1 Tan agawa a sanen niletneg da la so simbaan ed saman a dalin, si ari Lamoni nampilalekan to a mila si Ammon ed sikato ed dalin na Nephi, pian sikato so ipanengneng to ed si ama to.

2 Tan say voces na Katawan so sinmabi ed si Ammon, a nankuan: Ag ka oonla ed dalin na Nephi, tan nia, say ari ekalen to so bilay mo; balet sika so onla ed dalin na Middoni; tan nia, si agim ya Aaron, tan ontan met si Muloki tan si Ammah so wala ed pañgawan.

3 Tan agawa a sanen nadñgel nen Ammon so saya, inkuan to ed si Lamoni: Nia, say agik tan saray kaagian ko so wala ed dalem na pañgawan ed Middoni, tan onla ak pian sikara so ipaway ko.

4 Natan si Lamoni inkuan to ed si Ammon: Amtak, dia ed biskeg na Katawan nayarian mo a gawaen so amin a beñgatla. Balet nia, siak so mila ed sika ed dalin na Middoni; lapu ed say ari ed dalin na Middoni, a say ñgaran to Antiomno, so sakey a kaarok; dia ed ontan onla ak ed dalin na Middoni, pian sagyaten ko so ari ed saman a dalin, tan ipaway to ed pañgawan so saray kaagian mo. Natan si Lamoni inkuan to ed sikato: Siopa so añgibaga ed sika a saray kaagian mo so wala ra ed pañgawan?

5 Tan si Ammon inkuan to ed sikato: Angapo so añgibaga ed siak, likud ed Dios; tan inkuan to ed siak—Onla ka tan ipaway mo so saray kaagian mo, lapu ed sikara so wala ed pañgawan ed dalin na Middoni.

6 Natan sanen nadñgel nen Lamoni so saya ingangan to ed saray igagangan to ya iparaan da so saray kabayo tan saray karwahe to.

7 Tan inkuan to ed si Ammon: Gala, mila ak ed sika ed dalin na Middoni, tan diman mikasi ak ed ari ya ibulos to ed pañgawan so saray kaagian mo.

8 Tan agawa a sanen si Ammon tan si Lamoni so mambabaroy diman, naabet da so ama nen Lamoni, a sikato so ari ed amin a lapag na dalin.

9 Tan nia, say ama nen Lamoni inkuan to ed sikato: Akin kasi ag ka linma ed pista na saman so baleg ya agew sanen nangawa ak na pista onkana ed saray anak ko a lalaki, tan saray totook?

10 Tan inkuan to met: Iner so laen mo a kaibam so saya a Nephite, a sakey ed saray anak na matila?

11 Tan agawa a si Lamoni insalaysay to ed sikato no iner so laen to, lapu ed antakot a sikato so napabarong to.

12 Tan imbaga to met ya amin so señgegan na inkaabala to ed loob na dili a panarian to, kanian ag to akaakar ed pista ya imparaan nen ama to.

13 Tan natan sanen nisalaysay la nen Lamoni ed sikato so saraya ya amin a beñgatla, nia, dia ed pankelaw to, si ama to so nampasnok ed sikato, tan inkuan to: Lamoni, sika so onla pian pabulosan mo so saraya a Nephite, a sikara so lalaki ya anak na matila. Nia, tinulisan to so kaamaan tayo; tan natan saray anak to sikara lamet so onla ed limog tayo pian no nayari, dia ed silong na kasiliban tan panagtila ra, palikdoen da itayo, pian takewan da itayo ed saray kayarian tayo.

14 Natan say ama nen Lamoni ingangan to ed sikato a pateyen to si Ammon ed panamegley na espada to. Tan ingangan to met ed sikato ya ag oonla ed dalin na Middoni, balet sikato so ompawil la a kaiba to ed dalin na Ishmael.

15 Balet si Lamoni inkuan to ed sikato: Ag ko pateyen si Ammon, ni say ompawil ak ed dalin na Ishmael, balet siak so onla ed dalin na Middoni pian ibulos ko so saray kaagian nen Ammon, lapu ed kabat ko a sikara so matunong a totoo tan masanto a profeta na tua a Dios.

16 Natan sanen nadñgel nen ama to so saraya a salita, sikato so nampasnok ed sikato, tan inoyus to so espada to pian sikato so sigbaten to ya iparukol ed dalin.

17 Balet si Ammon so tinmalindeg tan inkuan to ed sikato: Nia, ag mo papateyen so anak mo; manwari ya ontan, magmaong ni a sikato so ompatey nen say sika, tan nengneng mo, sikato so nambabawi la ed saray kasalanan to; balet no sika so niparukol natan ed saya a panaon, ed pasnok mo, say kamareruam so ag nilaban.

18 Tan lamet, nakaukolan a sika so mantepel; tan no pateyen mo so anak mo a laki, angaman sikato so sakey a too ya angapo so kasalanan to, say dala to so onakis manlapu ed dalin ya onarap ed Katawan a Dios to, pian say kibabales so ondapo ed sika; tan ag la piga nabalang mo so kamareruam.

19 Natan sanen si Ammon nibalikas to so saraya a salita ed sikato, saya so iniebat to ed sikato, a nankuan: Amtak a no pateyen ko so anak ko, ipaterter ko so andi-kasalanan a dala; lapu ed sika so nampilalek a mamatey ed sikato.

20 Tan iniunat to so lima to pian pateyen to si Ammon. Balet si Ammon aligyasan to so saray sigbat to, tan siningwat to met so taklay to pian ag to la nikana.

21 Natan sanen say ari anengneng to a si Ammon a sikato so nayarian to a pateyen, ginapoan to so mikasi ed si Ammon ya ag to lalausan so bilay to.

22 Balet si Ammon intagey to so espada to, tan inkuan to ed sikato: Nia, sika so sigbaten ko likud no iabuloy mo ed siak a bulosan da so saray kaagian ko ed pañgawan.

23 Natan say ari, dia ed takot to ya ompano nabalang to so bilay to, inkuan to: No siak so iligyas mo ed kipapatey iter ko ed sika so antokaman a kerewen mo, angan say kapaldua na panarian ko.

24 Natan sanen si Ammon anengneng to ya inmabubon so masiken ya ari unong ed pilalek to, inkuan to ed sikato: No iabuloy mo a saray kaagian ko so nipaway ed pañgawan, tan ontan met si Lamoni so mansiansia ed panarian to tan ag ka mamapasnok ed sikato, balet paulyan mo a mangawa na kaliktan to ed antokaman a beñgatla a nanunotan to, dia ed ontan sika so ag ko pateyen; odino andi sika so sigbaten ko anga ed dalin.

25 Natan sanen si Ammon nibalikas to so saraya a salita, say ari ginapoan to so manliket lapu ed bilay to.

26 Tan sanen anengneng to a si Ammon angapo so pilalek to a manderal ed sikato, tan sanen anengneng to met so baleg a panañgaro to ed si anak to a Lamoni, sikato so mapalalo a nikelawan, tan inkuan to: Lapu ed saraya labat so pilalek mo, ya ibulos ko so saray kaagian mo, tan abuloyan ko a say anak ko a si Lamoni so mansiansia ed panarian to, nia, iabuloy ko ed sika a say anak ko mansiansia ed panarian to manlapu ed saya a panaon tan anga ed anga; tan sikato so ag ko la a balot oleyan—

27 Tan iabuloy ko met ed sika a saray kaagian mo so nibulos manlapu ed pañgawan, tan sika tan saray kaagian mo nayari kayo ya onla ed siak ed panarian ko, lapu ed balbaleg so pampilalek ko a minengneñgan ed sika. Lapu ed say ari so mapalalo a mankelaw ed saray sinalita to, tan ontan met ed saray salita ya imbalikas nen anak to a Lamoni, dia ed ontan sikato so nampilalek a saraya so naaralan to.

28 Tan agawa a si Ammon tan si Lamoni intuloy da so baroy da ya onarap ed dalin na Middoni. Tan si Lamoni arumog to so maong a linawa na ari ed saman a dalin; dia ed ontan saray kaagian nen Ammon so nipaway ed pañgawan.

29 Tan sanen naabet ira nen Ammon sikato so mapalalo a maermen, tan nia sikara so lakseb, tan saray baog da so aluklukdasan lapu ed inkabalor da na saray mabiskeg a lubir. Tan sikara met so nantepel na eras, inkapgaan, tan amin a nengneng na irap; manwari ya ontan sikara so nananos ed amin ya intetepel da.

30 Tan, unong ed inkagawa, say kapalaran da so naplag ed lima na saray lalo ya inmawet tan matatalker a teñger a totoo; dia ed onia ag ira ondeñgel ed saray salita ra, tan sikara so dinagdag da a pinapaway, tan binakbak da ra, tan sikara so inosil-osilan da ed balang sakey ya abong, tan manlapu ed sakey a pasen ya anga ed sananey, ya anga ed sikara so akasabi ed dalin na Middoni; tan diman sikara so inala ra tan sikara so inloob da ed pañgawan, tan binalor da ra na mabiskeg a lubir, tan inloob da ra ed pañgawan ed dakel ya agew, tan sikara so inlaban nen Lamoni tan si Ammon.