Faaolaina o La’u Pisinisi: O Lo’u Faavae: Saili e Aoaoina: Filifili Poo Fea E te Agai i ai ma Pe Faapefea ona Oo iai iina,” Amataina ma le Faaolaina o La’u Pisinisi mo le Ola Tutoatasi (2017)
“Faaolaina o La’u Pisinisi: O Lo’u Faavae: Saili e Aoaoina: Filifili Poo Fea O E Agai i ai ma Pe Faapefea ona Oo ai Iina”
E faapefea e le aoaoina ona fatuina avanoa?
“Aoaoga mo se Olaga Sili,” o lo o maua i le srs.lds.org/videos (A e pe a le maua le vitio? Faitau le tusiga o lo o maua i le faaiuga o lenei vaega.)
O le a le mea na manao ai Elder Joseph W. Sitati ina ua 13 ona tausaga? O le a le mea sa ia faia i ai?
Mataupu Faavae ma Feagaiga 88:118–19 ma le upusii mai ia Peresitene Gordon B. Hinckley.
Laasaga 1: Faitau le upusii mai ia Peresitene Henry B. Eyring.
“Aioi atu ina ia faaali mai e le Agaga ia te oe mea e finagalo le Alii e te faia. Fuafua e fai. Folafola atu ia te Ia e usiusitai. Galue ma le naunautai seia oo ina e faia le mea ua Ia poloai mai ai. Ona tatalo ai lea … ma ia iloa po o le a le isi mea e tatau ona e faia.”
“Galue i le Maelega Atoatoa,” Ensign po o le Liahona , Me 2010, 63.
O loo i ai se fuafuaga a le Alii mo oe. Ua Ia faamanuiaina oe i meaalofa ma taleni faapitoa lea e faataga ai oe e avea ma soo se mea e Na te finagalo e te avea ai. E mafai ona e faataunuuina lau misiona iinei i le fogaeleele pe afai e te filiga i le sailia ia malamalama ma usitai i Lona finagalo mo oe.
Laasaga 2: Tali fesili o lo o i lalo e amata ai le fatuina o lau vaaiga mamao po o le “misiona o le olaga.” Masalo o le a le lava se taimi e faamaea ai i le taimi nei, ae pau o lea ia tusi i lalo manatu autu. O le a mafai ona e toe teuteu ma faaleleia le savali a lau pisinisi i le lumanai.
O Le Misiona o Lo’u Olaga
O fea ou te manao ia i ai i le lima tausaga?
Aisea?
O a ni tomai, malamalama, po o aafiaga ou te manaomia ia oo ai iina?
Tautino atu e faia faatinoga nei i le faagasologa o le vaiaso.
Faamaea le gaoioiga o le “fausiaina o sini” ma le “sailia o se faufautua.”
Faamaea le tusia o lau fuafuaga o le “misiona o le olaga” ma talanoa ai ma lou aiga po o uo.
Fai atu i se tasi ia avea ma au fesoasoani ma faatulaga se taimi e feiloai ai.
Laasaga 1: Faitau le upusii mai ia Peresitene Howard W. Hunter. E ala i le galue agai atu i sini faamoemoeina, tatou te suia ai o tatou faamoemoega i ni faatinoga.
“O le talalelei lenei o le salamo, ma e tatau ona tatou salamo ma faaleleia. E moni, o le faagasologa o le salamo, faia o tautinoga, ma le faatulagaina o sini e tatau ona avea ma se mea e faifai pea. … Ou te fautuaina le faatinoga ia te oe.”
“The Dauntless Spirit of Resolution” (Brigham Young University devotional, Ian. 5, 1992), 2, speeches.byu.edu
O sini e tatau ona:
Ia patino ma mafai ona fuaina.
Ia tusia i lalo ma tuu i se mea e mafai ona e vaai iai i aso taitasi.
Ua faatulaga taimi e faamaea ai.
E manaomia ai le ausia o faatinoga patino.
Ia iloiloina, lipotia, ma toe faafou e le aunoa.
Laasaga 2: I se isi fasipepa, tusi ai ni sini se lua pe tolu o le a fesoasoani e te ausia ai le “misiona o lou olaga.” Mulimuli i le faataitaiga o lo o i lalo. Faapipii pepa i se mea e te vaai iai i aso taitasi.
Sini
Aisea?
Laasaga Faapitoa e Ausia ai le Sini
Faasologa o Taimi
O Ai Ou te Lipoti i Ai Lou Alualu i Luma?
FAATAITAIGA:
Faitau le Tusi a Mamona mo le 30 minute i aso taitasi.
Ina ia mafai ona ou maua le taitaiga i aso uma mai le Agaga Paia.
1. Ala i luga i le 6:30 i le taeao.
2. Faitau ae lei faia le taumafataga i le taeao.
3. Faamaumau lou alualu i luma i luga o se siata.
O le a ou iloiloa lou alualu i luma i po taitasi ae ou te lei moe.
O le a ou faasoa atu lau siata o le alualu i luma i se tasi o le aiga i Aso Sa taitasi.
Laasaga 1: Faitau le upusii mai ia Elder Robert D. Hales.
“I o’u tausaga o se talavou matua, sa ou sailia ai se fautuaga mai o’u matua ma mai faufautua faamaoni, ma faatuatuaina. O se tasi o se taitai perisitua; o le isi o se faiaoga na talitonu ia te a’u. … Ia saili ma le agaga tatalo ni faufautua o e o iai le manuia faaleagaga i o latou loto.”
“Fetaiai ma Luitau o le Lalolagi i Lenei Vaitaimi,” Ensign po o le Liahona , Nov. 2015, 46
Atonu e te manaomia se tasi o i ai le tele o tomai e tali au fesili—se tasi sa faia se mea e te manao e fai. O isi faufautua e mafai ona avea o ni uo amiotonu po o ni tagata o le aiga. O tagata nei e naunau e faaalu le tele o le taimi e faamalosiau ai oe e faia suiga i lou olaga ma tuu atu ia te oe e alualu i luma.
Laasaga 2: Mafaufau i le ituaiga o fesoasoani e te manaomia. Tusi se lisi o tagata e mafai ona avea ma au faufautua. Mafaufau loloto ma tatalo e uiga i lau lisi o igoa.
Laasaga 3: Tali fesili o lo o i lalo e amata ai se sootaga faafaufautua. Ina ia valaaulia se tasi ia avea ma au faufautua, e mafai ona tau lava o lou fai atu, “O lo o ou taumafai e faia se suiga i lo’u olaga. Pe e te manao e fesoasoani ia te a’u?”
O La’u Faufautua
O ai e te manao e avea ma au faufautua?
O le a se aso o le a e fai atu ai ia te ia e avea ma au faufautua?
O afea e mafai ona oulua feiloai ai e faasoa atu lau “misiona o le olaga” ma au sini?
E faafia ona e manao e te lua feiloai ma lau faufautua?
Laasaga 4: Ia manatua o oe lava e nafa ma lau “misiona o le olaga.” Pe a e feiloai i lau faufautua:
Toe iloilo lou alualu i luma.
Toe iloilo ni puniala i lou alualu i luma ma mea o lo o e faia e faatoilalo ai.
Ia faapitoa ona toe iloilo mea ua e fuafua e faia ae lua te lei toe feiloai ma lau faufautua.
Afai e le mafai ona e matamata i le vitio, filifili se tasi o le vaega e faitau le tusiga lenei.
Ata
Aoga mo se Olaga Sili Atu
Elder Joseph W. Sitati Ina ua 13 [ou tausaga] sa ou nofo ai i se itu maotua lava o Kenya. O tagata na laiti ni mea sa latou maua. Ae o i latou o e na foliga mai e gafatia mea na faamemelo i ai isi, o i latou na sa maua se aoaoga lelei. Na ou iloa ai o le aotauina o le ki lea i se olaga e sili atu.
Sa tumau pea le oo mai o le manatu ia te au ou te alu atu ma fai i le puleaoga i se tasi o aoga sa ou manao lava ia auai. Sa ou manaomia ai le uila a lou tama e faia ai lenei malaga lea na alu ai le afa o le aso. Ou te lei alu ese atu lava ma lou nuu. Ou te lei iloa pe faapefea ona tautala lelei i le faaperetania, ma o lenei puleaoga o se tamalii paepae. Ou te lei feiloai muamua pe talanoa sao i se tamalii paepae, o lea o se manatu taufaamatau lea.
Sa i ai se mea i totonu ia te au na tuleia au ma fai mai ia te au ou te faia lenei mea, lea na ou alu atu ai e asiasi i le puleaoga. A o ou vaai atu ia te ia sa ou iloa sa fai sina tei o ia e vaai i lenei tama talavou o lo o tu e pei o se fitafita i ona luma. Sa ia te ia ni fofoga agalelei, o lea sa oo mai ai ia te au le lototele. Sa ou tau atu ia te ia ou te matua manao lava e auai i lana aoga ma o le a ou fiafia pe a ia talia au. Ona ia fai mai lea, “Ia, sei o ta iloa pe a maua faaiuga o suega.” Sa ou fai atu, “Faafetai lava, i lau susuga.” I le itiiti ifo ma le fa minute sa ou i fafo mai le ofisa.
O na minute e fa na ou faaaluina i lena ofisa o ni taimi taua i lou olaga. Sa na o au le tamaitiiti aoga mai i lau aoga maualalo na filifilia i se tasi o aoga sili ona lelei i la matou eria. O le mea moni sa tuuina mai e lenei tamalii lelei ia te au lenei avanoa sa ou faafetai ai, ma sa uunaia au e taumafai ia avea ma se tamaitiiti aoga sili ona lelei i lau vasega.
Sa tatalaina e lena mea ni avanoa fou mo au e alu ai i se isi aoga lelei ma saunia ai mo le iunivesite. O lou aotauina na mafai ai ona ou maua lou toalua i le iunivesite. Sa mafai ai ona maua se galuega i le taulaga. A o nofo ai i Nairobi, sa ma maua ai se ulugalii faifeautalai sa valaaulia i maua i lo la aiga, lea sa latou faia ai ni fonotaga ma i latou o tagata o le Ekalesia. Ana ou le iai i Nairobi i lena taimi, semanu ou te le maua lava le talalelei. O le mea moni sa ou i ai i se galuega malupuipuia sa mafai ai ona ou auauna atu i le Ekalesia.
Ou te molimau atu o le aotauina o se ki lea i le ola tutoatasi. O le a tatala ai ni auala mo oe e mafai ai ona e saunia mo oe lava i le faaletino ma ola tutoatasi ai foi faaleagaga.