Scriptures
Alma 1


Say Libro nen Alma
Say Laki ya Anak nen Alma

Saray kasulatan nen Alma, say laki ya anak nen Alma, say inmuna tan pañgulo ya okom ed saray totoo nen Nephi, tan sikato met so atagey a sacerdote na Simbaan. Say kasulatan ed impanoley na saray okom, tan saray bakal tan baliñgaan ed limog na saray totoo. Tan ontan met say kasulatan na sakey a bakal ed baetan na saray Nephite tan saray Lamanite, unong ed kasulatan nen Alma, say inmuna tan pañgulo ya okom.

Tekap 1

Si Nehor so nambañgat na saray tila-tila a doctrina, añgiletneg na sakey a simbaan, inkabat to so kasiliban na sacerdote tan pinatey to si Gideon—Si Nehor so pinatey da makaseñgeg ed saray kasalanan to—Say kasiliban na saray sacerdote tan panamasegsegang so tinmayak ed limog na saray totoo—Saray sacerdote tinuloñgan da so inkasikara a dili, saray totoo so nanasikaso ed saray duka, tan say Simbaan so inmaliguas. Ñgalñgali 91–88 S.C.

1 Natan agawa a dia ed unaan a taon ya oley na saray okom ed saray totoo nen Nephi, nanlapu ed saya a panaon ya anga ed saray mantumbok, si ari Mosiah lapu ed sikato so linma la ed dalan na amin ed dalin, ya akibakal ed maong a pibabakal, a nankurang a maptek ed arap na Dios, ya angapo so intilak to ya insalat ed sikato; angaman ontan inletneg to so saray gangan, tan saraya so binirbir na saray totoo; dia ed onia sikara so kaukolan a mañgonor ed saray gangan a ginawa to.

2 Tan agawa a dia ed inmuna a taon ya impanoley nen Alma ed yuroñgan na panañgokoman, wala so sakey a too ya inawit da ed sikato a tutolan to, sakey a too a baleg, tan bantog ed baleg a biskeg to.

3 Tan sikato so linma ed limog na saray totoo, ya impulong to ed sikara so saman so kuan to a salita na Dios, ya impaldeg to so sumpa ed simbaan; ya imbaga to ed saray totoo a balang sakey a sacerdote tan managbañgat so nepeg a kabat na amin; tan nepeg a sikara so ag mankimey ed dili a lima da, balet sikara so nepeg a tuloñgan na saray totoo.

4 Tan sikato met so nampaneknek ed saray totoo ya amin a too a pinalsa so nilaban ed kaunoran ya agew, tan ag nakaukolan a sikara so ontakot odino ongiwgiw, balet itangwa ra so saray ulo ra tan manliket ira; lapu ed say Katawan pinalsa to so amin a too, tan dinundon to met so amin a too; tan, dia ed kasampotan, amin a too so nawalaan na andi-angaan a bilay.

5 Tan agawa ya imbañgat to so saraya a beñgatla tan dakel so saray anisia ed salita to, angan ontan la a karakel kanian ginapoan da a tuloñgan tan añgiter ira na kuarta ed sikato.

6 Tan ginapoan to so mampaatagey ed kinon na puso to, tan mansulong na ankabli a kawes, on, tan ginapoan to ya iletneg so sakey a simbaan ya ontukoy ed saray pulong to.

7 Tan agawa a legan a sikato so linma, a mampulong ed saraman so manisia ed saray salita to, nabet to so sakey a too a miembro na simbaan na Dios, on, iñgen sakey ed saray managbañgat da; tan ginapoan to so misangsañgan ed sikato, pian komon nisian to ya iarawi so saray totoo na simbaan; balet saman so too atalindegan to, a binilin to ed panamegley na saray salita na Dios.

8 Natan say ñgaran na saman a too so Gideon; tan sikato so inkana na lima na Dios ed impañgilaban to ed saray totoo nen Limhi ed inkaaripen.

9 Natan, lapu ed si Gideon atalindegan to ed panamegley na saray salita na Dios sikato so mamapasnok ed si Gideon, tan inoyus to so espada to tan ginapoan to a sigbaten. Natan lapu ed si Gideon so tinmakken la, dia ed ontan ag to atalindegan so saray waswas to, dia ed onia sikato so inatey ed panamegley na espada.

10 Tan say too ya amatey ed sikato so inala na saray totoo na simbaan, tan inawit da ed arap nen Alma, pian sikato so natutolan unong ed saray kasalanan a ginawa to.

11 Tan agawa a sikato so tinmalindeg ed arap nen Alma tan akikasi ed pañgiagel to ed inkasikato tekep na baleg a kasil na linawa.

12 Balet si Alma inkuan to ed sikato: Nengneng mo, saya so sankaunaan a panaon a say kasiliban na sacerdote so nikabat ed limog na saya a totoo. Tan nengneng mo, aliwa lambeñgat a nankasalanan ed kasiliban na sacerdote, balet kinaliktan mo ya ipasuot so saya ed panamegley na espada; tan no say kasiliban na sacerdote so nipasuot ed limog na saya a totoo paneknekan to so mamimpinsan a kaderal da.

13 Tan pinaterter mo so dala na sakey a too a matunong, on, sakey a too a nangawa na dakel a kaabigan ed limog na saya a totoo; tan no sika so iligyas mi say dala to so onsabi ed sikami onkana ed kibabales.

14 Dia ed ontan sika so natutolan a pateyen, unong ed gangan ya initer nen Mosiah ed sikayo, say sankaunoran ya ari tayo; tan saya so binirbir na saya a totoo; dia ed ontan saya a totoo nakaukolan ya ononor ed gangan.

15 Tan agawa a sikato so inala ra; tan say ñgaran to Nehor; tan sikato so iniakar da ed tuktok na sakey a pukdol na Manti, tan diman da impagawa, odino impabirbir, ed nambaetan na tawen tan say dalin, a saray imbañgat to ed saray totoo so sumlang ed salita na Dios; tan diman nanlikna na makapabaing ya ipapatey.

16 Angaman ontan, aliwa a dia so nanangaan na kitayak na kasiliban na sacerdote ed lapag na saman a dalin: lapu ed dakel so saray añgaro ed saray beñgatla a minomundo, tan sikara so linma a nampulong na saray aliwa a tua a doctrina; tan saya so ginawa ra makaseñgeg ed kayamanan tan dayew.

17 Angaman ontan, sikara so ag mantila, no wala so mikabat, lapu ed takot da ed gangan, lapu ed saray managtila so nadusa; dia ed ontan sikara so nankonkonwari a mampupulong unong ed pananisia ra; tan natan say gangan angapo so pakapanyari to ed sakey a too makaseñgeg ed pananisia to.

18 Tan sikara so ag mantakew, lapu ed takot da ed gangan, tan nadusa so onia ra; ni say sikara so mantulisan, odino mamatey, tan siopaman a mamatey nadusa na patey.

19 Balet agawa a siopaman ya aliwa a miembro na simbaan na Dios ginapoan da a pasegsegañgen so saray miembro na simbaan na Dios, tan inala ra ed inkasikara so ñgaran nen Cristo.

20 On, sikara so pinasegsegang da, tan sikara so impanlikna ra na amin a nengneng na salita, tan saya lapu ed panagpaabeba ra; lapu ed sikara so aliwa a mankinon ed saray dili a mata ra, tan lapu ed sikara so añgibañgat ed saray salita na Dios, ed sakey tan sakey, ya angapo so kuarta tan angapo so bili to.

21 Natan wala so mapeget a gangan ed limog na saray totoo na simbaan, ya angapo so siopaman a too, a miembro na simbaan, so ontalindeg tan mamasegsegang ed saray aliwa a miembro na simbaan, tan angapo so panagpasegsegang ed limog na inkasikara.

22 Angaman ontan, wala so dakel ed limog da a ginmapo a mankinon, tan ginapoan da so misangsañgan ed saray kabusol da; iñgen anga ed pankakabilan; on, nankakabilan so balang sakey ed panamegley na saray poniti ra.

23 Natan saya so komadua a taon ed oley nen Alma, tan saya so señgegan na baleg ya irap ed simbaan; on, saya so señgegan na dakel a subok dia ed simbaan.

24 Tan say puso na karaklan so inmawet, tan saray ñgaran da so naekal, pian sikara so ag la nodnunoten ed limog na saray totoo na Dios. Tan ontan met dakel so inekal da so inkasikara a dili ed limog da.

25 Natan saya so baleg a subok ed saray ag nagiing so pananisia ra; angaman ontan, sikara so malet tan ag nagiing ed pañgoonor da ed saray gangan na Dios, tan inako ra tekep na anos so saray panamasegsegang a nibunton ed sikara.

26 Tan sanen saray sacerdote so tinmonda ed saray kimey da pian mampulong ira na salita na Dios ed saray totoo, saray totoo tinaynan da met so saray kimey da pian ondeñgel ed salita na Dios. Tan sanen say sacerdote ayari to la ya imbaga ed sikara so salita na Dios sikara ya amin so pinmawil lamet a siseseet ed saray kimey da; tan say sacerdote, ag to pablien so inkasikato nen saray domereñgel to, lapu ed say managpulong aliwa a magmaong nen saray domereñgel to, ni say managbañgat aliwa a magmaong nen say babañgatan; kanian dia ed onia sikara so nampapara, tan sikara ya amin so nankimey, balang sakey a too unong ed biskeg to.

27 Tan sikara so añgiter ed saray pambibilay da, balang sakey a too unong ed saman so wala ed sikato, dia ed saray duka, tan saray mankakaukolan, tan saray mansasakit, tan asakitan; tan ag ira nansusulong na saray ankabli a kawes, balet sikara so malinis tan marakep a nengneñgen.

28 Tan dia ed onia inletneg da so kurang na simbaan; tan dia ed onia ginmapo so nampatuloy a kareenan lamet, manwari ed amin a kasegsegañgan da.

29 Tan natan, lapu ed ag añguman so simbaan sikara so ginmapo ya onyaman a maong, a wala ed sikara so daakan a beñgatla ed antokaman a nakaukolan da—daakan a karnero tan baka, tan mataba a kilaw ed amin a nengneng, tan ontan met ed daakan a bokel na dawa, tan balitok, tan pilak, tan saray ankabli a beñgatla, tan daakan a seda tan abel a lienso, tan amin a nengneng na maong ya abel a makana ed abong.

30 Tan dia ed onia, dia ed maaliguas a kipapasen da, ag da pinataynan so siopaman ed saray alakseban, odino saray narasan, odino saray napgaan, odino saray mansasakit, odino saray kulang ed panañgan; tan ag da inteen so saray puso ra ed kayamanan; dia ed ontan sikara so mabunlok ed amin; mandapag a matakken tan malangwer, mandapag ya aripen tan bulos, mandapag a laki tan bii, angano wala ed paway odino saray wala ed loob na simbaan, lapu ed ag ira onnenengneng ed inkatoo na saray mankaukolan.

31 Tan dia ed onia sikara so inmaliguas tan nanmaliw a mayaman nen saray aliwa a miembro na simbaan da.

32 Lapu ed saray aliwa a miembro na simbaan da inagamil da ed inkasikara so mauges a pakapanyari, tan panaglingkor ed talintao odino panagmeneng, tan inkatalabitab, tan paniimonan tan pambobusolan; panagsulong na ankabli a kawes; a sikara so nitanduro ed kinon ed saray dili a mata ra; panagpasegsegang, panagtila, panagtakew, panagtulisan, panaggawa na inkabalangkantis, tan panagpatey, tan amin a nengneng na karelmeñgan; angaman ontan, say gangan so nikana ed amin a nankasalanan ed saya, ed angaan na pakayari.

33 Tan agawa a dia ed onia ya impañgikana na gangan ed sikara, balang sakey a too so manlikna unong ed ginawa to, sikara so nanmaliw a mareen, tan ag ira mangawa na karelmeñgan no saya so wala so makapikabat; dia ed onia, wala so baleg a kareenan ed limog na saray totoo nen Nephi anga ed komalima a taon na oley na saray okom.