1 Tan natan agawa a saray lalaki ya anak nen Alma so linma ed limog na saray totoo, pian ibawag da so salita ed sikara. Tan si Alma, met, dia ed sikato a dili, ag makareen, tan sikato met so linma.

2 Natan ag tayo la dia saglawien so nipaakar ed impampulong da, likud ed impulong da so salita, tan katuaan, unong ed espiritu na profesiya tan puyan; tan sikara so nampulong unong ed masanto a gangan na Dios a saya so akatawagan da.

3 Tan natan pawilen ko so pañgidalatdat ed saray bakal ed baetan na saray Nephite tan saray Lamanite, ed komalabinwalo a taon ya oley na saray okom.

4 Tan nia, agawa a saray Zoramite nanmaliw ira a Lamanite; dia ed ontan, dia ed ingapo na komalabinwalo a taon saray totoo a Nephite anengneng da a saray Lamanite so ompegdat ed sikara; dia ed ontan nangawa ra na paraan onkana ed bakal; on, tinipon da so saray ñgayew da ed dalin na Jershon.

5 Tan agawa a saray Lamanite so pinmegdat a kaolop da so saray nilibo ra; tan linma ra ed dalin na Antionum, a saya so dalin na saray Zoramite; tan sakey a too a say ñgaran to Zerahemnah so pañgulo ra.

6 Tan natan, lapu ed saray Amalekite so lalo a marelmeng tan awalaan ira na managpatey ya inkaugali nen saray Lamanite, dia ed sikara a dili tan inkasikara, dia ed ontan, si Zerahemnah anuro na saray pañgulo a kapitan ed saray Lamanite, tan sikara ya amin so Amalekite tan Zoramite.

7 Natan saya so ginawa to pian napagnayon to so busol da ed saray Nephite, pian sikara so nasakop to ra ya oleyan pian nasumpal so saray gagala to.

8 Tan nia, saray gagala to so pagalawen so saray Lamanite a mampasnok sumpa ed saray Nephite; saya so ginawa to pian nasamsam to so baleg a pakapanyari ed sikara, tan ontan met pian naala to so pakapanyari a mañgoley ed saray Nephite ed panamegley na pañgawit to ed sikara ed inkaaripen.

9 Tan say gagala na saray Nephite so say pañgiagel da ed saray dalin da, tan saray kaaboñgan da, tan saray kaasawaan da, tan saray anak da, pian sikara so niagel da ed lima na saray kabusol da; tan ontan met napagnayon da so saray katunoñgan da tan pankanawnawa ra, on, tan ontan met ed say kawayañgan da, pian makapañgigalang ira ed Dios unong ed pilalek da.

10 Lapu ed kabat da a no sikara so napelag ed lima na saray Lamanite, a siopaman a mañgigalang ed Dios ed espiritu tan dia ed katuaan, say tua tan mabilay a Dios, so deralen na saray Lamanite.

11 On, tan kabat da met so alablabas a busol na saray Lamanite ed saray kaagian da, a sikara so totoo na Anti-Nephi-Lehi, a sikara so atawag a totoo nen Ammon—tan ag da labay a demeten so saray ayura ra, on, sikara so linmoob ed sakey a paknaan tan saya so ag da labay a deralen—dia ed ontan, no sikara so napelag ed lima na saray Lamanite sikara so naderal.

12 Tan saray Nephite ag da nitepel a sikara so naderal; dia ed ontan niiter ed sikara so saray dalin ya onkana a tawir da.

13 Tan saray totoo nen Ammon initer da ed saray Nephite so baleg a kabiañgan na tagano ra ya onkana ed saray ñgayew da; tan dia ed onia saray Nephite so apasuotan, a bukor, ya ontalindeg sumpa ed saray Lamanite, a sikara so tinipon nen Laman tan si Lemuel, tan saray anak nen Ishmael, tan amin na saraman so sinmian a nanlapu ed saray Nephite; a sikara so saray Amalekite tan saray Zoramite tan saray kapolian na saray sacerdote nen Noah.

14 Natan saraman a kapolian agay la so kinarakel da, ñgalñgali, siñga saray Nephite; tan dia ed onia saray Nephite so apasuotan a milaban ed saray kaagian da, angan dia ed pamaterter na dala.

15 Tan agawa a legan a saray ñgayew na Lamanite so mantitipon ed dalin na Antionum, nia, saray ñgayew na Nephite so akaparaan ya onabet ed sikara dia ed dalin na Jershon.

16 Natan, say pañgulo na saray Nephite, odino say too ya aturo a pañgulo a kapitan ed saray Nephite—natan say pañgulo a kapitan so mambemben na sankaatageyan a pakapanyari ed amin a ñgayew na Nephite—tan say ñgaran to Moroni;

17 Tan si Moroni binembenan to so sankaatageyan a pakapanyari, tan say pakaoley ed saray bakal da. Tan sikato so mantaon labat na duamplo tan lima nen sikato so aturo a pañgulo a kapitan ed saray ñgayew na Nephite.

18 Tan agawa ya inabet to so saray Lamanite ed saray ketegan na Jershon, tan saray totoo to so inayuraan to na espada, tan melag a wasay, tan amin a nengneng ya agamil ed bakal.

19 Tan sanen saray ñgayew na Lamanite anengneng da so saray totoo nen Nephi, odino nen Moroni, ya imparaan to so saray totoo to a nansulong na salimbeng ed pagew tan salimbeng ed taklay, on, tan ontan met ed salimbeng a mañgiagel ed saray ulo ra, tan ontan met nansulong ira na makakapal a kawes—

20 Natan saray ñgayew nen Zerahemnah so ag akaparaan ed onia ra a beñgatla; say wala labat ed sikara so espada tan melag a wasay, saray pabekang da, tan saray pana ra, tan saray bato ra tan saray palsot da; tan sikara so lakseb, likud labat ed sakey a katat a niberber ed saray awak da; on, sikara ya amin so lakseb, likud ed saray Zoramite tan Amalekite.

21 Balet ag ira awalaan na salimbeng ed pagew, ni salimbeng—dia ed ontan, sikara so ataktakot a maong ed saray ñgayew na Nephite lapu ed saray kirlong da, manwari ya ontan a say bilang da so amayamay nen saray Nephite.

22 Nia, natan agawa ya ag da nitepel so onla sumpa ed saray Nephite ed saray ketegan na Jershon; dia ed ontan sikara so tinmaynan a pinmaway ed dalin na Antionum ya amaarap ed kalawakan, tan sinmaliberber ira ed kalawakan, paarawi diman ed señgeg na ilog na Sidon, pian sikara so onla ed dalin na Manti tan kayarianen da so dalin; lapu ed ag da impasen a saray ñgayew nen Moroni ag da kabat no iner so nila ra.

23 Balet agawa, dia ed bekta a tinmaynan ira ya amaarap ed kalawakan si Moroni so añgibaki na saray espiya ed kalawakan pian siimen da so campo ra; tan si Moroni, met, dia ed pikakabat to ed saray profesiya nen Alma, so añgibaki na pigara a lalaki ed sikato, pian kerewen da a tepeten to ed Katawan no iner kasi so laen na saray ñgayew na Nephite a mañgiagel ed inkasikara sumpa ed saray Lamanite.

24 Tan agawa a say salita na Katawan so sinmabi ed si Alma, tan si Alma impakabat to ed saray igagangan nen Moroni, a saray ñgayew na Lamanite so mankokurang ya onsasaliberber ed kalawakan, pian sikara so makasabi ed dalin na Manti, pian igapo ra so laban ed saray makapoy a kabiañgan na saray totoo. Tan saraman ya igagangan linma ra tan initer da so saya a balita ed si Moroni.

25 Natan si Moroni, añgitilak na kabiañgan na ñgayew to ed dalin na Jershon, ag la piga dia ed antokaman a pamaakaran say kabiañgan na saray Lamanite so onla ed saman a dalin tan kayarianen da so ciudad, inala to so nakekeraan a kabiañgan na ñgayew to tan sikara so kinmurang a linma ed dalin na Manti.

26 Tan ingangan to so saray totoo ed saman a pasen na dalin so mantitipon ed sikara a dili a mibakal sumpa ed saray Lamanite, pian iagel da so saray dalin da tan say bansa ra, saray katunoñgan da tan kawayañgan da; dia ed ontan sikara so akaparaan ed panaon ya isabi na saray Lamanite.

27 Tan agawa a si Moroni insanib to so saray ñgayew to ed patar a saya so asinger ed pandel na ilog na Sidon, a wala ed sagur na ilog na Sidon dia ed kalawakan.

28 Tan si Moroni so añgipasen na saray espiya ed kaliber-liber, pian nakabatan to no kapigan so isabi na campo na saray Lamanite.

29 Tan natan, lapu ed kabat nen Moroni so gagala na saray Lamanite, a say gagala ra so deralen da so saray kaagian da, odino sikara so oleyan da tan awiten da ra ed inkaaripen pian iletneg da so sakey a panarian onkana ed inkasikara ed amin a lapag na dalin;

30 Tan lapu ed pikakabat to a say alenleneg a pilalek na saray Nephite so say pañgiagel da ed saray dalin da, tan say kawayañgan da, tan say simbaan da, dia ed ontan anunotan to ya aliwa a kasalanan so pañgiagel to ed sikara ed panamegley na silib; dia ed ontan, akabatan to ed panamegley na saray espiya to no dinan a pasen so dalanen na saray Lamanite.

31 Dia ed ontan, inapag to so saray ñgayew to tan iniakar to so sakey a kabiañgan to nia ed patar, tan iniamot to ra ed bokig, tan dia ed abalaten na pukdol na Riplah;

32 Tan say nakdaan so iniamot to ed sagur a patar, dia ed sagur na ilog na Sidon, tan mampaleksab ed ketegan na dalin na Manti.

33 Tan dia ed onia kayari to ya inlira so saray ñgayew to unong ed pilalek to, sikato so akaparaan ya onabet ed sikara.

34 Tan agawa a saray Lamanite so sinmabi ed baybay na pukdol, a diman so kawalaan na kabiañgan na saray ñgayew nen Moroni ya akaamot.

35 Tan sanen saray Lamanite so linmabas ed pukdol Riplah, tan arapat da so patar, tan ginapoan da a baliwen so ilog na Sidon, say ñgayew ya akaamot ed abalaten na pukdol, ya ipapañgulo na sakey a too a say ñgaran to Lehi, tan impañgulo to so ñgayew to tan niliktob da so saray Lamanite ed nibukig a beneg da.

36 Tan agawa a saray Lamanite, sanen anengneng da so saray Nephite ya onsasabi ed banda ed beneg da, sikara so pinmoliktar tan ginapoan da so milaban ed saray ñgayew nen Lehi.

37 Tan say kimey na patey so ginmapo ed nantupag a dapag, balet lalo a makapataktakot so agawa ed biang na saray Lamanite, lapu ed say inkalakseb da mapalaway so laman da ed saray ambebelat a sigbat na saray Nephite ed panamegley na saray espada da tan saray melag a wasay da, a saya so añgawit na patey so balang sakey a sigbat ed sikara.

38 Legan a dia ed biek a dapag, wala natan tan dia ed saman so sakey a too ya apatey da ed limog na saray Nephite, ed panamegley na saray espada da tan say interter na dala, lapu ed asalimbeñgan so saray makana a kabiañgan na laman da, odino saray makana a kabiañgan na laman so asalimbeñgan sumpa ed sigbat na saray Lamanite, makaseñgeg ed salimbeng da ed pagew, tan salimbeng da ed taklay, tan salimbeng da ed ulo; tan dia ed onia saray Nephite intuloy da so kimey na panagpatey ed limog na saray Lamanite.

39 Tan agawa a saray Lamanite so tinmakot, lapu ed kinabaleg na deral ed limog da, ya anga ed ginapoan da so ombatik ya amaarap ed ilog na Sidon.

40 Tan sikara so inosilan nen Lehi tan saray totoo to; tan sikara so sinunson nen Lehi ed danum na Sidon, tan binaliw da so danum na Sidon. Tan si Lehi impanayam to so saray ñgayew to ed pandel na ilog na Sidon pian ag ira ombaliw.

41 Tan agawa a si Moroni tan say ñgayew to inabet da so saray Lamanite ed patar, dia ed biek a pandel na ilog na Sidon, tan ginapoan da ra a dugpaan tan pateyen.

42 Tan saray Lamanite so binmatik ira lamet ed arapan da ya amaarap ed dalin na Manti; tan sikara so inabet lamet na saray ñgayew nen Moroni.

43 Natan dia ed saya a kipapasen saray Lamanite so akilaban a maong; on, angapo ni so akabkabatan ya impibakal na saray Lamanite ed onia a mapalalo a biskeg tan kasil na linawa, andi, angan nanlapu ed gapo.

44 Tan sikara so pinabiskeg na saray Zoramite tan saray Amalekite, a sikara so manunaan a kapitan da tan pañgulo ra, tan si Zerahemnah, a sikato so manunaan a kapitan da, odino say manunaan pañgulo ra tan sankaatageyan a manañgoley da; on, sikara so akilaban a siñga dragon, tan dakel ed saray Nephite so inatey ed saray lima da, on, lapu ed dakel so saray sinisigbat da ya apisag so saray salimbeng da ed ulo, tan dakel so dinoyok da ed saray salimbeng na pagew da, tan dakel so saray sinisigbat da ed saray taklay da; tan dia ed onia saray Lamanite so nansigbat ed masebeg a pasnok da.

45 Manwari ya ontan, saray Nephite so apabiskeg na magmaong a pamaakaran, lapu ed ag ira milalaban onkana ed panari odino pakapanyari balet sikara so milalaban onkana ed saray kaaboñgan da tan kawayañgan da, saray kaasawaan da tan saray anak da, tan amin a wala ed sikara, on, onkana ed saray pamaakaran na panagpikasi ra tan say simbaan da.

46 Tan gagawaen da so saman so wala ed liknaan da a saya so kaukolan da a sumpalen ed Dios da; lapu ed say Katawan inkuan to ed sikara, tan ontan met ed kaamaan da, ya: Unong a sikayo so ag nankasalanan na unaan ya impankasalanan, ni say dia ed komadua, ag yo itetepel ed inkasikayo a sikayo so ompatey ed silong na lima na saray kabusol yo.

47 Tan lamet, say Katawan inkuan to a: Nepeg yo ya iagel so boleg yo ya angan makaseñgeg na iterter na dala. Dia ed ontan lapu ed saya a pamaakaran saray Nephite so akilaban ed saray Lamanite, pian iagel da so inkasikara, tan ontan met ed saray boleg da, tan saray dalin da, say bansa ra, tan saray pankatunoñgan da, tan say relihion da.

48 Tan agawa a sanen saray totoo nen Moroni anengneng da so sebeg tan pasnok na saray Lamanite, sikara so ñgalñgali la onkebet tan ombatik ya onarawi ed sikara. Tan si Moroni, dia ed impakatebek to ed getma ra, so añgibaki tan pinabiskeg to so puso ra ed saraya a kanunotan—on, say kanunotan ed saray dalin da, say kawayañgan da, on, say inkabulos da ed inkaaripen.

49 Tan agawa a sikara so pinmoliktar ed saray Lamanite, tan sikara so tinmawag ed saksakey a voces ed Katawan a Dios da, onkana ed say kawayañgan da tan say inkabulos da ed inkaaripen.

50 Tan ginapoan da so ontalindeg sumpa ed saray Lamanite a tekep so pakapanyari; tan dia ed saman met lamlamang a bekta a sikara so tinmawag ed Katawan ya onkana ed kawayañgan da, saray Lamanite ginapoan da so ombatik ed arapan da; tan sikara so binmatik anga ed saray danum na Sidon.

51 Natan, saray Lamanite dakerakel so bilang da, on, masulok a mamiddua nen saray Nephite; manwari ya ontan, sikara so asunson kanian sikara so atipon a nankakasakey ed patar, a wala ed pandel na ilog na Sidon.

52 Dia ed ontan saray ñgayew nen Moroni so linmiktob ed sikara, on, angan dia ed nantupag a pandel na ilog, tan nia, dia ed bokig wala diman so saray totoo nen Lehi.

53 Dia ed ontan sanen anengneng nen Zerahemnah so saray totoo nen Lehi a wala ed bokig na ilog na Sidon, tan saray ñgayew nen Moroni ed sagur na ilog na Sidon, a sikara so aliktob na saray Nephite, sikara so asabian na mapalalo a takot.

54 Natan si Moroni, sanen anengneng to so mapalalo a takot da, ingangan to ed saray totoo to ya itonda da la so mañgipaterter na dala.