“Sailiina o Tagata Faatau,” Amataina ma le Faaolaina o La’u Pisinisi mo le Ola Tutoatasi mo le Ola Tutoatasi (2017)
“Sailiina o Tagata Faatau”
Aoao
Taimi Atoa: 65 minute
1. O Le Taua o Tagata Faatau
Faitau:
O tagata faatau e tatau ona taulai iai lau pisinisi. O lo latou aafiaga ma lau pisinisi o le a faalagolago tele i ai lona manuia. Faaogatotonu tulaga uma o lau pisinisi i le faamalieina o o latou manaoga. E te manao ina ia faagaeetiaina i latou i aafiaga latou te maua ma lau pisinisi
2 . O Ai La’u Tagata Faatau?
Faitau:
I le avea ai ma pule o se pisinisi, e ao ona e taulimaina se malamalamaaga auiliili i ituaiga o tagata, vaega, po o faalapotopotoga latou te fiafia e faatau au auaunaga po o mea gaosi. O le tele o lou malamalama i ou tagata faatau, o le tele foi lea ona patino faapitoa o savali, aafiaga, ma le lagolago e mafai ona fai mo i latou. O nisi o mea e fesoasoani e te silafia ai tagata faatau manaomia e aofia ai:
-
Faamaumauga: tausaga, ituaiga (alii po o le tamaitai), faaipoipo pe nofo fua, galuega, tupe maua
-
Faalapotopotoga: malo pe tumaoti, tomai faapitoa, faleoloa siiatoa pe o pisinisi laiti
-
Itulagi: nofoaga, aofai o tagata
-
Tagata: amioga, soifuaga, mea e fiafia iai, uiga, manatu
-
Aga: agafaatau, faamaoni i le ituaiga, sailia faamanuiaga
3 . Faamatalaina o le Savali a La’u Pisinisi
Faitau:
Pe a maea ona e faailoa mai tagata faatau o taulai iai, e taua le fesootai ma i latou i le mafuaaga e ao ona latou fiafia ai i le auaunaga po o le oloa gaosi ua ofoina atu e lau pisinisi. Ina ia fesoasoani e fesootai atu lenei mea, fatu se savali faapisinisi puupuu e vave ona faasalalau ma faaalia ai le tulaga ese o mea o lo o ofoina atu e lau pisinisi. E ao ona aofia ai ni vaega se tolu:
-
O le igoa o lau pisinisi.
-
O le auaunaga po o se oloa gaosi.
-
Mafuaaga e tulaga ese ai pe sili atu foi lau auaunaga ma oloa gaosi. (Tagai i lau Fuafuaga o se Pisinisi Patino ma toe iloilo le mafuaaga e tulagaese pe sili atu ai foi lau auaunaga po o se mea gaosi.)
O se faataitaiga lenei o se savali faapisinisi puupuu:
Talofa, o a’u o Terry O lo o ou amataina se pisinisi o le a taua o le Hidden Fields Catering Matou te saunia taumafa maloloina mo faatasiga faapisinisi, aiga, ma isi vaega. Matou te faaaoga na o taumafa fou lava faalenatura ia matou taumafataga. O lo matou famoemoe o le faamalieina o tagata e naunau ia soifua maloloina lelei e manaomia ai taumafataga o fualaau aina ma se aafiaga e le maua ai se faafitauli.”
4 . Filifiliina o Auala Silisili mo Faatauga mo La’u Pisinisi
Faitau:
E taua le sailia o auala silisili ona aoga e fesootai ai i au tagata faatau. E toatele tagata faipisinisi latou te faaaoga faiga eseese o fesootaiga faaletagata ma faatekinolosi e faatau ma fesootai ai ma a latou tagata faatau. Ae ui i lea, e lelei i se tagata faipisinisi fou ona taulai e atiinaeina se auala fesootai e tasi ma se faatekinolosi e tasi ae le sili ae. E mafai ona faaopoopo nisi auala pe a amata ona ola le pisinisi. O auala o fefaatauaiga masani e aofia e o lo o lisi atu i lalo.
Fefaatauaiga i Fesootaiga Faaletagata
-
Faatauga tuusao: O oe po o lau tagata faatauoloa e faatau sao atu i le tagata faatau e ala i fesootaiga faaletagata.
-
Tufaoloa po o faleoloa siiatoa E te faatau atu i se tagata tufaoloa po o se faleoloa siiatoa, o le faataua lau oloa gaosi siiatoa ona latou faatau atu lea i isi pisinisi laiti.
-
Pisinisi laiti: E te faatau atu i pisinisi laiti, ona latou faatau atu lea i tagata faatau.
Auala o Fefaatauaiga Faatekinolosi
-
Uepisaite: Fefaatauaiga fesootai e faaaoga ai lau lava uepisaite.
-
Fefaatauaiga i le Uepisaite: Fefaatauaiga fesootai e faaaoga ai le uepisaite, ae le o lau lava uepisaite.
-
Telefoni feaveai: Fefaatauaiga fesootai e faaaoga ai telefoni feaveai.
5. Faatosinaina o Tagata Faatau i le a?
Faitau:
E le mafai e lau pisinisi ona otometi lona faatosina mai o tagata faatau. E tatau ona e ofoina atu ni mea latou te manaomia ma e latou te talitonu e aoga mo i latou. Ia mautinoa e fesootai le savali a lau pisinisi i mea e ono manaomia e au tagata faatau. Tuu oe lava i tulaga o au tagata faatau ma fesili, “Pe oute fiafia e faatau le auaunaga po o oloa gaosi o lo o ofaina mai e lenei pisinisi? Aisea pe aisea e leai ai?
O faipisinisi atamamai latou te faatupu ni mea e faatosina mai ai le fiafia o a latou tagata faatau. O nisi o auala e faatosina mai ai le fiafia o lo o lisi atu i lalo.
|
Tuuina atu o faamatalaga ma manatu loloto e ala i vitio, itulau i uepisaite, tusi, tala faasalalau, ma faaaliga o fefaatauaiga. |
|
O le faafetaui talafeagai lelei o mea e fiafia iai tagata faatau ma mafuaaga faaletagata, e pei o le lagolagoina o se gaioioiga. |
|
O le faamatuu atu i le tagata faatau e tofo i le auaunaga po o le oloa gaosi i se tau itiiti pe leai foi, e pei o le ofoina atu o ni faataitaiga po o kuponi. |
|
Faamautuina o le talitonuga i le tauleleia o le kamupani ma le maoae o lana auaunaga po o ana oloa gaosi e ala i iloiloga a tagata faatau, faailoga o kamupani, po o isi faamaoniga maoae. |
|
O le tuuina atu o avanoa e faafaigofie ma faasaoina ai le taimi e ala i le faafaigofieina ona maua ma galue ai ma lau pisinisi (mo se faataitaiga, o le faaleleia o auala e saili ai lau pisinisi i luga o uepisaite). |
|
O le galulue soofaatasi lelei ma se pisinisi lauiloa ae le faatauva o lo o auauna i le vaega o tagata faatau e tasi. |
6 . Fuaina o le Lelei o Fesootaiga ma Tagata Faatau
Faitau:
E taua le fua pe o aoga au fesootaiga e faatosina mai ai le fiafia o tagata faatau, e mafua ai ona tele fefaatauaiga, ma faatupulaia ai le polofiti o tupe maua. Ina ia faia o lea, e manaomia ona e fua:
-
Se auala patino faapitoa o lo o e fesootai ai ma au tagata faatau.
-
Po o le a le faaiuga faapisinisi.
Toe iloilo faataitaiga nei.
E le tutusa le pisi ma le manuia lelei. Afai e le o maua ni taunuuga lelei mai auala o lo o e fesootai ai, o lona uiga e le o se faaaogaina lelei lea o lou taimi. O le mea lea e taua ai lou fua pea lava pea o au taunuuga.