1 Tan natan, saraya so salita nen Ammon ed saray kaagian to, a nankuan na onia: Agagik tan kaagian ko, nia ikuan ko ed sikayo, agay la so kabaleg na rason tayo a mangayaga; tan nayari kasi ya ipasen tayo a nen onsipot itayo ed dalin na Zarahemla say Dios initer to ed sikatayo so onia a kabaleg a bendicion?

2 Tan natan, ontepet ak, Agay la so kinabaleg na bendicion ya initer to ed sikatayo? Nayarian yo kasi ya ibaga?

3 Nia, siak la so onebat ed sikayo; lapu ed saray kaagian tayo, saray Lamanite, wala ra ed kabiluñgetan, on, angan dia ed sankabiluñgetan a kaaraleman, balet nia, kaonoñgan ed sikara so naawit ya akamuria ed makapakelaw a liwawa na Dios! Tan saya so bendicion ya initer to ed sikatayo, tan ginawa to tayo ya ikakana ed lima na Dios a mañgawit ed saya a baleg a kimey.

4 Nengneng yo, libu-libo ed sikara so nangayaga, tan sikara so naawit ed saray papastolan na Dios.

5 Nia, say kaumaan aanien la, tan mapalar kayo, lapu ed inwasiwas yo so palot, tan nanani kayo ed angaan na pakayari yo; on, dia ed legan na sanagew sikayo so nankimey; tan nengneng yo so bilang na saray apalot yo! Tan sikara so natipon ed saray kamalir, pian ag ira nadarak.

6 On, sikara so ag nabakbak na bagyo ed sampot ya agew; on, ni say sikara so sagaran na saray alimbosabos; balet sano onsabi so bagyo sikara so natiptipon ed saray pasen da, a say bagyo ag ontalos ed sikara; on, ni say sikara so nasunson na mabiskeg a dagem ed inerman a pasen a kiliñgan na kabusol a pañgawitan ed sikara.

7 Balet nia, sikara so wala ed lima na Katawan na panagani, tan sikara so kayarian to; tan sikara so ibañgon to ed sampot ya agew.

8 Nagalang so ñgaran na Dios tayo; mancancion tayo ed dayew to, on, iter tayo so pisasalamat ed masanto a ñgaran to, lapu ed sikato so mankikimey ed inkamatunong ed andi-angaan.

9 Tan no ag itayo linma a pinmaway ed dalin na Zarahemla, saraya ya inararo tayo a kaagian, a sikara so añgaro ed sikatayo, sikara ni natan so tatagen-tagenen na pasnok sumpa ed sikatayo, on, tan sikara met ni so sankaili ed Dios.

10 Tan agawa sanen imbaga nen Ammon so saraya a salita, si agi to ya Aaron so nampasnok ed sikato, a kuan to: Ammon, wala ed siak so takot ag la piga say gayagam awiten to ka ed panagpasirayew.

11 Balet si Ammon inkuan to ed sikato: Ag ko mampasirayew ed dili a biskeg ko, ni say dia ed dili a kakabatan ko; balet nia, say gayagak so ayadyari, on, say pusok so manliplipwa ed gayaga, tan mangayaga ak ed Dios ko.

12 On, kabat ko ya angapo so kanak; no nipaakar ed biskeg ko sakey ak a makapoy; dia ed ontan ag ko mampasirayew ed inkasiak, balet ipasirayew ko so Dios ko, tan dia ed biskeg to nayarian ko a gawaen so amin a beñgatla; on, nia, dakel a makapakelaw a milagro so inawit tayo ed saya a dalin, lapu ed saraya idayew tayo so ñgaran to ed andi-angaan.

13 Nia, pigara a libo ed saray kaagian tayo so naukbaran ed otot na infierno; tan sikara so naawit a mancancion na makarundon ya aro, tan saya lapu ed pakapanyari na salita to a wala ed sikatayo, dia ed ontan ag kasi wala so baleg a rason tayo a mangayaga?

14 On, wala so rason tayo a mandayew ed sikato ed andi-angaan, lapu ed sikato so Sankaatageyan a Dios, tan inukbaran to so saray kaagian tayo ed gulonggulong na infierno.

15 On, sikara so aliktob na andi-angaan a kabiluñgetan tan kadederal; balet nia, sikara so inawit to ed andi-angaan a liwawa to, on, ed andi-angaan a kilalaban; tan sikara so aliktob na angapo so kapara a bunlok na aro to; on, tan sikatayo so nanmaliw ya ikakana ed lima to a mangawa ed saya a makana tan makapakelaw a kimey.

16 Dia ed ontan, sikatayo so mangloria, on, mangloria itayo ed Katawan; on, sikatayo so mangayaga, tan say gayaga tayo so ayadyari; on, idayew tayo so Dios tayo ed ando la ya ando. Nia, siopa so mangloria na alablabas ed Katawan? On, siopa so makapankuan na alablabas ed kinabaleg na pakapanyari to, tan say panañgasi to, tan say andukey a panagtepel to ed saray anak na totoo? Nia, ikuan ko ed sikayo, ag ko nayari ya ibalikas so angan say sankamelagan a kabiañgan na naliliknak.

17 Siopa so mañgipasen a say Dios tayo mapalalo so panañgasi to a sinamsam to itayo ed makapataktakot, makasalanan, tan marutak a kipapasen?

18 Nia, sikatayo so nankurang a sisasanok, ed baleg a gagala a manderal ed simbaan to.

19 O sirin, akin ag to itayo impaarap ed makapataktakot a kadederal, on, akin ag to pinaulian a say espada na kaptekan to so ondapo ed sikatayo, tan ipaldeg to itayo ed andi-angaan ya andi-ilalo.

20 O, say kamareruak, siñga ed gendat a kipapasen, ontataynan ed saya a pakanunot. Nia, ag to inkana so kaptekan to ed sikatayo, balet lapu ed baleg a panañgasi to inawit to itayo ya imbasil ed andi-angaan a dayat na patey tan segsegang, angan dia ed kilalaban na saray kamarerua tayo.

21 Tan natan nia, kaagian ko; anto ya inkaugali na too so makapikabat ed saraya a beñgatla? Ikuan ko ed sikayo, angapo so siopaman a makapikabat ed saraya likud no sikato so mambabawi.

22 On, siopaman a mambabawi tan aagamilen to so pananisia, tan mangagawa na saray maong a kimey, tan mampipikasi ya andi-tonda—dia ed sikato niiter so pikakabat ed saray misterio na Dios; on, dia ed sikato niiter so pañgipuyan na saray beñgatla ya ag ni nipuyan; on, tan niiter ed sikato so pañgawit na nilibo a kamarerua ed pambabawi, angan siñga say niiter ed sikatayo ed impañgawit ed saraya a kaagian tayo ed pambabawi.

23 Natan nanunotan yo, kaagian ko, ya imbaga tayo ed saray kaagian tayo diman ed dalin na Zarahemla, ya onla itayo ed dalin na Nephi, a mampulong tayo ed saray kaagian tayo, a saray Lamanite, tan sikatayo so inelekan da a binalaw?

24 Ya inkuan da ed sikatayo: Ipapasen yo a nayarian yo ya awiten so saray Lamanite ed pikakabat na katuaan? Ipapasen yo a nakuyong yo so saray Lamanite nipaakar ed saray aliwa a tua a sisia a tawir na kaamaan da, a sikara so totoo a matalker so saray teñger da; a saray puso ra manliket ed pañgipaterter na dala; a saray agew da so pinapalabas da ed sankaugesan a karelmeñgan; a saray kagagawa ra so basbas na saray managkasalanan nanlapu la ed gapo? Natan kaagian ko, nanunotan yo a saraya so salita ra.

25 Tan nagkalalo ni inkuan da: Onlaban itayo sumpa ed sikara, pian deralen tayo ra tan say karelmeñgan da ed ipaway ed saya a dalin, ag la piga sikatayo so taloen da tan sikatayo so deralen da.

26 Balet nengneng yo, inararok a kaagian, linma itayo ed kalawakan ya aliwa a say gagala tayo deralen tayo so saray kaagian tayo, balet tekep na gagala ya ag la piga nilaban tayo so pigara ed saray kamarerua ra.

27 Natan sanen saray puso tayo so naermenan, tan ñgalñgali tayo la ompawil, nia, say Katawan niligliwa to tayo, tan inkuan to: Onla kayo ed limog na saray kaagian yo, a saray Lamanite, tan itepel yo a siaanos so saray kairapan yo, tan iter ko ed sikayo so maong a pansumpalan.

28 Tan natan nia, sikatayo so sinmabi, tan akilimog itayo ed sikara; tan sikatayo so nananos ed saray kairapan tayo, tan intepel tayo so amin a nengneng na kasegsegañgan; on, sikatayo so linma ed balang sakey ya abong, a nanmatalek itayo ed saray panañgasi na mundo—aliwa labat ed panañgasi na mundo balet dia ed saray panañgasi na Dios.

29 Tan sikatayo so linmoob ed saray kaaboñgan da tan binañgatan tayo ra, tan binañgatan tayo ra ed saray karsada ra; on, tan sikara so binañgatan tayo ed tapew na saray pukdol; tan sikatayo so linmoob met ed saray templo ra tan saray sinagogas da tan binañgatan tayo ra; tan sikatayo so pinapaway da, tan binalaw-balaw da, tan niluklukdaan da, tan tinatampal da itayo ed saray aping; tan sikatayo so tinutopak da, tan inala ra tan binalor na malet a lubir, tan impisok da itayo ed pañgawan; tan dia ed panamegley na pakapanyari tan karonuñgan na Dios sikatayo so nipaway lamet.

30 Tan sikatayo so nantepel na amin a nengneng na kairapan, tan ed saraya ya amin, ag la piga saraya so onkana ed kilaban na saray arum a kamarerua; tan impasen tayo a say gayaga tayo so manmaliw ya ayadyari no ag la piga bilang sikatayo so onkana ed kilaban na pigara.

31 Natan nia, nayarian tayo so onwandag tan nengneñgen so saray buñga na saray sagpot tayo; tan sikara kasi so pigpigara? Ikuan ko ed sikayo, Andi, sikara so amayamay; on, tan nayarian tayo a tasian so saray inkamatua ra, lapu ed panañgaro ra ed saray kaagian da tan ontan met ed sikatayo.

32 Tan nia, lablabayen da ya ibagat so saray bilay da nen say sikara so mañgekal na bilay na saray kabusol da; tan inkutkot da so saray agamil da ed bakal dia ed kaaraleman na dalin, lapu ed panañgaro ra ed saray kaagian da.

33 Tan natan nia ikuan ko ed sikayo, wala kasi ni so babaleg ya aro nen say saya ed amin a dalin? Nia, ikuan ko ed sikayo, Andi, angapo so siñga saya, angan dia ed limog na saray Nephite.

34 Tan nia, onlaban ira sumpa ed saray kaagian da; ag da nitepel ed inkasikara a sikara so napatey. Balet nia pigara ed sikara so initer da so bilay da; tan sikakabat itayo a sikara so linma ed Dios da, lapu ed aro ra tan pambusol da ed kasalanan.

35 Natan angapo kasi so rason tayo a mangayaga? On, ikuan ko ed sikayo, angapo kapiganman so totoo ya awalaan na ontan kabaleg a gayaga a siñga sikatayo, nanlapu ed ingapo na mundo; on, tan say gayagak so alablabas, angan say pampasirayew ko ed Dios ko; lapu ed wala ed sikato so amin a pakapanyari, amin a karonuñgan, tan amin a pakatalus; natebek to so amin a beñgatla, tan sikato so sakey a mapañgasi a Pinalsa, angan dia ed kilalaban, ed saraman so mambabawi tan manisia ed ñgaran to.

36 Natan no saya so panagpasirayew, angan ontan siak so mampasirayew; lapu ed sikatoya so bilay ko tan liwawak, say gayagak tan kilalaban ko, tan inkarundon ko nanlapu ed andi-angaan a dageyem. On, nagalang so ñgaran na Dios ko, a sikato so manunot ed saya a totoo, a sikara so sakey a sañga na kiew na Israel, tan saya so abalang ed señgeg to ed ag-kabat a dalin; on, ikuan ko, nagalang so ñgaran na Dios ko, lapu ed sikato so manunot ed sikatayo, a manaakar-akar ed ag-kabat a dalin.

37 Natan kaagian ko, anengneng tayo a say Dios so manunot ed amin a totoo, inerman a dalin so kawalaan da; on, binilang to so saray totoo to, tan say sankaaraleman a panañgasi to wala ed amin a lapag na mundo. Natan, saya so gayagak, tan baleg a pisalamatan ko; on, tan iter ko so pisasalamat ed Dios ko ya anga la ed anga. Amen.