1 Tan agawa ya añgipasen ira na saray bantay ed saray adakep a Lamanite, tan kinaukolan da ra ya onla tan mañgikutkot ed saray inaatey da, on, tan ontan met ed saray inaatey a Nephite ya apatey; tan si Moroni so añgipasen na saray totoo a mambantay ed sikara legan a gagawaen da so saray kimey da.

2 Tan si Moroni linma ed ciudad na Mulek a kaiba to si Lehi, tan inala to so oley a sankaatageyan ed ciudad tan initer to ed si Lehi. Natan nia, saya a Lehi so sakey a too a kaolop nen Moroni ed karaklan a bakal to; tan sikato so sakey a too a siñga si Moroni, tan sikara so nangayaga ed inkiagel na balang sakey ed sikara ed kaatapan; on, balang sakey ed sikara pinabli ra so sakey tan sakey, tan sikara met so pinabli na saray totoo nen Nephi.

3 Tan agawa a kayari ya inkutkot na saray Lamanite so saray inaatey da tan ontan met ed saray inaatey na Nephite, sikara so kinmurang a papawil ed dalin na Bountiful; tan si Teancum, dia ed gangan nen Moroni, ingangan to ed sikara a gapoan da so mankimey a mankugkot na banawang a mampaliber ed saman a dalin, odino dia ed ciudad, na Bountiful.

4 Tan ingangan to a mañgipaalagey ira na padir a kiew dia ed loob na pilapil na banawang; tan dia ra itabon so dalin a nanlapu ed banawang ya insamben ed padir a kiew; tan dia ed onia saray Lamanite so nankimey anga ed aliktob da so ciudad na Bountiful na mabiskeg a padir a kiew tan dalin, ed mapalalo a kaatagey.

5 Tan saya a ciudad so nanmaliw a mapalalo a mabiskeg a salimbeñgan nanlapu ed saman; tan dia ed saya a ciudad binantayan da so saray adakep a Lamanite; on, angan dia ed loob na sakey a padir ya ingangan da ya ipaalagey da ed saray dili a lima da. Natan apasuotan si Moroni a pankimeyen to so saray Lamanite, lapu ed mainomay ira a bantayan no sikara so mankikimey; tan nampilalekan to so amin a ñgayew no kapigan so idugpa ra ed saray Lamanite.

6 Tan agawa a dia ed onia agamoran nen Moroni so taluna ed sakey a sankabalegan a ñgayew na saray Lamanite, tan agamoran to so pankayarian ed ciudad na Mulek, a saya so sankabiskegan ya abembenan na saray Lamanite ed dalin na Nephi; tan dia ed onia sikato so añgipaalagey na mabiskeg a salimbeñgan a pañgitilakan to ed saray adakep.

7 Tan agawa ya ag to la ginetma so mibakal ed saray Lamanite ed saman a taon, balet inkana to so saray totoo to a mamparaan ed bakal, on, tan pangawa na saray salimbeñgan a pañgiagel sumpa ed saray Lamanite, on, tan mañgipaliis met ed saray bibii tan saray anak da ed eras tan kairapan, tan pañgiter na naakan ed saray ñgayew to.

8 Tan natan agawa a saray ñgayew na Lamanite, ed bokig a dayat, ed abalaten, legan ya angapo si Moroni makaseñgeg ed kolkulan ed limog na saray Nephite, a saya so nanseñgegan na baliñgaan ed limog da, akagamor ira na arum a dalin ed saray Nephite, on, angan lapu ed saya agamoran da a kinayarian so pigara a bilang na ciudad ed saman a kabiañgan na dalin.

9 Tan dia ed onia lapu ed karelmeñgan a wala ed limog da a dili, on, lapu ed baliñgaan tan kolkulan ed limog da a dili sikara so nipasen ed sankaatapan a kipapasen.

10 Tan natan nia, wala so siñga labay ko ya ibaga nipaakar ed saray totoo nen Ammon, a sikara, dia ed gapo, Lamanite ira; balet lapu ed si Ammon tan saray kaagian to, odino lapu ed pakapanyari tan salita na Dios, sikara so apasimbalo ed Katawan; tan sikara so niakar ed dalin na Zarahemla, tan nanlapu ed saman sikara so iniagel na saray Nephite.

11 Tan lapu ed samba ra sikara so asebelan a mañgala na ayura sumpa ed saray kaagian da; lapu ed sikara so nansamba a kapiganman ag la ra mampaterter na dala; tan unong ed samba ra sikara komon so inatey la; on, itepel da a sikara so napelag ed saray lima na saray kaagian da, no ag labat lapu ed panañgasi tan mapalalo a panañgaro nen Ammon tan saray kaagian to ed sikara.

12 Tan lapu ed saya a pamaakaran sikara so iniakar ed dalin na Zarahemla; tan nanlapu ed saman sikara so lawas ya iaagel na saray Nephite.

13 Balet agawa a sanen anengneng da so kaatapan, tan say dakel a kairapan tan kaermenan a sasakbaten na saray Nephite lapu ed sikara, sikara so atenyeg na panañgasi tan pilalek da ya alaen so saray ayura ra ed pañgiagel ed bansa ra.

14 Balet nia, sanen kuan da la ya alaen so saray agamil da ed bakal, sikara so tinalo na saray panagkuyong nen Helaman tan saray kaagian to, tan ñgalñgali ra la deralen so samba a ginawa ra.

15 Tan si Helaman mapaga ompano dia ed pangawa ra na onia nabalang da so saray kamarerua ra; dia ed ontan amin da a linmoob ed saya a paknaan so apasuotan ira ya imatonan so saray kaagian da ya onyakyak ed saray kairapan da, ed saray maatap a kipapasen da ed saya a panaon.

16 Balet nia, agawa a dakel so saray anak da a lalaki, ya ag linmoob ed paknaan ya ag da alaen so saray agamil da ed bakal a mañgiagel ed inkasikara sumpa ed saray kabusol da, dia ed ontan tinipon da so inkasikara ed saya a panaon, no kaonoñgan karakel so saray nayarian da so mañgala na ayura, tan tinawag da so inkasikara a Nephite.

17 Tan sikara so linmoob ed paknaan a milaban ira onkana ed pañgiagel ed kawayañgan na saray Nephite, on, iagel da so dalin ya anga ed pañgibagat da ed bilay da; on, angan sikara so akipaknaan a kapiganman ag da iter so kawayañgan da, balet sikara so milaban ed antokaman a kipapasen a mañgiagel ed saray Nephite tan inkasikara ed inkaaripen.

18 Natan nia, wala so duara a libo ed saraya a kalangweran a lalaki, so linmoob ed saya a paknaan tan inala ra so saray agamil da ed bakal a mañgiagel ed bansa ra.

19 Tan natan nia, lapu ed ag la ra pabelat ed saray Nephite, sikara so nanmaliw la natan ed saya a panaon met baleg a tulong; tan inala ra so saray agamil da ed bakal, tan nampirawatan da a si Helaman so pañgulo ra.

20 Tan sikara ya amin a kalangweran a lalaki, tan mapalalo so inkabayani ra ed biskeg na linawa, tan ontan met ed biskeg tan kagagalaw; balet nia, aliwa ni a saya ya amin—sikara so lalaki a lawas matua ed amin a panaon ed antokaman a beñgatla a nimatalek ed sikara.

21 On, sikara so totoo na katuaan tan inkakalakal, lapu ed sikara so nibañgat ya ononor ed saray gangan na Dios tan mankurang na maptek ed arap to.

22 Tan natan agawa a si Helaman so kinmurang ed unaan na saya a duara libo a kalangweran a sondalo, ya ontulong ed saray totoo a wala ed ketegan na dalin dia ed abalaten ya asinger ed sagur a dayat.

23 Tan dia ed onia so impansampot na komaduamplo tan walo a taon ya oley na saray okom ed saray totoo nen Nephi.