O Lo’u Faavae: Fesootai: Talosaga ma Faalogo

Taimi Aofai: 20 minute

Mafaufau loloto:

O le a se taimi na tali mai ai e le Tama Faalelagi a’u tatalo?

Maimoa:

“Fatuina o se Siitiaina,” o loo maua i le srs.lds.org/videos (A e a pe a le maua le vitio? Faitau le tusiga o lo o maua i le faaiuga o lenei vaega.)

Talanoa:

E mafai faapefea ona tatou iloaina tali i a tatou tatalo? Aisea e avea ai le faalogo ma se vaega taua o le tatalo?

Faitau:

Mataupu Faavae ma Feagaiga 8:2 ma le upusii mai ia Peresitene Russell M. Nelson.

Mataupu Faavae ma Feaigaiga 8:2

“O le a ou tau atu ia te oe i lou mafaufau ma lou loto e ala i le Agaga Paia, lea o le a oo atu i ou luga ma lea o le a mau i lou loto.”

Peresitene Russell M. Nelson

“O le a faamanuiaina o outou agaga pe a outou faalogo, ona faalogo lea e a’oa’o mai fanau, matua, soa, tuaoi, ma taitai o le Ekalesia, e faateleina ai le malosi e faalogo i fautuaga mai luga.”

“Faalogo ina ia Aoao,” Ensign, Me 1991, 24

Talanoa:

Aisea e avea ai le faalogo o se tomai taua? E mafai faapefea e le faalogo ma le faaeteete ona fesoasoani ia i tatou i a tatou galuega?

Gaoioiga: (5 minute)

Laasaga 1: I le avea ai o se vaega, faitau laasaga i le pusa o i lalo ma talanoa puupuu le ala e fai ai oe ma tagata faalogo lelei.

Laasaga mo le faalogo lelei

Laasaga 2: Ia fai atu i ni tagata se tasi pe lua o le vaega e tau atu i isi e uiga i se luitau po o se fesili o i ai. E tatau ona taumafai isi tagata uma e faalogo, ma mulimuli i nei laasaga.

Laasaga 3: A uma, ona fesili atu lea i tagata o le vaega na saunoa pe na faapei o latou lagona ina ua taumafai lava le vaega e faalogo.

Faitau:

Faitau upusii mai ia Peresitene Henry B. Eyring ma Elder Robert D. Hales.

Peresitene Henry B. Eyring

“E faafofoga lo tatou Tama Faalelagi i tatalo a Lana fanau i le lalolagi atoa o loo augani atu mo mea e aai ai, o lavalava e ufiufi ai o latou tino, ma le mamalu o le a oo mai ona ua mafai ona tausia i latou lava.”

“O Avanoa e Fai Ai Mea Lelei,” Ensign po o le Liahona, Me 2011, 22

Elder Robert D. Hales

“E tatau ona tatou ole atu mo se fesoasoani mai lo tatou Tama Faalelagi ma saili le malosi e ala i le Togiola a Lona Alo o Iesu Keriso. I mea uma faaletino ma faaleagaga, e mafai e [lenei] ona avea i tatou ma e e tuuina atu ma le faautauta mea e manaomia e i tatou lava faapea ma isi.”

“Avea ma E Tuuina Atu ma le Faautauta Mea e Manaomia Faaletino ma le Faaleagaga,” Ensign po o le Liahona, Me 2009, 7–8

Tautino:

Tautino atu e faia faatinoga nei i le faagasologa o le vaiaso.

• Tatalo taitoatasi ma o se aiga i taeao taitasi ma i le po. Faaalu le taimi pe a maea tatalo taitasi e faalogo ai ma le migao mo le taitaiga.

• Faasoa atu mea na e aoaoina i le aso e uiga i le fesootaiga ma lou aiga po o uo.

Fatuina o le Siitiaina

Afai e le mafai ona e matamata i le vitio, filifili se tasi o le vaega e faitau le tusiga lenei.

Aoga mo se Olaga Sili Atu

Peresitene Dieter F. Uchtdorf: Ina ia mafai ona aluese se vaalele mai le eleele, e tatau ona e fatuina se tulaga e masii i luga. I aoaoga i mea tau feoaiga i le ea, e tupu le masii i luga pe a pasi ae le ea i luga ae o apaapa o se vaalele i se auala o le a avea ai le ea i lalo ifo o le apaapa e malosi atu nai lo le savili i luga ae o apaapa. A sili atu le malosi o le uuna’i i luga e le savili nai lo le malosi o le toso i lalo e le kalave, ona masii lea i luga o le vaalele mai le laueleele ma mafai ai ona lele.

I se auala e talitutusa lava, e mafai ona tatou faia ni mea e sii ai i luga i o tatou olaga faaleagaga. Afai e malosi atu le malosiaga lea e tuleiina i tatou agai i le lagi nai lo faaosoosoga ma faanoanoaga lea e tosoina i tatou i lalo, o le a mafai ona tatou o a’e ma felelei atu i le malo o le Agaga.

E ui i le tele o mataupu faavae o le talalelei e fesoasoani ia i tatou i le mauaina o le masii i luga, ae ou te fia taulai faapitoa atu i se mataupu faavae e tasi.

Tatalo!

O le tatalo o se tasi lea o mataupu faavae o le talalelei e maua ai lena masii i luga. O le tatalo ua i ai le mana e siitia ai i tatou mai o tatou popolega faalelalolagi. E mafai e le tatalo ona sii ae ai i tatou mai ao o le faanoanoa po o le pogisa ma avatu ai i se tafailagi susulu ma le manino.

O se tasi o faamanuiaga aupito maoae ma avanoa ua tatou maua o ni fanau a lo tatou Tama Faalelagi o le mafai lea ona tatou fesootai ma Ia e ala i le tatalo. E mafai ona tatou talanoa ma Ia e uiga i mea e tutupu i o tatou olaga, tofotofoga, ma faamanuiaga. E mafai ona tatou faalogo atu ma maua le taitaiga faaselesitila mai le Agaga Paia i soo se taimi ma i soo se nofoaga.

(Tagai Dieter F. Uchtdorf, “Tatalo ma le Tafailagi Lanumoana,” Ensign po o le Liahona, Iuni 2009, 5–6)