Scriptures
Alma 47


Tekap 47

Si Amalickiah inagamil to so malames a gawa, panagpatey, tan silib pian sikato so manmaliw ya ari na saray Lamanite—Saray sinmisian a Nephite so lalo a mauges tan masibeg nen saray Lamanite. Ñgalñgali 72 S.C.

1 Natan pawilen tayo so kasulatan nipaakar ed si Amalickiah tan saraman so binmatik ya akila ed sikato ed kalawakan; tan, nia, inawit to so saraman so akiabubon ed sikato, tan linma ra ed dalin na Nephi ed limog na saray Lamanite, tan pinagalaw to so saray Lamanite a mampasnok sumpa ed saray totoo nen Nephi, lapu ed saya say ari na saray Lamanite so añgipaakseb na palapag ed amin a nasasakopan to a dalin, ed limog na amin a totoo to, a sikara so mantitipon lamet a mibakal sumpa ed saray Nephite.

2 Tan agawa a sanen say palapag so akasabi ed limog da sikara so tinmakot a mapalalo; on, antakot da a pabaiñgan so ari, tan sikara met so antakot a mibakal sumpa ed saray Nephite ag la piga nabalang da so bilay da. Tan agawa ya ag ira inmabuloy, odino say karaklan ed sikara ag da labay, so ontolok ed saray gangan na ari.

3 Tan natan agawa a say ari so sinmanok lapu ed ag ira ontolok; dia ed ontan initer to ed si Amalickiah so sankaatageyan ya oley ed kabiañgan na ñgayew to a matolok ed saray gangan to, tan sikato so ingangan to ya onla a mamasoot ed sikara a mañgala na saray ayura ra.

4 Natan nia, saya so pilalek nen Amalickiah; lapu ed sikato so sakey a too a masilib ed panaggawa na mauges dia ed ontan inlira to so plano ed puso to ya ekalen to ed trono so ari na saray Lamanite.

5 Tan naala to so oley ed saraman so pakapanyari ed kabiañgan na ñgayew na saray Lamanite ya onkikiling ed ari; tan inanap to a naala so maong a linawa na saray aliwa a matolok; dia ed ontan sikato so linma ed pasen a tatawagen na Onidah, lapu ed diman so binatikan na amin a Lamanite; lapu ed asukayan da so ñgayew ya onsasabi, tan, lapu ed impasen da a sikara so deralen da, dia ed ontan sikara so binmatik ed Onidah, a diman so kawalaan na saray ayura.

6 Tan tinuro ra so sakey a too a sikato so manmaliw ya ari tan pañgulo ed sikara, lapu ed niapasakey la ed nunot da a katekep to so mabiskeg a gagala ya ag ira paoleyan ya onla sumpa ed saray Nephite.

7 Tan agawa a nantitipon ira ed sikara a dili ed tuktok na pukdol a say ñgaran to Antipas, a sakey a paraan ed pibakal da.

8 Natan aliwa a gagala nen Amalickiah so mibakal ed sikara unong ed gangan na ari; balet nia, say gagala to so say pakaala to na maong a linawa na saray ñgayew na Lamanite, pian ipasen to so inkasikato a pañgulo ra tan ekalen to ed trono so ari tan kayarianen to so panarian.

9 Tan nia, agawa ya ingangan to so ñgayew to ya ipaalagey da so abong-abong da ya abel ed sakey a patar ya asinger ed pukdol na Antipas.

10 Tan agawa a sanen labi la añgibaki na sakey a maamot a mañgilaman ed sikato ya onla ed pukdol na Antipas, tan pilalek to a say pañgulo na saray wala diman ed pukdol, a say ñgaran to Lehonti, so onlasur ed señgeg na pukdol, lapu ed pilalek to a pitungtoñgan.

11 Tan agawa a sanen naawat nen Lehonti so pakabat ag to labay so onlasur ed señgeg na pukdol. Tan agawa a si Amalickiah añgibaki lamet na komadua, a pilalek to a sikato so onlasur. Tan agawa si Lehonti ag to lamet; tan sikato so añgibaki lamet na komatlo.

12 Tan agawa a sanen si Amalickiah nalmoan to ya ag to napalasur si Lehonti manlapu ed pukdol, sikato so linma a sinmegep ed pukdol ya asinger ed campo nen Lehonti; tan sikato lamet so añgibaki ed si Lehonti na komapat a pakabat to, a pilalek to a sikato so onlasur a kaiba to so saray bantay to.

13 Tan agawa a sanen si Lehonti so linmasur a kaiba to so saray bantay to ya onla ed si Amalickiah, si Amalickiah nampilalekan to a si Lehonti so onlasur a kaiba to so ñgayew to ed labi, tan liktoben da so saraman so totoo a wala ed campo ra ya initer na ari ya ipañgulo to, tan sikara so iawat to ed lima nen Lehonti, dapot no sikato so gawaen to (Amalickiah) a komadua a pañgulo ed amin a ñgayew.

14 Tan agawa a si Lehonti so linmasur kaiba to so saray totoo to tan niliktob da so saray totoo nen Amalickiah, kanian sakbay na imbañgon da ed palbañgon na saman ya agew sikara so aliktob la na saray ñgayew nen Lehonti.

15 Tan agawa sanen anengneng da a sikara so aliktob, akikasi ra ed si Amalickiah a sikara so miolop ed saray kaagian da, pian ag ira naderal. Natan saya a beñgatla so pilalek nen Amalickiah.

16 Tan agawa ya iniawat to so saray totoo to, sumpa ed gangan na ari. Natan saya a beñgatla so pilalek nen Amalickiah, pian nasumpal to so gagala to ya ekalen ed trono so ari.

17 Natan saya so kaugalian ed limog na saray Lamanite, no say sankaatageyan a pañgulo so apatey, turoen da so komadua a pañgulo a manmaliw a sankaatageyan a pañgulo.

18 Tan agawa a si Amalickiah ingangan to so sakey ed saray igagangan a kalkalnaan to a samalan si Lehonti, kanian sikato so inatey.

19 Natan, sanen inatey si Lehonti, saray Lamanite tinuro ra si Amalickiah a pañgulo ra tan sikato so sankaatageyan a manañgoley ed sikara.

20 Tan agawa a si Amalickiah inkurang to so saray ñgayew to (lapu ed agamoran to la so pilalek to) ya onarap ed dalin na Nephi, ed ciudad na Nephi, a saya so manunaan a ciudad.

21 Tan say ari so pinmaway ya inmabet a kaolop to so saray bantay to, tan impasen to a sinumpal nen Amalickiah so saray gangan to, tan si Amalickiah so akatipon na baleg a ñgayew ya onla a mibakal sumpa ed saray Nephite.

22 Balet nia, sanen say ari so linma ya inmabet ed sikato ingangan nen Amalickiah ed saray igagangan to a sikara so onabet met ed ari. Tan sikara so linma tan sikara so yinmuko ed arap na ari, a siñga mañgigalang ed sikato lapu ed pakapanyari to.

23 Tan agawa a say ari iniunat to so lima to pian ipaalagey to ra, unong ed kaugalian na saray Lamanite, a pakapatnagan na kareenan, a saya a kaugalian so nanlapu ed saray Nephite.

24 Tan agawa a sanen iyalagey to la so unaan manlapu ed dalin, nia sinaksak to so ari ed puso; tan sikato so niparukol ed dalin.

25 Natan saray igagangan na ari so binmatik; tan saray igagangan nen Amalickiah so inmeyag, a nankuan:

26 Nengneng yo, saray igagangan na ari sinaksak da so ari ed puso, tan sikato so niparukol tan sikara so binmatik la; nia, dago kayo tan nengneng yo.

27 Tan agawa a si Amalickiah ingangan to so ñgayew to ya ondago tan nengneñgen da no anto so agawa ed ari; tan sanen sikara so sinmabi ed pasen, tan anengneng da so ari ya akarukol ed dala to a dili, si Amalickiah so nankonkonwari a mamapasnok, tan inkuan to: Siopaman a manañgaro ed ari, sikato so onla, tan osilan to so saray igagangan to pian sikara so pateyen.

28 Tan agawa ya amin a manañgaro ed ari, sanen nadñgel da so saraya a salita, sikara so linma tan añgosil ed saray igagangan na ari.

29 Natan sanen saray igagangan na ari anengneng da so ñgayew ya onoosil ed sikara, sikara so ataktakot lamet, tan binmatik ira ed kalawakan, tan akasabi ra ed dalin na Zarahemla tan akitipon ira ed saray totoo nen Ammon.

30 Tan say ñgayew ya añgosil ed sikara so amawil la ra, lapu ed say impañgosil da angapo so kakanaan to; tan dia ed onia si Amalickiah, dia ed panagluko to, agamoran to so puso na saray totoo.

31 Tan agawa dia ed kaimbuasan sikato so linmoob ed ciudad na Nephi a kaiba to so saray ñgayew to, tan kinayarian to so ciudad.

32 Tan natan agawa a say reyna, nen nadñgelan to a pinatey da so ari—lapu ed si Amalickiah so añgibaki na too ed reyna ya añgipakabat a say ari so pinatey na saray dili ya igagangan to, a sikara so impaosilan to a kaiba so ñgayew to, balet saya so andi-kana, tan sikara so akabatik—

33 Dia ed ontan, sanen say reyna naawat to so saya a balita sikato so nampabaki ed si Amalickiah, a pilalek to ya ag to lalanoren so saray totoo ed ciudad; tan pilalek to met a si Amalickiah so onla ed sikato; tan pilalek to met ed sikato ya awiten to so saray tasi a mamaneknek nipaakar ed impatey na ari.

34 Tan agawa ya inawit nen Amalickiah so saman met lamlamang ya igagangan ya amatey ed ari, tan amin a kaolop, tan linma ra ed reyna, ed pasen a panyodyuroñgan to; tan sikara ya amin so amaneknek ed sikato a say ari so pinatey na saray dili ya igagangan to; tan inkuan da met: Sikara so binmatik; aliwa kasi a saya so mamaneknek sumpa ed sikara? Tan dia ed onia apenek da so reyna nipaakar ed impatey na ari.

35 Tan agawa a si Amalickiah nampilalekan to a naala so maong a linawa na reyna, tan sikato so inasawa to; tan dia ed onia a panagluko to, tan dia ed tulong na silib na saray igagangan to, agamoran to so panarian; on, sikato so binirbir da ya ari ed amin a lapag na saman a dalin, ed limog na amin a totoo na Lamanite, a saraya so nanlalaok a Lamanite tan Lemuelite tan Ishmaelite, tan amin a sinmisian a Nephite, manlapu ed impanoley nen Nephi anga ed saya a panaon.

36 Natan, saraya a sinmisian, lapu ed sikara so awalaan na nampapara ya inkabañgat tan pikakabat a siñga saray Nephite, on, lapu ed sikara so abilin ed saman lamlamang a kakabatan ed Katawan, angaman ontan, makapakelaw a tungtoñgen, ya ag abayag ed insian da sikara so nanmaliw a lalo ya anawet tan ag ira mambabawi, tan alablabas ed inkaatap, marelmeng tan masibeg nen saray Lamanite—ya oniinom ira ed saray sisia a tawir na saray Lamanite; tan niiter so dalan ed inkañgiras, tan amin a kanengneñgan na alak na laman; on, naspot so impañgilingwan da ed Katawan a Dios da.