1 O lenei sa oo ina ua iloa e i latou o sa Lamanā o ē na o atu e tau faasaga ia sa Nifaē, ina ua mavae a latou taumafaiga e tele e faaumatia i latou, ua lē aoga lo latou saili e faaumatia i latou, sa latou toe foi i le laueleele o Nifae.

2 Ma sa oo ina sa feita tele sa Amalekā, ona o le toatele o i latou ua maliliu. Ma ina ua latou vaai ua le mafai ona latou saili le taui ma sui mai ia sa Nifaē, sa amata ona latou faaoso tagata ia feita e faasaga i o latou uso, le nuu lea o Aneti-Nifae-Liae; o lea na latou toe amata ai ona faaumatia o i latou.

3 O lenei sa toe mumusu ia tagata e fetagofi i a latou auupega o taua, ma sa latou tuu atu i latou lava ia fasiotia e tusa ma manao o o latou fili.

4 O lenei ina ua vaai atu Amona ma ona uso i lenei galuega o le faafanoga i totonu o i latou o ē sa sili ona pele ia te i latou, ma i totonu o i latou o ē sa sili ona pele ia te i latou,—ona sa latou tausi ia te i latou e pei i latou o ni agelu na auina mai e le Atua e laveai i latou mai le faafanoga e faavavau—o lea, ina ua vaai atu Amona ma ona uso i lenei galuega o le faafanoga tele, sa ootia i latou i le mutimuti alofa, ma sa latou fai atu i le tupu:

5 Ia tatou faapotopoto faatasi lenei nuu o le Alii, ma ia tatou o ifo i le laueleele o Sara’emila i o matou uso o sa Nifaē, ma tatou sosola ese mai lima o o tatou fili, ina ia le faaumatiaina i tatou.

6 Peitai sa fai mai le tupu ia te i latou: Faauta, o le a faaumatia i matou e sa Nifaē, ona o le fasioti tagata ma agasala e tele sa matou faia ia te i latou.

7 Ma sa fai atu Amona: O le a ou alu ma ole atu i le Alii, ma afai e fetalai mai o ia ia te i tatou, ia tatou o ifo i o matou uso, pe tou te o ea?

8 Ma sa fai mai le tupu ia te ia: Ioe, afai e fetalai mai le Alii ia te i matou e o, o le a matou o ifo i o tatou uso, ma o le a avea i matou ma a latou pologa seia oo ina matou toe faalelei atu ia te i latou mo le fasioti tagata ma agasala e tele na matou faia ia te i latou.

9 Peitai sa fai atu Amona ia te ia: Ua tetee i le tulafono a o matou uso, lea na faatūina e lo’u tamā, e faapea e le tatau ona i ai ni pologa i totonu ia te i latou; o lea ia tatou o ifo, ma faalagolago i le alofa mutimutivale o o matou uso.

10 Peitai sa fai mai le tupu ia te ia: Ole atu i le Alii, ma afai e fetalai mai o ia ia te i matou e o, o le a matou o; a leai o le a matou fano pea i le laueleele.

11 Ma sa oo ina alu atu Amona ma ole i le Alii, ma sa fetalai mai le Alii ia te ia:

12 Aveese atu i fafo lenei nuu mai lenei laueleele, ina ia le fano i latou; ona ua malosi tele le uumau a Satani i loto o sa Amalekā, o ē ua faaosoina sa Lamanā ia feita i o latou uso, ia fasioti ia te i latou; o lea ia e alu ese atu ai mai lenei laueleele; ma amuia lava lenei nuu i lenei tupulaga, ona o le a ou faasaoina i latou.

13 Ma o lenei sa oo ina alu atu Amona ma ta’u atu i le tupu upu uma na fetalai mai ai le Alii ia te ia.

14 Ma sa latou faapotopoto faatasi o latou tagata uma, ioe, tagata uma o le Alii, ma faapotopoto faatasi a latou lafu ma fagaga uma, ma o ese atu mai le laueleele, ma o mai i le vao lea sa vavae ai le laueleele o Nifae mai le laueleele o Sara’emila, ma o a’e latalata i tuaoi o le laueleele.

15 Ma sa oo ina fai atu Amona ia te i latou: Faauta, o a’u ma o’u uso o le a matou o atu i le laueleele o Sara’emila, ae o le a outou faatali atu iinei seia matou foi mai; ma o le a matou tofotofoina loto o o matou uso, pe latou te loto ia outou o mai i lo latou laueleele.

16 Ma sa oo ina a’o alu atu Amona i le laueleele, sa feiloai o ia ma ona uso ma Alema, i le nofoaga lea sa ta’ua; ma faauta, o se feiloaiga olioli tele lenei.

17 O lenei sa matuā tele lava le olioli o Amona sa oo ina faatumulia o ia; ioe, sa faatumulia o ia i le olioli i lona Atua, sa oo ina uma lona malosi; ma sa toe pa’ū ifo ai o ia i le eleele.

18 O lenei pe le o le olioli tele ea lenei? Faauta, o le olioli lenei e le maua e se tasi, vagana ai lē ua salamo faamaoni ma lē ua saili mo le fiafia ma le lotomaualalo.

19 O lenei sa matuā tele moni lava le olioli o Alema i le feiloaiga ma ona uso, ma le olioli foi o Arona, ma Ominea, ma Himinae; peitai faauta, sa lē sili atu lo latou olioli nai lo latou malolosi.

20 Ma o lenei sa oo ina toe taitai atu e Alema ona uso i tua i le laueleele o Sara’emila; i lona lava fale. Ma sa latou o atu ma faamatala atu i le faamasino sili mea uma na oo ia te i latou i le laueleele o Nifae, i totonu o o latou uso, o sa Lamanā.

21 Ma sa oo ina auina atu e le faamasino sili se folafolaga i le laueleele atoa, e fia iloa le leo o le nuu e uiga i le faatagaina o o latou uso, o ē o tagata o Aneti-Nifae-Liae.

22 Ma sa oo ina oo mai le leo o le nuu, fai mai: Faauta, o le a tatou tuu atu le laueleele o Seasona, lea o loo i le itu i sasae o le sami, lea ua sosoo ma le laueleele o Nuumau, lea o loo i le itu i saute o le laueleele o Nuumau; ma o le laueleele lenei o Seasona o le laueleele lea o le a tatou tuu atu i o tatou uso mo so latou tofi.

23 Ma faauta, o le a tatou tuu a tatou autau i le va o le laueleele o Seasona ma le laueleele o Nifae, ina ia mafai ona tatou puipui o tatou uso i le laueleele o Seasona; ma o le a tatou faia lenei mea mo o tatou uso, ona o lo latou matata’u e faaaoga auupega o taua e faasaga i o latou uso ne’i o latou faia le agasala; ma ua oo mai ia te i latou lenei mata’u tele ona o lo latou salamo tiga tele lea na oo ia te i latou, ona o le tele o lo latou fasioti tagata ma lo latou amio leaga matautia.

24 Ma o lenei faauta, o le a tatou faia lenei mea mo o tatou uso, ina ia mafai ona fai mo o latou tofi le laueleele o Seasona; ma o le a tatou puipuia i latou mai i o latou fili i a tatou autau, pe afai latou te tuu mai ia te i tatou se vaega o a latou mea e fesoasoani ia te i tatou ina ia mafai ona tatou tausia a tatou autau.

25 O lenei, sa oo ina ua faalogo atu Amona i lenei mea, sa foi atu o ia i le nuu o Aneti-Nifae-Liae, ma Alema foi faatasi ma ia, i le vao, i le mea sa faatutū ai o latou faleie, ma faailoa atu ia te i latou nei mea uma. Ma sa faamatala atu foi e Alema ia te i latou e uiga i lona liuaina, faatasi ma Amona ma Arona, ma ona uso.

26 Ma sa oo ina o lenei mea na oo ifo ai le olioli tele i totonu o i latou. Ma sa latou o atu i le laueleele o Seasona, ma avea le laueleele o Seasona e fai mo i latou; ma sa ta’ua i latou e sa Nifaē o le nuu o Amona; o lea na iloga ai i latou i lena igoa mai lena lava taimi.

27 Ma sa i ai i latou i totonu o le nuu o Nifae, ma faitauina foi i totonu o tagata o ē sa auai i le ekalesia a le Atua. Ma sa iloga foi i latou i lo latou finafinau i le Atua, ma i tagata foi; ona sa latou faamaoni atoatoa ma amiotonu i mea uma; ma sa latou mausali i lo latou faatuatua ia Keriso, e oo i le iuga.

28 Ma sa latou manatu i le faamasaaina o le toto o o latou uso ma le inoino tele; ma sa le mafai lava ona faatauanauina i latou ia fetagofi i auupega o taua e faasaga i o latou uso; ma sa latou le vaai lava i le oti ma sina fefe, ona o lo latou faamoemoe ma manatu e uiga ia Keriso ma le toetutū; o lea, ia te i latou lava, ua faatoilaloina le oti i le manumalo ai o Keriso i ona luga.

29 O lea, na latou tuu ai le oti ia oo mai ia te i latou i le ala sili ona leaga ma tiga e mafai ona faia e o latou uso, ae latou te le’i ave le pelu po o le simetea e taia ai i latou.

30 Ma sa faapea ona avea o i latou ma tagata finafinau ma faapelepele, o se nuu e alofagia tele o le Alii.