1 Tan nia, natan agawa a say ontumbok a getma mi say pakaala mi ed ciudad na Manti; balet nia, angapo so nagawaan mi pian napapaway mi ra ed ciudad dia ed panamegley na saray melag ya olop mi. Tan nia, anunotan da so saray ginawa mi la ed sikara; dia ed ontan ag mi la ra naayat ya onarawi ed saray salimbeñgan da.

2 Tan sikara so lalo a dakel nen say ñgayew mi kanian ag mi labay so onla ya ondugpa ed sikara ed saray salimbeñgan da.

3 On, tan nakaukolan ya ikana mi so saray totoo mi pian napagnayon so saray kabiañgan na dalin ya abawi mi a kinayarian; dia ed ontan nakaukolan a manalagar kami, pian makaawat kami na onarum a biskeg manlapu ed dalin na Zarahemla tan ontan met ed saray balo a tagano.

4 Tan agawa ya añgibaki ak na mitalusan ed gobernador na dalin tan, pian ipakabat ed sikato so kipapasen na saray totoo mi. Tan agawa a nanalagar kami ed pañgawat na saray tagano tan biskeg a manlapu ed dalin na Zarahemla.

5 Balet nia, melag labat so pinanabang mi ed saya; lapu ed saray Lamanite so mañgaawat met na baleg a biskeg ed inagew-agew, tan ontan met na dakel a tagano; tan onia so kipapasen mi ed saya a panaon.

6 Tan saray Lamanite so nampawil-pawil sumpa ed sikami ed panapanaon, tan nonunoten da a dia ed panamegley na kasiliban deralen da kami; manwari ya ontan ag kami makakar a milaban ed sikara, lapu ed saray seseneran da tan saray salimbeñgan da.

7 Tan agawa a nanalagar kami ed saya a mairap a kipapasen ed dakel a bulan, anga ed sikami so ñgalñgali la ompatey lapu ed kakulañgan na naakan.

8 Balet agawa ya akaawat kami na naakan, a saya so binantayan na ñgayew a duara a libo a totoo a tinmulong ed sikami; tan saya labat ya amin so tulong a naawat mi, ed pañgiagel mi ed sikami a dili tan ed bansa mi pian ag napelag ed lima na saray kabusol mi, on, sumpa ed kabusol ya ag-nabilang.

9 Natan say makaseñgeg ed saraya a kababaiñgan mi, odino say makaseñgeg no akin ag da kami pawitan na onarum a biskeg mi, ag mi amta; dia ed ontan sikami so maermen tan ontan met napno kami na takot, ag la piga dia ed antokaman a pamaakaran say okom na Dios so onsabi ed dalin mi, dia ed kaekal mi tan sigpot a kadederal.

10 Dia ed ontan initer mi so liknaan mi ed pikakasi ed Dios, a pabiskegen to kami tan ilaban to kami ed lima na saray kabusol mi, on, tan ontan met iter to ed sikami so biskeg pian napagnayon mi so saray ciudad mi, tan saray dalin mi, tan saray kayarian mi, ya onkana a tulong ed saray totoo mi.

11 On, tan agawa a say Katawan a Dios mi dinalaw to kami ya initer to ed sikami so peteg a sipan ya ilaban to kami; on, iñgen sikato so nansalita na kareenan ed saray kamarerua mi, tan initer to ed sikami so baleg a pananisia, tan makaseñgeg ed saya sikami so nanilalo na kilalaban ed sikato.

12 Tan awalaan kami na biskeg na linawa ed melag a ñgayew a naawat mi, tan sikami so ag-nagiing ed sebeg na linawa a taloen so saray kabusol mi, tan napagnayon mi so saray dalin mi, tan saray kayarian mi, tan saray kaasawaan mi, tan saray anak mi, tan pamaakaran na kawayañgan mi.

13 Tan dia ed onia sikami so linma ed amin a pakayari mi sumpa ed saray Lamanite, a wala ed ciudad na Manti; tan impaalagey mi so saray abong-abong mi ya abel ed gilig na kalawakan, ya asinger ed ciudad.

14 Tan agawa a dia ed kaimbuasan, sanen anengneng na saray Lamanite a wala kami ed ketegan na kalawakan ya asinger ed ciudad, añgibaki ra na saray espiya ra ed kaliber-liber mi pian nakabatan da so bilang tan biskeg na ñgayew mi.

15 Tan agawa sanen anengneng da ya aliwa kami a mabiskeg, unong ed bilang mi, tan natatakot ira ompano sabaten mi so saray tulong da likud no ompaway ira a milaban ed sikami tan pateyen da kami, tan ontan met ipapasen da a sikami so mainomay da a deralen ed kinarakel na totoo ra, dia ed ontan ginapoan da so mangawa na paraan ya onsalong sumpa ed sikami a milaban.

16 Tan sanen anengneng mi a sikara so mangagawa na paraan ya onsalong sumpa ed sikami, nia, ingangan ko a si Gid, kaiba to so melag a bilang na totoo, so onla ya unamot ed kalawakan, tan ontan met ed si Teomner tan melag a bilang na totoo so unamot met ed kalawakan.

17 Natan si Gid tan saray totoo to wala ra ed kawanan tan saray arum wala ra ed kawigi; tan sanen sikara la so akaamot, nia, siak so atilak, kaibak so saray nakekeraan a ñgayew ko, diman ed saman lamlamang a pasen ya añgipaalageyan mi na abong-abong mi ya abel sumpa ed panaon a saray Lamanite ya ompaway a mibakal.

18 Tan agawa a pinmaway so saray Lamanite a kaiba ra so dakerakel a ñgayew da sumpa ed sikami. Tan sanen sikara so sinmabi tan sikami so ñgalñgali ra la dugpaan ed panamegley na espada, ingangan ko ed saray totook, saraman so kaibak, ya onsener ed kalawakan.

19 Tan agawa a saray Lamanite tinumbok da kami a masiglat, tan agay la so pilalek da a sikami so naabotan da pian pateyen da kami; dia ed ontan sikami so tinumbok da ed kalawakan; tan sikami so linmabas ed nampegleyan nen Gid tan si Teomner, ya angan ag ira naimano na saray Lamanite.

20 Tan agawa sanen akalabas la so saray Lamanite, odino sanen saray ñgayew da so linmabas la, si Gid tan si Teomner so pinmaway ed panaamotan da a pasen, tan sinakbayan da so saray espiya na saray Lamanite pian ag la ra makapawil ed ciudad.

21 Tan natan agawa sanen asakbayan da ra, sikara so binmatik ya amaarap ed ciudad tan dinugpaan da so saray bantay ya intilak da a mambantay ed ciudad, a dia ed saya sikara so dineral da tan kinayarian da so ciudad.

22 Natan saya so agawa makaseñgeg saray Lamanite inawit da ya amin so ñgayew da, likud labat ed pigara ya intilak da a bantay, ya asagyat a mamaarap ed kalawakan.

23 Tan agawa a si Gid tan si Teomner ed saya a pamaakaran agamoran da so pankayarian ed salimbeñgan da. Tan agawa a sikami so nampatuloy ed basbas mi, kayari na dakel ya impambaroy mi ed kalawakan ya amaarap ed dalin na Zarahemla.

24 Tan sanen anengneng na saray Lamanite a sikara la so mankokurang a mamaarap ed dalin na Zarahemla, mapalalo so takot da, ag la piga wala so plano a niparaan a mañgitunton ed sikara ed kadederal; dia ed ontan ginapoan da so onsener ed kalawakan lamet, on, angan amawil ira ed saman lamlamang so dinalan da sanen sikara so amaarap.

25 Tan nia, labi la tan impaalagey da so saray abong-abong da ya abel, tan impasen na saray kapitan na Lamanite a saray Nephite so abanalan lapu ed impankurang da; tan impasen da ya asunson da ya amin so saray ñgayew da dia ed ontan ag da ninunot so nipaakar ed ciudad na Manti.

26 Natan agawa a dia ed labi, ingangan ko ed saray totook ya ag ira onugip, balet onkurang ira ya onarap ed ciudad na Manti ed sananey a dalan.

27 Tan makaseñgeg ed saya ya impankurang mi ed labi, nia, dia ed kaimbuasan alabsanan mi la so kawalaan na saray Lamanite, kanian akauna kami a sinmabi nen say sikara ed ciudad na Manti.

28 Tan dia ed onia agawa, lapu ed saya a kasiliban akayarian mi so ciudad na Manti ya angapo so tinmerter a dala.

29 Tan agawa sanen saray ñgayew na Lamanite so sinmabi ed asinger na ciudad, tan anengneng da ya akaparaan kami ya onabet ed sikara, sikara so nikelawan a maong tan awalaan ira na baleg a takot, kanian sikara so binmatik ed kalawakan.

30 On, tan agawa a saray ñgayew na Lamanite so binmatik a pinmaway ed amin a sukong na dalin. Balet nia, dakel so saray bibii tan ugogaw ya inaawit da ya impaway ed saman a dalin.

31 Tan saraman so ciudad ya inala na saray Lamanite, saraman ya amin ed saya a panaon so wala la ed pankayarian mi; tan saray kaamaan mi tan saray bibii tan anak mi so ompapawil la ed saray abong da, amin likud labat ed saray naala ya adakep tan inawit na saray Lamanite.

32 Balet nia, saray ñgayew mi so melag pian napagnayon mi so agay la a karakel a bilang na ciudad tan kabaleg na saray kayarian mi.

33 Balet nia, nanmatalek kami ed Dios mi ya añgiter ed sikami na taluna ed saraman a dalin, kanian agamoran mi so saraman a ciudad tan saraman a dalin, a saraya so kayarian mi.

34 Natan ag mi amta so makaseñgeg akin a saray manuoley ag añgiter ed sikami na babaleg a biskeg; ni saraman so totoo a sinmabi ed sikami ag da kabat no akin ag kami akaawat na babaleg a biskeg.

35 Nia, ag mi kabat balet no anto so ag yo impakagamor na maong ya nansumpalan, tan sikayo so añgiarawi na saray ñgayew ed saman a sukong na dalin; tan no onia, ag mi kaliktan so manñguroñguro.

36 Tan no aliwa ya ontan, nia, mapaga kami a wala so inkaapag ed olopan na saray manuoley, kanian ag ira añgibaki na dakel a totoo ya ontulong ed sikami; lapu ed kabat mi a dakerakel ni ra nen say saraman so imbaki ra.

37 Balet, nia, saya so angapo so kakanaan to—matalek kami a say Dios ilaban to kami, angaman ontan so kakapuyan na saray ñgayew mi, on, tan nilaban kami ed lima na saray kabusol mi.

38 Nia, natan so komaduamplo tan siam a taon, ed saguinunor a sampot, tan sikami so mankakayarian ed saray dalin mi; tan saray Lamanite so binmatik la ra ed ciudad na Nephi.

39 Tan saraman so lalaki ya anak na saray totoo nen Ammon, a sikara so mapagalang ya asalitak, kaibak ira ed ciudad na Manti; tan say Katawan tinuloñgan to ra, on, tan sikara so iniagel to ed kiparukol da ed panamegley na espada, kanian ni angan sakey a kamarerua so ag apatey.

40 Balet nia, asugat-sugatan ira; manwari ya ontan sikara so tinmalindeg ya ag-nagiing ed saman a kawayañgan no iner say Dios ginawa to ra a bulos; tan sikara so maong a makanunot ed Katawan a Dios da dia ed inagew-agew; on, inonor da a sumpalen so saray tutuntonen to, tan saray panañgokom to, tan saray gangan to ya andi-tonda; tan say pananisia ra so mabiskeg ed saray profesiya nipaakar ed saman so onsabi.

41 Tan natan, inararok ya agik, Moroni, komon say Katawan a Dios tayo, a sikato so anundon ed sikatayo tan ginawa to tayo a bulos, sayakopen to tayo ya andi-tonda ed kawalaan to; on, tan komon palaboan to so saya a totoo, anga ed nawalaan kayo na taluna ed pakagamor yo na pankayarian ed amin a sinamsam na saray Lamanite ed sikatayo, a saraya so onkana a tulong ed sikatayo. Tan natan, nia, sampotan ko la so sulat ko. Siak si Helaman, say laki ya anak nen Alma.