“Faatupeina o La’u Pisinisi: Aoao,” Amataina ma le Faaolaina o La’u Pisinisi mo le Ola Tutoatasi (2017)
“Faatupeina o La’u Pisinisi: Aoao”
Aoao
Taimi Aofai: 5 minute
1 . Pe o ia te A’u se Tinoitupe e Mafai ona Ola Ai?
Faitau:
Ua tatou aoao o tagata faipisinisi faamanuiaina e galulue e fausia se faataamilosaga o tupe faaaoga lelei. E ala i fuafuaga lelei ma le filiga, ua lava ni tupe ua ia i latou e tausia ma faaola ai a latou pisinisi. Latou te iloa lava le tulaga o iai a latou tupe, ma e latou te masani ona faafou a latou fuafuaga mo tupe faaaoga. Latou te “iloa ua faia nei mea uma i le poto ma le faatulagaga lelei” (Mosiah 4:27).
E faaopoopo iai, ua saili e le tele o tagata faipisinisi tupe e tuliloaina ai avanoa e ola ai e faapei o i latou sa tatou aoao ai i le mataupu 9. Afai ua e filifili e saili avanoa e faatupe ai lau pisinisi, e muamua ona e manaomia le iai o se malamalamaaga auiliili o le faaaogaina o tupe, aemaise ai lava tupe o lo o faaaogaina nei pe o lo o faamoemoe e faaaogaina e lau pisinisi. E taua mo oe ia mautinoa ua lava tupe o lau pisinisi e faaauau ai lona faagaoioiga, foia tulaga le maalofia, ma ola e tusa ai ma ou sini faamoemoeina.
2. Faamata e lelei pe leaga le nonotupe?
Faitau:
E eseese aitalafu patino ma aitalafu o le pisinisi. O nonogatupe patino e masani ona faaaoga e sili atu nai lo tatou gafatia e totogi ai. O nonogatupe faapisinisi e faaaoga e gaosi ai le tele o oloa tatou te le gafatia ona gaosi. Ua fautua mai taitai o le Ekalesia ia tatou aloese mai aitalafu patino. E pei ona saunoa Elder Joseph B. Wirthlin: “O nisi aitalafu—e pei o se fale lelei, tupe faaalu mo aoga, ma pe o se taavale muamua o lo o manaomia—atonu e talafeagai. Ae e le tatau ona tatou oo atu i le pologa i mea tautupe e ala i le faia o aitalafu e totogi auaua’i e aunoa ma le iloiloina toto’a o le tau” (Aitalafu Faalelalolagi, Aitalafu Faalelagi,” Ensign po o le Liahona, Me 2004, 41).
Talanoa:
Mafaufau i se tasi e te iloa na fai se nonogatupe e faaaoga mo ia lava. Pe na fesoasoani pe mafatia i latou i le nonogatupe?
Faitau:
E ao ona tatou faaeteete pe a manatu i se aitalafau mo se pisinisi. Ae a taulimaina ma le faautauta, o le nonogatupe fuafua lelei mo pisinisi o se tasi o elemene o le ola lelei” (Teachings of Presidents of the Church: Ezra Taft Benson[2014], 272).
Toetoe o pisinisi uma lava e manaomia tupe faaopoopo, po o tupe e ola ai. O tagata faipisinisi e masani ona maua tupe faaopoopo mai a latou lava teugatupe pe faatupe mai nonogatupe po o vaevaega. Faatupeina mai aitalafu o lona uiga o le faia lea o se aitalafu mo le pisinisi ma toe totogi i le tului. Faatupeina mai vaevaega o lona uiga e maua le tupe ae pule i se vaega o le kamupani.
I nisi o taimi, e maua e tagata faipisinisi tupe faameaalofa mai le malo po o tupe mai isi punaoa. O nei tupe e masani ona le toe totogiina atu.
3 . Faatupeina Eseese mo La’u Pisinisi
Faitau:
O faipisinisi faamanuiaina e mafaufau loloto ma faatutupu ni mea e fai ai suegatupe e manaomia e faaola ai a latou pisinisi. E tele ni auala e maua ai tupe e te manaomia. O le mataupu lenei e vaevae ai nei mea i ni vaega se tolu. Vaega 1 e muamua ona vaavaai ai i tupe e masani ona faaaoga, e pei o au lava teugatupe. Vaega 2 e sailiili ai punaoa o nonogatupe eseese. Vaega 3 e auiliili ai nonogatupe e le taatele ae atonu e talafeagai mo nisi o le aufaipisinisi,
Vaega 1: Faatupeina i Punaoa Masani
Faitau:
O le tele o le aufaipisinisi e muai faatupe le ola o a latou pisinisi e ala i le faalagolago ia latou lava teugatupe, pe faia o le galuega e i latou lava ae le faalagolago i fesoasoani ma fafo, ma le faia o nonogatupe po o tupe faafaigaluega mai tagata o le aiga vavalalata po o uo. O nei avanoa filifilia e mafai ai ona latou faia ai faaiuga vave ma fetuunai ai le puleaina o le ola o a latou pisinisi.
Vaega 2: Punaoa mo le Faatupeina o Aitalafu
Faitau:
E faaopoopo i le faaaogaina o punaoa patino a le tagata lava ia e faatupe ai, o le toatele o tagata faipisinisi latou te saili tupe e ala i nonogatupe, po o le aitalafu. O fesili o mulimuli mai e mafai ona fesoasoani e taialaina ai faaiuga e fai ai ni aitalafu:
-
Pe o o’u nonotupe mo le faaolaina o la’u pisinisi, ae le mo ni mafuaaga patino?
-
Pe o o’u nonotupe e lagolago ai le pisinisi ua le gafataulimaina?
-
Pe ua sao le taimi e tauave ai lenei tulaga le mautinoa?
-
Pe oute talia tuutuuga o le nonogatupe o le a ou maua?
-
Pe o sao le aofai o le tupe o lo o o’u nono mai?
-
Pe mafai ona ou toe totogi le aitalafu ma faaauau pea le faagaoioiga o la’u pisinisi i ni tulaga lamatia itiiti ma maua ni tupe lelei?
Talanoa:
Vaaifaalemafaufau e faapea, ua e manatu e aitalafu ni tupe mo lau pisinisi. I le avea ai o se vaega, talanoa pe faapefea e fesili taitasi muamua ona fesoasoani ia te oe i lenei faaiuga.
Faitau:
O kata talatupe faaaitalafu o le punaoa sili ona masani ona faaaogaina mo aitalafu, ae maualuga le tupe tului. O le laina o aitalafu o se filifiliga fetuutuunai e mafai ai e le tagata faipisinisi ona pulea le lugā ma le lalō o manaoga o le faaaogaina o tupe. O lo o maua foi nonogatupe mai faletupe, nonogatupe laiti, ma nonogatupe a le tasi mai le isi ma ofoina atu ni tulaga lelei se tele, ae masani ona manaomia ai se faagasologa o se talosaga faigata.
Vaega 3: Punaoa o Nonogatupe e le Tupu Soo
Faitau:
E mafai e tagata faipisinisi ona saili isi avanoa faatulaga o nonogatupe, e pei ona faaalia i le siata lenei: O nei avanoa faatulagaina e fuafua i le ituaiga alamanuia ma le avanoa o pisinisi. E le masani ai mo le toatele o tagata faipisinisi laiti.
4 . Suesueina o Faatupega Eseese
Faitau:
O le sailia o punaoa o nonogatupe silisili mo lau pisinisi e manaomia ai le taumafai pea. O punaoa mo nonogatupe e eseese e fuafua i nofoaga, o lea e taua ai le talanoa ma tagata e te faatuatuaina i lau fesootaiga faaletagata ma le nuu, O punaoa i luga o le initoneti, malo, ma le nuu o le a le taumate ona fesoasoani ia te oe i lau sailiiliga
Talanoa:
-
O a faalapotopotoga o le lotoifale po o le atunuu e mafai ona maua mai ai fautuaga po o punaoa mo le faatupeina o pisinisi?
-
O a punaoa i le initoneti e ono maua mai ai fautuaga mo le faatupeina o se pisinisi?
5 . Fesootaiga Amiotonu i Mea Tautupe
Faitau:
Fai mai le mataupu faavae o le faatuatua e sefulutolu, “Matou te talitonu ia faamaoni.” O fesootaiga o mea tautupe e faalagolago i le faatuatuaina ma le faamaoni patino. O le amio ai ma le faamaoni o lona uiga o le faatumulia lea o a tatou feagaiga ma taofia ni faiga faagutugutulua,
Afai tatou te aitalafu tupe, ia mautinoa ua tatou toe totogi atu. E pei ona faamanatu mai e le Alii i le Mataupu Faavae ma Feagaiga, “Afai e te nonō mai i lē lua te tuaoi, ia e toe faafoi atu le mea na e nonō “ (MF 136:25).
Afai tatou te maua tupe mo a tatou pisinisi i se nonogatupe, mai tagata o faafaigaluega a latou tupe, pe mai se tupe faameaalofa, e ao ona tatou faaaoga lena tupe i le faamoemoe ua tuuina mai ai, ae le mo se isi mea. Afai e tuuina mai e tagata taitoatasi po o faalapotopotoga tupe mo a tatou pisinisi, e ao ona latou faatuatuaina o le a tatou faamamaluina la tatou maliega.
Ua fautuaina i tatou e taumamao ma le faia o fuafuaga tatou te le malamalama iai, e foliga e lelei sili lona moni, e maua ai le feteenaiga o mea manaomia, pe fesiligia ai foi lo tatou faamaoni po o tulaga faaletulafono.
Talanoa:
O le a se mea ua e aoaoina e uiga i le faamaoni i tulaga tautupe ma le taofia o faiga faagutugutulua?