Scriptures
Alma 38


Saray gangan nen Alma ed laki ya anak to a si Shiblon.

Sakopen to so tekap 38.

Tekap 38

Si Shiblon so apasegsegang lapu ed inkamatunong—Say kilalaban wala ed si Cristo, a sikato so bilay tan say liwawa na mundo—Rindaan yo so amin a mabiskeg a liknaan yo. Ñgalñgali 74 S.C.

1 Anak ko, talineng mo so saray salitak, tan ikuan ko ed sika, angan siñga inkuan ko ed si Helaman, tan unong ya onoren mo so saray gangan na Dios sika so onaliguas ed dalin; tan unong ya ag mo onoren so saray gangan na Dios sika so nataksing ed arap to.

2 Tan natan, anak ko, manmatalek ak a nawalaan ak na baleg a gayaga ed sika, lapu ed ag ka nagiing tan inkamatuor mo ed Dios; lapu ed ingapom la ed kalangweran mo so onnengneng ed Katawan a Dios mo, anga ed ontan mailalo ak a mampatuloy ka a manumpal ed saray gangan to; tan mapalar so mansiansia ya anga ed sampot.

3 Ikuan ko ed sika, anak ko, awalaan ak la na baleg a gayaga ed sika, lapu ed inkamatuor mo tan say seet mo, tan say anos mo tan say andukey ya impantepel mo ed limog na saray totoo na Zoramite.

4 Tan kabat ko a sika so abalor; on, tan kabat ko met a sika so tinutopak da makaseñgeg ed salita; tan intepel mo so saraya ya amin a beñgatla a siaanos lapu ed say Katawan so wala ed sika; tan natan sikakabat ka a say Katawan inlaban to ka.

5 Tan natan anak ko, Shiblon, pilalek ko a nunoten mo, a no iter mo so talek mo ed Dios angan ontan met so pañgilaban to ed sika ed saray subok mo, tan saray gonigon mo, tan saray irap mo, tan sika so nitanduro ed sampot ya agew.

6 Natan, anak ko, ag ko labay a nunoten mo a kabat ko so saraya ya amin a beñgatla ed inkasiak, balet say Espiritu na Dios a saya so wala ed siak so nangawa ed saraya a beñgatla pian nakabatan ko; tan no ag ak nianak ed Dios, ag ko akabatan so saraya a beñgatla.

7 Balet nia, say Katawan dia ed baleg a panañgasi to imbaki to so angel to a mañgibaga ed siak ya itondak la so kimey na panagderal ed limog na saray totoo to; on, tan anengneng ko so angel ed arap-arapan, tan sikato so akisalita ed siak, tan say voces to so siñga karul, tan niyegyeg to so lapag na dalin.

8 Tan agawa a dia ed loob na talora ya agew tan talora a labi nanlikna ak na agay la a pait a sakit tan iñgel na kamarerua; tan kapiganman ag ko, anga ed siak so inmakis ed Katawan Jesu Cristo onkana ed panañgasi, agamoran ko so pamaandi na saray kasalanan ko. Balet nia, siak so nannañgis ed sikato tan agamoran ko so kareenan ed kamareruak.

9 Tan natan, anak ko, imbagak ed sika so saya pian naaralan mo so kakabatan, pian makaaral ka ed siak ya angapo so arum a dalan odino pamaakaran pian say sakey a too so nilaban, no ag labat dia tan panamegley nen Cristo. Nia, sikato so bilay tan liwawa na mundo. Nia, sikato so salita na katuaan tan inkamatunong.

10 Tan natan, lapu ed ingapom la so mambañgat na salita angan onia pirawat ko ya ituloy mo so mambañgat; tan pirawat ko met a manseet tan manalwar ka ed amin a beñgatla.

11 Manseet ka ya ag ka nipatagey ed kinon; on, nengneng mo ya ag ka mampasirayew ed dili a kakabatan mo, ni say baleg a biskeg mo.

12 Ikanam so inkasibeg na linawa, balet aliwa a lastog; tan seetan mo met a dangkaan mo so amin a mabiskeg a liknaan mo, pian sika so napano na aro; seetan mo ya arawian so panagmeneng.

13 Ag ka mampipikasi a siñga saray Zoramite, lapu ed anengneng mo a mampipikasi ra pian sikara so nareñgel na totoo, tan nadayew ed kakabatan da.

14 Ag mo ikuan so: O Dios, misalamat ak ed sika lapu ed magmaong kami ni nen saray kaagian mi; balet magmaong ni ya ikuan mo so: O Katawan, pirdonam so ag ko pankanepegan, tan nunoten mo so saray kaagian ko ed panañgasi—on, birbir mo so ag mo pankanepegan ed arap na Dios ed amin a panaon.

15 Tan komon say Katawan bendicionan to so kamareruam, tan sika so awaten to ed sampot ya agew ed panarian to, ya onyurong ed kareenan. Natan sika la so onla, anak ko, tan ibañgat mo so salita ed saya a totoo. Sika so mandangka. Anak ko, mampatanir ak la.