“Tuu Eseeseina o Tupe o La’u Pisinisi ma A’u Tupe Patino: Aoao,” Amataina ma le Faaolaina o La’u Pisinisi mo le Ola Tutoatasi (2017)
“Tuu Eseeseina o Tupe o La’u Pisinisi ma A’u Tupe Patino: Aoao”
Aoao
Taimi Aofai: 60 minute
1 . E Fesoasoani i La’u Pisinisi ma Lo’u Aiga
Maimoa:
“O Avanoa i le Olaga? Vaega 1,” o lo o maua i le srs.lds.org/videos (A e a pe a le maua le vitio? Faitau le tusiga o lo o maua i le faaiuga o lenei vaega.)
Talanoa:
E manao Mark e fesoasoani i lona tuafafine, ae e manao foi o ia e faatele lana pisinisi. O le a sou manatu i le mea e tatau ona fai e Mark?
Faitau:
O le vaiaso ua tea na tatou talanoaina ai le taua o le tausia o se faamaumauga i aso uma o a tatou tupe maua ma tupe faaalu. E taua le atiina aeina o lenei mausa i le fausiaina o se pisinisi manuia. E pei o le a faamatala atu e lenei mataupu, o le isi mausa taua o le tausia o tupe o a tatou pisinisi ese mai a tatou tupe patino.
2 . Tuu Eseeseina o Tupe o La’u Pisinisi ma A’u Tupe Patino
Maimoa:
“O Avanoa i le Olaga? Vaega 2,” o lo o maua i le srs.lds.org/videos (A e a pe a le maua le vitio? Faitau le tusiga o lo o maua i le faaiuga o lenei vaega.)
Talanoa:
O a mea tatou te aoao mai i lenei vitio e uiga i le teu eseese o tupe o a tatou pisinisi mai a tatou tupe patino.
Faitau:
Totogi oe lava. A o amata ona maua tupe o lau pisinisi, e manaomia ona e iloa pe faapefea ona totogi oe lava. O le toatele o tagata faipisinisi e amata ona totogi i latou lava i se totogi laiitiiti, e mafai ona faateleina a o ola le pisinisi ma ua mautu le tulaga tautupe.
Teu Eseese teugatupe. O le tupe e te totogiina ai oe lava e tatau ona teu i lau teugatupe patino. O lenei teugatupe e ao ona ese mai lau teugatupe mo lau pisinisi.
Aua le gaoia la oe lava pisinisi. O tagata faipisinisi faamanuiaina latou te le ave tupe mai a latou teugatupe o a latou pisinisi e tuu atu ai fesoasoani tautupe i o latou aiga ma uo.
Maimoa:
“O Avanoa i le Olaga? Vaega 3,” o lo o maua i le srs.lds.org/videos (A e a pe a le maua le vitio? Faitau le tusiga o lo o maua i le faaiuga o lenei vaega.)
Talanoa:
-
E te manatu sa faia e Mark le mea sao? Aisea pe aisea e leai ai?
-
O a mea na e aoao mai e uiga i le faapea atu “leai” o le a fesoasoani ia te oe o se tagata faipisinisi.
Faitau:
E malamalama tagata faipisinisi faamanuiaina i le manaomia ona latou teu tupe ina nei tupu se faafitauli po o se faigata ma fesoasoani ia ola a latou pisinisi. Pe a manatu e fesoasoani i se tasi i le tulaga tautupe, e ao ona tatou faaaoga ma le atamai e iloa ai puipuiga ma tulaga talafeagai. E tatau ona tatou faalagolago i punaoa patino faaagaaga ma aua lava ona faaaogaina tupe o le pisinisi. I lona faatumutumuga, e ao ona tatou mautinoa o la tatou pisinisi o le “fale e maopoopo” (MF&F 88:119).
3 . Totogiina o le Sefuluai mai Lo’u Totogi
Faitau:
Tatou te maua faamanuiaga maoae mai le totogiina o le sefuluai ia tatou tupe maua. Afai tatou te tuu eseese a tatou tupe o le pisinisi ma a tatou tupe patino, o le a faigofie ona fuafua la tatou sefuluai. Manatua nei mataupu faavae:
-
Teu tupe o le pisinisi ma tupe patino i ni teugatupe eseese.
-
Totogi le sefuluai i tupe maua patino (totogi po o komisi) tatou te maua o ni totogi mai le pisinisi.
-
O tupe i totonu o le pisinisi e le faasefuluaiina. E tatau ona e faaaoga lena tupe e totogi ai tupe faaalu mo le pisinisi, totogi, ma avanoa e faaolaina ai le pisinisi.
4 . Teuina Eseese o Faamaumauga
Faitau:
E faaopoopo i le iai o teugatupe eseese mo lau tupe patino ma tupe o le pisinisi, e tatau foi ona teu eseese faamaumauga. E tausia e Mark Bailey faamaumauga o aso taitasi o tupe uma e sau i totonu ma alu i fafo o lana pisinisi. E tausia foi e ia faamaumauga o tupe uma e sau i totonu ma alu i fafo i lona aiga. O nei faamaumauga e taua o tupe maua ma tupe faaalu faamau (mo le faaaogaina i le pisinisi) ma totogi ma tupe faaalu faamau (mo le faaaogaina patino).
Talanoa:
-
O a tulaga o le tuu eseeseina o tupe o le pisinisi ma tupe patino sa fai ma luitau sili?
-
O a ni malamalamaga ua e maua mai tala o tupe maua o pisinisi ma patino?
Faitau:
O tagata faipisinisi faamanuiaina e tausia faamaumauga o aso uma ma faaaoga e fai ai filifiliga atamamai o le pisinisi. E ui o le tele o tagata faipisinisi e le fiafia e tausi faamaumauga, ua fai ma mausa ma se faamuamua aua ua latou iloa o le iai o faamatalaga o tupe maua ma tupe faaalu sao o le a fesoasoani i le manuia ma le ola o a latou pisinisi.
E masani tagata faipisinisi fou ona faaaoga pepa o laina felavasai po o mea faigofie i le initoneti e faatulaga ai a latou faamaumauga. A o olaola lau pisinisi, e talafeagai mo oe ona faaaoga se auala lelei e faamatala ai tupe pe faafaigaluega se tausitusi mo le pisinisi. E ui ina o iai sau meafaigaluega po o se tausitusi e puleaina au faamaumauga o tupe, e tatau ona iai se malamalamaaga auiliili o ia faamaumauga ma faaauau ona iloiloina pea.
O le a tatou galulue malosi i le vaiaso lenei e tuu eseese ai teugatupe ma foia ai le sese masani o le pisi i galuega o le pisinisi ma ua tatou faatamala ai i le tausia lelei o faamaumauga i aso taitasi.