1 Bheka, manje kwenzeka ukuthi lawo maLamani athukuthela kakhulu ngoba ayebulele abafowabo; ngakho-ke afungela impindiselo kumaNefi; futhi awazange esenza mizamo nanini yokuthi abulale abantu baka-Anti-Nefi-Lehi ngaleso sikhathi.

2 Kodwa athatha amabutho awo futhi ahamba awelela emingceleni yezwe lakwa Zarahemla, futhi ahlasela abantu ababesezweni lakwa-Amoniha futhi bababulala.

3 Futhi emva kwalokho, aba nezimpi eziningi namaNefi, kuzo aqhutshwa futhi abulawa.

4 Futhi phakathi kwamaLamani ayebulewe kwakukhona cishe yonke inzalo ka-Amuloni kanye nabafowabo, ababengabaphristi bakaNowa, futhi babulawa ngezandla zamaNefi;

5 Futhi abasalayo, sebebalekele ehlane elisempumalanga, futhi sebezithathele amandla kanye negunya phezu kwamaLamani, benza ukuthi abaningi bamaLamani bafe ngomlilo ngenxa yenkolo yabo—

6 Ngokuba abaningi bawo, emva kokuthi esebe nokulahlekelwa okukhulu kanye neziningi kakhulu izinhlupheko, aqala ukuphehlelwa ekukhumbuleni amazwi u-Aroni kanye nabafowabo ababewashumayele kubo ezweni lawo; ngakho-ke aqala ukungawakholwa amasiko oyise, futhi akholwa eNkosini, futhi nokuthi yanikeza amandla amakhulu kumaNefi; futhi ngaleyondlela kwabakhona abaningi bawo abaphenduka ehlane.

7 Futhi kwenzeka ukuthi labo babusi ababeyinsalela yabantwana bakwa-Amuloni benza ukuthi babulawe, yebo, bonke labo ababekholelwa kulezi zinto.

8 Manje lokhu kufela ukholo kwenza ukuthi abaningi babafowabo baphehlelwe entukuthelweni; futhi kwaqala ukuthi kube khona umbango ehlane; futhi amaLamani aqala ukuzingela inzalo ka-Amuloni kanye nabafowabo futhi aqala ukuyibulala; futhi babalekela ehlane elisempumalanga.

9 Futhi bheka basazingelwa nangalolusuku ngamaLamani. Ngaleyondlela amazwi ka-Abinadi agcwaliseka, awasho mayelana nenzalo yabaphristi abenza ukuthi ezwe ukufa ngomlilo.

10 Ngokuba wathi kubo. Lokho eniyokwenza kimi kuyokuba wuhlobo lwezinto eziyokwenzeka.

11 Manje u-Abinadi wayengowokuqala owezwa ukufa ngomlilo ngenxa yokukholwa kwakhe kuNkulunkulu; manje yilokhu ayekuqondile, ukuthi abaningi bayokuzwa ukufa ngomlilo, njengoba naye akuzwa.

12 Futhi washo kubaphristi bakaNowa ukuthi inzalo yabo iyokwenza abaningi ukuthi babulawe, ngendlela efanayo njengoba kwenziwa nakuye, futhi nokuthi bayohlakazeka ngaphandle futhi babulawe, ngisho njengezimvu ezingenamelusi zixoshwa futhi zibulawa yizilwane zasendle; manje bhekani, lamazwi agcwaliseka, ngokuba baxoshwa ngamaLamani, futhi bazingelwa, futhi bashaywa.

13 Futhi kwenzeka ukuthi ngesikhathi amaLamani ebona ukuthi ayengeke akwazi ukunqoba amaNefi abuyela futhi ezweni lawo; futhi amaningi awo eza azohlala ezweni lakwa-Ishmayeli kanye nasezweni lakwaNefi, futhi nempela azihlanganisa nabantu baNkulunkulu, ababengabantu bakwa-Anti-Nefi-Lehi.

14 Futhi nawo ngokunjalo nempela azingcwaba izikhali zawo zempi, njengoba nabafowabo babenzile, futhi aqala ukuthi abe ngabantu abalungile; futhi ahamba ezindleleni zeNkosi, futhi aqaphela ukuthi agcine imiyalelo kanye nemithetho yayo.

15 Yebo, futhi nempela bawugcina umthetho kaMose; ngokuba kwakufanele ukuthi bawugcine umthetho kaMose okwangaleso sikhathi, ngokuba kwakungakagcwaliseki konke. Kodwa nakuba wawukhona umthetho kaMose, babheka phambili ekuzeni kukaKristu, bebona ukuthi umthetho kaMose wakuyisibonakaliso sokuza kwakhe, futhi bekholwa ukuthi kufanele bagcine lezo zimiso zangaphandle kuze kube yisikhathi ayokwembulwa ngaso kubo.

16 Manje babengacabangi ukuthi ukusindiswa kwakuza ngomthetho kaMose; kodwa umthetho kaMose nempela wenza ukuthi ukholo lwabo kuKristu luqine; futhi ngaleyondlela nempela baligcina ithemba ngokholo, elaliholela ekusindisweni kwaphakade, bethembele kuwo umoya wokuphrofetha, owakhuluma ngalezo zinto ezazizokwenzeka.

17 Manje bhekani, u-Amoni, no-Aroni, no-Omineri, noHimini, kanye nabafowabo bajabula kakhulu, ngempumelelo ababanayo phakathi kwamaLamani, bebona ukuthi iNkosi yayibanikezile njengokwemi khuleko yabo, futhi nokuthi phezu kwalokho yaliqinisekisa izwi layo kubo ngayo yonke indlela.