1 I tur e kosnan aki mi tata a mira, i skucha, i papia, miéntras e tabata biba den un tènt, den e vaye di Lemuel, i tambe hopi otro kos mas, kual no por wòrdu skirbí riba e planchanan aki.

2 I awor, manera mi a papia konserniente e planchanan aki, mira nan no ta e planchanan riba kual mi ta hasi un relato kompletu di e historia di mi pueblo; pasobra e planchanan riba kual mi ta hasi un relato kompletu di mi pueblo mi a duna e nòmber di Nefi; pues, nan ta yamá e planchanan di Nefi, segun mi propio nòmber; i e planchanan aki tambe ta wòrdu yamá e planchanan di Nefi.

3 Sin embargo, mi a risibí un mandamentu di Señor ku mi mester traha e planchanan aki, pa e propósito spesial ku lo mester tin un relato grabá di e ministerio di mi pueblo.

4 Riba e otro planchanan lo mester tin grabá un relato di e reinado di reinan, i e gueranan i kontenshonnan di mi pueblo; pues e planchanan aki ta pa un gran parti di e ministerio; i e otro planchanan ta pa un gran parti di e reinado di e reinan i e gueranan i kontenshonnan di mi pueblo.

5 Pues, Señor a manda mi pa traha e planchanan aki pa un propósito sabio den dje, kual propósito mi no sa.

6 Pero Señor sa tur kos for di komienso; pues, el a prepará un kaminda pa kumpli tur su obra entre e yunan di hende; pasobra mira, e tin tur poder den e kumplimentu di tur su palabranan. I asina ta. Amèn.