1 Natan saraya so salita ya impulong nen Amulek ed saray totoo a wala ed dalin na Ammonihah, ya inkuan to:

2 Siak si Amulek; laki ya anak nen Giddonah, a sikato so laki ya anak nen Ishmael, a kapolian nen Aminadi; tan sikato met lamlamang si Aminadi ya añgipatalus ed saray sulat a wala ed dingding na templo, a saraya so insulat ed dili a gamet na Dios.

3 Tan si Aminadi so kapolian nen Nephi, a laki ya anak nen Lehi, a nanlapu a pinmaway ed dalin na Jerusalem, a sikato so nanlapu ed kapolian nen Manasseh, laki ya anak nen Jose ya inlako da ed Egipto ed panamegley na lima na saray agagi to.

4 Tan nengneng yo, siak met so sakey a too ya aliwa a melag so kagalañgan to ed limog na saray makapikabat ed siak; on, tan nia, dakel so saray kakanayon ko tan kakaarok, tan akagamor ak met na dakel a kayamanan ed panamegley na saray limak lapu ed kulik.

5 Angaman ontan, kayari na saya ya amin, kapiganman ag ko akabatan a maong so saray dalan na Katawan, tan saray misterio to tan say makapakelaw a pakapanyari to. Inkuan ko ya kapiganman ag ko akabatan a maong so saraya a beñgatla; balet nia, siak so aliñgo, tan anengneng ko so dakel ed saray misterio to tan makapakelaw a pakapanyari to; on, angan say impañgiagel to ed saray bilay na saya a totoo.

6 Angaman ontan, pinaawet ko so pusok, lapu ed atawag ak ya amimpiga tan ag ak dinmeñgel; dia ed ontan kabat ko so nipaakar ed saraya a beñgatla, balet ag ko labay a kabaten; kanian intuloy ko so impansumpak ed Dios, dia ed karelmeñgan na pusok, anga ed komapat ya agew ed saya a komapito a bulan, a saya so komasamplo a taon ya oley na saray okom.

7 Legan a siak so mambabaroy pian pinengneñgan ko so asinger a kanayon ko, nia sakey ya angel na Katawan so pinmanengneng ed siak tan inkuan to: Amulek, pawil ka ed dili ya abong mo, tan pakanen mo so sakey a profeta na Katawan; on, sakey a masanto a too, a sikato so pinili a too na Dios; lapu ed sikato so nanayuno ed dakel ya agew lapu ed saray kasalanan na saya a totoo, tan sikato so narasan, tan sikato so awaten mo ed abong mo tan pakanen mo, tan sika so bendicionan to tan saray kabubong mo; tan say bendicion na Katawan so manayam ed sika tan say abong mo.

8 Tan agawa ya inonor ko so voces na angel, tan pinmawil ak ya amaarap ed abong ko. Tan legan a siak so manaakar arumog ko so sakey a too a sinalita na angel ed siak: Sikato so awaten mo ed abong mo—tan nia sikato met lamlamang iman a too ya akisalita ed sikayo nipaakar ed saray beñgatla na Dios.

9 Tan say angel inkuan to ed siak a sikato so sakey a masanto a too; dia ed ontan kabat ko a sikato so sakey a masanto a too lapu ed onia so inkuan na angel na Dios.

10 Tan lamet, kabat ko a saray beñgatla a pinaneknekan to so tua; tan nia ikuan ko ed sikayo, ya unong a say Katawan so mambibilay, sikato so añgibaki na angel to pian ipanengneng to so saraya a beñgatla ed siak; tan saya so ginawa to legan a saya ya Alma so manaayam ed abong ko.

11 Tan nia, binendicionan to so abong ko, binendicionan to ak, tan saray bibii, tan saray anak ko, tan say amak tan saray kakanayon ko; on, angan amin a kakanayon ko so binendicionan to, tan say bendicion na Katawan wala ed sikami unong ed salita ya imbalikas to.

12 Tan natan, sanen si Amulek so nambalikas na saraya a salita saray totoo ginmapo ira a mankelaw, lapu ed anengneng da a masulok a sakey so tasi a nampaneknek ed saray beñgatla a saraya so ipapakasalanan, tan ontan met ed saray beñgatla ya onsabi, unong ed espiritu na profesiya a wala ed sikara.

13 Angaman ontan, wala so pigara ed sikara a nunot da so ontepet ed sikara, pian dia ed panamegley na saray kasiliban da sikara so naerel da ed saray salita ra, ag la piga makarumog ira na tasi sumpa ed sikara, pian sikara so iawat da ed saray okom pian sikara so natutolan unong ed gangan, tan pian sikara so pateyen odino ipisok da ed pañgawan, unong ed kasalanan a nagawa ra a nayarian da a papawayen odino tasian a sumpa ed sikara.

14 Natan saraman a totoo so nampilalek a manderal ed sikara, a saraya so abogado, ya inupaan da odino tinuro na saray totoo a mantalima ed saray gangan ed saman a panaon na pansubok, odino dia ed pansubok na saray kasalanan na totoo ed arap na saray okom.

15 Natan saraya ya abogado malaknab ed aral da nipaakar ed saray arti tan kasiliban na totoo; tan onia pian niiter ed sikara so naspot a karonuñgan ed anapan da.

16 Tan agawa a ginapoan da a tepetan si Amulek, pian dia ed onia ag la piga napansusumlañgan to so saray salita to, odino napansosunian to so saray salita to ya ibalikas to.

17 Natan ag da kabat a si Amulek kabat to so saray getma ra. Balet agawa a sanen ginapoan da a tepetan, apatnagan to so saray kanunotan da, tan inkuan to ed sikara: O sikayo a marelmeng tan makasalanan a kailalakan, sikayo ya abogado tan mansimpisimpitan, sikayo so mañgipapasen na letnegan na demonyo; ililira yo so saray patit tan kalot a pañgerel yo ed saray pinasanto na Dios.

18 Sikayo so mañgililira na saray plano pian pikeweten yo so saray dalan na saray matunong, tan pian paleksaben yo so sanok na Dios ed saray ulo yo, angan onkana ed sigpot a kaderal na saya a totoo.

19 On, maong so imbaga nen Mosiah, say sampot ya ari tayo, sanen ñgalñgali to la iawat so panarian, lapu ed angapo so peteg a pañgipatawiran to, saya so akaseñgeg kanian saya a totoo so oleyan na dili a voces da—on, malinew so impañgibaga to a no onsabi so panaon a say voces na saray totoo pilien da so karelmeñgan, a saya, no onsabi so panaon a saya a totoo napelag ed kasalanan, sikara la so nagnap ed kadederal.

20 Tan natan ikuan ko ed sikayo a maong a say Katawan so mañgokom ed sikayo ed saray karelmeñgan yo; maong ya imbelyaw to ed saya a totoo, ed panamegley na voces na saray angeles to: Mambabawi kayo, mambabawi, lapu ed say panarian na tawen so asiñger la.

21 On, maong a sikato so añgibelyaw, ed panamegley na voces na saray angeles to: Siak so onsabi ed limog na saray totook, ya awit ko so pampapara tan kaptekan ed saray limak.

22 On, tan ibagak ed sikayo no ag lapu ed pikakasi na saray matunong, a sikara so wala dia natan ed saya a dalin, sikayo iñgen natan so dinalaw la na naspot a kadederal; balet aliwa a dia ed panamegley na delap, a siñga ed saray totoo ed agew nen Noe, balet dia ed panamegley na eras, tan salot, tan say espada.

23 Balet makaseñgeg ed pikakasi na saray matunong kanian sikayo so a nipapaliis: natan sirin, no ibantak yo so saray matunong ed limog yo dia ed ontan say Katawan ag to la pukpokan so lima to; balet dia ed sebeg na sanok to sikato so onla dia sumpa ed sikayo; dia ed ontan sikayo so nabakbak na eras, tan salot, tan espada; tan say panaon magano la ya onsabi likud no sikayo so mambabawi.

24 Tan natan agawa a saray totoo lalo ra a nampasnok ed si Amulek, tan inkelyaw da, a nankuan: Saya a too papaugesen to so saray gangan tayo a saraya so matunong, tan ed saray makabat ya abogado a pinili tayo.

25 Balet si Amulek iniunat to so saray taklay to, tan inkelyaw ni na lalo a maksil ed sikara, a nankuan: O sikayo a marelmeng tan managpikewet a kailalakan, akin ontan la so bemben nen Satanas ed saray puso yo? Akin itoluk yo so inkasikayo ed sikato pian nawalaan na pakapanyari ed sikayo, a pereñgan to so saray mata yo, pian naandian kayo na pakatalus ed saray nibalikas a salita, unong ed katuaan da?

26 Tan nia, siak kasi so nampaneknek sumpa ed saray gangan yo? Ag yo natatalusan; Inkuan yo a nansalita ak sumpa ed gangan yo; balet ag ko ginawa, balet siak so nansalita ya onaabubon ed saray gangan yo, onkana ed pakatetel ed sikayo.

27 Tan natan nia, ikuan ko ed sikayo a say letnegan na kadederal na saya a totoo so ongagapo la ya iletneg ed panamegley na saray aliwa a matunong ya abogado tan saray okom yo.

28 Tan natan agawa a sanen imbalikas nen Amulek so saraya a salita saray totoo nansalita ra sumpa ed sikato, a nankuan: Natan kabat tayo la a saya a too so anak na demonyo, lapu ed sikato so nantila ed sikatayo; tan sikato so nansalita sumpa ed gangan tayo. Tan natan inkuan to ya ag nansalita sumpa ed saya.

29 Tan lamet, sikato so nampauges sumpa ed saray abogado tayo, tan saray okom tayo.

30 Tan agawa a saray abogado initer da ed saray puso ra a nepeg da a nunoten so saraya a beñgatla sumpa ed sikato.

31 Tan wala so sakey ed limog da a manñgaran na Zeezrom. Natan sikato so manunaan a nantetel ed si Amulek tan si Alma, lapu ed sikato so sankamaoñgan ed silib ed limog da, lapu ed dakel ya anapan a ginawa to ed saray totoo.

32 Natan say getma na saray abogado say pakagamor da na gungona; tan agamoran da so saray gungona ra unong ed anapan da.