“Puleaina o Tupe Faaaoga o La’u Pisinisi: Aoao,” Amataina ma le Faaolaina o La’u Pisinisi mo le Ola Tutoatasi (2017)
“Puleaina o Tupe Fa’aaoga o La’u Pisinisi: Aoao”
Aoao
Taimi Aofai: 60 minute
1 . O le Eseesega o le Polofiti ma Tupe Faaaoga
Faitau:
Ua e aoao o le manuia o se pisinisi e manaomia ai le faamaumauina o faamatalaga i aso taitasi. O taimi uma e maua pe faaalu ai e lau pisinisi se tupe, e manaomia ona e faamauina. Ua e aoao foi le auala e fausiaina ai se faamatalaga o tupe maua, e iloa ai le aotelega o tupe mama (pe leiloa) ua ausia e lau pisinisi i se taimi faatulagaina. Polofiti ua faamatalaina o se tupe ua totoe mo lau pisinisi pe a maea ona toese mai au tupe faaalu mai au tupe maua.
E ui o le polofiti o se fua taua, e le na o le pau lea o se vaega e manaomia naua le uai atu iai o lou taimi o se tagata faipisinisi. Tupe faaaoga o se fua e taulai atu i le taimi o le feaveaiina o tupe i totonu ma fafo atu o lau pisinisi i aso taitasi. O le faagaoioiga o tupe o le toto ola lea o lau pisinisi. Afai ua iai se tupe faaagaaga o lau pisinisi, e mafai ona e tuliloa filifiliga e faaola, faafaigaluega, ma faasao tupe mo tulaga le maalofia po o faalavelave faafuasei.
E mafai ona faailoa mai e lau faamatalaga o tupe maua o lo o maua tupe a lau pisinisi, ae o le a gau pe afai e le lava tupe e totogi ai ana aitalafu o noatia ai. O le faaaogaina o tupe o se tasi o mafuaaga taua o le iuvale o pisinisi.
2 . Malamalama i Tupe Faaaoga
Faitau:
E lua ituaiga o tupe faaaoga:
Tupe faaaoga lelei e tupu pe a tele atu le aofai o tupe maua e lau pisinisi i se taimi faatulagaina i lo le aofai o le tupe faaalu e lau pisinisi i le taimi lava lea e tasi. O le mea lea e te manao iai: o le faataamilosaga o tupe faaaoga lelei.
Tupe faaaoga le lelei e tupu pe a tele atu le aofai o tupe faaalu e lau pisinisi i se taimi faatulagaina i lo le aofai o le tupe maua e lau pisinisi i le taimi lava lea e tasi. O se tulaga lamatia, ma le manaomia lea e ao ona e foia vave ma faatinoga e maua ai tupe i se auala vave ma faaitiitia ai tupe faaalu.
Sei o tatou iloilo i faataitaiga eseese e tolu ina ia malamalama ai i uunaiga faigata o tupe faaaoga ma le auala e foia ai e le tagata faipisinisi. Sei manatu ane pe afai e amata e se pisinisi le masina i le 300 o tupe. E masani e pisinisi ona maua le tupe e 200 i Aso Gafua taitasi ma le 200 i Aso Lulu taitasi. Nate totogi atu le 300 o tupe i Aso Faraile taitasi. Faataitaiga A o lo o i lalo o lo o faaalia ai le faataamilosaga o tupe faaaoga mo lenei pisinisi i le vaitaimi o le tolu vaiaso. E sau i totonu le tupe ma tafe atu i fafo o le pisinisi i se mamanu ua silafia lava.
Faataitaiga A: Manatu lelei atoatoa i tupe faaaoga
O le mea faigata, e aafia pisinisi uma i tulaga faateia ma faafitauli. Faataitaiga E o i lalo e iloa ai le mea e tupu pe a le saunia se pisinisi mo tupe faaaoga le lelei. I le tulaga lenei, e toalua tagata faatau ua le totogiina aitalafu, e tusa ma le 400 ua le mafai ona toe faaola (e taua foi o aitalafu leaga). Sa faamoemoe le faipisinisi i lenei tupe e totogi ai tagata faigaluega. Ua tulai nei foi i le pisinisi se tupe faaalu faafuasei e tatau ona totogi nei loa.
Faataitaiga E: Tupe faaaoga le lelei—le saunia
Faataitaiga I o lo o i lalo ua iloa ai mea faateia ma faafitauli lava e tasi e pei o le faataitaiga E. Ae i lenei tulaga, ua saunia le tagata faipisinisi. Ua faalagolago o ia i lana laina o aitalafu e tausia ai pea le faagaoioiga o lana pisinisi. Sa ia toe totogi le paleni i lana laina o aitalafu i le taimi vave lava.
Faataitaiga I: E ono ia ni tupe faaaoga le lelei—saunia
Talanoa:
O a mea o aoao mai e nei faataitaiga ia oe e uiga i luitau o le puleaina o tupe faaaoga?
Faitau:
E masani i tagata faipisinisi ona iai luitau o tupe faaaoga. O nisi o nei luitau e aofia ai:
-
O le fou o le pisinisi; e faigata ai ona talia ma totogi faaaitalafu.
-
O avanoa e ola ai, e mafai ai ona faaitiitia le aofai o tupe maua.
-
Faia o faamaumauga, ua taofia ai tupe.
-
Ua totogi faaaitalafu e tagata faatau, ua faatuai ai ona maua mai le aofai o tupe.
-
O le faatauina atu i isi pisinisi ua totogi faaaitalafu, ua faatuai ai ona maua mai le aofai o tupe.
-
O fefaatauaiga le tutusa ona o tulaga faavaitau ma isi mafuaaga, ua mafua ai le alu i luga ma ifo i lalo le aofai o tupe e te maua.
-
Tupe faaalu e le i fuafuaina
-
O le le totogiina o aitalafu e tagata faatau (aitalafu e le mafai ona toe faaola).
Talanoa:
O a luitau e ono e aafia ai e tusa ai ma tupe faaaoga a lau pisinisi?
3 . Auala e Faaleleia ai Tupe Faaaoga
Faitau:
E tele mea e mafai ona e fai e fausia ai se faataamilosaga lelei o au tupe faaaoga mo lau pisinisi ma saunia ai mo ni faateitei ma faafitauli e ono oo mai. Mo se faataitaiga, e mafai ona e suesue i tuutuuga o tupe totogi mo fale e gaosi ai au oloa. I nisi fale gaosi oloa, e mafai e tagata faatau atu ona faatali mo le 90 aso pe sili atu a o le i manaomia ona tuuina atu se totogi. O isi fale gaosi oloa e masani ona manaomia ona totogi i totonu o le 30 aso, Pe a e malamalama i le tuutuuga o tupe totogi mo le gaosiga o au oloa, ona e galue lea e fetuunai tulaga lelei mo lau pisinisi.
Talanoa:
E masani ona mananao tagata faipisinisi e maua pe ao mai tupe i le vave e mafai ai ae taofi le totogiina o tupe seia oo i le taimi e manaomia ai. I lona laualuga, e foliga mai o lenei mataupu faavae e ono feteenai ma aoaoga a le Faaola e faapea: “O mea uma foi tou te loto i ai ia faia e tagata ia te outou ia faapea lava ona outou faia ia te i latou” (Mataio 7:12). I le avea ai ma se tagata faipisinisi, e faapefea ona e faaleleia nei mataupu faavae?
Faitau:
Ao e galue e fausia se faataamilosaga lelei o au tupe faaaoga mo lau pisinisi, e taua le galue ma le faamaoni. Tuu atu taumafaiga e malamalama ai i tuutuuga o tupe totogi mo au oloa gaosi. Ia atamai e faatulaga auala e fai ai tupe totogi. Galue ia fausia tuutuuga e lelei mo lau pisinisi. A maea ona faia au auala mo tupe totogi, ia fesootai malamalama atu ou faamoemoega ma tausia lelei ou tautinoga uma.
4 . Mataalia i le Puleaina o A’u Tupe Faaaoga
Faitau:
E le lava ona siaki faavaitaimi lau teugatupe o lau pisinisi i le faletupe ma faamoemoe o lo o fetaui faamaumauga uma. E manaomia ona e mataala e pulea tupe faaaoga a lau pisinisi.
I le avea ai ma tagata faipisinisi faamanuiaina, e ao ona e iloa pe fia se tupe o lau pisinisi o lo o iai mo so o se taimi. Aua nei faalagolago i faamatalaga mai le faletupe e pulea ai au tupe faaaoga. O le paleni o au teugatupe e masani ona le faailoaina mai tupe totogi o lo o faagasolo, e pei o le totogi e tuuina atu i kamupani o lo o sapalaia au oloa gaosi po o tupe maua mai tagata faatau.
E manaomia ona e fatuina ma faaauau pea ona faailoa mai tupe faaaoga fuafuaina fou. E pei ona faamatala atu muamua, o tupe faaaoga o le taimi ma le aofai o tinoitupe o lo o tafe mai i totonu ma fafo atu o lau pisinisi i se vaitaimi faatulagaina faapitoa. E ao i lau fuafuaga ona faailoa mai au tupe faaaoga faatulagaina mo ni nai masina o i luma. O lau fuafuaga o le a le 100 pasene lona sao, ae e taua lou faaauau pea ona faia o ni tala faatatau faautauta mo au tupe maua faalemasina, tupe faaalu fesuisuiai, ma tupe faaalu faatulagaina.
O tupe faaaoga lelei e le na ona tupu mo se pisinisi. E ausia lea e ala i le galue malosi ma le fuafua faaeteete. Afai e te iloa le tulaga o au tupe i le taimi nei ma le faataamilosaga o tupe faaaoga i le lumanai, e mafai ona e faia faaiuga o le a fesoasoani i lau pisinisi e manuia ma ola ai. O tagata faipisinisi faamanuiaina latou te tausia tupe faaagaaga mo mea e faaalu ai sa le i fuafuaina ma e masani ona faatulagaina punaoa o aitalafu e faalagolago i manaoga o a latou tupe faaaoga faamoemoeina.