1 Tan agawa a sikara so linma, tan ginapoan da ya ipulong so salita na Dios ed saray totoo, a linmoob ira ed saray sinagogas da, tan dia ed saray kaaboñgan da; on, tan angan dia ed saray dalan da sikara so nampulong na salitak.

2 Tan agawa a kayari na dakel a sagpot ed saray limog da, ginmapo a makagamor ira na maong a nansumpalan ed limog na saray totoo a duka; tan nia, sikara so pinapaway da ed saray sinagogas da lapu ed gasal na saray kawes da—

3 Dia ed ontan ag ira naabuloyan ya onloob ed saray sinagogas da a mañgigalang ed Dios, lapu ed ipapasen da a sikara so marutak; dia ed ontan sikara so duka; on, sikara so ibibilang na saray kaagian da a makadutadutak; dia ed ontan sikara so duka ed saray minomundo a beñgatla; tan ontan met sikara so duka ed puso.

4 Natan, legan a si Alma so mambabañgat tan mansasalita ed saray totoo ed pukdol na Onidah, wala so sinmabi a baleg a karaklan ed sikato, a sikara so saray asalita la, a duka ed puso, lapu ed inkaduka ra nipaakar ed saray beñgatla ed minomundo.

5 Tan sikara so linma ed si Alma; tan say sakey ed sikara a sikato so manunaan ed limog da inkuan to ed sikato: Nia, anto so gawaen na saraya so kaagian ko, lapu ed sikara so babalawen na amin a totoo lapu ed inkaduka ra, on, tan nagkalalo la na saray sacerdote mi; lapu ed sikami so pinapaway da ed saray sinagogas mi a sikami so nansagpot na dakel ya añgipaalagey ed saray dili a lima mi; tan sikami so pinapaway da lapu ed mapalalo ya inkaduka mi, tan angapo so pasen a pañgigalañgan mi ed Dios mi; tan nia, anto so gawaen mi?

6 Tan natan sanen si Alma nadñgel to so saya, sikato so linmiñgaw, a say lupa to so bigla ya iniarap to ed sikato, tan anengneng to ed baleg a gayaga; lapu ed anengneng to a saray kairapan da so peteg a nampaabeba ed sikara, tan sikara so akaparaan ya ondeñgel ed salita.

7 Dia ed ontan sikato so ag la nansalita ed saman so sananey a karaklan; balet iniunat to so lima to, tan nankelyaw ed saraman so anengneng to, a sikara so peteg a nambabawi, tan inkuan to ed sikara:

8 Anengneng ko a sikayo so apaabeba ed puso; tan no ontan, mapalar kayo.

9 Nia say agi yo inkuan to: Anto so gawaen mi?—lapu ed sikami so pinapaway da ed saray sinagogas mi, kanian ag kami makapañgigalang ed Dios mi.

10 Nia ikuan ko ed sikayo, ipapasen yo kasi ya ag kayo makapañgigalang ed Dios likud no dia ed dalem na saray sinagogas labat?

11 Tan kaaruman ni, siak so ontepet, ipapasen yo kasi a maminsan labat so pañgigalang yo ed Dios ed loob na sakey simba?

12 Ikuan ko ed sikayo, maong a sikayo so pinapaway da ed saray sinagogas yo, pian sikayo so mampaabeba, tan pian naaral yo so kakabatan; lapu ed nakaukolan a naaralan yo so kakabatan; lapu ed sikayo so pinapaway da, a sikayo so binalaw na saray kaagian yo lapu ed mapalalo ya inkaduka yo, kanian sikayo so naawit ed saya a kaabebaan na puso; lapu ed sikayo so nakaukolan a naawit a mampaabeba.

13 Tan natan, lapu ed sikayo so apasuotan a mampaabeba mapalar kayo; lapu ed say too no maminsan, no sikato so napasuotan a mampaabeba, anapen to so pambabawi; tan natan petepeteg, siopaman a mambabawi makaalmo na panañgasi; tan siopaman so makarumog na panañgasi tan mansiansia ya anga ed sampot sikato met lamlamang so nilaban.

14 Tan natan, unong ed inkuan ko ed sikayo, lapu ed sikayo so apasuotan a mampaabeba sikayo so mapalar, ag yo kasi ipasen a lalo a mapalar so peteg a paabebaen da so inkasikara lapu ed salita?

15 On, siopaman so mampaabeba ed inkasikato a dili, tan mambabawi ed saray kasalanan to, tan mansiansia ya anga ed sampot, sikato met lamlamang so napalaran—on, lalo a mapalar nen say saraman so apasuotan a mampaabeba lapu ed mapalalo ya inkaduka ra.

16 Dia ed ontan, mapalar so saraman so mampaabeba ed inkasikara a dili ya ag ira apasuotan a mampaabeba; odino magmaong ni, dia ed sananey a salita, mapalar so siopaman a manisia ed salita na Dios, tan nabiniagan ya angapo so inkabañgar ed puso to, on, ya ag naawit ed pikakabat na salita, odino angan apasuotan a makapikabat, sakbay a sikara so manisia.

17 On, dakel so saray mankuan: No ipanengneng mo ed sikami so sakey a tanda a manlapu ed tawen, dia ed saya nakabatan mi a saya so peteg; dia ed saya sikami so manisia.

18 Natan tepeten ko, saya kasi so pananisia? Nia, ikuan ko ed sikayo, Andi; no say sakey a too kabat to la so sakey a beñgatla angapo la so makaseñgeg a sikato so manisia, lapu ed saya kabat to la.

19 Tan natan, lalo ni a naayew so sakey a kabat to la so linawa na Dios tan saya so ag to gawaen, nen say saman so manisia labat, odino wala so makaseñgeg a sikato so manisia, tan napelag ed kasalanan?

20 Natan nipaakar ed saya a beñgatla sikayo so mantutol. Nia, ikuan ko ed sikayo, a nagawa ed sakey a lima angan ontan met ed sananey; tan saya so nagawa ed balang sakey a too unong ed saray kimey to.

21 Tan natan unong ed asalitak la nipaakar ed pananisia—say pananisia ag nakaukolan a wala so nagnap a pikakabat ed saray beñgatla; dia ed ontan no walaan kayo na pananisia ilaloan yo so saray beñgatla ya ag nanengneng, a saraya so tua.

22 Tan natan, nia, ikuan ko ed sikayo, tan komon nunoten yo, a say Dios mapañgasi ed amin a manisia ed ñgaran to; dia ed ontan pampilalekan to, ed unaonaan, a kaukolan sikayo so manisia, on, angan dia ed salita to.

23 Tan natan, initer to so salita to ed panamegley na saray angeles ed saray totoo, on, aliwa labat ed saray lalaki balet dia ed saray bibii met. Natan aliwa ni a saya ya amin; saray ankekelag ya ugogaw niiter ed sikara so saray salita to ed dakel a panaon, a saya so nankewkew ed saray makabat tan saray awalaan na aral.

24 Tan natan, inararok a kaagian, unong ed pilalek yo a kabaten ed siak no anto so gawaen yo lapu ed sikayo so nanlikna na irap tan sikayo so pinapaway da—natan ag ko pilalek ya ipasen yo a say labay ko ya ibaga so pañgokom ko ed sikayo labat unong ed saman so tua—

25 Lapu ed ag ko labay ya ibaga yo ya amin yo so apasuotan a mampaabeba ed inkasikayo a dili; tan peteg a manisia ak a wala ed limog yo so nampaabeba ed inkasikara, paulyan yo ra a mansiansia ed antokaman a kipapasen a kawalaan da.

26 Natan, unong ed asalitak la nipaakar ed pananisia—a saya so aliwa a nagnap a pikakabat—angan ontan saya so unong ed saray salitak. Ag yo kabat so katuaan na saraya ed unaan, ed inkagnap, a lalo ni nen say pananisia so sakey a nagnap a pikakabat.

27 Balet nia, no bañgonen tan liiñgen yo so saray pakayari yo, ya angan salsalien yo so saray salitak, tan ikana yo so angan melag a pananisia, on, angano say nayarian yo a pampilalekan so say manisia, paulyan yo a saya a pilalek so mankimey ed sikayo, ya anga ed sikayo so manisia ed sakey a kanengneñgan pian niiter yo so pasen ed kabiañgan na saray salitak.

28 Natan, ipareng tayo so salita ed sakey a bokel. Natan, no initer yo so pasen, pian say sakey a bokel so nitanem ed puso yo, nia, no saya so tua a bokel, odino maong a bokel, no saya so ag yo ibantak lapu ed ag-pananisia, pian sumpaen yo so Espiritu na Katawan, nia, saya so ongapo ya ombaleg ed dalem na saray pagew yo; tan sano nalikna yo so saraya ya ombaleg ya ongagalaw, ongapo kayo a mankuan ed inkasikayo—Nakaukolan sirin a saya so maong a bokel, odino say salita so maong, lapu ed ginapoan to a pabalegen so kamareruak; on, gagapoan to a paliliwawaen so pakatalus ko, on, gagapoan to so onnanam ed siak.

29 Natan nia, ag kasi saya so mañgarum ed pananisia yo? Ikuan ko ed sikayo, On; angaman ontan saya so ag ni tinmubo ed nagnap a pikakabat.

30 Balet nengneng yo, legan a say bokel so ombabaleg tan ombabasik, tan ongagapo ya ontubo, dia ed saya nakaukolan a nepeg yo ya ikuan a say bokel so maong; tan nia saya so binmaleg, tan binmasik, tan ginmapo la ya ontubo. Tan natan, nia, ag kasi saya so mamabiskeg ed pananisia yo? On, saya so mamabiskeg ed pananisia yo: lapu ed ikuan yo kabat ko a saya so sakey a maong a bokel; tan nia saya so binmasik tan ginmapo ya ontubo.

31 Tan natan , nia, peteg kasi a saya so maong a bokel? Ikuan ko ed sikayo, On; tan balang sakey a bokel papawayen to so kaolibay to.

32 Dia ed ontan, no say sakey a bokel so ontubo saya so maong, balet no saya so ag tinmubo, nia saya so aliwa a maong, dia ed ontan saya so ibantak.

33 Tan natan, nia, lapu ed sinubok yo so saya a salsali, tan intanem yo so bokel, tan saya so binmaleg tan binmasik, tan ginmapo ya ontubo, kaukolan yo a kabaten a saman a bokel so maong.

34 Tan natan, nia, say pikakabat yo kasi so nagnap la? On, say pikakabat yo so nagnap la ed saman a beñgatla, tan say pananisia yo so ag-onkakana; tan saya lapu ed amta yo, lapu ed kabat yo a say salita pinaliket to so saray kamarerua yo, tan kabat yo met a saya so binmasik, a say pakatalus yo so ginmapo ya onliwawa, tan say nunot yo so ginmapo ya onlaknab.

35 O sirin, ag kasi saya so petepeteg? Ikuan ko ed sikayo, On, lapu ed saya so liwawa; tan antokaman a liwawa, so maong, lapu ed saya so natalusan, dia ed ontan kaukolan a kabaten yo a saya so maong; tan natan nia, kayari ya atawayan yo so saya a liwawa nagnap la kasi so pikakabat yo?

36 Nia ikuan ko ed sikayo, Andi; ni say kaukolan yo ya ipulisay so pananisia yo, lapu ed say inagamil yo labat so pananisia yo ya añgitanem na bokel pian salien yo a kabaten no say bokel maong.

37 Tan nengneng yo, no say kiew ginmapo ya ontubo, ikuan yo: Bayuboan tayo a maalwar, pian onlamut, pian saya so ombaleg, tan mañgiter na buñga ya onkana ed sikatayo. Tan natan nia, no saya so nabayuboan ed dakel ya alwar saya so manlamut, tan ombaleg, tan mañgiter na buñga.

38 Balet no paulyan yo so kiew, tan angapo la so nunot yo ed pambayubo ed saya, nia saya so ag onlamut; tan sano onsabi so petang na agew tan saya so dangdañgen to, lapu ed angapo so lamut to saya so onlenes, tan saya so bagoten tan ibantak yo.

39 Natan, saya so aliwa lapu ed say bokel so makapoy, ni say lapu ed say buñga to so aliwa a makapaliket; balet lapu ed say dalin yo so kelang, tan ag yo binayuboan so kiew, dia ed ontan ag kayo makaala na buñga.

40 Tan dia ed onia, no ag yo bayuboan so salita, ya mantalaran kayo ya awalaan na mata na pananisia ed buñga to, ag kayo makaburbor na buñga ed kiew na bilay.

41 Balet no bayuboan yo so salita, on, bayuboan yo so kiew no ongapo la ya ontubo, dia ed pananisia yo tekepan na baleg a seet, tan katekep na anos, ya mantatalaran kayo ed buñga to, saya so onlamut; tan nengneng yo saya so manmaliw a sakey a kiew ya onsubol so andi-angaan a bilay.

42 Tan lapu ed seet yo tan say pananisia yo tan say anos yo ed salita nipaakar ed panagbayubo ed saya, pian onlamut ed sikayo, nia, dia ed nagogonuyan makaburbor kayo na buñga to nia, a saya so sankablian, a saya so sankasamitan nen say dinan a masamit, tan saya so amputi nen say dinan ya amputi, on, tan dalisay nen say amin a dalisay; tan sikayo so mampenek ed saya a buñga ya anga ed sikayo so napesel, pian sikayo so ag naerasan, ni say sikayo so napaet.

43 Dia ed saya, kaagian ko, anien yo so tumang na pananisia yo, tan seet yo, tan anos yo, tan dukey na panagtepel, a nanalagar kayo ed kiew a mañgiter na buñga ya onkana ed sikayo.