Faasilasilaina atu o La’u Pisinisi: Aoao,” Amataina ma le Faaolaina o La’u Pisinisi mo le Ola Tutoatasi (2017)
“Faasilasilaina atu o La’u Pisinisi: Aoao”
Aoao
Taimi Aofai: 105 minute
1 . Faaauauina pea o La’u Vaega o le Ola Tutoatasi
Pe a uma le kosi o le Amataina ma le Faaolaina o La’u Pisinisi mo le Ola Tutoatasi, e filifili e nisi o vaega ona faaauau ona fono faatasi ae le faia soo. Ua latou iloa le taua o le aoao faatasi pea lava pea, lagolagoina o le tasi ma le isi i le faaolaina o a latou pisinisi, ma galulue e foia luitau.
Afai tou te mananao e faaauau ona fono, filifili se taitai o le vaega ma faaatulaga se faasologa o fonotaga. E le manaomia i le tagata e faagaioia o lo o iai nei ona fai ma taitai o le vaega. E fesootai le taitai ma le vaega ma galue ina ia mautinoa ua faatulaga lelei fonotaga ma fesoasoani ai i tagata taitasi. E ao i le taitai ona fuafua mataupu ma fausia se faatulagaga mo fonotaga taitasi e faalagolago i finagalo faaalia o le vaega. O le faagasologa o mataupu e ono aofia ai gaoioiga e pei o le faalogologo i se lauga faapitoa, talanoaina o se tusi tau pisinisi ua uma ona faitau e le vaega, po o le galulue faatasi e atiiae tomai faapisinisi.
O nisi o vaega latou te faatulaga tesi faalevaega ina ia latou fesootai ai pea lava pea. Latou te ofaina atu faamalosiau, fefaasoaai tala o nusipepa, vitio, ma isi mataupu; ma fautua mai konekarate faapisinisi ma punaoa. Ina ia faafaigofie aafiaga o fesootaiga faaopoopo, atonu e te manao e taupule ma le tagata faapitoa o le ola tutoatasi a le siteki. e fai se fonotaga mo tagata o lau vaega ma isi i le siteki ua faamaeaina le kosi.
Pe e te manao e faaauau ona fono o se vaega? Afai o lea, talanoa pe faapefea ona outou mananao e fesootai e lagolago le isi i le faaolaina o a outou pisinisi.
2. O Lo’u Auala i le Ola Tutoatasi
I le taimi o le 12 vaiaso ua e atiina ae ni mausa fou ma ola tutoatasi atili. E finagalo le Alii ia faaauau ona e atiina ae i luga o nei tomai ma atiina ae ni tomai fou. A o e tatalo ma faalogo, e mafai ona fesoasoani le Agaga Paia ia te oe e iloa po o a mea i o outou olaga e manaomia ona outou faaleleia.
O a ni suiga ua e iloa i lou olaga i le 12 vaiaso a o e auai i fonotaga faalevaega, tausia tautinoga, ma galue e avea ma tagata e ola faalagolago ia te ia lava.
E tele lava ni auala e faaauau ai ona e galue ina ia avea ma tagata e ola tutoatasi. E mafai ona e faia.
Suesue ma faaauau pea ona ola i mataupu faavae uma e 12 o Lo’u Faavae ma mausa o le ola tutoatasi.
Faaauau ona fesoasoani i tagata o lau vaega.
Faasoa atu mea na e aoaoina ma lau molimau i le ola tutoatasi ma isi i le lotu ma i lou nuu.
Avea ma tagata e faagaoioia mo le vaega fou o le ola tutoatasi.
Atiina ae i luga o ou tomai e ala i le auai i se isi vaega o le ola tutoatasi.
Suesue mataupu faavae o le atamai o le ola tutoatasi o loo i lalo.
O Aoaoga Faavae o le Ola Tutoatasi
O Le Ola Tutoatasi O se Poloaiga
O Le Faamoemoega a le Alii ina Ia Tuuina Atu Mea mo Lana Au Paia, ma e Ia te Ia le Mana Uma e Faia Ai
O Le Faaletino ma le Faaleagaga e Tasi Lava
Mataupu Faavae ma Feagaiga 78:13–14; Mose 2:27–28
Mataupu Faavae ma Feagaiga 104:15; Ioane 10:10; Mataio 28:18; Kolose 2:6–10
Mataupu Faavae ma Feagaiga 29:34; Alema 34:20–25
Taitasi ma tusi au tali i fesili nei: O a ni faatinoga oute mafai ona fai i vaiaso o lumanai e fesoasoani ai ia te au lava ma lou aiga ina ia avea ma tagata ola tutoatasi.
Fatu se Faamatalaga
A o faaauau pea lou ala agai atu i le ola tutoatasi, manatua le fautuaga mai ia Elder Marvin J. Ashton: “E popole alofa le Alii ia i tatou ua ia tuuina mai ai ia i tatou taitaiga ia tatou auauna atu ai faapea ma le avanoa e atiina ae ai le agaga o le faalagolago o le tagata ia te ia lava. O Ana mataupu faavae e tumau ma e le suia lava” (“Give with Wisdom That They May Receive with Dignity,” Ensign , Nov. 1981, 91 ).
Na lapatai mai le perofeta o Nifae: “Ma o lenei, oʼu uso pele e, pe a uma ona outou i ai i lenei ala … ou te fesili atu pe ua uma ona faia o mea uma? Faauta, ou te fai atu ia te outou, E leai; ona tou te lē oo mai iinei pe a na lē seanoa le afioga a Keriso faatasi ma le faatuatua lē mafaagaeetia ia te ia, ma le faalagolago atoa i galuega a ia o lē ua malosi aoao e laveai. … Ia outou fetaomi atu i luma ma le tumau ia Keriso.” (2 Nifae 31:19-20 ).
3. Faailoaina Atu o La’u Pisinisi
Faamatalaga i le tagata faagaoioi: Afai e te lei faia o lea, faailoa atu le auvalaaulia o le a tuuina mai manatu faaalia i le taimi e faailoa atu ai lau pisinisi.
O le tasi o a tatou ki o tomai faapisinisi o le faatau atu. O tagata faipisinisi faamanuiaina e talanoa ia i latou e ono avea ma tagata faatau i aso taitasi -- e aloaia pe le aloaia --e faasoa atu ai le savali a a latou pisinisi, ma maua mai manatu faaalia, ma mulimuli ane ua maua ai ni faatauga. O le aso o le a tatou tuuina atu ai folasaga o pisinisi i tagata o a tatou vaega ma le auvalaaulia ua faatasi ma i tatou.
O le faamoemoega o le folasaga o le pisinisi o le fesootai manino atu lea o le taua o mea lo o ofoina atu e lau pisinisi. O le tagata faagaoioi, valaaulia, ma tagata o le vaega latou te le iloiloina ou tomai i le tuuina atu o lau folasaga, ae latou te tuuina mai manatu e atiina ae ma faaleleia ai vaega eseese o lau pisinisi. I le agai ai i luma, e le taumate o le a iai ni ou avanoa faaopoopo e uunaia ai lau pisinisi a o e faatau atu, fausia sootaga, faatosina mai o paaga po o tagata e faafaigaluega a latou tupe, pe saili ai avanoa e faatupe ai.
O lau folasaga e tatau ona aofia ai faamatalaga e uiga:
O manaoga e le i faamalieina o tagata faatau o le a e talanoaina.
O le auaunaga po o le oloa gaosi o le a e ofoina atu.
O lou avanoa faatauva - o mea faapitoa e te tulaga ese ai mai isi.
O tagata faatau o faamoemoe iai.
O lau fuafuaga e maua mai ai tagata faatau.
O punaoa o le a e manaomia mo lau pisinisi.
Faamaoniga o lau pisinisi o le a maua ai tupe.
O le isi laasaga o le a e faia e faagasolo ai i luma lau pisinisi.
E ao ona tuuina atu folasaga e tusa ai ma taiala nei.
A o lei faia le Folasaga
Ata
aikona o le fagu malamalama e iloa ai le taimi
Tofi se tagata e vaaia le taimi.
I le Faagasologa o Folasaga taitasi
E tatau ona lima minute pe itiiti ifo o le folasaga.
O le tagata faagaoioi ma valaaulia e faatumu le fomu o manatu faaalia mai le folasaga (tagai i le vaega o le “Tautino” i le mataupu 12).
Pe a Uma Folasaga Taitasi
O le tagata faagaoioi ma valaaulia e faaalu le lima minute e fesili ma tuuina atu ai manatu faaalia. Afai e iai se taimi, e mafai foi ona auai tagata o le vaega
E tuuina atu e le tagata faagaoioi ma valaaulia fomu faatumu o manatu faaalia mai le folasaga i le o lo o faia le folasaga.