Scriptures
Alma 19


Tekap 19

Si Lamoni naawat to so liwawa na andi-angaan a bilay tan anengneng to so Mananundon—Saray kabubong to so niparukol ed inkaandian da na liknaan, tan dakel so akanengneng na saray angeles—Si Ammon so niagel a makapakelaw—Sikato so nambiniag na dakel tan inletneg to so sakey a simbaan ed limog da. Ñgalñgali 90 S.C.

1 Tan agawa a kayari na duara ya agew tan duara a labi ñgalñgali da la iakar ed lubok so laman to, a saya so ingagala a ginawa ra a pañgipumpon ed saray inaatey da.

2 Natan say reyna lapu ed nadñgelan to so inkabantog nen Ammon, dia ed ontan añgibaki tan nampilalek a sikato so onla ed sikato.

3 Tan agawa a si Ammon so linma unong ed nigangan ed sikato, tan sikato so linma ed reyna, tan pilalek to a nakabatan no anto so labay to a pagawa.

4 Tan inkuan to ed sikato: Saray igagangan nen asawak impakabat da ed siak a sakey ka a profeta na masanto a Dios, tan wala so pakapanyarim a mangawa na saray makapakelaw a kimey ed ñgaran to;

5 Dia ed ontan, no onia so kipapasen, pirawat ko ya onloob ka tan nengneñgen mo so asawak, lapu ed sikato so akarukol ed dukolan to ed loob na duara ya agew tan duara a labi; tan kuan na arum a sikato so ag inatey, balet saray arum say kuan da sikato so inatey la tan sikato la so ombabañget, tan nakaukolan la ya iloob ed lubok; balet no say siak, ag ni ombabañget.

6 Natan, saya so pilalek nen Ammon, lapu ed kabat to a si ari Lamoni so wala ed silong na pakapanyari na Dios; kabat to a say ambiluñget a sakbong na ag-pananisia so mankakalkalna a nanaekal ed kanunotan to, tan say liwawa a manisilew ed kanunotan to, a saya so liwawa na gloria na Dios, a saya so makapakelaw a liwawa na kaabigan to—on, saya a liwawa so añgisindag na ontan la a gayaga ed kamarerua to, a say lurem na kabiluñgetan so abuyak la, tan say liwawa na andi-angaan a bilay so aselselan ed kamarerua to, on, kabat to a saya tinalo to so indeñgan na inkalaman to, tan sikato so niakar ed Dios—

7 Dia ed ontan, no anto so pirawat na reyna ed sikato saya met so pilalek to ya alenleneg. Dia ed ontan, sikato so linmoob pian nengneñgen to so ari unong ed pilalek na reyna ed sikato; tan ninengneng to so ari, tan kabkabat to a sikato so ag inatey.

8 Tan inkuan to ed reyna: Sikato so ag inatey, balet sikato so naugip ed Dios, tan dia ed kaimbuasan sikato so ombañgon lamet; dia ed ontan ag yo ipupompon.

9 Tan si Ammon inkuan to ed sikato: Manisia ka ed saya? Tan inkuan to ed sikato: Angapo so mantasi ed siak likud ed saray sinalitam, tan salita na saray igagangan mi; manwari ya ontan manisia ak ya ontan so nagawa unong ed sinalitam la.

10 Tan si Ammon inkuan to ed sikato: Mapalar ka lapu ed maksil a pananisiam; Ikuan ko ed sika, bii, angapo ni so ontan la a kabaleg na pananisia ed limog na amin a totoo na Nephite.

11 Tan agawa a binantayan to so dukolan nen asawa to, nanlapu ed saman a bekta ya anga ed panaon na kaimbuasan unong ed ingetar nen Ammon a sikato so ombañgon.

12 Tan agawa a sikato so binmañgon, unong ed saray salita nen Ammon; tan dia ed imbañgon to, iniunat to so saray lima to ed saman a bii, tan inkuan to: Nagalang so ñgaran na Dios, tan mapalar ka met.

13 Tan unong a peteg a sika so mabilay, nia, anengneng ko la so Mananundon ko; tan sikato so onsabi, tan ianak na sakey a bii, tan dundonen to so amin a katooan a manisia ed ñgaran to. Natan, sanen nibalikas to so saraya a salita, say puso to so napno na liket, tan sikato so nalmay lapu ed gayaga; tan say reyna so nalmay met, lapu ed sikara so tinalo na pakapanyari na Espiritu.

14 Natan si Ammon dia ed impakanengneng to a say Espiritu na Katawan so niiter unong ed saray pikakasi to ya onkana ed saray Lamanite, a kaagian to, a saya so señgegan na dakel ya ermen ed limog na saray Nephite, odino ed limog na amin a totoo na Dios lapu ed saray karelmeñgan da tan saray sisia ra a tawir, sikato so tinmalimukor, tan ginapoan to ya iter so kamarerua to dia ed pikakasi tan pisasalamat ed Dios lapu ed saray ginawa to ed saray kaagian to; tan sikato met so tinalo na gayaga; tan dia ed onia sikara a talo so nalmay ed dalin.

15 Natan, sanen saray igagangan na ari anengneng da ra a niparukol, ginapoan da met so onnañgis ed Dios, lapu ed say takot da ed Katawan so sinmabi ed sikara met, lapu ed sikara so inmalagey ed arap na ari tan nampaneknek ed sikato nipaakar ed baleg a pakapanyari nen Ammon.

16 Tan agawa a sikara so tinmawag ed ñgaran na Katawan, ed angaan na pakayari ra, anga ed sikara ya amin so niparukol met ed dalin, likud labat ed sakey a bii a Lamanite, a say ñgaran to Abish, a sikato so apasimbalo la ed Katawan ed dakel a taon, unong ed ag-nalinglingwanan a payawar ed ama to—

17 Dia ed onia, lapu ed sikato la so apasimbalo ed Katawan, tan saya so ag to impaamta, dia ed ontan, sanen anengneng to ya amin ya igagangan nen Lamoni so niparukol ed dalin, tan ontan met ed amo to a bii, say reyna, tan say ari, tan si Ammon ya akaunat ed dalin, amta to a saya so nanlapu ed pakapanyari na Dios; tan impasen to a saya la so pankanawnawa, ed pañgipakabat to ed saray totoo no anto so agawa ed limog da, a dia ed pakanengneng da ed saya ya agawa so makaseñgeg na panisia ra ed pakapanyari na Dios, dia ed ontan sikato so binmatik a linma ed sakey ya abong anga ed sananey, ya añgibuyak na balita ed saray totoo.

18 Tan ginapoan da so mantitipon ed inkasikara a dili diman ed abong na ari. Tan wala so dinmagup a baleg a karaklan, tan dia ed baleg a kelaw da, anengneng da so ari, tan say reyna, tan saray igagangan da ya akaunat ed dalin, tan sikara ya amin so siñga ra inaatey; tan anengneng da met si Ammon, tan nia, sikato so sakey a Nephite.

19 Tan natan saray totoo ginapoan da so manmere-mere ed inkasikara a dili; saray arum inkuan da a sakey a baleg a kaugsan so sinmabi ed sikara, odino dia ed ari tan say abong to, lapu ed inabuloyan to so sakey a Nephite a mansiansia ed saman a dalin.

20 Balet saray arum so sinmumpa ed sikara, a kuan da: Say ari sikato met lamlamang so señgegan na insabi na kaugsan ed abong to, lapu ed pinatey to so saray igagangan to a sikara so nantaytayak na saray ayayep to ed danum na Sebus.

21 Tan sikara met so sinumpa na saraman a totoo a wala diman a nanalalagey ed asinger ed danum na Sebus a sikara so nantaytayak ed saray ayayep a kayarian na ari, lapu ed sikara so mampapasnok ed si Ammon lapu ed say pigara a bilang na saray apatey ed kaagian da diman ed danum na Sebus, sanen iaagel to so saray ayayep na ari.

22 Natan, sakey ed sikara, a say agi to so apatey nen Ammon ed espada to, dia ed mapalalo a pasnok to ed si Ammon, inoyus to so espada to tan sikato so linma pian saya so idapo to ed si Ammon, pian pateyen to; tan sanen intagey to la so espada to pian sigbaten to, nia, sikato so niparukol ya inatey.

23 Natan anengneng mi a si Ammon so ag nayari a napatey, lapu ed say Katawan inkuan to ed si Mosiah, ya ama to: Sikato so iagel ko, tan saya so nagawa unong ed pananisiam—dia ed ontan, si Mosiah inmatalek to ed Katawan.

24 Tan agawa a sanen say karaklan anengneng da so saman a too so abaktar ya inatey, saman so añgitagey na espada pian pateyen to si Ammon, sinmabi so takot ed sikara ya amin, tan ag da labay ya idiwit so lima da ed sikato odino ed siopaman ed saray niparukol; tan sikara so ginmapo a mankelaw lamet ed inkasikara no anto so señgeg na saya a baleg a pakapanyari, odino anto so kabaliksan na saraya ya amin a beñgatla.

25 Tan agawa a dakel ed saray wala ed limog da so nankuan a si Ammon so Makapanyari ya Espiritu, tan saray arum inkuan da ya sikato so imbaki na Makapanyari ya Espiritu;

26 Balet saray arum nampasnokan da ya amin, ya inkuan da sikato so sakey ya ayep a makapataktakot, ya imbaki na saray Nephite a mandusa ed sikara.

27 Tan wala so arum a nankuan a si Ammon so imbaki na Makapanyari ya Espiritu a mamairap ed sikara lapu ed saray karelmeñgan da; tan saman a Makapanyari ya Espiritu so lawas a mañgaasikaso ed saray Nephite, a sikato so lanang a mañgiaagel ed sikara ed saray lima da; tan kuan da a saya a Baleg ya Espiritu so nanderal na dakerakel ed saray kaagian da, saray Lamanite.

28 Tan dia ed onia sakey a baleg a baliñgaan so ginmapo ed limog da. Tan legan da a mambabaliñgaan saman so bii ya igagangan a sikato so nangawa na inkatiptipon da so sinmabi, tan sanen anengneng to so baliñgaan ed limog na saray karaklan sikato so apaermen a mapalalo, angan sikato so akalua.

29 Tan agawa a sikato so linma tan inala to ed lima so reyna, ag la piga sikato so nibañgon to manlapu ed dalin; tan dia ed bekta ya adiwit to so lima to sikato so binmañgon tan inmalagey ed sali to, tan inmakis ed maksil a voces, a nankuan: O mapagalang a Jesus, ya añgilaban ed siak ed makapataktakot ya infierno! O mapagalang a Dios, kasian mo so saya a totoo!

30 Tan sanen asalita to so saraya, impantekepan to so saray lima to, tan sikato so napno na gayaga, a nambalikas na dakel a salita ya ag natalusan; tan sanen ginawa to so saya, inala to so ari, Lamoni, ed lima, tan nia sikato so binmañgon tan inmalagey ed saray sali to.

31 Tan sikato, a tampol, nen anengneng to so baliñgaan ed limog na saray totoo to, sikato so dinmago tan ginapoan to ra a nampasnokan, tan sikara so imbañgat to na saray salita a nadñgel to ed saray sañgi nen Ammon; tan no kaonoñgan so akareñgel ed saray salita to sikara so anisia, tan sikara so apasimbalo ed Katawan.

32 Balet wala so dakel ed limog da ya ag ondeñgel ed saray salita to; dia ed onia tinmaynan ira.

33 Tan agawa a sanen si Ammon so binmañgon sikato so nantalima met ed sikara, tan ontan met ed amin ya igagangan nen Lamoni; tan imbawag da ed saray totoo so saman lamlamang a beñgatla—a saray puso ra so nauman; ya angapo la so pilalek da a mangawa na mauges.

34 Tan nia, dakel so añgibawag ed saray totoo ya akanengneng ira na saray angeles tan sikara so akisalita ed sikara; tan dia ed onia imbaga ra ed sikara so saray beñgatla a nipaakar ed Dios, tan say inkamatunong to.

35 Tan agawa a dakel so anisia ed saray salita ra; tan no kaonoñgan so saray anisia sikara so abiniagan; tan nanmaliw ira a totoo a matunong, tan inletneg da so simbaan ed limog da.

36 Tan dia ed onia say kimey na Katawan so ginmapo ed limog na saray Lamanite; dia ed onia say Katawan ginapoan to ya iter so Espiritu to ed sikara; tan nanengneng tayo a say taklay to so akaunat ed amin a totoo a mambabawi tan manisia ed ñgaran to.