo a gutgot lapu ed karelmeñgan to; tan sanen anengneng to ra iniunat to so lima to, tan kinerew to ed sikara a sikato so tambalen da.

6 Tan agawa a si Alma inkuan to ed sikato, ya inala to ed lima: Manisia ka kasi ed pakapanyari nen Cristo nipaakar ed kilalaban?

7 Tan sikato so inmebat tan nankuan: On, manisia ak ed amin a salita ya imbañgat mo.

8 Tan si Alma inkuan to: No manisia ka ed karundon ed Cristo sika so onabig.

9 Tan inkuan to: On, manisia ak unong ed saray salitam.

10 Tan dia ed onia si Alma inmakis ed Katawan a nankuan: O Katawan a Dios mi, kasian mo so saya a too, tan sikato so paabigen mo unong ed pananisia to a wala ed Cristo.

11 Tan sanen nibalikas la nen Alma so saraya a salita, si Zeezrom linmugtot ed saray sali to, tan ginapoan to so onakar; tan saya so agawa ed baleg a pankelaw na amin a totoo; tan say pikakabat ed saya so tinmayak ed lapag na dalin na Sidom.

12 Tan si Alma bininiagan to si Zeezrom ed Katawan; tan ginapoan to nanlapu ed saman a panaon so mampulong ed saray totoo.

13 Tan si Alma inletneg to so sakey a simbaan ed dalin na Sidom, tan nampasanto na saray sacerdote tan managbañgat ed saman a dalin, a mambiniag ed Katawan na siopaman a mampilalek a pabiniagan.

14 Tan agawa a dakerakel ira; lapu ed sikara so dinmagup a nanlapu ed amin a kaliber-liber na Sidom, tan sikara so abiniagan.

15 Balet no nipaakar ed saray totoo a wala diman ed dalin na Ammonihah, sikara so nansiansia ni ya anawet so puso ra tan totoo a matalker so teñger da; tan ag ira nambabawi ed saray kasalanan da, lapu ed ipapasen da a say pakapanyari a wala ed si Alma tan si Amulek so manlalapu ed demonyo; lapu ed sikara so kaolop ed pananisia nen Nehor, tan ag ira manisia ed panagbabawi ed saray kasalanan da.

16 Tan agawa a si Alma tan si Amulek, si Amulek binenegan to so amin a balitok to, tan pilak to, tan saray kayarian to ya ankabli a beñgatla, a saraya so wala ed dalin na Ammonihah, lapu ed salita na Dios, lapu ed sikato so impulisay na saray kakaaro to nen saman tan ontan met nen ama to tan saray kakanayon to;

17 Dia ed ontan, kayari nen Alma ya añgiletneg na simbaan ed Sidom, dia ed impakanengneng to na baleg ya impakaamper, on, dia ed impakanengneng to ed saray totoo a naamper so kinon ed saray puso ra, tan ginapoan da so mampaabeba ed inkasikara a dili ed arap na Dios, tan ginapoan da so mantitipon ed inkasikara dia ed saray pasen a panagpikasian pian mañgigalang ed Dios ed arap na altar, a mambabantay tan mampipikasi ra ya andi-tonda, pian sikara so niagel ed Satanas, tan manlapu ed patey, tan manlapu ed kadederal—

18 Natan unong ed asalitak la, lapu ed impakanengneng nen Alma ed saraya ya amin a beñgatla, dia ed ontan inala to si Amulek tan linma ra ed dalin na Zarahemla, tan inala to ed dili ya abong to, tan sikato so inasikaso to ed saray kairapan to, tan sikato so pinabiskeg to ed Katawan.

19 Tan dia ed onia so impansampot na komasamplo a taon ya oley na saray okom ed saray totoo nen Nephi.