1 Nia, natan agawa a kayari a saray totoo nen Ammon so niletneg ed dalin na Jershon, on, tan ontan met kayari a saray Lamanite so asunson ed paway na saman a dalin, tan saray inaatey da so intabon na saray totoo ed saman a dalin—

2 Natan saray inaatey so ag la abilang lapu ed kinarakel na saray bilang da; ni saray inaatey na saray Nephite so abilang—balet agawa a kayari ra ya intabon so saray inaatey da, tan ontan met kayari na saray agew na impanayuno, tan impanermen tan pikakasi, (tan saya so komalabinanem a taon ya oley na saray okom ed saray totoo nen Nephi) ginmapo so nampatuloy a kareenan ed lapag na saman a dalin.

3 On, tan saray totoo tinunton da a sumpalen so saray gangan na Katawan; tan malet so impansumpal da ed saray tutuntonen na Dios, unong ed gangan nen Moises; lapu ed nibañgat ed sikara a sumpalen da so saray gangan nen Moises ya anga ed saraya so nagnap.

4 Tan dia ed onia saray totoo angapo so beñgatla ya akagutgot ed sikara legan na komalabinanem a taon ya oley na saray okom ed saray totoo nen Nephi.

5 Tan agawa a sanen ingapo na komalabimpito a taon ya oley na saray okom, wala so nampatuloy a kareenan.

6 Balet agawa dia ed saguinunor ed komalabimpito a taon, sinmabi so sakey a too ed dalin na Zarahemla, tan sikato so Sumpa ed Cristo, lapu ed ginapoan to so mampulong ed saray totoo sumpa ed saray profesiya a sinalita na saray profeta, nipaakar ed isabi nen Cristo.

7 Natan angapo so gangan a sumpa ed pananisia na sakey a too; lapu ed mapeget a sumpa ed saray gangan na Dios a wala so sakey a gangan a mañgawit ed saray totoo ed ag pampapara a letnegan.

8 Tan onia so kuan na masanto a kasulatan: Pilien mo ed saya ya agew, no siopa so panlingkoran mo.

9 Natan no say sakey a too pilalek to so manlingkor ed Dios, saya so pankanawnawa to; odino, no sikato so manisia ed Dios sikato so mankanawnawa a manlingkor ed sikato; balet no sikato so ag manisia ed sikato angapo so gangan a mandusa ed sikato.

10 Balet no sikato so nampatey sikato so dusaen na patey; tan no sikato so nantulisan sikato met so nadusa; tan no sikato so nantakew sikato met so nadusa; tan no sikato so nangawa na pikakaloguran sikato met so nadusa; on, lapu ed saya ya amin a karelmeñgan sikara so nadusa.

11 Lapu ed wala so sakey a gangan a saray totoo so natutolan unong ed saray kasalanan da. Manwari ya ontan, angapo so gangan a sumpa ed pananisia na sakey a too; dia ed ontan, say sakey a too so nadusa labat ed saray kasalanan a ginawa to; dia ed ontan amin a totoo so wala ed nampapara a letnegan.

12 Tan saya a Sumpa ed Cristo, a say ñgaran to Korihor, (tan say gangan angapo so pakayari to a mambemben ed sikato) ginapoan to so mampulong ed saray totoo ya angapo so Cristo. Tan dia ed onia a kanengneñgan sikato so nampulong, a nankuan:

13 O sikayo ya abalor ed silong na makulang-kulang tan angapo so kakanaan ya ilalo, akin ipako yo so inkasikayo ed onia a makulang-kulang a beñgatla? Akin aanapen yo so sakey a Cristo? Lapu ed angapo so too a makapikabat ed antokaman ya onsabi.

14 Nia, saraya so beñgatla a tatawagen yo a profesiya, a kuan yo a saraya so nipalima nanlapu ed saray masanto a profeta, nia, saraya so makulang-kulang a sisia a tawir na kaamaan yo.

15 Panon so pikabat yo na katuaan na saraya? Nia, ag nayari ya amta yo so saray beñgatla ya ag yo nanengneng; dia ed ontan ag yo nayarian a naamtaan a wala so sakey a Cristo.

16 Sikayo so mantatalaran tan kuan yo ya anengneng yo so pamaandi na saray kasalanan yo. Balet nia, saya so kasumpalan na sakey a nagugulo a kanunotan; tan saya ya aliwa a mauksoy a kanunotan yo so sinmabi lapu ed sisia a tawir na kaamaan yo, a saya so añgitunton ya añgiarawi ed sikayo ed pananisia na saray beñgatla ya aliwa a tua.

17 Tan dakel ni a siñga onia a beñgatla so imbaga to ed sikara, ya imbaga to ya angapo so bagat a pamaandi na kasalanan a nagawa ya onkana ed kasalanan na saray totoo, balet balang sakey a too so mankurang ed saya a bilay unong ed kiwas na pinalsa; dia ed ontan balang sakey a too so onaliguas unong ed kakabatan to, tan balang sakey a too so ontaluna unong ed biskeg to; tan antokaman a gawaen na too aliwa a kasalanan.

18 Tan onia so impampulong to ed sikara, ya intunton to ya iniarawi so puso na dakerakel, a señgeg na impañgiatagey da ed saray ulo ra ed karelmeñgan da, on, dakel a bibii so nitunton a niarawi, tan ontan met ed saray lalaki, a mangawa na inkabalangkantis—ya imbabaga to ed sikara a sano say sakey a too so inatey la, saman la so kasampotan.

19 Natan saya a too linma ed dalin na Jershon met, a mañgipulong ed saraya a beñgatla ed limog na saray totoo nen Ammon, a sikara nen saman so totoo na saray Lamanite.

20 Balet nia sikara so lalo a makabat nen say dakel ed saray Nephite; tan sikato so inerel da, tan binalor da, tan sikato so inawit da ed arap nen Ammon, a sikato so atagey a sacerdote na saman a totoo.

21 Tan agawa a sikato so inawit da ya impaway ed dalin da. Tan sikato so akasabi ed dalin na Gideon, tan ginapoan to so mampulong ed sikara met; tan dia ag awalaan na dakel a maong a nansumpalan, lapu ed sikato so inerel da tan binalor tan inawit da ed arap na atagey a sacerdote, tan ontan met dia ed pañgulo ya okom ed dalin.

22 Tan agawa a say atagey a sacerdote inkuan to ed sikato: Akin kasi manliliber-liber ka a mamipikewet ed saray dalan na Katawan? Akin kasi ibabañgat mo ed saraya a totoo ya angapo so Cristo, pian patondaen mo so saray gayaga ra? Akin kasi mansasalita ka sumpa ed amin a profesiya na saray masanto a profeta?

23 Natan say ñgaran na saya ya atagey a sacerdote so Giddonah. Tan si Korihor inkuan to ed sikato: Lapu ed ag ko ibabañgat so makulang-kulang a sisia a tawir na kaamaan yo, tan lapu ed ag ko ibabañgat so saray totoo ya ipaldeg da so inkasikara ed saray makulang-kulang a tutuntonen tan gagawaen a saraya so impalima na saray kadaanan a sacerdote, pian pasuoten da ya alaen so pakapanyari tan pakaoley ed sikara, pian mansiansia ra ed andi-kakabatan, pian ag da ipaatagey so saray ulo ra, no ag iñgen sikara so naawit a mampaabeba unong ed saray salita yo.

24 Inkuan yo a saya a totoo so sakey a bulos a totoo. Nia, ikuan ko a sikara so wala ed inkadakep. Ikuan yo a saraman so kadaanan a profesiya so tua. Nia, ikuan ko ya ag yo kabat a saraya so tua.

25 Inkuan yo a saya a totoo so sakey a makasalanan tan nigapol a totoo, lapu ed impankasalanan na sakey ya ateng. Nia, ibagak a say sakey ya ogaw angapo so kasalanan to lapu ed saray ateng to.

26 Tan inkuan yo met a si Cristo so onsabi. Balet nia, ikuan ko ya ag yo kabat a wala so Cristo. Tan inkuan yo met a sikato so ompatey lapu ed saray kasalanan na mundo—

27 Tan dia ed onia intutunton yo so saraya a totoo ya ontumbok ed saray makulang-kulang a sisia a tawir na kaamaan yo, tan unong ed saray dili a pilalek yo; tan sikara so impaldeg yo, angan siñga sikara so wala ed inkadakep, pian patabaen yo so inkasikayo ed sagpot na saray lima da, pian ag da sarag so ontangwa a sitatalek, tan ag da pangayagaan so saray pankatunoñgan tan pankanawnawa ra.

28 On, ag da sarag ya ikana so saray kayarian da ag la piga napabaiñgan da so saray sacerdote ra, a sikara so añgipako ed sikara unong ed saray dili a pilalek da, tan inawit da ra a manisia, unong ed sisia a tawir tan saray kugip da tan saray kaliktan da tan saray payawar da tan saray konkonwari a misterio ra, a nepeg da a gawaen, lapu ed ag da gawaen so unong ed saray salita ra, napabaiñgan da so sakey a pinalsa ya ag-kabat, a sikato so ibabaga ra a Dios—sakey a pinalsa ya ag ni anengneng odino akabatan, a sikato so angapo nen saman odino kapiganman.

29 Natan sanen say atagey a sacerdote tan say pañgulo ya okom anengneng da so awet na puso to, on, sanen anengneng da a sikato so onsumpa angan dia ed Dios, ag ira inmebat ed saray salita to; balet ingangan da a sikato so baloren; tan sikato so iniawat da ya impalima ed saray manañgipañgulo, tan iniakar da ed dalin na Zarahemla, pian sikato so iarap da ed si Alma, tan say pañgulo ya okom a sikato met so gobernador ed amin na dalin.

30 Tan agawa a sanen sikato so naawit da ed arap nen Alma tan say pañgulo ya okom, intuloy to so gagawaen to a siñga sanen wala ed dalin na Gideon; on, intuloy to so pansasamba to.

31 Tan sikato so tinmalindeg ed agay la a lañgas na salita to ed arap nen Alma tan ininsulto to so saray sacerdote tan managbañgat, a pankakasalananen to a sikara so mañgitutonton ed saray totoo ed makulang-kulang a sisia a tawir ed kaamaan da, pian sikara so ontaba ed sagpot na saray totoo.

32 Natan si Alma inkuan to ed sikato: Kabat mo ya ag kami mampapataba ed saray sagpot na saya a totoo; tan nia siak so nansagpot nanlapu la ed ingapo na oley na saray okom ya anga ed natan, ed dili a limak ya onkana ed pambilay ko, manwari a dakel so pambabaroy ko a manliliber-liber ed saya a dalin pian ipalapag so salita na Dios ed saray totook.

33 Tan manwari a dakel so kimey a ginawak ed simbaan, ag ko añgawat na angan sakey a senine ed saray sagpot ko; ni siopaman ed saray kaagian ko, likud labat dia ed yuroñgan na panañgokoman; tan dia ed onia say inawat mi saman labat so unong ed gangan ed panaon mi.

34 Tan natan, no ag kami mañgawat na antokaman a beñgatla ed saray sagpot mi ed simbaan, anto so nagungonaan mi a mansagpot ed simbaan likud labat ed pañgibawag mi na katuaan, pian nawalaan kami na liket na gayaga ed saray kaagian mi?

35 Dia ed onia akin kasi ibagam a sikami so mampupulong ed saya a totoo pian makaala kami na gungona, balet sika, dia ed sika a dili, kabat mo ya angapo so gungona ya aawaten mi? Tan natan, a manisia ka a papalikdoen mi so saya a totoo, a saya so señgegan na ontan la a gayaga ed saray puso ra?

36 Tan si Korihor inmebat ed sikato, On.

37 Tan dia ed saya si Alma inkuan to ed sikato: Manisia ka kasi a wala so Dios?

38 Tan sikato so inmebat, Andi.

39 Natan si Alma inkuan to ed sikato: Iburim kasi ni lamet a wala so Dios, tan ontan met iburim ni si Cristo? Tan nia, inkuan ko ed sika, kabat ko a wala so Dios, tan ontan met a si Cristo so onsabi.

40 Tan natan anto so pakanengneñgan a wala ed sika ya angapo so Dios, odino si Cristo so ag onsabi? Ibagak ed sika ya angapo so nibagam, likud ed salitam labat.

41 Balet, nia, wala ed siak so amin a beñgatla a pamaneknek a saraya a beñgatla so tua; tan wala met ed sika so amin a beñgatla a pamaneknek a saraya so tua; tan saraya kasi so iburim? Manisia ka kasi a saraya a beñgatla so tua?

42 Nia, kabat ko a manisia ka, balet wala ed sika so mantitila ya espiritu, tan impulisay mo so Espiritu na Dios kanian angapo so pasen to ed sika; balet say demonyo wala so pakapanyari to ed sika, tan sika so ililibot to, a mankikimey ed panagpalikdo pian deralen to so saray anak na Dios.

43 Tan natan si Korihor inkuan to ed si Alma: No ipanengneng mo ed siak so sakey a tanda, pian nakuyong ak a wala so Dios, on, ipanengneng mo ed siak a wala so pakapanyari to, tan dia ed ontan nakuyong ak ed katuaan na saray salitam.

44 Balet si Alma inkuan to ed sikato: Wala la ed sika so magenap a tanda; tuksoen mo ni kasi so Dios mo? Ibagam ni kasi, Ipanengneng mo ed siak so sakey a tanda, angaman wala la ed sika so pamaneknek na amin a kaagian mo, tan amin met a masanto a profeta? Saray masanto a kasulatan so nigaton ed arapan mo, on, tan amin a beñgatla so mañgitoturo a wala so Dios; on, angan say dalin, tan amin a beñgatla a wala ed tapew to, on, tan say igagalaw to, on, tan ontan met na amin a planeta ya ongagalaw ed gendat ya uksoy da so mantasi a wala so Sankaatageyan a Manamalsa.

45 Tan siansia ka ni a manliliber-liber, a mañgitutonton a mañgiarawi ed puso na saya a totoo, a mampapaneknek ed sikara ya angapo so Dios? Tan iñgen mamburi ka sumpa ed saraya a mantatasi? Tan inkuan to: On, iburik, likud no mañgipanengneng ka ed siak na sakey a tanda.

46 Tan natan agawa a si Alma inkuan to ed sikato: Nia, siak so maermen lapu ed awet na pusom, on, tan siansia ni a sumpaen mo so espiritu na katuaan, pian say kamareruam komon so naderal.

47 Balet nia, magmaong ni a nabalang mo so kamareruam nen say sika so panseñgegan na dakel a kamarerua so napelag ed kadederal, lapu ed panagtilam tan say makasagiat a salitam; dia ed ontan no mamburi ka lamet, nia say Dios bakbaken to ka, pian sika so manmaliw ya emel, pian ag mo la nilukas so sañgim kapiganman, pian ag mo la palikdoen so saya a totoo kapiganman.

48 Natan si Korihor inkuan to ed sikato: Ag ko iburi so kiwala na Dios, balet ag ko manisia a wala so Dios; tan ikuan ko met, ya ag mo kabat a wala so Dios; tan likud no ipanengneng mo ed siak so sakey a tanda, ag ak manisia.

49 Natan si Alma inkuan to ed sikato: Saya so iter ko ed sika a sakey a tanda, a sika so nabakbak na inkaemel, unong ed saray salitak; tan ikuan ko, dia ed ñgaran na Dios, sika so nabakbak na inkaemel, pian kapiganman ag ka la makasalita.

50 Natan sanen si Alma imbaga to so saraya a salita, si Korihor so abakbak na inkaemel, kanian ag la makasalita, unong ed saray salita nen Alma.

51 Tan natan sanen say pañgulo ya okom anengneng to so saya, sikato so nangawa na sulat ed si Korihor, a nankuan: Manisia ka la ed pakapanyari na Dios? Dia ed sikato so nampilalekan mo a si Alma mañgipanengneng na tanda? Labay mo kasi a pairapen to ni so arum, pian ipanengneng to ed sika so sakey a tanda? Nengneng mo, impanengneng to ed sika so sakey a tanda; tan natan aruman mo ni so pansumpam?

52 Tan si Korihor iniunat to so lima to tan nansulat, a nankuan: Kabat ko a sakey ak la ya emel, lapu ed ag ak makapansalita; tan amtak ya angapo likud ed pakapanyari na Dios so makapañgiter ed saya ed siak; on, tan lawas kabat ko a wala so Dios.

53 Balet nia, say demonyo pinalikdo to ak; lapu ed pinmanengneng ed siak ed kanengneñgan na sakey ya angel, tan inkuan to ed siak: Onla ka tan bawim so saya a totoo, tan sikara ya amin so abalang a tinmumbok ed ag-kabkabat a Dios. Tan inkuan to ed siak: Angapo so Dios; on, tan imbañgat to ed siak so nepeg ko ya ibaga. Tan imbañgat ko so saray salita to; tan imbañgat ko lapu ed saraya so makaruyo ed minomundo a kanunotan; tan saraya so imbañgat ko, angan agamoran ko so dakel a maong a nansumpalan, anga ed anisia ak a saraya so petepeteg a tua; tan lapu ed saya sinumpak so katuaan, anga ed naawit ko so saya a baleg ya ayew ed siak.

54 Tan sanen asalita to so saya, mikakasi ed si Alma ya ipikasi to ed Dios, pian saya a baleg ya ayew so naekal ed sikato.

55 Balet si Alma inkuan to ed sikato: No saya ya ayew so naekal ed sika itunton mo ya iarawi lamet so saray puso na saya a totoo; dia ed ontan, nagawa ed sika unong ed linawa na Katawan.

56 Tan agawa a say ayew so ag naekal ed si Korihor; balet sikato so impaliis da ed paway, tan sikato so linma ed balang sakey ya abong a mipapayabol na naakan to.

57 Natan say pikakabat ed agawa ed si Korihor so tampol a nipalapag ed dalin; on, sakey a palapag so impaitayak na pañgulo ya okom ed amin a totoo ed dalin, ya imbawag da ed saray anisia ed saray salita nen Korihor a nakaukolan da so mambabawi a tampol, ag la piga saya met lamlamang a dusa so onsabi ed sikara.

58 Tan agawa a sikara ya amin so anisia ed karelmeñgan nen Korihor; dia ed ontan sikara lamet so nampasimbalo ed pananisia ed Katawan; tan dia la nansampot so karumsisan na saray bañgat nen Korihor. Tan si Korihor so linma ed balang sakey abong, a mipapayabol na pambilay to.

59 Tan agawa a sanen sikato so linma ed limog na saray totoo, on, ed limog na saray totoo ya insian da so inkasikara ed saray Nephite tan tinawag da so inkasikara a Zoramite, lapu ed sikara so impañgulo na sakey a too a manñgaran na Zoram—tan sanen sikato so linma ed limog da, nia, sikato so inosilan da tan ginagatin-gatinan da, anga ed sikato so inatey.

60 Tan dia ed onia anengneng tayo so impansampot na saman so amikewet ed saray dalan na Katawan; tan dia ed onia anengneng tayo a say demonyo ag to tuloñgan so saray anak to ed kaunoran ya agew, balet masiglat to ra ya igayugoy a paleksab ed infierno.