1 Natan, legan a si Ammon so mambabañgat ed saray totoo nen Lamoni ya andi-tonda, ompawil itayo ed say pakatungtoñgan a nipaakar ed si Aaron tan saray kaagian to; lapu ed kayari na intaynan da ed dalin na Middoni sikato so intunton na Espiritu ed dalin na Nephi, angan dia ed abong na ari a mañguoley ed amin a sakop na dalin likud labat ed dalin na Ishmael; tan sikato so ama nen Lamoni.

2 Tan agawa a sikato so linma ed loob na palacio na ari, a kaolop to so saray kaagian to, tan sikato so yinmuko ed arap na ari, tan inkuan to ed sikato: Nengneng mo, O ari, sikami so kaagian nen Ammon, ya impaway mo ed pañgawan.

3 Tan natan, O ari, no iligyas mo so saray bilay mi, sikami so manmaliw ya igagangan mo. Tan say ari inkuan to ed sikara: Alagey kayo, lapu ed iabuloy ko ed sikayo so saray bilay yo, tan ag ko nitepel a sikayo so manmaliw ya igagangan ko; balet ipasuot ko a sikayo so mantalima ed siak; lapu ed siñga nagugulo so kanunotan ko lapu ed inkabunlok tan kinabaleg na saray salita nen agi yo a si Ammon; tan pilalek ko a nakabatan so señgegan no akin sikato so ag inmalis a pinmaway ed Middoni ya akiolop ed sikayo.

4 Tan si Aaron inkuan to ed ari: Nia, say Espiritu na Katawan tinawag to ed sananey a dalan: sikato so linma ed dalin na Ishmael, a mambañgat ed saray totoo nen Lamoni.

5 Natan say ari inkuan to ed sikara: Anto so saya ya imbagam a nipaakar ed Espiritu na Katawan? Nengneng mo, saya so beñgatla a kagoguloan ko.

6 Tan ontan met, anto so saman so imbaga nen Ammon—No sika so mambabawi sika so nilaban, tan no ag ka mambabawi, sika so nibantak ed kaunoran ya agew?

7 Tan si Aaron so inmebat ed sikato tan nankuan ed sikato: Manisia ka a wala so Dios? Tan say ari inkuan to: Kabat ko a saray Amalekite kuan da wala so Dios, tan inabuloyan ko ra a mañgipaalagey na saray pasen a panagpikasian, pian sikara so mantitipon a mañgigalang ed sikato. Tan natan no ibagam a wala so Dios, nia manisia ak.

8 Tan natan sanen nadñgel nen Aaron so saya, say puso to ginmapo a mangayaga, tan inkuan to: Nia, andi-duarua a legan a sika so mambibilay, O ari, wala so Dios.

9 Tan say ari inkuan to: Say Dios sikato kasi so Makapanyari ya Espiritu ya añgipaway ed kaamaan tayo ed dalin na Jerusalem?

10 Tan si Aaron inkuan to ed sikato: On, sikato so saman so Makapanyari ya Espiritu, tan pinalsa to so amin a beñgatla mandapag dia ed tawen tan dia ed dalin. Manisia ka ed saya?

11 Tan inkuan to: On, manisia ak a saman so Makapanyari ya Espiritu so amalsa ed amin a beñgatla, tan pilalek ko ya ibagam ed siak so nipaakar ed saraya ya amin a beñgatla, tan manisia ak ed saray salitam.

12 Tan agawa a sanen anengneng nen Aaron a say ari so manisia ed saray salita to, ginapoan to manlapu ed impamalsa ed Adan, a binasa to so saray masanto a kasulatan ed ari—no panon a say Dios pinalsa to so too unong ed dili ya indeñgan to, tan say Dios initer to ed sikato so saray gangan, tan lapu ed impankasalanan to, say too so nigapol.

13 Tan si Aaron impaliwawa to ed sikato so saray masanto a kasulatan manlapu ed impamalsa ed si Adan, imbaga to ed sikato so inkigapol na too, tan say minomundo a kipapasen da tan ontan met ed say plano na pakadundon, a saya so niparaan nanlapu la ed inletneg na mundo, ed panamegley nen Cristo, ya onkana ed amin a siopaman a manisia ed ñgaran to.

14 Tan lapu ed say too so nigapol ag to nagamoran so pankaabigan to ed inkasikato a dili; balet saray irap tan ipatey nen Cristo so mamaandi ed saray kasalanan da, ed panamegley na pananisia tan pambabawi, tan arum ni; tan inukbar to so balor na patey, kanian say lubok ag la ontaluna, tan say otot na patey akmonen la na ilalo ed gloria; tan si Aaron impaliwawa to so saraya ya amin ed ari.

15 Tan agawa a kayari ya impampaliwawa nen Aaron so saraya a beñgatla ed sikato, say ari inkuan to: Anto so gawaen ko pian nawalaan ak na saya ya andi-angaan a bilay a sinalitam? On, anto so gawaen ko pian siak so nianak ed Dios, pian saya so mauges ya espiritu so nabagot ed pagew ko, tan naawat ko so Espiritu to, pian siak so napano na gayaga, pian ag ak nibantak ed kaunoran ya agew? Nia, inkuan to: Iter ko so amin a kayarian ko, on, taynanan ko so panarian ko, pian naawat ko so saya so baleg a gayaga.

16 Balet si Aaron inkuan to ed sikato: No say pilalek mo so saya a beñgatla, no sika so ontewek ed Dios, on, no sika so mambabawi ed saray amin a kasalanan mo, tan onyuko ka ed arap na Dios, tan ontawag ka ed ñgaran to ed pananisia, a manisia ka a saya so naawat mo, dia ed ontan naawat mo so ilalo a saya so pilalek mo.

17 Tan agawa a sanen nibaga la nen Aaron so saraya a salita, si ari so tinmewek ed Katawan, a tinmalimukor; on, iñgen intikleb to so inkasikato ed dalin, tan nampikasi a masimuon, a nankuan:

18 O Dios, si Aaron imbaga to ed siak a wala so Dios; tan no wala so Dios, tan no sika so Dios, ipakabat mo pa so inkasika ed siak, tan ibantak ko so amin a kasalanan ko pian nakabat taka, tan siak so ombañgon a manlapu ed saray inaatey, tan siak so nilaban ed kaunoran ya agew. Tan natan sanen si ari nibaga to so saraya a salita, sikato so siñga inatey.

19 Tan agawa a saray igagangan to so binmatik tan imbalita da ed reyna so agawa ed ari. Tan sikato so linma a linmoob ed kawalaan na ari, tan sanen sikato so anengneng to ya akarukol a siñga inatey, tan si Aaron tan saray kaagian to so wala diman ya akaalagey a siñga sikara so akaseñgeg na inkatumba to, sikato so nampasnok ed sikara, tan ingangan to ed saray igagangan to, odino ed saray igagangan na ari, a sikara so alaen da tan pateyen da ra.

20 Natan saray igagangan anengneng da so señgegan na inkatumba na ari, dia ed ontan ag da labay ya idiwit so saray lima da ed si Aaron tan saray kaagian to; tan akikasi ra ed reyna a kuan da: Akin igangan mo kami a pateyen mi so saraya a totoo, tan nia say sakey ed sikara so lalo a makapanyari nen say sikami ya amin? Dia ed ontan sikami so niparukol ed arapan da.

21 Natan sanen say reyna anengneng to so takot na saray igagangan sikato met so ginmapo ya ontakot a mapalalo, ag la piga wala so mauges ya onsabi ed sikato. Tan ingangan to ed saray igagangan to a sikara so onla tan tawagen da so saray totoo, pian sikara so mamatey ed si Aaron tan saray kaagian to.

22 Natan sanen anengneng nen Aaron so peleng na reyna, sikato, lapu ed amta to met so awet na puso na saray totoo, pinmaga ompano say karaklan so mantitipon ed inkasikara, tan agawa so baleg a baliñgaan tan sakey a gulo ed limog da; dia ed ontan iniunat to so lima to tan impaalagey to so ari manlapu ed dalin, tan inkuan to ed sikato: Alagey ka. Tan sikato so inmalagey ed saray sali to, a pinmawil so kasil to.

23 Natan saya so agawa ed imaton na reyna tan dakel ed saray igagangan. Tan sanen saya so anengneng da sikara so mankelaw a mapalalo, tan ginapoan da so ontakot. Tan say ari tinmalindeg, tan ginapoan to ra a puloñgan. Tan sikato so nampulong ed sikara, a lapu ed saya say amin a kabubong to so apasimbalo ed Katawan.

24 Natan wala so sakey ya olop so nantitipon lapu ed gangan na reyna, tan ginmapo so baleg a panmere-mere ed limog da makaseñgeg ed si Aaron tan saray kaagian to.

25 Balet say ari tinmalindeg ed limog da tan sikato so nampulong ed sikara. Tan sikara so dinmeen nipaakar ed si Aaron tan saray kaagian to.

26 Tan agawa a sanen anengneng na ari a saray totoo so dinmeen, kinaukolan to a si Aaron tan saray kaagian to so onalagey ed limog na karaklan, tan ipulong da so salita ed sikara.

27 Tan agawa a say ari añgipaakseb na sakey a gangan ed amin a sakop na saman a dalin, ed limog na saray totoo to a wala ed nasasakopan na amin a dalin to, a wala ed amin a pasen ed kaliber-liber, a miketegan anga ed dayat, ed bokig tan dia ed sagur, tan saya so nankadua manlapu ed dalin na Zarahemla dia ed makisir a kalawakan, a manlapu ed dayat a banda ed bokig anga ed dayat a wala ed banda ed sagur, tan dia ed piketegan ed gilig na dayat, tan dia ed piketegan ed kalawakan a baybay na dalin na Zarahemla, ya ombeltang ed saray ketegan na Manti, dia ed uloan na ilog na Sidon, manlapu ed bokig a mamaarap ed sagur—tan dia ed onia saray Lamanite tan saray Nephite so naapag.

28 Natan, say dakel a kabiañgan na mañgiras ed saray Lamanite so manayam ed kalawakan, tan manaayam ira ed saray abong-abong ya abel; tan sikara so nitayak ed kalawakan ed sagur, ed dalin na Nephi; on, tan ontan met ed sagur ed dalin na Zarahemla, dia ed ketegan ed gilig na dayat, tan dia ed sagur na dalin na Nephi, dia ed pasen na unaan a tawir na kaamaan da, tan dia ed onia miketeg ed gilig na dayat.

29 Tan ontan met dakel so saray Lamanite ed gilig na dayat ed bokig, a diman ira sinunson na saray Nephite. Tan dia ed onia saray Nephite so ñgalñgali ra aliber na saray Lamanite; manwari ya ontan saray Nephite so mambebemben na amin a lapag a wala ed baybay na dalin a miketeg ed kalawakan, dia ed uloan na ilog na Sidon, manlapu ed bokig ya anga ed sagur, a mamaliber ed kalawakan; dia ed baybay, anga ed impakasabi ra ed saman a dalin a tatawagen da na Bountiful.

30 Tan saya so miketeg ed dalin a tatawagen da na Apalis, a saya so niarawi ed mamabaybay anga ed sabien to so dalin a saya so atooan nen saman balet sikara so aderal, a saray pokel da so asalitak la, a sikara so asukayan na saray totoo na Zarahemla, lapu ed saya so pasen na inmuna a sinakbitan da.

31 Tan sikara so nanlapu diman a linma ed abalaten na kalawakan. Dia ed onia say dalin a mamabaybay so tinawag da na Apalis, tan say dalin a wala ed mamaabalaten so tinawag da na Bountiful, lapu ed saya so kalawakan a napno na amin a nengneng na atap ya ayayep, a say kabiañgan na saraya so nanlapu ed dalin ya onarap ed baybay a mananap na kanen da.

32 Tan natan, say kaarawi to so sakey ya agew tan kapaldua no baroyen na sakey a Nephite, ed angaan na dalin na Bountiful tan dalin na Apalis, manlapu ed bokig a mamaarap ed sagur a dayat; tan dia ed onia say dalin na Nephi tan say dalin na Zarahemla so ñgalñgali aliber na danum, lapu ed wala so melag a nipabeklew a dalin ed nanleetan na dalin a wala ed baybay tan say dalin a wala ed abalaten.

33 Tan agawa a saray Nephite tinooan da so dalin na Bountiful, manlapu ed bokig ya anga ed sagur a dayat, tan dia ed onia saray Nephite ed panamegley na kakabatan da, kaiba ra so saray taga-bantay tan saray ñgayew da, sineldet da so saray Lamanite ed abalaten, dia ed onia angapo so kayarianen da ed baybay, pian ag da la deralen so dalin a wala ed baybay.

34 Dia ed ontan saray Lamanite angapo la so dalin a kayarianen da ed dalin na Nephi, tan say kaliber-liber na kalawakan. Natan saya so kakabatan ed saray Nephite—tan saray Lamanite so kabusol da, lapu ed ag da la nitepel so saray panagpairap na balang sakey a lima, tan ontan met pian nawalaan ira na bansa a nayarian da a batikan, unong ed saray pilalek da.

35 Tan natan siak, kayarik ya imbaga so saya, pawilen ko lamet so pakatungtoñgan nipaakar ed si Ammon tan Aaron, Omner tan Himni, tan saray kaagian da.