1 Ha koʼág̃a péina ápe, che joykeʼykuéra ahayhuetéva, añeʼẽta peẽme; ha che, Nefi, ndaipotái peimoʼã penderekojojaveha umi gentil-kuéra haʼetaháichagui. Ha péina ápe, peneñeʼẽrenduʼỹramo umi Tupã rembiapoukapýre añetehápe opavave pemanótante avei; ha umi ñeʼẽ ojeʼevaʼekuére peẽ napeimoʼãivaʼerã umi gentil-kuéra oñehundipataha.

2 Ha péina ápe, haʼe peẽme opavave umi gentil apytégui oñearrepentíva haʼe Ñandejára konvénio tavayguakuéra; ha opavave judio-kuéra noñearrepentíriva oñemombóta; ha katu Ñandejára ndojapói konvénio avave ndive ndahaʼéiramo umi oñearrepentíva ndive ha ogueroviáva Itaʼýrape, haʼéva pe Israel-pegua Imarangatúva.

3 Ha koʼág̃a aprofetisaseve peẽme judío ha gentil-kuéragui. Ha osẽ rire pe kuatiañeʼẽ añeʼẽhague, ha ojehai rire gentil-kuérape, ha ojesella jey Ñandejára rembipotápe, oĩta heta ogueroviátava umi ñeʼẽ ojehaíva; ha haʼekuéra ogueraháta umíva ñane ñemoñare rembyrépe.

4 Ha upérõ ñane ñemoñare rembyre oikuaáta ñandehegui; mbaʼéichapa ñasẽvaʼekue Jerusalén-gui, ha haʼekuéra haʼeha judio-kuéra ñemoñare.

5 Ha Jesucristo evanhélio oñemomarandúta ijapytepekuéra; upévare, oñemoʼĩjeýta chupekuéra ituvakuéra kuaapýpe, ha avei Jesucristo kuaapýpe, oĩvaʼekue ituvakuéra apytépe.

6 Ha upérõ ovyʼáta hikuái; oikuaátagui haʼeha chupekuéra peteĩ Tupã pógui jehovasa; ha pe ypytũ omoʼãva chupekuéra oñepyrũta hoʼa hesakuéragui; ha ohasa mboyve heta ñemoñareʼaty ijapytepekuéra, oikóta chuguikuéra tavayguakuéra potĩ ha ipotapyrãva.

7 Ha ojehúta judio-kuéra isarambíva oñepyrũta avei oguerovia Cristo-pe; ha oñepyrũta oñembyaty hikuái yvy ape ári; ha opavave ogueroviáva Cristo-pe oikóta avei chugui tavayguakuéra potapyrãva.

8 Ha ojehúta Tupã Ñandejára oñepyrũta hembiapo opa tetãnguéra, avaretãnguéra, ñeʼẽnguéra ha tavayguakuéra apytépe, omoĩjey hag̃ua itavayguakuérape yvy ári.

9 Ha tekojojápe ohusgáta Tupã Ñandejára imboriahúvape, ha jojápe oporojaʼóta umi hekomarangatúva yvy ári oĩva rehe. Ha haʼe oipyʼajopýta yvy ijurupegua várape; ha hembe pytúpe ojukáta iñañávape.

10 Ha pyaʼe og̃uahẽ ára Tupã Ñandejára ojapotaha peteĩ tuicha ñembojaʼo tavayguakuéra apytépe, ha ohunditaha iñañávape; ha oñongatúta itavayguakuérape, heẽ, ohundivaʼerã jepe iñañávape tata rupi.

11 Ha tekojoja haʼéta ilómo jokuaha, ha jeroviapy irriñón jokuaha.

12 Ha avei oikóta pe lóvo ovecha raʼy ndive, ha pe jaguarete kavara raʼy ndive oñenóta; pe mymbaraʼy ha leõʼi ha mymbakyra oikóta oñondive, ha peteĩ mitã michĩ oisãmbyhýta chupekuéra.

13 Ha pe vaka ha ósa okarúta, imymbaraʼykuéra oñenóta oñondive; ha leõ hoʼúta guéicha kapiʼi.

14 Ha pe mitã kambu oñemboharáita mbói chumbe kuára ári, ha pe oñemomboʼoramóva opoʼẽta mbói raitýpe.

15 Nombyaimoʼãi ha nohundimoʼãi hikuái opa che yvyty marangatúpe; pe yvy henyhẽtagui Ñandejára jeikuaágui umi y ojahoʼiháicha pe yguasu.

16 Upévare, opa tetãnguéra mbaʼe ojeikuaáukáta; heẽ, opa mbaʼe ojeikuaaukáta yvypóra raʼykuérape.

17 Ndaipóri mbaʼeve mbaʼeñemi ndojeikuaaukáitava; ndaipóri tembiapo pytũmbypegua nosẽitava tesapépe; ha ndaipóri mbaʼeve ojeselláva yvy ári ndojejoráitava.

18 Upévare, opa mbaʼe ojehechaukavaʼekue yvypóra raʼykuérape ojehechaukáta upe árape; ha Satana ndaipuʼakamoʼãvéima yvypóra raʼykuéra korasõre, heta ára pukukue. Ha koʼág̃a, che joykeʼykuéra ahayhuetéva, ambopaha che ñeʼẽ.