1 Nia inararok a kaagian, lapu ed anengneng ko a siak so inabuloyan yo ya onla ed sikayo, dia ed ontan salien ko so mansalita ed sikayo ed dili a salitak; on, dia ed panamegley na sañgik a dili, lapu ed anengneng ko a saya so unaan a panaon a pambalikas ko ed salita na dili a sañgik, lapu ed siak so nipasen ed yuroñgan na panañgokoman, lapu ed kinarakel na kimey ko kanian ag ak akakar ed sikayo.

2 Tan iñgen ag ak akakar dia ed saya a panaon no ag say yuroñgan na panañgokoman so niiter ed sananey, a manoley ed pasen ko; tan say Katawan lapu ed kinabaleg na abagey to iniabuloy to ya onla ak dia ed sikayo.

3 Tan nia, linma ak dia a wala so baleg ya ilalok tan malaknab a pilalek a narumog takayo a nampaabeba kayo la ed inkasikayo a dili ed arap na Dios, tan nampatuloy kayo ed ikekerew yo na gracia to, pian narumog takayo ya angapo so pakatetelan ed arap to, a narumog takayo ya angapo ed makapataktakot a gulo na kanunotan a siñga saray kaagian tayo ed Zarahemla.

4 Balet mapalar so ñgaran na Dios, lapu ed initer to ed siak so pikakabat, on, initer to ed siak so baleg a gayaga ed pikakabat a sikara lamet so niletneg ed dalan na inkamatunong to.

5 Tan mailalo ak, unong ed Espiritu na Dios a wala ed siak, a nawalaan ak met na gayaga lapu ed sikayo; manwari ya ontan ag ko pilalek a say gayagak ed sikayo so onsabi makaseñgeg ed dakel a kairapan tan ermen a saya so wala ed siak lapu ed saray kaagian ed Zarahemla, tan nengneng yo, say gayagak ed sikara so sinmabi kayari impanyakyak ko ed dakel a kairapan tan ermen.

6 Balet nia, mailalo ak ya angapo kayo ed kipapasen na baleg ya ag-pananisia a siñga saray kaagian yo; mailalo ak ya ag kayo nipaatagey ed kinon na saray puso yo; on, mailalo ak ya ag yo inteen so saray puso yo ed saray kayamanan tan dia ed saray andi-kakanaan a beñgatla na mundo; on, mailalo ak ya ag kayo mañgigagalang ed saray talintao, balet mañgigagalang kayo ed tua tan mabilay a Dios, tan sikayo so mantalaran ed pamaandi na saray kasalanan yo, tekep na andi-angaan a pananisia, a saya so onsabi.

7 Tan nia, ikuan ko ed sikayo a dakerakel so beñgatla ya onsabi; tan nia, wala so sakey a beñgatla a makanakana nen say amin—tan nengneng yo, say panaon ag la arawi a say Mananundon miayam tan onsabi ed limog na saray totoo to.

8 Nia, ag ko ibabaga a sikato so onsabi ed limog tayo ed panaon a sikato so manayam ed ompatey a tabernaculo to; tan nia, say Espiritu ag to imbaga ed siak so onia a kipapasen. Natan no nipaakar ed saya a beñgatla ag ko amta; balet saya so amtak, a say Katawan a Dios wala ed sikato so pakapanyari a mangawa ed amin a beñgatla unong ed salita to.

9 Balet nia, say Espiritu onia karakel so imbaga to ed siak, a kuan to: Ibawag mo ed saya a totoo, ya ikuan mo—Mambabawi kayo, tan iparaan yo so dalan na Katawan, tan mankurang kayo ed saray basbas to, a saraya so maptek; tan nia, say panarian na tawen so asinger la, tan say Anak na Dios onsabi ed tapew na dalin.

10 Tan nia, sikato so ianak nen Maria, ed Jerusalem a saya so dalin na saray atateng tayo, lapu ed sikato so sakey a virgen, sakey a pinabli tan pinili a mañgianak, a sikato so natalukboñgan tan manñginew lapu ed pakapanyari na Espiritu Santo, tan ianak to so sakey a laki, on, iñgen say Anak na Dios.

11 Tan sikato so onla, a manlikna na sakit tan kairapan tan tukso ed amin a kanengneñgan; tan dia ed saya say salita so nasumpal ya añgikuan a sikato so mañgako ed saray irap tan saray sakit na saray totoo to.

12 Tan akoen to ed inkasikato so patey, pian ukbaran to so saray balor na patey ya amerber ed saray totoo to; tan akoen to ed inkasikato so saray bublay da, lapu ed say kalooban to so napno na panañgasi, unong ed laman, pian nakabatan to unong ed laman no panon so itulong to ed saray totoo to ed saray bublay da.

13 Natan say Espiritu kabat to so amin a beñgatla; angaman ontan say Anak na Dios manlikna unong ed laman pian akoen to ed inkasikato so saray kasalanan na totoo to, pian buralen to so saray kasalanan da unong ed pakapanyari na panañgilaban to; tan natan nia, saya so paneknek a wala ed siak.

14 Natan ikuan ko ed sikayo a nakaukolan a mambabawi kayo, tan nianak lamet; lapu ed say Espiritu inkuan to a likud no nianak kayo lamet ag yo natawir so panarian na tawen; dia ed ontan ondago kayo tan sikayo so mampabiniag onkana ed pambabawi, pian sikayo so naurasan ed saray kasalanan yo, pian nawalaan kayo na pananisia ed Cordero na Dios, a sikato so mañgekal ed saray kasalanan na mundo, a sikato so makapanyari a mañgilaban tan manlinis na amin ya aliwan inkamatunong.

15 On, ikuan ko ed sikayo ondago kayo tan ag kayo ontatakot, tan ipulisay yo so balang sakey a kasalanan, a saya so maininomay a mangulo ed sikayo, a saya so mañgisiñger a mañgipaldeg ed sikayo ed kadederal, on, ondago kayo tan onla kayo, tan ipanengneng yo ed Dios yo a sikayo so siaabuloy a mambabawi ed saray kasalanan yo tan onloob ed paknaan ed sikato a sumpalen yo so saray gangan to, tan tasian yo ed sikato ed saya ya agew ed panamegley na iakar yo ed saray danum na panagbiniagan.

16 Tan siopaman a mangawa ed saya, tan manumpal ed saray gangan na Dios manlapu ed natan, sikato met lamlamang so makanunot ed saray imbagak ed sikato, on, nanunotan to ya imbagak ed sikato, a sikato so nawalaan na andi-angaan a bilay, unong ed pamaneknek na Masanto ya Espiritu, a sikato so mampapaneknek ed siak.

17 Tan natan inararok a kaagian, manisia kayo kasi ed saraya a beñgatla? Nia, ikuan ko ed sikayo, on, kabat ko a manisia kayo ed saraya; tan say señgegan a kabat ko a saraya so panisiaan yo so lapu ed panañgipalikna na Espiritu a wala ed siak. Tan natan lapu ed say pananisia yo so mabiskeg nipaakar ed saman, on, nipaakar ed saray beñgatla a sinalitak, baleg so gayagak.

18 Tan unong ed asalitak ed sikayo a nanlapu la ed gapo, ya awalaan ak na baleg a pilalek ya angapo kayo ed kipapasen na magulo a kanunotan, siñga saray kaagian yo, angan ontan ed saray arumog ko a pilalek so asumpal.

19 Lapu ed apatnagan ko a wala kayo ed saray basbas na inkamatunong; apatnagan ko a wala kayo ed dalan ya ompugta ed panarian na Dios; on, apatnagan ko a pepeteken yo so saray basbas to.

20 Apatnagan ko a nipakabat ed sikayo, ed panamegley na paneknek na saray salita to, ya ag to nayarian so manakar ed pikewet a basbas; ni say mañguman ed antokaman a sinalita to; ni say wala ed sikato so antokaman ya anino ya oniwas manlapu ed kawanan a mampakawigi, odino manlapu ed tua ya onarap ed aliwa; dia ed ontan say kurang to so sakey ya andi-angaan.

21 Tan sikato so ag manayam ed aliwan masanto a templo; ni say karutakan odino antokaman a beñgatla ya ag-malinis so naawat ed panarian na Dios; dia ed ontan ikuan ko ed sikayo say panaon onsabi, on, tan saya dia ed sampot ya agew, a siopaman a marutak so magnayon ed karutakan to.

22 Tan natan inararok a kaagian, imbagak so saraya a beñgatla ed sikayo pian bañgonen takayo ed pakalikna na saray nakaukolan a sumpalen yo ed Dios, pian sikayo so mankurang ya angapo so tetel ed imaton to, pian mankurang kayo unong ed masanto a gangan na Dios, a dia ed saya so akaawatan yo.

23 Tan natan pirawat ko a sikayo so mampaabeba, tan matoluk tan maoyamo; mainomay a bilinen; napno na anos tan andukey a panagtepel; kabkaabigan ed amin a beñgatla; maseet ed pananumpal ed saray gangan na Dios ed amin a panaon; lawas onkerew ed antokaman a beñgatla a nakaukolan yo, mandapag dia ed maespiritu tan dia ed laman; lawas misalamat ed Dios ed antokaman a beñgatla a naawat yo.

24 Tan manseet kayo a nawalaan kayo na pananisia, ilalo, tan panañgasi, tan dia ed ontan wala ed sikayo so dakel a maong a kimey.

25 Tan say Katawan bendicionan to kayo, tan asikasoen yo so saray kawes yo a lawas ya angapo so mansa to, pian dia ed sampot sikayo so naawit ya onyurong a kaiba di Abraham, Isaac, tan Jacob, tan saray masanto profeta a sikara so wala la nanlapu ed gapo na mundo, tan saray kawes yo angapo so mansa angan siñga saray kawes da ya angapo so mansa, diman ed panarian na tawen ya ag la kapiganman ompaway.

26 Tan natan inararok a kaagian, imbalikas ko so saraya a salita ed sikayo unong ed Espiritu a nampaneknek ed siak; tan say kamareruak mapalalo a magayaga, lapu ed mapalalo a seet tan say imano ya initer yo ed saray salitak.

27 Tan natan, say kareenan na Dios so ondapo ed sikayo, tan dia ed saray kaaboñgan yo tan saray dalin yo, tan ed saray ayayep tan karnero yo, tan amin a kayarian yo, saray kaasawaan yo tan saray anak yo, unong ed pananisia tan saray maong a kimey yo, manlapu ed saya a panaon tan anga ed ando la ya ando. Tan onia so impansalitak. Amen.