1 Tan agawa a kayari to a sinampotan so pansasalita to ed saray totoo dakel ed sikara so anisia ed saray salita to, tan ginapoan da so mambabawi, tan mansukait ed saray masanto a kasulatan.

2 Balet say karaklan ed saray kabiañgan da so nampilalekan da a deralen si Alma tan si Amulek, lapu ed ampetang so ulo ra ed si Alma, lapu ed inkalinew na saray salita to ed si Zeezrom; tan inkuan da met a si Amulek so nantila ed sikara, tan binalaw to a sinumpa to so gangan da tan sinumpa to met so saray abogado tan saray manañgokom da.

3 Tan sikara met so nampasnok ed si Alma tan si Amulek; tan lapu ed sikara so nampaneknek a malinlinew sumpa ed saray karelmeñgan da, sikara so nampilalekan da a pateyen a maamot.

4 Balet agawa a saya so ag da agawaan; balet inala da ra tan binalor da ra na mabiskeg a lubir, tan sikara so inawit da ed pañgulo ya okom ed saman a dalin.

5 Tan saray totoo so linma ra a pinmarungtal tan nantasi sumpa ed sikara—a pinaneknekan da a sikara so nampauges sumpa ed gangan, tan saray abogado ra tan saray okom da ed saman a dalin, tan ontan met ed amin a totoo a wala ed saman a dalin; tan pinaneknekan da met a wala so saksakey a Dios, tan ibaki to so Anak to ed limog na saray totoo, balet ag to ra ilaban; tan dakel ya onia ni ra a beñgatla so pinaneknekan na saray totoo sumpa ed si Alma tan si Amulek. Natan saya so agawa ed arap na pañgulo ya okom ed saman a dalin.

6 Tan agawa a mankelaw si Zeezrom ed saray salita ya imbaga ra; tan akabatan to met so nipaakar ed inkabulag na saray kanunotan, a saya so nansumpalan na ginawa to ed limog na saray totoo ed panamegley na saray salita to a tila; tan say kamarerua to ginmapo a nakewkew ed silong na pikakabat to ed saray dili a kasalanan to; on, sikato so ginmapo a liktoben na otot na infierno.

7 Tan agawa a ginapoan to so onakis ed saray totoo, a nankuan: Nia, siak so nankasalanan, tan saraya a lalaki angapo so kasalanan da ed arap na Dios. Tan ginapoan to so mikasi ya onkana ed sikara nanlapu ed saman a panaon; balet sikato so pinauges da, a kuan da: Akin angan sika met so aselepan na demonyo? Tan sikato so niluklukdaan da, tan sikato so pinapaway da ed limog da, tan ontan met ed saray anisia ed saray salita nen Alma tan si Amulek; tan sikara so sinunson da a pinapaway, tan nampabaki ra na totoo a mantupak na bato ed sikara.

8 Tan inawit da so saray kaasawaan ra tan saray anak da nanoolop, tan siopaman ya anisia odino abañgatan a manisia ed salita na Dios ingangan da a sikara so ibuntok ed apoy; tan inawit da met so saray kasulatan a kawalaan na saray masanto a kasulatan, tan saraya so imbuntok da ed apoy met, pian saraya so napoolan tan naderal ed apoy.

9 Tan agawa ya inala ra si Alma tan si Amulek tan sikara so inawit da ed pasen a panagmartiran, pian naimatonan da so naspot a kaderal na saraman so inupot na apoy.

10 Tan sanen anengneng nen Amulek so sakit na pampapairap na saray bibii tan ugogaw ya oopoten na apoy, sikato met so nanlikna na sakit; tan inkuan to ed si Alma: Panon ya imatonan ta so saya a makapataktakot a nagagawa? Dia ed ontan iunat ta so saray lima ta, tan ikana ta so pakapanyari na Dios a wala ed sikata, tan ilaban ta ra ed saya ya apoy.

11 Balet si Alma inkuan to ed sikato: Say Espiritu sasamperen to ak ya iunat ko so limak; tan nia sikara so aawaten na Katawan ed inkasikato a dili, dia ed gloria; tan intepel to a gawaen da so saya a beñgatla, odino saray totoo gawaen da so saya a beñgatla ed sikara, unong ed kinaawet na saray puso ra, pian say panañgokom a gawaen to ed sikara ed sanok to so manepeg; tan say dala na saray angapo so kasalanan ontalindeg a tasi sumpa ed sikara, on, tan sikara so onakis a madaleyet sumpa ed sikara dia ed sampot ya agew.

12 Natan si Amulek inkuan to ed si Alma: Nia, añganko poolan da ta met.

13 Tan si Alma inkuan to: Nagawa so unong ed linawa na Katawan. Balet, nia, say kimey ta ag ni asumpal; dia ed ontan, ag da ta poolan.

14 Natan agawa a sanen saray laman na saray imbubontok da ed apoy so naopot la, tan ontan met ed saray kasulatan ya impiolop da ya imbuntok ed sikara, say pañgulo ya okom na saman a dalin so linma tan tinmalindeg ed arap nen Alma tan si Amulek, legan a sikara so akabalor; tan sikara so tinampal to na lima to ed saray aping da, tan inkuan to ed sikara: Kayari na wala ya anengneng yo, mampulong kayo ni lamet kasi ed saraya a totoo, pian sikara so nibuntok ed louk na apoy tan azufre?

15 Nia, anengneng yo ya angapo so pakapanyari yo a mañgilaban ed saray nibuntok ed apoy; ni say Dios ag to ra inlaban lapu ed pananisia ra a siñga sikayo. Tan say okom tinampal to ra lamet ed saray aping da, tan tinmepet: Anto so nibaga yo nipaakar ed inkasikayo?

16 Natan saya ya okom tinmumbok ed bañgat tan pananisia nen Nehor, a sikato so amatey ed si Gideon.

17 Tan agawa a si Alma tan si Amulek angapo so iniebat da ed sikato; tan tinampal to ra lamet, tan iniawat to ra ed saray taga-pañgulo pian iloob da ra ed pañgawan.

18 Tan sanen sikara so nipañgaw ed loob la na talora ya agew, wala so sinmabi a dakel ya abogado, tan okom, tan sacerdote, tan managbañgat, a sikara so kaolop ed pananisia nen Nehor; tan sikara so linma ed pañgawan pian nengneñgen da ra, tan sikara so tinepetan da nipaakar ed dakel a salita; balet angapo so iniebat da ed sikara.

19 Tan agawa a say okom tinmalindeg ed arap da, tan inkuan to: Akin ag kayo onebat ed saray salita na saya a totoo? Ag yo kasi amta a wala so pakayarik pian sikayo so papoolan ko ed apoy? Tan ingangan to ra a mansalita balet angapo so iniebat da.

20 Tan agawa a sikara so tinmaynan tan linma ra ed dili a dalan da, balet linma ra lamet ed kaimbuasan; tan say okom tinampal to ra lamet ed saray aping da. Tan dakel met so linma, tan tinatampal da ra, a nankuan: Ontalindeg kayo ni kasi lamet pian okomen yo so saya a totoo, tan paandien yo so kakanaan na saray gangan mi? No walaan kayo na ontan la a kinabaleg na pakapanyari akin ag yo ilaban so inkasikayo?

21 Tan dakel ni ya onia ra a beñgatla so imbaga ra ed sikara, a pañgalateñgeten da ra so saray ñgipen da ed sikara, tan sikara so nilulukdaan da ra, tan kuan da: Anto so kanengneñgan mi no sikami so naayew?

22 Tan dakerakel ni ya onia ra a beñgatla, on, amin ya onia a beñgatla so imbaga ra ed sikara; tan dia ed onia so impanlemlemew da ed sikara ed dakel ya agew. Tan ag ira añgiter na kakanen pian sikara so naerasan, tan say danum pian sikara so napaet; tan ontan met inala ra so saray kawes da pian sikara so lakseb; tan sikara so binalor na malet a lubir tan impanayam da ra ed pañgawan.

23 Tan agawa a kayari impanirap da na onia ed dakel ya agew (tan dia ed komalabindua ya agew, ed komasamplo a bulan, ed komasamplo a taon ya oley na saray okom ed saray totoo nen Nephi) a say pañgulo ya okom ed dalin na Ammonihah tan dakel ed saray managbañgat da tan saray abogado ra so linma ed pañgawan a kawalaan nen Alma tan si Amulek a sikara so sibabalor na lubir.

24 Tan say pañgulo ya okom tinmalindeg ed arap da, tan sikara so kinabil to lamet, tan inkuan to ed sikara: No wala ed sikayo so pakapanyari na Dios ilaban yo so inkasikayo ed saraya a balor, tan dia ed ontan manisia kami a say Katawan deralen to so saraya a totoo unong ed saray salita yo.

25 Tan agawa a sikara ya amin so dinmago tan sikara so kinakabil da, a nankuan ed saksakey a salita, ya anga ed say sankaunoran; tan sanen say sankaunoran so akapisalita la ed sikara say pakapanyari na Dios so sinmabi ed si Alma tan si Amulek, tan sikara so tinmalindeg tan inmalagey ed saray sali ra.

26 Tan si Alma kinmelyaw, a nankuan: Panon kabayag so pantepel mi ed saraya ya irap, O Katawan? O Katawan, iter mo ed sikami so biskeg unong ed pananisia mi a wala ed si Cristo, iñgen anga ed panañgiagel. Tan pinaksot da so saray lubir ya akabalor ed sikara; tan sanen saray totoo anengneng da so saya, ginapoan da so ombatik, lapu ed takot da a say kadederal so sinmabi la ed sikara.

27 Tan agawa ya agay la so takot da kanian niparukol ira ed dalin, ya ag da adampot so puerta a papaway ed pañgawan; tan say dalin minmayegmeg na makmaksil, tan say dingding na pañgawan so abuyak, kanian ginmeba ed dalin; tan say pañgulo ya okom, tan saray abogado, tan sacerdote, tan managbañgat, a sikara so nankakabil ed si Alma tan si Amulek, so inatey ed saya ya inkageba.

28 Tan si Alma tan si Amulek so pinmaway ed pañgawan, tan sikara so ag asakitan; lapu ed say Katawan initer to ed sikara so pakapanyari, unong ed pananisia ra a wala ed Cristo. Tan sikara so tampol a pinmaway ed pañgawan; tan sikara so naukbaran ed saray balor da; tan say pañgawan ageba ed dalin, tan amin a kamarerua a wala ed loob to, likud labat ed si Alma tan si Amulek, so inaatey; tan sikara so tampol a linma ed ciudad.

29 Natan saray totoo lapu ed nadñgel da so baleg a tanol sikara so nanoolop a linma a mambatik pian kabaten da so señgegan to; tan sanen anengneng da si Alma tan si Amulek ya ompapaway ed pañgawan, tan saray dingding to so ageba ed dalin, sikara so ataktakot, tan sikara so binmatik a nanlapu ed arapan nen Alma tan si Amulek a siñga sakey a kanding a kaiba to so saray kilaw to ya ibabatikan da so duara a leon; tan dia ed onia sikara so binmatik ed arapan nen Alma tan si Amulek.