1 Tan agawa a saray Nephite ya ag apatey ed saray agamil na bakal, kayari ra ya intabon so saraman so inaatey—natan say bilang na saray inaatey so ag da la binilang, lapu ed kinarakel na bilang da—kayari ra ya intabon so saray inaatey da pinmawil la ra ya amin ed saray dalin da, tan dia ed saray abong da, tan saray kaasawaan ra, tan saray anak da.

2 Natan dakel a bibii tan ugogaw so inatey ed panamegley na espada, tan ontan met dakel ed saray karnero ra tan baka ra; tan ontan met dakel ed saray kaalugan da a tataneman na dawa so aderal, lapu ed ginatin-gatinan na saray olop na ñgayew.

3 Tan natan no kaonoñgan so karakel na saray Lamanite tan saray Amlicite so apatey da ed pandel na ilog na Sidon so imbabantak da ed danum na Sidon; tan nia saray pokel da so wala ed kaaraleman na dayat, tan sikara so amayamay.

4 Tan saray Amlicite nabirbir ira ed saray Nephite, lapu ed tinandaan da so inkasikara a dili na ambalañga ed saray muling da a siñga unong ed nengneng na saray Lamanite; angaman ontan ag da pinoklisan so ulo ra a siñga ed saray Lamanite.

5 Natan say ulo na saray Lamanite so pinoklisan; tan sikara so lakseb, likud ed katat a nibalkes ed saray awak da, tan ontan met ed kirlong da, a saraya so nibalkes ed laman da, tan saray pabekang da, tan saray pana ra, tan saray bato ra, tan saray palsot da, tan saray arum ni.

6 Tan say baog na saray Lamanite so magket, unong ed tanda a niiter ed saray ama ra, a saya so ayew ed sikara lapu ed kasalanan da tan impanalsa ra sumpa ed saray agagi ra, a sikara di Nephi, Jacob, tan Joseph, tan Sam, a sikara so matunong tan masanto a totoo.

7 Tan saray agagi ra so nampilalek a pateyen da ra, dia ed ontan sikara so naayew; tan say Katawan a Dios so añgiyan na tanda ed sikara, on, dia ed sikara di Laman tan Lemuel, tan ontan met ed saray lalaki ya anak nen Ishmael, tan saray Ismaelitish a bibii.

8 Tan saya so agawa pian saray boleg da so nibiig ed saray boleg na saray agagi ra, pian dia ed onia say Katawan a Dios iagel to so saray totoo to, pian ag ira onlaok tan manisia ed aliwa a tua ya abañgonan a saya so mamaneknek ed kaderal da.

9 Tan agawa a siopaman a mañgilaok na boleg to ed saray boleg na Lamanite so naawit met ed saya ya ayew ed boleg to.

10 Dia ed ontan, siopaman a paulyan to a sikato ya iarawi na saray Lamanite so natawag ed saman a paulo, tan wala so tanda a niiter ed sikato.

11 Tan agawa a siopaman ya ag manisia ed saray abañgonan na saray Lamanite, balet manisia ed saray kasulatan ya inawit ya impaway ed dalin na Jerusalem, tan ontan met ed saray abañgonan da ed saray ama ra, a saraya so duga, a manisia ed saray gangan na Dios tan sikara so onoonor ed saraya, so atawag a saray Nephite, odino totoo nen Nephi, manlapu ed saman a panaon—

12 Tan sikara so saraman so añgisinop ed saray kasulatan a saraya so tua nipaakar ed saray totoo ra, tan ontan met ed saray totoo a Lamanite.

13 Natan ompawil itayo lamet ed saray Amlicite, lapu ed wala met so tanda a niiter ed sikara; on, sikara so añgiter na tanda ed inkasikara a dili, on, iñgen tanda ya ambalañga ed saray muling da.

14 Dia ed onia say salita na Dios so asumpal, tan saraya so salita ya inkuan to ed si Nephi: Nia, saray Lamanite so inayew ko, tan añgiyan ak na sakey a tanda ed sikara pian sikara tan saray boleg da so nibiig ed sika tan saray boleg mo, manlapu ed saya a panaon ya anga ed arapen tan anga ed anga, likud no sikara so mambabawi ed saray karelmeñgan da tan ompawil ira ed siak pian nawalaan ak na abagey ed sikara.

15 Tan lamet: mañgiyan ak na tanda ed saraman so ilaok da so boleg da ed saray agagim, pian sikara so naayew met.

16 Tan lamet: mañgiyan ak na tanda ed saray onlaban sumpa ed sika tan saray boleg mo.

17 Tan lamet, ikuan ko a saman so onsian ed sika ag la natawag a boleg mo; tan sika so bendicionan ko, tan siopaman a natawag a boleg mo, manlapu ed natan tan anga ed anga; tan saraya so sipan na Katawan ed si Nephi tan dia ed say boleg to.

18 Natan saray Amlicite ag da amta a susumpalen da so saray salita na Dios nen ginapoan da a tandaan da so inkasikara ed saray muling da; angaman ontan sikara so mapalaway a sinmumpa ed Dios; dia ed ontan nakaukolan a say ayew so ondapo ed sikara.

19 Natan labay ko a nanengneng yo a sikara so añgawit na dili ya ayew da; tan angan say balang sakey a too a naayew awiten to ed sikato a dili so kadodusa to.

20 Natan agawa ag linmabas so dakel ya agew kayari na bakal ya agawa ed dalin na Zarahemla, na saray Lamanite tan saray Amlicite, wala lamet so sananey a ñgayew na saray Lamanite a linma ed saray totoo nen Nephi, ed saman lamlamang a pasen saray inmuna a ñgayew inabet da so saray Amlicite.

21 Tan agawa a wala so saray ñgayew a nibaki a mansunson a mamapaway ed dalin da.

22 Natan si Alma lapu ed sikato so manlilikna makaseñgeg ed sugat to ag linma ed bakal ed saya a panaon sumpa ed saray Lamanite;

23 Balet añgibaki na dakel a ñgayew sumpa ed sikara; tan sikara so linma tan apatey da so dakel ed saray Lamanite, tan sinunson da so saray nakdaan ed sikara ed paway na ketegan na dalin da.

24 Tan dia ed saman sikara lamet so pinmawil tan ginapoan da ya iletneg so kareenan ed saman a dalin, ya ag la ra agulo ed loob na sakey a panaon na saray kabusol da.

25 Natan saraya a beñgatla so agawa, on, saraya ya amin a bakal tan baliñgaan so ginmapo tan nansampot ed komalima a taon ya oley na saray okom.

26 Tan dia ed loob na sakey a taon nilibo tan asamplora a nilibo a kamarerua so niakar ed andi-angaan a mundo, pian anien da so saray gungona ra unong ed saray kimey da, no sikara so maong odino sikara so mauges, pian anien da so andi-angaan a liket odino andi-angaan a segsegang, unong ed espiritu a kiniliñgan da ya inonor, no saya so maong ya espiritu odino sakey a mauges.

27 Tan balang sakey a too awaten to so upa to no dinan so kiniliñgan da ya inonor, tan saya so unong ed saray salita na espiritu na profesiya, dia ed ontan paulyan tayo a nagawa unong ed katuaan. Tan dia ed onia so impansampot na komalima a taon ya oley na saray okom.