1 Tan agawa ed ingapo na komalima a taon na oley da wala so ginmapo a baliñgaan ed limog na saray totoo; tan sakey a too, a tatawagen na Amlici, lapu ed sikato so masilib a too, on, sakey a makabat a too no nipaakar ed minomundo a kakabatan, a say inkabañgat to so siñga unong ed saman so amatey ed si Gideon ed panamegley na espada, a sikato so atutolan na patey unong ed gangan—

2 Natan saya ya Amlici agawa to, dia ed kasiliban to, so impañgisian na dakel a totoo ya ontumbok ed sikato; angan ontan la a karakel kanian ginapoan da so manmaliw a mapalalo a makapanyari; tan ginapoan da so nampilalek ya iletneg si Amlici a manmaliw ya ari a manoley ed saray totoo.

3 Natan saya so tinakotan na saray totoo na simbaan, tan ontan met na saray ag tinmumbok ya onsian unong ed saray panagkuyong nen Amlici; lapu ed kabat da ya unong ed gangan da say onia a beñgatla so nakaukolan ya iletneg ed panamegley na voces na saray totoo.

4 Dia ed ontan, no nayari a si Amlici nagamoran to so voces na saray totoo, sikato, lapu ed sikato so sakey a too ya marelmeng, paandien to ed sikara so saray kanepegan da tan pankanawnawa ra ed simbaan; lapu ed say getma to deralen to so simbaan na Dios.

5 Tan agawa a saray totoo so nantitipon ed saman a lapag na dalin, balang sakey a too unong ed kanunotan to, miabubon odino sumpa ed si Amlici, ed nansian a pulok, lapu ed kinarakel na kolkulan tan makapakelaw a sumlañgan na balang sakey tan sakey.

6 Tan dia ed onia sikara so nantitipon pian nipaamta ra so voces da nipaakar ed saya a pamaakaran; tan saraya so niparungtal ed arap na saray okom.

7 Tan agawa a say voces na saray totoo so pinmaway a sumpa ed si Amlici, kanian sikato so ag agawa ya ari a manoley ed saray totoo.

8 Natan saya so señgegan na baleg a liket ed puso na saray sumpa ed sikato; balet si Amlici pinagalaw to so saray miabubon ed sikato ya onsanok ed saraman so sumpa ed sikato.

9 Tan agawa a sikara so nantitipon ed inkasikara a dili, tan si Amlici so pinasanto ra ya ari ed sikara.

10 Natan sanen si Amlici so agawa ya ari ed sikara ingangan to a mañgala ira na saray kagawaan ed bakal sumpa ed saray kaagian da; tan saya so ginawa to pian naoleyan to ira.

11 Natan saray totoo nen Amlici so nibiig ed ñgaran nen Amlici, a sikara so atawag ya Amlicite; tan saray nakdaan so atawag a Nephite, odino saray totoo na Dios.

12 Dia ed onia saray totoo na Nephite kabkabat da so getma na saray Amlicite, tan dia ed ontan sikara so namparaan ya onabet ed sikara; on, inayuraan da so inkasikara a kaiba so saray espada, tan panagtastas, tan pabekang, tan pana, tan bato, tan palsot, tan amin a nengneng ya ikakana ed bakal, ed balang sakey a kanengneñgan.

13 Tan dia ed onia sikara so akaparaan ya onabet ed saray Amlicite ed antokaman a panaon ya isabi ra. Tan wala so saray aturo a kapitan, tan saray atagey a kapitan, tan saray pañgulo a kapitan, unong ed bilang da.

14 Tan agawa a si Amlici imparaan to so saray totoo to ed nambabañgil ya agamil ed bakal ed balang sakey a kanengneñgan; tan sikato met so nanturo na saray manoley tan pañgulo ed saray totoo to, a mañgipañgulo ed sikara ed bakal sumpa ed saray kaagian da.

15 Tan agawa a saray Amlicite linma ra ed pukdol na Amnihu, a wala ed bokig na ilog na Sidon, a saya so ondadalan ed dalin na Zarahemla, tan diman ingapo ra so mibakal ed saray Nephite.

16 Natan si Alma, lapu ed sikato so pañgulo ya okom tan manañgoley ed saray totoo nen Nephi, dia ed ontan sikato so linma a kaiba to so saray totoo to, on, kaiba to so saray kapitan, tan saray pañgulo a kapitan, on, dia ed unaan na saray ñgayew to, sumpa ed saray Amlicite ed bakal.

17 Tan ginapoan da a pateyen so saray Amlicite ed pukdol a wala ed bokig na Sidon. Tan saray Amlicite sinmumpa ra ed saray Nephite ed baleg a biskeg, kanian dakel ed saray Nephite so niparukol ed arap na saray Amlicite,

18 Angaman ontan say Katawan pinabiskeg to so lima na saray Nephite, kanian apatey da so saray Amlicite ed baleg a panagpatey, kanian ginapoan da so ombatik ed arap da.

19 Tan agawa a saray Nephite inosilan da so saray Amlicite a sanagew, tan pinapatey da ra ed dakel a panagpatey, a wala so saray apatey da ya Amlicite a labindua a libo lima a lasus talomplo tan dua a kamarerua; tan saray apatey da ed saray Nephite wala so anem a libo lima a lasus anemaplo tan dua a kamarerua.

20 Tan agawa a sanen si Alma ag to la natumbok so saray Amlicite ingangan to a saray totoo to ipaalagey da so saray abong-abong da ya abel ed patar na Gideon, say patar ya inñgaran ed si Gideon a pinatey nen Nehor ed panamegley na espada; tan dia ed saya a patar saray Nephite impaalagey da so saray abong-abong da ya abel a pamalabasan da na sanlabi.

21 Tan si Alma añgibaki na saray managsiim ya ontumbok ed saray nakdaan ya Amlicite, pian nakabatan to so saray plano ra tan saray maamot a nunoñgan da, pian niagel to so inkasikato sumpa ed sikara, pian niagel to so saray totoo to ed pakaderal da.

22 Natan saraman so imbaki to a mambantay ed campo na saray Amlicite so atawag a Zeram, tan Amnor, tan Manti, tan Limher; saraya so linma a pinmaway a kaolop da so saray totoo ra a mambantay ed campo na saray Amlicite.

23 Tan agawa a dia ed kaimbuasan sikara so amawil ed campo na saray Nephite ed baleg a ganat, lapu ed sikara so mapalalo ya ataktakot, tan awalaan na baleg a takot, a nankuan:

24 Nia, sikami so tinmumbok ed campo na saray Amlicite, tan dia ed baleg a pankelaw mi, diman ed dalin na Minon, ed tagey na dalin na Zarahemla, ya ombeltang ed dalin na Nephi, anengneng mi so dakerakel a Lamanite; tan nia, saray Amlicite so tinmipon ed sikara;

25 Tan sikara so wala la ed saray kaagian tayo ed saman a dalin; tan sikara so ombabatik ed arapan da a kaiba ra so saray ayayep da, tan saray kaasawaan ra, tan saray anak da, a mamapaarap ed ciudad tayo; tan likud no sikatayo so manganat naala ra so pankayarian ed ciudad tayo, tan saray ama tayo, tan saray kaasawaan tayo, tan saray anak tayo so pateyen da.

26 Tan agawa a saray totoo nen Nephi inala ra so saray abong-abong da ya abel, tan sikara so sinmipot a pinmaway ed patar na Gideon ya amaarap ed ciudad da, a saya so ciudad na Zarahemla.

27 Tan nia, sanen ombabaliw ira ed ilog na Sidon, saray Lamanite tan saray Amlicite, a say karakel da, siñga karakel na buer ed dayat, dinugpaan da ira pian sikara so deralen da.

28 Angaman ontan, saray Nephite lapu ed sikara so pinabiskeg na lima na Katawan, tan sikara so nampikasi a madaleyet ed sikato pian sikara so ilaban to ed lima na saray kabusol da, dia ed ontan say Katawan dineñgel to so saray nañgis da, tan pinabiskeg to ira, tan saray Lamanite tan saray Amlicite so niparukol ed arapan da.

29 Tan agawa a si Alma so akilaban ed si Amlici ed panamegley na espada, ed arap-arapan; tan sikara so mapalalo a nanlaban, ed balang sinansakey.

30 Tan agawa a si Alma, lapu ed sikato so sakey a too na Dios, ya inagamil to so baleg a pananisia, so inmakis, a nankuan: O Katawan, kasian mo ak tan ilaban mo so bilay ko, pian manmaliw ak a sakey ya ikakana ed saray limam a mañgilaban tan mañgiagel ed saya a totoo.

31 Natan sanen nibaga nen Alma so saraya a salita sikato so akibakal lamet ed si Amlici; tan sikato so apabiskeg, a lapu ed saya apatey to si Amlici ed panamegley na espada.

32 Tan sikato met so akibakal ed ari na saray Lamanite; balet say ari na saray Lamanite so batik a sinmener manlapu ed arap nen Alma tan imbaki to so saray taga-bantay to a mibakal ed si Alma.

33 Balet si Alma, kaiba to so saray taga-bantay to, so akibakal ed saray taga-bantay na ari na saray Lamanite anga ed apatey to tan sinunson to ira a papawil.

34 Tan dia ed onia alinisan to so dalin, odino say pandel, a saya so wala ed sagur na ilog na Sidon, ya imbabantak to so saray laman na Lamanite ya apatey da ed saray danum na Sidon, pian dia ed ontan saray totoo to nawalaan ira na liwang ya ombaliw tan mibakal ed saray Lamanite tan saray Amlicite a wala ed sagur na ilog na Sidon,

35 Tan agawa a sanen akabaliw la ra ya amin ed ilog na Sidon saray Lamanite tan saray Amlicite ginapoan da so ombatik ed arap da, manwari ya ontan la so kinarakel da ya ag ira nabilang.

36 Tan sikara so binmatik ed unaan na saray Nephite ya amaarap ed kalawakan a wala ed sagur tan baybay, ya arawi ed labas na ketegan na dalin; tan saray Nephite tinumbok da ira ya inosilan ed angaan na nayarian da, tan sikara so pinapatey da,

37 On, sikara so inabet da ed balang sakey a narandan na lima, tan pinapatey tan sinunson da ra, anga ed sikara so ataytayak ed sagur, tan ed baybay, anga ed arapat da so kalawakan, a tatawagen na Hermounts; tan dia ed saman a pasen na kalawakan so kawalaan na karaklan na saray atap tan masiba a monanakap.

38 Tan agawa a dakel so saray inaatey ed kalawakan lapu ed saray sugat da, tan sikara so kinan na saraman so monanakap tan saray buitri ed tagey; tan saray pokel da so nalmo, tan abunton ed dalin.