1 Nia, natan agawa ya ag abayag ed impañgipawit nen Moroni na sulat ed pañgulo a gobernador, sikato so akaawat na sulat a nanlapu ed si Pahoran, say pañgulo a gobernador. Tan saraya so salita a naawat to:

2 Siak, si Pahoran, a pañgulo a gobernador ed saya a dalin, ipawit ko so saraya a salita ed si Moroni, say pañgulo a kapitan na ñgayew. Nia, ikuan ko ed sika Moroni, ya ag ak magayaga ed baleg ya irap mo, on, apaermen so kamareruak.

3 Balet nia, wala ra so arum a nangayaga ed irap mo, on, a dia ed onia sikara so tinmalindeg ya inmalsa sumpa ed siak, tan ontan met ed saraman so totook a sikara so, bulos a totoo, on, tan saray inmaalsa mapalalo so kinarakel da.

4 Tan saraman so nampilpilalek ya alaen da ed siak so yuroñgan na panañgokoman a saya so señgegan na saya a baleg a karelmeñgan; tan inkana ra so baleg a panagsagyat, tan asagyat da so saray puso na dakel a totoo, a saya so señgegan na ansakit ya irap ed limog mi; ag da initer so saray tagano mi, tan tinaktakot da so saray bulos a totoo kanian ag ira akasabi ed sika.

5 Tan nia, siak so dinagdag da a pinapaway ed arap da, tan siak so binmatik ed dalin na Gideon, a kaibak so kinarakel na totoo a nayarian ko ya awiten.

6 Tan nia, añgipaakseb ak na pakabat ed saya a pasen na dalin; tan nia, sikara so ondadago ya inagew-agew ed sikami, ya awit da so saray ayura ra, a mañgiagel ed bansa ra tan say inkabulos da, tan ombales ed mauges a ginawa ra ed sikami.

7 Tan sikara so sinmabi ed sikami, dia ed onia saraman so tinmalindeg ya inmalsa sumpa ed sikami so sinmumlang, on, dia ed onia sikara so tinmakot ed sikami tan ag da la labay so ompaway sumpa ed sikami ed bakal.

8 Naala ra a kinayarian so dalin, odino say ciudad, na Zarahemla; sikara so anuro na ari ed sikara, tan sikato so nansulat ed ari na saray Lamanite, a dia ed saya sikato so akikasakey ed nunoñgan; a dia ed saman a nunoñgan inmabuloy a pagnayonen to so ciudad na Zarahemla, a dia ed saya a panagasikaso to impasen to a niiter ed saray Lamanite so pankanawnawa a nasamsam so nakekeraan ni a dalin, tan sikato so ipasen ya ari ed saraya a totoo sano nasamsam la na saray Lamanite.

9 Tan natan, dia ed sulat mo ed siak so tinetel mo, balet saya so ag la makana; ag ak mampapasnok, balet nangayaga ak ed kinabaleg na pusom. Siak, Pahoran, ag ko pampipilalekan so pakapanyari, likud labat ed pansiansiak ed yuroñgan na panañgokoman pian niagel ko so saray pankatunoñgan tan kawayañgan na saray totook. Say kamareruak so ag nagiing nipaakar ed saya a kawayañgan a dia ed saya say Dios ginawa to tayo a bulos.

10 Tan natan, nia, amperen tayo so karelmeñgan iñgen anga ed iterter na dala. Ag tayo paterteren so dala na saray Lamanite no sikara so mansiansia ed saray dili a dalin da.

11 Ag tayo paterteren so dala na saray kaagian tayo no sikara so ag onalsa tan alaen da so saray espada da sumpa ed sikatayo.

12 Sikatayo so ontewek ed pako na inkaaripen no saya so nakaukolan ed kaptekan na Dios, odino no igangan to ed sikatayo a saya so gawaen tayo.

13 Balet nia ag to ingangan a sikatayo so ontewek ed saray kabusol tayo, balet iter tayo so talek tayo ed sikato, tan ilaban to itayo.

14 Dia ed ontan, inararok ya agi, a Moroni, amperen tayo so mauges, tan antokaman a mauges ya ag tayo naamper ed saray salita tayo, on, a siñga saray panagalsa, tan isian, saya so amperen tayo ed panamegley na espada tayo, pian napagnayon tayo so inkabulos tayo, pian mangayaga itayo ed baleg a pankanawnawa ed simbaan tayo, tan makaseñgeg ed Mananundon tayo tan Dios tayo.

15 Dia ed ontan, gala dia ed siak a masiglat a kaibam so pigara ed saray totoom, tan itilak mo so nakekeraan ed si Lehi tan si Teancum; iter mo ed sikara so pakapanyari a mañgikurang na bakal ed saman a kabiañgan na dalin, unong ed Espiritu na Dios, a saya met so espiritu na inkabulos a wala ed sikara.

16 Nia añgipawit ak na daiset a tagano ed sikara, pian ag ira ompatey anga ed pakasabim dia ed siak.

17 Tipon mo so antokaman a ñgayew a nayarian mo ed ikurang mo ya onla dia, tan tampol sikatayo so onla sumpa ed saray sinmisian, dia ed biskeg na Dios tayo unong ed pananisia a wala ed sikatayo.

18 Tan kayarianen tayo so ciudad na Zarahemla, pian makagamor tayo na dakel ni a naakan ya ipawit ed si Lehi tan si Teancum; on, sikatayo so onla sumpa ed sikara dia ed biskeg na Katawan, tan sampotan tayo so saya a baleg a karelmeñgan.

19 Tan natan, Moroni, nangayaga ak ed impakaawat ko na sulat mo, tan siñga aburido ak no anto so gawaen tayo, no kasi matunong so iakar tayo sumpa ed saray kaagian tayo.

20 Balet inkuan mo, likud no sikara so mambabawi say Katawan ingangan to ed sika ya onla ka sumpa ed sikara.

21 Manseet ka a pabiskegen si Lehi tan si Teancum ed Katawan; ibagam ed sikara ya ag ira ontatakot, tan say Dios ilaban to ra, on, tan ontan met ed amin na saraman so ontalindeg ya ag nagiing ed saman a kawayañgan a dia ed saya say Dios impanmaliw to ra a bulos. Tan natan sampotan ko la so sulat ko ed inararok ya agik, a Moroni.